ၵူၼ်းႁဵတ်းၼႂ်းႁူင်းၵၢၼ်ၶႃႈသတ်း မိူင်းၵျိူဝ်ႊမၼီႊ ၸပ်းတၢင်းပဵၼ်ၶူဝ်ႊဝိတ်ႉ 19 ႁဵင်ပၢႆ၊ ၾၢႆႇၽွင်းငမ်းမႆႈၸႂ် ၸိူဝ်ႉမႅင်းတၢင်းပဵၼ်ၸၢင်ႈလၢမ်းၽႄႈႁၢဝ်ႈႁႅင်း။
မိူဝ်ႈဝၼ်းတီႈ 22/06/2020 ယူႇတီႈလူင်ပွင်ၸိုင်ႈမိူင်းၵျိူဝ်ႊမၼီႊ ႁၢႆးငၢၼ်းဝႃႈ- တေႃႇထိုင်ယၢမ်း ဝၢႆးဝၼ်း ၶွင်ဝၼ်းတီႈ 21/06/2020 ၼၼ်ႉ ၵူတ်ႇထတ်းႁၼ်မႅၼ်ႈ ၵူၼ်းၸပ်းၸိူဝ်ႉမႅင်းတၢင်းပဵၼ် ၶူဝ်ႊဝိတ်ႉ 19 တီႈႁူင်းၶႃႈသတ်းၶွင်ၶွမ်ႊပၼီႊ ထိူၼ်ႊၼီႊသ် (Toennies) ၊ ၼႂ်းၶဵတ်ႇၵွႆႊထိူဝ်ႊသလူဝ်ႊ (Guetersloh) ၸႄႈမိူင်းရတ်ႉၼွတ်ႊရႆႊ ဝဵသ်ႉၾႃႊလဵၼ်ႊ (NRW) တင်းမူတ်း 1,331 ၵေႃႉ-ၼႆယဝ်ႉ။
ၵဵဝ်ႇၵပ်းလွင်ႈၼႆႉ ၸဝ်ႈၼႃႈတီႈၾၢႆႇၽွင်းငမ်း ၶဵတ်ႇၵွႆႊထိူဝ်ႊသလူဝ်ႊ လၢတ်ႈဝႃႈ- မီးၵၢၼ်ၵူတ်ႇထတ်းၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 တီႈၵူၼ်းႁဵတ်းၵၢၼ်တင်းမူတ်း 6,139 ၵေႃႉ၊ ၼႂ်းၼၼ်ႉၵူတ်ႇထတ်းယဝ်ႉတူဝ်ႈလီငၢမ်းတႃႇ 5,889 ၵေႃႉသေ ထူပ်းႁၼ်မႅၼ်ႈၵူၼ်းပဵၼ် Positive တင်းမူတ်း 1,331 ၵေႃႉ။ ၼွၵ်ႈသေၼၼ်ႉ ၵူၼ်းႁဵတ်းၵၢၼ်ၼႂ်းၶွမ်ႊပၼီႊၼႆႉ တႃႇ 5 ၵေႃႉၵေႃႈ ၸပ်းၸိူဝ်ႉမႅင်းတၢင်းပဵၼ်သေ တိုၵ်ႉယူတ်းယႃတူဝ်ယူႇဝႆႉတီႈ ၼႂ်းႁွင်ႈၵူၼ်းပဵၼ်ၵိၼ်းၼၼ်ႉ- ၼႆယဝ်ႉ။
မိူဝ်ႈဝၼ်းတီႈ 21/06/2020 ၼၼ်ႉ ယူႇတီႈဢႃႊမိၼ်း လၢသ်ႉၶျဵတ်ႉ (Armin Laschet) ၽွင်းလူင် ၸႄႈမိူင်းရတ်ႉၼွတ်ႊရႆႊ ဝဵသ်ႉၾႃႊလဵၼ်ႊ ၵၢဝ်ႇလၢတ်ႈဝႃႈ- “ၸိူဝ်ႉမႅင်းတၢင်းပဵၼ်ၼႆႉ မီးတိုဝ်ႉတၢင်း ၸၢင်ႈလၢမ်းၽႄႈႁၢဝ်ႈႁႅင်း”-ဝႃႈၼႆ။ ၸိူင်ႉႁိုဝ်ၵေႃႈယဝ်ႉ တေၶတ်းၸႂ်ၵုမ်းၵမ်ၼႂ်းၶွမ်ႊပၼီႊႁႂ်ႈလႆႈ ပိူဝ်ႈတႃႇယႃႇႁႂ်ႈၸိူဝ်ႉမႅင်းလွတ်ႈဢွၵ်ႇတၢင်းၼွၵ်ႈသေ လၢမ်းၽႄႈၵႂႃႇထိုင်ၵူၼ်းၼႂ်းပိုၼ်ႉတီႈ တူင်ႇတၢင်ႇ ပွတ်းတွၼ်ႈၼၼ်ႉ- ၼႆယဝ်ႉ။
