ဝၼ်းတီႈ 22 လိူၼ်တီႊသႅမ်ႊပိူဝ်ႊ ဝၼ်းၸၼ် ဝူင်ႈၼႃႈၼႆႉ ၶွင်ႇသီႇၾၢႆႇႁူမ်ႇလူမ်ႈၸၢတ်ႈၸိုင်ႈလုမ်ႈၾႃႉ တေၸတ်းႁဵတ်း ပၢင်ၵုမ် တႃႇဢုပ်ႇဢူဝ်းလွင်ႈမိူင်းႁူမ်ႈတုမ် (မိူင်းမၢၼ်ႈ) ႁင်းၵူၺ်းၶေႃၶေႃ။ တေမီး ႁူဝ်ပဝ်ႈ လုမ်းၽွင်းတၢင်ၶိုၵ်ႉတွၼ်း တႃႇမိူင်းမၢၼ်ႈ Tan Sri Othman Hashim လႄႈ ၽူႈၵုမ်းၵၢၼ် ၽူႈၼမ်းၼႂ်းၵူႈလွင်ႈလွင်ႈလုမ်းၸၢတ်ႈၸိုင်ႈလုမ်ႈ ၾႃႉ ဢၼ်ႁပ်ႉပုၼ်ႈၽွၼ်းပဵၼ် ၽွင်းတၢင်ၶိုၵ်ႉတွၼ်းတႃႇ မိူင်းမၢၼ်ႈဝႆႉၼၼ်ႉ ၶဝ်ႈႁူမ်ႈၸွမ်း ၼႆယဝ်ႉ။

တႃႇၸတ်းပၢင်ၵုမ် ဢုပ်ႇဢူဝ်းလွင်ႈငဝ်းလၢႆး မိူင်းႁူမ်ႈတုမ် (မိူင်းမၢၼ်ႈ) ၵႂႃႇၼၼ်ႉ မိူင်းၵူဝ်ႊလီႊယိူဝ်ႊၸၢၼ်း လႄႈ မိူင်းပရိတ်ႊထဵင်ႊ တုၵ်းယွၼ်းဝႆႉ ဝႃႈၼႆ။

မိူဝ်ႈဝၼ်းတီႈ 27 လိူၼ်ဢွၵ်ႉထူဝ်ႊပိူဝ်ႊ ၼႂ်းပၢင်ၵုမ်လူင် ၽူႈၼမ်း ဢႃႊသီႊယႅၼ်ႊ- ၸၢတ်ႈၸိုင်ႈလုမ်ႈၾႃႉ ၼၼ်ႉၵေႃႈ ၽူႈၵုမ်းၵၢၼ် ၽူႈၼမ်းၼႂ်းၵူႈလွင်ႈလွင်ႈ ဢႅၼ်ႊထူဝ်ႊၼီႊယူဝ်ႊ ၵူႊတႃႊရႅၵ်ႊ ၸီႉၸမ်ႈလၢတ်ႈ ဝႆႉဝႃႈ – ၼႂ်းပီ 2025 ၼႆႉ ငဝ်းလၢႆးၵၢၼ်မိူင်း၊ ၵၢၼ်သိုၵ်းမိူင်းမၢၼ်ႈႁၢဝ်ႈႁႅင်းၶိုၼ်ႈမႃးၵူႈမိုဝ်ႉဝၼ်း။ ယၢမ်းလဵဝ်ၵေႃႈ ၵူၼ်းမိူင်းၼပ်ႉႁူဝ်ႁဵင် လူႉတၢႆယွၼ်ႉၸုမ်းယိပ်းၵွင်ႈၵၢင်ႇ ယိုဝ်းၵၼ်၊ ၵူၼ်းမိူင်းၼပ်ႉႁူဝ်မိုၼ်ႇၵေႃႉ လႆႈႁူပ်ႉလွင်ႈတုၵ်ႉယၢၵ်ႈ ယၢပ်ႇၽိုတ်ႇ ၵိၼ်းၸႂ်ယူႇႁၢဝ်ႈႁႅင်း ႁဵတ်းႁႂ်ႈၵူၼ်းမိူင်း ၽၢၼ်တီႈယူႇတၼ်းသဝ်းၵူၺ်း ဢမ်ႇၵႃး ၼႂ်းပိုၼ်ႉတီႈၵေႃႈဢမ်ႇယူႇငၢႆႈလူမ်ၸႂ် ၼႆယဝ်ႉ။

မၼ်းၸၢႆး ယင်းတုၵ်းယွၼ်းႁႂ်ႈၵိုတ်းယိုတ်း ၵၢၼ်ႁုၵ်းႁၢႆႉတေႃႇၵူၼ်းမိူင်းတင်းသဵင်ႈ၊ ႁႂ်ႈပွႆႇပၼ်ၶိုၼ်း ၵူၼ်းၸိူဝ်းၺႃးတီႉၺွပ်းဝႆႉ လူၺ်ႈၵၢၼ်မၢပ်ႇၼႄးဝႃႈ ၵေႃႇၵၢၼ်ႁၢႆႉၼႆၼၼ်ႉ ၵူၺ်းဢမ်ႇၵႃး ၵမ်ႉထႅမ်ႁၼ်လီၸွမ်း ၶေႃႈတူၵ်းလူင်း ၸုမ်းဢႃႊသီႊယႅၼ်ႊ 5 ၶေႃႈထႅင်ႈ။

ၵၢၼ်တီႈ ၵျူဝ်ႊလီႊပီႊသျွတ်ႊ ၵႂႃႇႁူပ်ႉထူပ်းၵၼ်တင်း ၸွမ်ၸိၵ်းသိုၵ်းမိၼ်းဢွင်ႇလၢႆႇ တီႈၼေႇပျီႇတေႃႇ ၼၼ်ႉၵေႃႈ ပေႃးထိုင်မႃး ပၢင်ၵုမ်ဢၼ်တေၸတ်းႁဵတ်းၼႆႉ လူဝ်ႇပၼ် ၾၢင်ႉတီႈ ၽူႈၶဝ်ႈၸုမ်းၶွင်ႇသီႇၸၢတ်ႈ ၸိုင်ႈလုမ်ႈၾႃႉၵႂႃႇ ၼႆယဝ်ႉ။

လႆႈႁူႉဝႃႈ ၼႂ်းပၢင်ၵုမ် ဢၼ်တေၸတ်းႁဵတ်း ဝၼ်းၸၼ်ဝူင်ႈၼႃႈၼႆႉ တေဢုပ်ႇဢူဝ်းၵၼ်ၵႂႃႇ လွင်ႈပၢင်လိူၵ်ႈ တင်ႈ ဢၼ်သိုၵ်းမၢၼ်ႈယိုတ်းမိူင်းတေၼမ်းၸတ်းၼႆႉ။ တေပိူင်းၼႄ ႁႂ်ႈၸၢတ်ႈၸိုင်ႈလုမ်ႈၾႃႉႁၼ်ဝႃႈ လုၵ်ႉတီႈပၢင်လိူၵ်ႈတင်ႈၼႆႉသေ ၸၢင်ႈၵိူတ်ႇပဵၼ်မႃး လွင်ႈႁုၵ်းႁၢႆႉထႅင်ႈၸိူင်ႉႁိုဝ်။ လွင်ႈၵူၼ်းမိူင်းႁူမ်ႈတုမ် ႁၢမ်းလွင်ႈၽဵင်ႇပဵင်းသေ ႁူပ်ႉတၢင်း ယၢပ်ႇၽိုတ်ႇဝႆႉ ၸဵမ်ၸိူဝ်းၼႆႉ ၼႆယဝ်ႉ။