EAO ၸုမ်းၸၢဝ်းၶိူဝ်းလူင်းလၢႆးမိုဝ်းၵိုတ်းတိုၵ်း 10 ၸုမ်းလႄႈ ၸုမ်းငမ်းယဵၼ်လူင်ပွင်ၸိုင်ႈ NRPC ႁူပ်ႉထူပ်း ဢုပ်ႇဢူဝ်း တူၵ်းလူင်းၵၼ်ပႃးၸဵမ်တႃႇၸတ်းပၢင်ၵုမ်လူင်ပၢင်လူင်။
မိူဝ်ႈဝႃးဝၼ်းတီႈ 22/6/2020 ပၢင်ၵုမ်ၸတ်းတီႈ လုမ်း NRPC ဢၼ်မီးတီႈ သဵၼ်ႈတၢင်း သူၺ်ႇလီႇ ဝဵင်းတႃႈၵုင်ႈ ။
ၾၢႆႇ NRPC မီး ၵႅမ်ႁူဝ်ပဝ်ႈ ငဝ်ႈငုၼ်းလွင်ႈငမ်းယဵၼ်လႄႈ လွင်ႈၸမ်ၸႂ်ၸိူဝ်ႉၸၢတ်ႈ NRPC ၸွမ်ၽူႈတၢင်လၢတ်ႈမိူင်းႁူမ်ႈတုမ် ဢူးထုၼ်းထုၼ်းဢူး ဢွၼ်ႁူဝ်၊ ၸွမ်သိုၵ်းယႃႇပျေႉ ၸွမ်သိုၵ်းမိၼ်းၼွင်ႇ ၸွမ်သိုၵ်းတိၼ်ႇမွင်ႇဝိၼ်း ၊ ၽွင်းတႅၼ်းသၽႃးၵူၼ်းမိူင်း ဢူးပျူင်းၶဵဝ်ႇ၊ ၽူႈၵိူဝ်းၵုမ် ၶွမ်ႊမသျိၼ်ႊ ဢူးလႃႉမွင်ႇသူၺ်ႇ၊ ဢူးမူဝ်းၸေႃႇဢူး၊ ၽူႈၸိသင်ႇ လုမ်းၽွင်းလူင်ၽူႈၵိူဝ်းၵုမ် ဢူးၸေႃႇထေး ၶဝ်ၶဝ်ႈႁူမ်ႈ။
ၾၢႆႇတၢင်း ၸုမ်းၸၢဝ်းၶိူဝ်ႊ EAO တႄႉ ႁူဝ်ၼႃႈၸုမ်းငူပ်ႉငိၵဵဝ်ႇၵပ်းၵၢၼ်ၵိုတ်းတိုၵ်း ပတူဝ်ႊၸေႃးသႄးၵေး ၊ ၽူႈငူပ်ႉငိ ၸၢႆးလႅင်း၊ ၽူႈၶဝ်ႈၸုမ်း ၸဝ်ႈသႅဝ်းႁၢၼ်၊ ၻွၵ်ႊတိူဝ်ႊ သုၺ်းၶႃး၊ ၸေႃးတႃႇမလႃႇပေႃး၊ ၶုၼ်ႇဢွင်ႇမၢၼ်း၊ ၼၢႆႇပၺႃးၶျၢၼ်းၼုၼ်ႇ ၶဝ် ၶဝ်ႈႁူမ်ႈ။
ၸိူဝ်းဢမ်ႇၸၢင်ႈမႃးၶဝ်ႈႁူမ်ႈပၢင်ၵုမ်တီႈတႃႈၵုင်ႈသမ်ႉ ၶဝ်ႈပၢင်ၵုမ်တၢင်း ဢွၼ်ႊလၢႆး။
ဢုပ်ႇၵုမ်တႅပ်းတတ်းဝႃႈ ၼႂ်းဝၼ်းတီႈ 7 /7/2020 ၼႆႉ တေၸတ်းႁဵတ်းပၢင်ၵုမ် JMC-U ပၢင်ၵုမ်ၶွမ်ႊမတီႊပႂ်ႉတူၺ်းၵၢၼ်ၵိုတ်းတိုၵ်း ၸၼ်ႉမိူင်းႁူမ်ႈတုမ် ဢၼ်ၵိုတ်းမႃးလႆႈ ပီပၢႆ 10 လိူၼ်။
လိူဝ်ၼၼ်ႉ ဝၼ်းတီႈ 23 ထိုင် 25 /6/2020 တေသိုပ်ႇဢုပ်ႇၵုမ် ၵၼ်လွင်ႈ တႃႇႁၢင်ႈႁႅၼ်း တႃႇၸတ်းပင်ၵုမ်လူင်ပၢင်လူင် ၼႂ်းလိူၼ်ဢေႃးၵတ်ႉသ် ၼႆႉ ဝႃႈၼႆ။
ၵွပ်ႈၼႆလႄႈ ၶေႃႈတူၵ်းလူင်းၶေႃႈလႆႈၸႂ် လိၵ်ႈႁူမ်ႈမၢႆ မိူင်းႁူမ်ႈတုမ် တွၼ်ႈ 3 ဢၼ်တေလႆႈမႃးတီႈပၢင်ၵုမ်ပၢင်လူင်လိူၼ်ဢေႃးၵတ်ႉသ်ၼႆႉၼၼ်ႉ တေဢၢၼ်းဢဝ် တၢင်ႇလၢတ်ႈဢုပ်ႇၵုမ်ၼႂ်းသၽႃး တႃႇလႆႈၶေႃႈတႅပ်းတတ်း ၵွၼ်ႇတေႁဵတ်းပၢင်လိူၵ်ႈတင်ႈ ဝႃႈၼႆ။
ပၢင်ၵုမ်လူင်ပီႁူဝ်ပၢၵ်ႇ 21 ပၢင်လူင်ၼႆႉ ဢၢၼ်းၸတ်းႁဵတ်းၼႂ်းႁူဝ်ပီ 2020 ၼႆႉသေတႃႉ ယွၼ်ႉပိူဝ်ႈငဝ်းလၢႆးတၢင်းပဵၼ်ၶူဝ်းဝိတ်ႉ ဢိၵ်ႇလၢႆလၢႆလွင်ႈလႄႈ ဢမ်ႇပဵၼ်ၸတ်းႁဵတ်း။
ၶေႃႈမုၼ်း NCA-S EAO. RFA .NRPC