သိုၵ်းလူင်ပွင်ၸိုင်ႈမၢၼ်ႈ  ယႃႉသုမ်ႉ ၵူတ်ႇထတ်းတၢင်းပဵၼ်ၶူဝ်ႊဝိတ်ႉ -19 ၶွင် RCSS ဢၼ်တင်ႈဝႆႉ ၼႂ်းၵႄႈဝၢၼ်ႈၼႃးၶၢၼ်လႄႈ ၵဵင်းတွင်း ။

သိုၵ်းလူင်ပွင်ၸိုင်ႈမၢၼ်ႈ တပ်ႉၶမယ 575 မိူင်းၼၢႆး ဢဵၼ်ႁႅင်းသိုၵ်းမွၵ်ႈ 30 ပၢႆ ၵႂႃႇယႃႉပႅတ်ႈလၢၼ်ႇ/ သုမ်ႉ ဢၼ်ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) မိူဝ်ႈဝၼ်းတီႈ 21/6/2020 ယၢမ်းဝၢႆးဝၼ်း  ။

ၸဝ်ႈသိုၵ်း ဢုမ်ႈၶိူဝ်း ၽူႈၶၢၼ်ပၢၵ်ႇ RCSS  လၢတ်ႈတီႈၽူႈတွႆႇႁွၵ်ႈဝႃႈ “ ယူႇတီႈၵူၼ်းသိုၵ်းႁဝ်းၶႃႈ ၼႂ်းပိုၼ်ႉတီႈ ႁၢႆးငၢၼ်းလၢတ်ႈၼႄမႃးတႄႉ ပဵၼ်ၶေႃႈသင်ႇၽူႈၵွၼ်းတိူင်းသိုၵ်း ဝၼ်းဢွၵ်ႇၵၢင် ၶူဝ်လမ်ၸီႉသင်ႇ တပ်ႉသိုၵ်းမၢၼ်ႈ 575 မိူင်းၼၢႆး ဢဵၼ်ႁႅင်းမွၵ်ႈ 30 ပၢႆၼႆႉ မႃးယႃႉသုမ်ႉႁဝ်းၶႃႈ။   ဢွင်ႈတီႈၼၼ်ႈ ၵူၼ်းသိုၵ်းႁဝ်း မႃးပႂ်ႉၵူတ်ႇထတ်းတၢင်း ပဵၼ် ပၼ်ၵူၼ်းမိူင်း ပႆႇတၼ်းႁိုင်သင်၊ ဢွၼ်တၢင်းၼၼ်ႉတႄႉ ၶဝ်မႃးႁၢမ်ႈ၊ ဝၢႆးသေၶဝ်မႃးႁၢမ်ႈယဝ်ႉၼၼ်ႉ ၵမ်းလိုၼ်းမႃး ၶဝ်ၸင်ႇတေမႃးယႃႉပႅတ်ႈၼၼ်ႉ ၶႃႈယဝ်ႉ” ဝႃႈၼႆ။

ႁွင်ႈၵၢၼ်ပိုၼ်ၽၢဝ်ႇ တႆးလွတ်ႈလႅဝ်း ၶွင် RCSS တႄႉဢွၵ်ႇဝႆႉတႄႉ “ မိူဝ်ႈဝၼ်းတီႈ 18/6/2020 ယၢမ်းၵၢင်ၼႂ် 9 မူင်း ပလိၵ်ႈမၢၼ်ႈ2 ၵေႃႉ တင်းၽူႈၵွၼ်းဢိူင်ႇ လုင်းႁဵင်လွႆဝွတ်းလႄႈ ၽူႈမၢႆဢိူင်ႇ ၵႂႃႇႁႄႉႁၢမ်ႈ ၾၢႆႇပၢႆးယူႇလီ RCSS/SSA ဢၼ်ပႂ်ႉၵူတ်ႇထတ်းတၢင်းပဵၼ်ပၼ် ၵူၼ်းမိူင်းၵႂႃႇမႃး ၼႂ်းၵႄႈဝၢၼ်ႈၼႃးၶၢၼ် – ၵဵင်းတွင်း ၸႄႈဝဵင်းမိူင်းၼၢႆး” ဝႃႈၼႆ။

ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ၼႆႉ ပဵၼ်ၸုမ်းဢၼ်လူင်းလၢႆးမိုဝ်းၵိုတ်းတိုၵ်း ပတ်းပိုၼ်ႉတူဝ်ႈမိူင်း NCA ဝႆႉၸုမ်းၼိုင်ႈ။

