ႁႅင်းၵၢၼ်ယၢၼ်မိူင်း ဢၼ်ၵႂႃႇႁဵတ်းၵၢၼ် တၢင်းမိူင်းထႆး ၸိူဝ်းၼၼ်ႉ တေဢွၼ်ၵၼ်ပွၵ်ႈၶဝ်ႈမႃးၼႂ်းမိူင်းထႅင်ႈယူႇ ၸၢႆးၼုမ်ႇတုၺ်ႈ ၾၢႆႇၸွႆႈထႅမ်ႁႅင်းၵၢၼ် တၢင်းလႅၼ်လိၼ် တႆး – ထႆး လၢတ်ႈၼႄၼင်ႇၼႆ။
တႄႇဢဝ် လိူၼ်ၾႅပ်ႊၿိဝ်ႊရီႊ တေႃႇ လိူၼ်ၵျုၼ်ႊ 2020 ၼႆႉ ႁႅင်းၵၢၼ် ၸိူဝ်းၵႂႃႇႁဵတ်းၵၢၼ် တၢင်းမိူင်းထႆး မိူင်းၶႄႇ ၸိူဝ်းၼၼ်ႉ ဢွၼ်ၵၼ်ပွၵ်ႈၶဝ်ႈမႃး ၸွမ်းၽၵ်းတူလႅၼ်လိၼ်တႆး – ထႆး၊ လႅၼ်လိၼ်တႆး – ၶႄႇ ၸိူဝ်းၼႆႉ မီးၵႂႃႇ ႁူဝ်ၵူၼ်း 42,995 ၵေႃႉယဝ်ႉ။
ၸၢႆးၼုမ်ႇတုၺ်ႈ ႁူဝ်ပဝ်ႈ ပႃႇတီႇႁူဝ်သိူဝ် ၸႄႈဝဵင်းတႃႈၶီႈလဵၵ်းလႄႈ ၾၢႆႇၸွႆႈထႅမ်ႁႅင်းၵၢၼ် ၸွမ်းလႅၼ်လိၼ်တႆး – ထႆး လၢတ်ႈတီႈၽူႈတွႆႇႁွၵ်ႈဝႃႈ “ၼႂ်းလိူၼ်ၵျုၼ်ႊၼႆႉၵူၺ်း ႁႅင်းၵၢၼ် ဢၼ်လုၵ်ႉမိူင်းထႆးပွၵ်ႈၶဝ်ႈမႃး တၢင်းၶူဝ်မိုတ်ႈၵိုဝ်း မၢႆ 2 ၸႄႈဝဵင်းတႃႈၶီႈလဵၵ်း မီးၵႂႃႇ 2-3 ပွၵ်ႈယဝ်ႉ။ ဢၼ်တေပွၵ်ႈၶဝ်ႈမႃးထႅင်ႈၵေႃႈ တေမီးယူႇတိၵ်းတိၵ်းၶႃႈယဝ်ႉ။ ႁႅင်းၵၢၼ် ၸိူဝ်းပၼ်သဵၼ်ႈမၢႆဝႆႉၸိူဝ်းၼၼ်ႉ” ဝႃႈၼႆ။
ႁႅင်းၵၢၼ်ဢၼ်ပွၵ်ႈၶဝ်ႈမႃး တၢင်းတႃႈၶီႈလဵၵ်းၼႂ်းလိူၼ်ၵျုၼ်ႊၼႆႉ မိူဝ်ႈဝၼ်းတီႈ 2/6/2020 ၶဝ်ႈမႃး 92 ၵေႃႉ။ မိူဝ်ႈဝၼ်းတီႈ 9/6/2020 သမ်ႉ ၶဝ်ႈမႃး 64 ၵေႃႉ ဝႃႈၼႆ။
