ႁႅင်းၵၢၼ်ၸိူဝ်းလုၵ်ႉမိူင်းၶႄႇ ပွၵ်ႈၶဝ်ႈမႃးၶိုၼ်းတၢင်း ၽၵ်းတူမိူင်း တီႈဝဵင်းၼမ်ႉၽႃႈ (သျိၼ်ႊသူၺ်ႇႁေႃႇ) ၼၼ်ႉယၢမ်း လဵဝ်မီး ႁူဝ်ၵူၼ်း 700 ပၢႆ ႁူပ်ႉလွင်ႈယၢပ်ႇၽိုတ်ႇ လွင်ႈၶဝ်ႈၼမ်ႉတၢင်းၵိၼ်။

ၼႂ်းဝၼ်းတီႈ 21-22/4/2020 ၶၢဝ်းတၢင်း 2 ဝၼ်းမႃးၼႆႉ ၵူၼ်းလုၵ်ႉမိူင်းၶႄႇၶဝ်ႈမႃးမီးၼႂ်းၼႃႈလိၼ်ၽွင်းငဝ်းတူဝ်ၵဝ်ႇ ၵဝ်ႈ ၵၢင်ႉ (ၵူဝ်းၵၢင်ႉ) မီး 300 ပၢႆ ၊ ၸဝ်ႈၼႃႈတီႈလႆႈႁွင်ႉၵုမ်းတူဝ်ဝႆႉတႃႇပႂ်ႉတူၺ်း တၢင်းပဵၼ် ၊ ယၢမ်းလဵဝ် ႁူပ်ႉလွင်ႈယၢပ်ႇၽိုတ်ႇတႃႇၶဝ်ႈ ၼမ်ႉတၢင်းၵိၼ် ဝႃႈၼႆ။

ၽူႈမီးပုၼ်ႈၽွၼ်း ၶႃႈႁၢပ်ႇၵၢၼ်လူင်ပွင်ၸိုင်ႈ ၵေႃႉၼိုင်ႈ တီႈဝဵင်းၼမ်ႉၽႃႈ လၢတ်ႈတီႈၽူႈတွႆႇႁွၵ်ႈဝႃႈ “ ဢွင်ႈတီႈ တႃႇယူႇ သဝ်းတႄႉ မီး ယူႇၼႆသေတႃႉ ယၢပ်ႇၽိုတ်ႇလွင်ႈၵိၼ်ယႅမ်ႉၼၼ်ႉၶႃႈယဝ်ႉ။ ႁႅင်းၵၢၼ် ဢၼ်ပွၵ်ႈၶဝ်ႈမႃးၼႆႉ တီႈသျိၼ်းသူၺ်ႇႁေႃႇတင်းလၢဝ်ႇၵၢႆး မီးႁူဝ်ၵူၼ်း 700 ပၢႆယဝ်ႉ” ဝႃႈၼႆ။

မိူဝ်ႈဝၼ်းတီႈ 21 ၼၼ်ႉ ႁႅင်းၵၢၼ်မိူင်းႁူမ်ႈတုမ် လုၵ်ႉမိူင်းၶႄႇ ပွၵ်ႈၶဝ်ႈမႃး 123 ၵေႃႉ။ ဝၼ်းတီႈ 22 သမ်ႉ ပွၵ်ႈ ၶဝ်ႈမႃး 120 ပၢႆ ။ ဢွၼ်ၵၼ်မႃးလိုဝ်ႈသဝ်းတီႈ ဢွင်ႈသဝ်းဢၼ်ၸဝ်ႈၼႃႈတီႈႁဵတ်းဝႆႉပၼ် ။

ဢိင်ၼိူဝ် ယၢပ်ႇၽိုတ်ႇ လွင်ႈၶဝ်ႈၼမ်ႉတၢင်းၵိၼ်ၼႆသေ ၽူႈမီးပုၼ်ႈၽွၼ်း လႆႈတၢင်ႇထိုင် တီႈၶွမ်ႊမတီႊၵုမ်းၵမ်တၢင်းပဵၼ်ၶူဝ်ႊဝိတ်ႉ 19 လႄႈၶိုင်ၵၢၼ်ငဝ်းလၢႆး ၶိုၵ်ႉၶၵ်ႉ ၸႄႈမိူင်းတႆးဝႆႉယဝ်ႉ ဝႃႈၼႆ။