မိူဝ်ႈပူၼ်ႉမႃး ဝၼ်းတီႈ 7 တင်း 12 လိူၼ်ဢေႊပရိူဝ်ႊ 2020 ၼၼ်ႉၵေႃႈ ၸုမ်းၾၢႆႇပၢႆးယူႇလီ RCSS လူင်းပိုၼ်ႉတီႈ ပၼ်ပိုၼ်ႉႁူႉ လွၵ်းလၢႆးႁႄႉၵင်ႈတၢင်းပဵၼ်ၶူဝ်ႊဝိတ်ႉ – 19 လႄႈ ၵူတ်ႇထတ်းတၢင်းပဵၼ်ပၼ်ၵူၼ်းမိူင်း တၢင်းပွတ်းဝၢၼ်ႈမႆႉပူၵ်ႇ တင်း ဝၢၼ်ႈၼႃးဝွၼ် ဢိူင်ႇၼႃးဝွၼ် ၸႄႈဝဵင်းမိူင်းပၼ်ႇ၊ မိူဝ်ႈၼၼ်ႉၵေႃႈ ထုၵ်ႇသိုၵ်းလူင်ပွင်ၸိုင်ႈမၢၼ်ႈ တပ်ႉၶမယ 153 ၸွမ်းႁႄႉၸွမ်းႁၢမ်ႈသေဢမ်ႇၵႃး ပၢႆတဵင်ၵႂၢမ်းၼၵ်းလွၵ်ႇငိုတ်ႈၵူၼ်းမိူင်း၊ သူင်ႇႁႅင်းသိုၵ်း လိုပ်ႈလမ်းလႄႈ ထိုင်တီႈ သွင်ၾၢႆႇ လႆႈပဵၼ်ပၢင်တိုၵ်းၵၼ်။

ၸုမ်းမေႃယႃ ၾၢႆႇပၢႆးယူႇလီ RCSS ၼႆႉ လူင်းပိုၼ်ႉတီႈပၼ်ပိုၼ်ႉႁူႉ ၵဵဝ်ႇလူၺ်ႈလွင်ႈလွၵ်းလၢႆးႁႄႉၵင်ႈ တၢင်းပဵၼ်ၶူဝ်ႊဝိတ်ႉ – 19 ပၼ်ၵူၼ်းမိူင်းသေ ၵူတ်ႇထတ်းတၢင်းပဵၼ်ပၼ်ၵူၼ်းမိူင်း ၸိူဝ်းၼႆႉ တႄႇဢဝ် မိူဝ်ႈႁၢင်လိူၼ်မၢတ်ႉၶျ်မႃး တေႃႇထိုင်ယၢမ်းလဵဝ် တိုၵ်ႉလူင်းၵူတ်ႇထတ်းၼႂ်းပိုၼ်ႉတီႈ ဢၼ် RCSS တူင်ႉၼိုင်ယူႇသဝ်းဝႆႉ ၸိူဝ်းၼၼ်ႉ ၼႆယဝ်ႉ။

ပိူဝ်ႈတႃႇၸွႆႈထႅမ် ၵူၼ်းမိူင်းၼၼ်ႉ မိူဝ်ႈဝၼ်းတီႈ 4/6/2020 ၸွမ်ႁၢၼ် ပွင်ၶိူဝ်း ၽႅဝ်ထိုင် ၼႂ်းလုမ်းတိူင်းသိုၵ်း ဝၼ်းဢွၵ်ႇ ယပၶ တူၼ်ႈတီးသေ ႁပ်ႉဢဝ်ၶူဝ်းၶွင် ဢၼ်ၾၢႆႇသိုၵ်းမၢၼ်ႈ ၸွႆႈထႅမ်။ ဝၼ်းတီႈ 8/6/2020 သမ်ႉ ၸဝ်ႈသိုၵ်း ဢုမ်ႈၶိူဝ်း ဢွၼ်ႁူဝ်သေ ႁပ်ႉဢဝ် ၶဝ်ႈသၢၼ် 300 ထူင်၊ ၼမ်ႉမၼ်း 30 ပုင်း ဢၼ်လူင်ပွင်ၸိုင်ႈမိူင်းတႆး ၸွႆႈထႅမ်။

ၶူဝ်းၶွင်ၸိူဝ်းၼႆႉ ပဵၼ်တႃႇၸွႆႈထႅမ်ၵူၼ်းမိူင်း ၸိူဝ်းယၢပ်ႇၽိုတ်ႇလွင်ႈၵိၼ်ယႅမ်ႉသေတႃႉ ၾၢႆႇၼိုင်ႈသမ်ႉ ဢမ်ႇပၼ်လူင်းပိုၼ်ႉတီႈ ၸွႆႈထႅမ်ထၢင်ႇႁၢင်ႈလွတ်ႈလႅဝ်း၊ ႁဵတ်းႁႂ်ႈၵူၼ်းမိူင်း ၵႂင်ၸႂ်ၸွမ်း ၶၵ်ႉၵၢၼ်ငမ်းယဵၼ် NCA ဢၼ် RCSS/SSA လူင်းလၢႆးမိုဝ်းဝႆႉယူႇ-ၼႆယဝ်ႉ။