ယူႇတီႈၼႃႈလိၼ်ၶိုၵ်ႉတွၼ်းမၢႆ 4 မိူင်းလႃး သူင်ႇတူဝ်ႁႅင်းၵၢၼ်မိူင်းႁူမ်ႈတုမ် ပွၵ်ႈၶဝ်ႈမႃးထႅင်ႈ တၢင်းၵဵင်းတုင်ၼပ်ႉႁူဝ်ပၢၵ်ႇ၊ ဢၼ်လုၵ်ႉတၢင်းမိူင်းလၢဝ်းၶဝ်ႈမႃးၵေႃႈမီး။
ဝၼ်းတီႈ 8/5/2020 ယၢမ်းၵၢင်ၶမ်ႈ ႁႅင်းၵၢၼ်မိူင်းႁူမ်ႈတုမ် ဢၼ်လႆႈၵုမ်းတူဝ် Quarantine တီႈတၢင်းမိူင်းလႃး တဵမ် 21 ဝၼ်းယဝ်ႉၼၼ်ႉ ယူႇတီႈၽူႈမီးပုၼ်ႈၽွၼ်း ၼႃႈလိၼ်ၶိုၵ်ႉတွၼ်းမၢႆ 4 မိူင်းလႃး လႆႈမွပ်ႈပၼ် တၢင်းလူင်ပွင်ၸိုင်ႈ သူင်ႇပွၵ်ႈမႃးတၢင်းၸႄႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း တင်းမူတ်း 645 ၵေႃႉ ဝႃႈၼႆ။
ၸၢႆးႁွမ်ၼွႆႉ ၶွမ်ႊမတီႊႁႃငိုၼ်းၵွင်ၵၢင်လႄႈ ႁႄႉၵင်ႈတၢင်းပဵၼ်ၶူဝ်ႊဝိတ်ႉ ၸႄႈတွၼ်ႈၵဵင်းတုင် လၢတ်ႈတီႈ ၽူႈတွႆႇႁွၵ်ႈဝႃႈ- “မိူဝ်ႈဝႃး ႁႅင်းၵၢၼ်မိူင်းႁူမ်ႈတုမ် လုၵ်ႉတၢင်းမိူင်းယူႉ မိူင်းယွင်း ၶဝ်ႈမႃးတၢင်းၵဵင်းတုင် 645 ၵေႃႉ။ ၶဝ်ႈၵုမ်းတူဝ် Quarantine တဵမ် 21 ဝၼ်းယဝ်ႉ လႄႈ ႁဝ်းၶႃႈၵေႃႈ လႆႈသူင်ႇပွၵ်ႈၵႂႃႇတၢင်းတူၼ်ႈတီးၵမ်းလဵဝ်ယဝ်ႉ။ ဢၼ်လုၵ်ႉတၢင်းမိူင်းလၢဝ်း ပွၵ်ႈမႃးထိုင်ၵဵင်းတုင် ၵေႃႈမီး 130 ၵေႃႉ။ ၸိူဝ်းၼႆႉတႄႉ ပႆႇလႆႈၶဝ်ႈၵုမ်းတူဝ် Quarantine ၵွပ်ႈၼႆလႄႈ ပေႃးထိုင်ဝၢၼ်ႈၽႂ်မိူင်းမၼ်းယဝ်ႉထုၵ်ႇလီ ၵုမ်းတူဝ် ႁင်းၽႂ်မၼ်းယူႇ” ဝႃႈၼႆ။
ႁႅင်းၵၢၼ် မိူင်းႁူမ်ႈတုမ် ဢၼ်လုၵ်ႉမိူင်းၶႄႇ မိူင်းလၢဝ်းမႃးၼၼ်ႉ ယွၼ်ႉတၢင်းပဵၼ်ၶူဝ်ႊဝိတ်ႉ – 19 လႄႈႁၢမ်းၵၢၼ်ငၢၼ်းၵၼ် ၸင်ႇလႆႈပွၵ်ႈၶဝ်ႈမႃး။ ၸိူဝ်းၶဝ်ၵႂႃႇႁဵတ်းၵၢၼ်ၼႂ်းသူၼ်ယၢင်၊ သူၼ်ဢွႆႈ၊ ႁဵတ်းၵၢၼ်ၼႂ်းႁူင်းၵၢၼ်တေႃႇလွင်း ၸိူဝ်းၼႆႉ ဝႃႈၼႆ။
ႁႅင်းၵၢၼ်မိူင်းႁူမ်ႈတုမ် ဢၼ်ပွၵ်ႈမႃးၼႆႉ ၵမ်ႈၼမ် ပဵၼ်ၵူၼ်းတၢင်းပွတ်းၸႄႈမိူင်းရၶႅင်ႇ၊ လိူဝ်ၼၼ်ႉ တၢင်းပွတ်းလိၼ်ထုင်ႉပဵင်း ။
ၼွၵ်ႈလိူဝ်ၼၼ်ႉ တၢင်းမိူင်းထႆးၵေႃႈ သူင်ႇႁႅင်းၵၢၼ်ပွၵ်ႈၶဝ်ႈမႃးတၢင်းတႃႈၶီႈလဵၵ်းၵေႃႈမီး။ ၾၢႆႇၼိုင်ႈတၢင်းၼိုင်ႈ ႁႅင်းၵၢၼ်ၸိူဝ်းပွၵ်ႈၶဝ်ႈမႃးတၢင်းလၢဝ်ႇၵၢႆး ၼႃႈလိၼ်ၶိုၵ်ႉတွၼ်းမၢႆ 1 ၵဝ်ႈၵၢင်ႉ(ၵူဝ်းၵၢင်ႉ) ၵေႃႈမီး ဢိၵ်ႇ ပွၵ်ႈၶဝ်ႈမႃး တၢင်းၸႄႈဝဵင်းမူႇၸေႊ ၸိူဝ်းၼႆႉၵေႃႈမီး။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