ၸွမ်းၼင်ႇႁွင်ႈၵၢၼ်ၾၢႆႇၵုမ်းၵမ်တၢင်းပဵၼ်မိူင်းၵျိူဝ်ႊမၼီႊ ၵဵပ်းသဵၼ်ႈမၢႆဝႆႉၼၼ်ႉ မိူဝ်ႈၵျုၼ်ႊ 21 ဝၼ်းၼၼ်ႉ တီႈမိူင်းၵျူဝ်ႊမၼီႊၼႆႉ မီးၵူၼ်းၸပ်းၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 ယဝ်ႉ 189,822 ၵေႃႉ၊ မီးၵူၼ်းလူႉတၢႆယဝ်ႉတင်းမူတ်း 8,882 ၵေႃႉ-ၼႆယဝ်ႉ။
ဝၼ်းမိူဝ်ႈၼႆႉ (23/6/2020) တူဝ်ႈလူၵ်ႈ ၵူၼ်းတိတ်းၸပ်းၸိူဝ်ႉမႅင်းတၢင်းပဵၼ် ၶူဝ်ႊဝိတ်ႉ 19 မီး 9,204,629 ၵေႃႉ၊ တိုၵ်ႉယူတ်းယႃတူဝ် 3,778,885 ၵေႃႉ၊ ႁၢႆၶႅၼ်း 4,939,422 ၵေႃႉ၊ လူႉတၢႆၵႂႃႇ 474,445 ၵေႃႉ။ ၸိုင်ႈမိူင်းဢၼ် ၵူၼ်းမိူင်းတိတ်းၸပ်းၼမ်သုတ်းထီႉၼိုင်ႈ ပဵၼ်ဢမေႊရိၵႃႊ။ ထီႉ 2 ပဵၼ်မိူင်းပရႃႇၸီး။ ထီႉ 3 ပဵၼ်ရတ်ႉသျိူဝ်ႊ။
ၼႂ်းမိူင်းႁူမ်ႈတုမ်မျႅၼ်ႇမႃႇၼႆႉ ၵူၼ်းတိတ်းၸပ်းတၢင်းပဵၼ်မီး 292 ၵေႃႉ၊ ယူတ်းယႃ 85 ၵေႃႉ၊ ယႃၶႅၼ်း 200 ၵေႃႉလႄႈ လူႉတၢႆ 6 ၵေႃႉ။
ၼႂ်းမိူင်းတႆး မီး 2 ၵေႃႉ တိုၵ်ႉယူတ်းယႃတူဝ်ဝႆႉတီႈမူႇၸေႊ ၵေႃႉၼိုင်ႈလႄႈ တီႈႁူင်းယႃ ၸဝ်ႈၸၢမ်ႇထုၼ်း ဝဵင်းလူင်တူၼ်ႈတီး ၵေႃႉၼိုင်ႈ။ တေႃႇထိုင် မိူဝ်ႈဝၼ်းတီႈ 18/6/2020 ၵူၼ်းမိူင်းတႆးပွတ်းၸၢၼ်းလၢႆၸႄႈဝဵင်းၵေႃႈ ဢၼ်သူင်ႇၼမ်ႉမုၵ်ႈၼမ်ႉလၢႆး ၵူတ်ႇထတ်းဝႆႉ တီႈတႃႈၵုင်ႈသေ ပႂ်ႉၵႂၢမ်းတွပ်ႇဝႆႉၼၼ်ႉ မီး 800 ပၢႆ -ၼႆယဝ်ႉ။
(ဢိင်ၶေႃႈမုလ်းၶၢဝ်ႇထႆး www.sanook.com)
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