တၢင်းပဵၼ်ၸိူဝ်ႉမႅင်းၶူဝ်ႊဝိတ်ႉ 19 လၢမ်းၽႄႈထႅင်ႈၵမ်းၼိုင်ႈ ၼႂ်းၸိုင်ႈမိူင်းၶႄႇ၊ ၼႂ်းဝၼ်းလဵဝ်ၵူၺ်း ၵူတ်ႇထတ်းထူပ်းႁၼ် ၵူၼ်းပဵၼ် 57 ၵေႃႉ၊ လႆႈဝႃႈၼမ်သုတ်းၼႂ်းႁွပ်ႈသွင်လိူၼ်။
မိူဝ်ႈဝၼ်းတီႈ 14/06/2020 ၸုမ်းသိုဝ်ႇၶၢဝ်ႇ CGTN ႁၢႆးငၢၼ်းဝႃႈ- ၸဝ်ႈၼႃႈတီႈပၢႆးယူႇလီ မိူင်းၶႄႇ ပိုတ်ႇလၢတ်ႈဝႃႈ- မိူဝ်ႈဝၼ်းသဝ် လိူၼ်ၵျုၼ်ႊ 13 ဝၼ်း ပူၼ်ႉမႃးၼၼ်ႉ ၼႂ်းၸိုင်ႈမိူင်းၶႄႇ ၵူတ်ႇထတ်းထူပ်းႁၼ် ၽူႈတိတ်းၸပ်းတၢင်းပဵၼ်ၸိူဝ်ႉမႅင်းၶူဝ်ႊဝိတ်ႉ 19 တင်းမူတ်း 57 ၵေႃႉ။ ၼႂ်းၼၼ်ႉ 38 ၵေႃႉ ပဵၼ်ၵူၼ်းၼႂ်းမိူင်းၶႄႇၼင်ႇၵၼ်ၸပ်းၵၼ်ၶိုၼ်း။ ၸိူဝ်ႉမႅင်းတၢင်းပဵၼ်လၢမ်းၽႄႈ ပွၵ်ႈၼႆႉ ဢမ်ႇမီးၽူႈလူႉတၢႆၽိူမ်ႉၶိုၼ်ႈထႅင်ႈသေတႃႉ ပေႃးၼပ်ႉသွၼ်ႇဢဝ်ၸွမ်းလၢႆးဝၼ်းမၼ်း ဝႃႈၸိုင် တင်ႈတႄႇလိူၼ်ဢေႊပရိူဝ်ႊမႃးၼႆႉ တေလႆႈဝႃႈတူဝ်ၼပ်ႉႁူဝ်ၵူၼ်းၸပ်းၸိူဝ်ႉမႅင်းမီး ၼမ်သုတ်း- ၼႆယဝ်ႉ။
ၼႂ်းၵူၼ်းၸိူဝ်းၸပ်းၸိူဝ်ႉမႅင်းၶူဝ်ႊဝိတ်ႉ 19 ၼၼ်ႉ တႃႇ 36 ၵေႃႉ ပဵၼ်ၵူၼ်းၸႃႇတိၼႂ်းဝဵင်းလူင် ပိူၺ်ႇၵျိင်း၊ ထႅင်ႈ 2 ၵေႃႉ ပဵၼ်ၵူၼ်းၸႄႈတွၼ်ႈလဵဝ်ၼိင် ၾၢႆႇၸဵင်ႇႁွင်ႇဝၼ်းဢွၵ်ႇမိူင်းၶႄႇ။ ၵူၼ်းပဵၼ် 2 ၵေႃႉ ၸႄႈတွၼ်ႈလဵဝ်ၼိင်ၼႆႉ ပဵၼ်ၵူၼ်းဢၼ်ယၢမ်ႈယူႇၼုၵ်းထုၵ်းထူတုမ်ႉတိူဝ်ႉၵၼ် တင်း ၵူၼ်းပဵၼ်ၼႂ်းဝဵင်းလူၺ်ပိူၺ်ႇၵျိင်း၊ လွင်ၶဝ်သွင်ၵေႃႉတိတ်းၸပ်းၸိူဝ်ႉမႅင်းၼႆႉ ထူပ်းႁၼ် ယိုၼ်ယၼ် မိူဝ်ႈဝၼ်းတီႈ 12 ပူၼ်ႉမႃးၼႆႉ-ၼႆယဝ်ႉ။