ၻွၵ်ႊတိူဝ်ႊ မဵဝ်းထုၼ်း ၽွင်းလူင်ၾၢႆႇတူင်ႇဝူင်းၵူၼ်း လၢတ်ႈတီႈၽူႈတွႆႇႁွၵ်ႈဝႃႈ “ ၼႂ်းၸႄႈမိူင်းတႆးၼႆႉ ဢွင်ႈတီႈဢၼ်ဝႆႉ ၵုမ်းတူဝ် ၵူၼ်းပွၵ်ႈတၢင်ႇမိူင်းမႃး Facility Quarantine တင်းမူတ်းမီး 517 ဢွင်ႈတီႈ၊ ၵူၺ်းၵႃႈ တၢင်ႇၸႄႈမိူင်းလႄႈ တိူင်းတႄႉ ဢမ်ႇမီး Facility Quarantine” ဝႃႈၼႆ။
ၵမ်ႈၼမ် ႁႅင်းၵၢၼ် ဢၼ်ပွၵ်ႈၶဝ်ႈမႃးတၢင်းလႅၼ်လိၼ်ၼႆႉ မိူၼ်ၼင်ႇ တၢင်းလႅၼ်လိၼ်ပွတ်းႁွင်ႇ တီႈမူႇၸေႊသမ်ႉ ၽၵ်းတူ ႁေႃၶမ်းလူင် (ရွှေနန်းတော်ဂိတ်)၊ လၢဝ်ႇၵၢႆး၊ ၼမ်ႉၽႃႈ/သျိၼ်းသူၺ်ႇႁေႃႇ (ချင်းရွှေဟော်ဂိတ်)၊ တႃႈၶီႈလဵၵ်းလႄႈ မျႃႉဝတီႇ ၸိူဝ်းၼႆႉ။
ႁႅင်းၵၢၼ် ဢၼ်ပွၵ်ႈၶဝ်ႈမႃးတၢင်း မူႇၸေႊလႄႈ လၢဝ်ႇၵၢႆး ၼမ်ႉၽႃႈ/ သျိၼ်ႊသူၺ်ႇႁေႃႇ ၸိူဝ်းၼႆႉတႄႉ ၵမ်ႈၼမ် ပဵၼ်ႁႅင်းၵၢၼ် ၵူၼ်းမိူင်းတၢင်းပွတ်းတိူင်းၸႄႈၵႅင်းလႄႈ ဝဵင်းလိူဝ်ႇ (မၼ်းတလေး) ၸိူဝ်းၼႆႉ။
ႁႅင်းၵၢၼ် ဢၼ်ပွၵ်ႈၶဝ်ႈမႃး တၢင်းၸႄႈမိူင်းတႆး ၸွမ်းလႅၼ်လိၼ်ၼႆႉ တင်းမူတ်းမီး 4 မိုၼ်ႇပၢႆ။ ၼႂ်း 4 မိုၼ်ႇပၢႆၼႆႉ လႆႈၵုမ်းတူဝ် Quarantine မူတ်း။ ႁႅင်းၵၢၼ် ၸိူဝ်းၶဝ်ႈၵုမ်းတူဝ်တဵမ်ယဝ်ႉသေ ပွၵ်ႈမိူဝ်းတီႈယူႇၽႂ်မၼ်းယဝ်ႉၼၼ်ႉ မီးၵႂႃႇ 3 မိုၼ်ႇပၢႆယဝ်ႉ။ တေႃႈလဵဝ် တႃႇ 5 ႁဵင်ပၢႆတႄႉ တိုၵ်ႉၵုမ်းတူဝ်ယူႇတီႈႁိူၼ်း Home Quarantine ။ လိူဝ်သေၼၼ်ႉ ဢၼ်တိုၵ်ႉၵိုတ်းယူႇဝႆႉဢွင်ႈတီႈၵုမ်းတူဝ် Facility Quarantine ၼၼ်ႉၵေႃႈ တိုၵ်ႉမီးယူႇ 1 ႁဵင်ပၢႆ ၼႆယဝ်ႉ။