“ယွၼ်ႉႁူဝ်ၵူၼ်းၵေႃႈ ၼမ်ၶိုၼ်ႈမႃးသေ ယၢပ်ႇၽိုတ်ႇလွင်ႈၵိၼ်ယႅမ်ႉၶႃႈယဝ်ႉ တေႁဵတ်းႁိုဝ်ၶပ်းၶိုင်ပၼ်ၵႂႃႇၼႆၼၼ်ႉ ႁဝ်း ၶႃႈ လႆႈတၢင်ႇထိုင်ဝႆႉယဝ်ႉ လွင်ႈၼႆႉ ၵူၺ်းၵႃႈ တေလႆႈၵႂၢမ်းတွပ်ႇမႃးၸိူင်ႉႁိုဝ် ဢၼ်ဝႃႈၼၼ်ႉ ပႆႇႁူႉၶႃႈ” ၽူႈမီးပုၼ်ႈၽွၼ်း ၼႂ်းၶႃႈႁၢပ်ႇၵၢၼ်လူင်ပွင်ၸိုင်ႈ ၵေႃႉၼိုင်ႈ လၢတ်ႈၼႄၼင်ႇၼႆ။

တေႃႈလဵဝ် ႁႅင်းၵၢၼ် ဢၼ်ၵုမ်းတူဝ်ဝႆႉတီႈဝဵင်းၼမ်ႉၽႃႈလႄႈ လၢဝ်ႇၵၢႆးၼၼ်ႉ လႆႈတူမ်ႈႁုင်ၵိၼ်ႁင်းၵူၺ်းၽႂ်မၼ်း ဝႃႈၼႆ။

ႁႅင်းၵၢၼ်မိူင်းႁူမ်ႈတုမ် ဢၼ်ပွၵ်ႈၶဝ်ႈမႃးတၢင်း ၽၵ်းတူမိူင်းတီႈဝဵင်းၼမ်ႉၽႃႈၼၼ်ႉ ပဵၼ်ႁႅင်းၵၢၼ် ဢၼ်ၵႂႃႇႁဵတ်းၵၢၼ် ၼႂ်းသူၼ်ဢွႆႈ ယွၼ်ႉဝႃႈ ၶၢဝ်းယၢမ်းၼႆႉ တၢင်းၾင်ႇမိူင်းၶႄႇ ႁူင်းၸၢၵ်ႈႁဵတ်းၵိူဝ်ဝၢၼ်ၵိုတ်းယင်ႉလႄႈ ႁႅင်းၵၢၼ်ၸင်ႇလႆႈ ဢွၼ်ၵၼ်ပွၵ်ႈၶဝ်ႈမႃး ဝႃႈၼႆ။

တေႃႈလဵဝ် ၼႂ်းၼႃႈလိၼ်ၽွင်းငမ်းတူဝ်ၵဝ်ႇ ၵဝ်ႈၵၢင်ႉၼႆႉ ဢွင်ႈတီႈဢၼ်ဝႆႉတႃႇပႂ်ႉတူၺ်း ၵူၼ်းပွၵ်ႈမိူင်းၶႄႇမႃးၼၼ်ႉ တီႈဝဵင်းၼမ်ႉၽႃႈ မီး 3 ဢွင်ႈတီႈ။ တီႈလၢဝ်ႇၵၢႆးသမ်ႉ မီး 7 ဢွင်ႈတီႈ ဝႃႈၼႆ။

ႁႅင်းၵၢၼ်မိူင်းႁူမ်ႈတုမ် ဢၼ်ပွၵ်ႈၶဝ်ႈမႃးတၢင်းၽၵ်းတူမိူင်းတီႈဝဵင်းၼမ်ႉၽႃႈၼႆႉ တင်းမူတ်းတေမီး 25,000 ပၢႆယဝ်ႉ ဝႃႈၼႆ။

တေႃႈလဵဝ် ၼႂ်းမိူင်းႁူမ်ႈတုမ်ၼႆႉ ၵူၼ်းၸပ်းတၢင်းပဵၼ်ၸိူဝ်ႉမႅင်းၶူဝ်ႊဝိတ်ႉ – 19 ၼႆႉ မီးၵႂႃႇ 121 ၵေႃႉ။ ဢၼ်ယူတ်းယႃ တူဝ်ဝႆႉ တီႈႁူင်းယႃဝႆႉသမ်ႉ မီး 107 ၵေႃႉ၊ လူႉတၢႆ 5 ၵေႃႉ။ ယႃၶႅၼ်း မီး 9 ၵေႃႉ ယူႇတီႈႁွင်ႈၵၢၼ်ပၢႆးယူႇလီလႄႈ ၾၢႆႇလဵၼ်ႈ ႁႅင်းပိုၼ်ၽၢဝ်ႇဢွၵ်ႇဝႆႉ။