ၾၢႆႇၼိုင်ႈတၢင်းၼိုင်ႈ မိူဝ်ႈဝၼ်းတီႈ 13/06/2020 ယူႇတီႈလူင်ပွင်ၸိုင်ႈၶႄႇ ပူင်သင်ႇပိၵ်ႉဢိုတ်းပႅတ်ႈ ၵၢတ်ႇၶၢႆၽၵ်းယိူဝ်ႈၼၢင်းၶဵဝ် / ၵၢတ်ႇၶၢႆၽၵ်းၵူႈလွင်ႈလွင်ႈ ၼႂ်းဝဵင်းလူၺ်ပိူၺ်ႇၵျိင်း၊ ယွၼ်ႉဝႃႈ ဢွၼ်ၼႃႈၼၼ်ႉ ၵူတ်ႇထတ်းထူပ်းႁၼ်ၵူၼ်းႁဵတ်းၵၢၼ်တီႈၵၢတ်ႇ ၸပ်းၸိူဝ်ႉမႅင်းတၢင်းပဵၼ် ၶူဝ်ႊဝိတ်ႉ 19 ၵူၺ်းဢမ်ႇၵႃး ယင်းၵူတ်ႇထတ်း ႁၼ်မႅၼ်ႈၸိူဝ်ႉမႅင်းၶူဝ်ႊရူဝ်ႊၼႃႊ ၼိူဝ်ၶဵင်ၽၵ်ႉ/သွႆး ပႃသေႊမွၼ်ႉ ဢၼ်ၼမ်းၶဝ်ႈမႃးတီႈၼွၵ်ႈမိူင်း-ၼႆယဝ်ႉ။
ဢိင်ၼိူဝ်လွင်ႈတၢင်းၼႆႉသေ ၽွင်းယၢမ်းလဵဝ်ၵၼ်ၼၼ်ႉ ယူႇတီႈလူင်ပွင်ၸိုင်ႈၶႄႇ လႆႈသင်ႇပိၵ်ႉ ဢိုတ်းပႃးထႅင်ႈ ၵၢတ်ႇၶၢႆတၢင်းၵိၼ်ပၢင်ႇလၢႆႇ ၾိူင်ႊထႆႉ လႄႈၵၢတ်ႇလၢႆလၢႆတီႈ။ လိူဝ်သေၼၼ်ႉ ပေႃႈၵႃႉမႄႈၵႃႉ ဢိၵ်ႇၵူၼ်းၸိူဝ်းယူႇႁိမ်းၵိၼ်ၸမ်ၸိူဝ်းၼႆႉၵေႃႈ ႁွင်ႉၵႂႃႇၵူတ်ႇထတ်းတၢင်းပဵၼ်ပႃး-ၼႆယဝ်ႉ။
ဢွၼ်ၼႃႈၼႆႉ မိူဝ်ႈဝၼ်းတီႈ 11-12/06/2020 ၼၼ်ႉၵေႃႈ ၼႂ်းဝဵင်းလူင်ပိူၺ်ႇၵျိင်းၼႆႉ ၵူတ်ႇထတ်း ထူပ်းႁၼ်ၵူၼ်းၸပ်းၸိူဝ်ႉမႅင်းၶူဝ်ႊဝိတ်ႉ တင်းမူတ်း 7 ၵေႃႉ၊ ၼႂ်းၶၢဝ်းတၢင်း 2 လိူၼ်ၼႆႉ ပဵၼ်ပွၵ်ႈ ဢၼ်ၵူတ်ႇထတ်းႁၼ် ၸိူဝ်ႉမႅင်းပွၵ်ႈဢွၼ်တၢင်းသုတ်း။ ၵဵဝ်ႇၵပ်းလွင်ႈၼႆႉ ၾၢႆႇၽွင်းငမ်းဝဵင်းလူင် ပိူၺ်ႇၵျိင်း လႆႈႁွင်ႉပၢင်ၵုမ်ၶိုၵ်ႉၶၵ်ႉၸဝ်ႈၼႃႈတီႈ ၽူႈမီးပုၼ်ႈၽွၼ်းၵူႈၾၢႆႇၾၢႆႇ၊ ဢုပ်ႇဢူဝ်းၵိူဝ်းၵုမ် ႁႃလၢႆးတၢင်းၵုမ်းၵမ်ၵႅတ်ႇၵင်ႈ တၢင်းပဵၼ်ၶူဝ်ႊဝိတ်ႉၵႂႃႇ-ၼႆယဝ်ႉ။
ဢိင်ၶေႃႈမုလ်းၶၢဝ်ႇထႆး covid-19.kapook.com
