ႁူဝ်ပဝ်ႈ ၸုမ်းလိူၵ်ႈတင်ႈ ၽူႈၵွၼ်းဢိူင်ႇမိူင်းတၢင်ႈ ၼႂ်းၸႄႈဝဵင်းၵျွၵ်ႉမႄး ၺႃးၸုမ်းဢမ်ႇႁူႉၸၵ်းယိုဝ်းတၢႆ တီႈၼႂ်းသူၼ်ၶဝ်ႈၵၢပ်ႇ ၊ ၽူႈတႅၼ်းသၽႃးဝႃႈ မိူၼ်ၵႂၢႆးတေႃးၵၼ်သၢင်ႈတႄးၼႃး။
မိူဝ်ႈဝၼ်းတီႈ 6/6/2020 ယၢမ်းဝၢႆးဝၼ်းၼၼ်ႉ လုင်းၵေႃးသူၺ်ႇဝိၼ်း ဢႃယု 50 ပီ ၵူၼ်းမၢၼ်ႈၸၢၼ်း ဢိူင်ႇမိူင်းတၢင်ႈ ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ၊ ထုၵ်ႇၵူၼ်းဢမ်ႇႁူႉၾၢႆႇ ဢမ်ႇႁူႉၸုမ်း ယိုဝ်းတၢႆ တီႈၼႂ်းသူၼ်ၶဝ်ႈၵၢပ်ႇ ၽွင်းတိုၵ်ႉႁဵတ်းၵၢၼ်ယူႇ ။
ၽူႈမီးပုၼ်ႈၽွၼ်းပလိၵ်ႈၸႄႈဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ ၵူၼ်းဝၢၼ်ႈထုၵ်ႇယိုဝ်းတၢႆ ၵေႃႉၼိုင်ႈ။ ၽွင်းတိုၵ်ႉၵႂႃႇႁဵတ်းသူၼ်ၼၼ်ႉ ပဵၼ်ၸုမ်းလႂ် ၵေႃႉလႂ် မႃးယိုဝ်းဢၼ်ဝႃႈၼၼ်ႉ ဢမ်ႇပႆႇႁူႉၶႃႈ။ တေႃႈလဵဝ် တိုၵ်ႉၵူတ်ႇထတ်းသွၵ်ႈႁႃတူဝ်ၵူၼ်းႁၢႆႉ ယူႇ” ဝႃႈၼႆ။
လုင်းၵေႃးသူၺ်ႇဝိၼ်း ၵေႃႉထုၵ်ႇၵူၼ်းဢမ်ႇႁူႉၾၢႆႇ ယိုဝ်းတၢႆၼႆႉ တီႈၶၢပ်ႈတူဝ်မၼ်းၸၢႆး တိူဝ်ႉၺႃးမၢၵ်ႇၵွင်ႈ တင်းမူတ်း 6 တီႈ။
ၸၢႆးထုၼ်းဝိၼ်း ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈမၢႆ 1 ၸႄႈဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ “တီႈမိူင်းတၢင်ႈၼႆႉ မီးၸုမ်းယိပ်းၵွင်ႈၵၢင်ႇၼမ်။ ၸုမ်းယိပ်းၵွင်ႈၸိူဝ်းၼႆႉ ႁိမ်တီႈယူႇ ႁိမ်ဢႃႇၼႃႇၵၼ်သေလႄႈ ႁဵတ်းႁႂ်ႈၵူၼ်းမိူင်းတူၵ်းပဵၼ်ယိူဝ်ႇ။ မၼ်းမိူၼ်ဢၼ်ပိူၼ်ႈဝႃႈ ၵႂၢႆးသွင်တူဝ်တေႃးၵၼ် သၢင်ႈတႄးၼႃးၼၼ်ႉၶႃႈယဝ်ႉ ။ ၵူၼ်းမိူင်းဢမ်ႇမီးလွင်ႈႁူမ်ႇလူမ်ႈ ” ဝႃႈၼႆ။
ၵဵဝ်ႇလူၺ်ႈလုင်းၵေႃးသူၺ်ႇဝိၼ်း ထုၵ်ႇယိုဝ်းတၢႆၼၼ်ႉ ယူႇတီႈပလိၵ်ႈ(ယႄး) တီႈၵျွၵ်ႉမႄး လႆႈပိုတ်ႇလိူင်ႈလၢဝ်း တီႈႁူင်းပလိၵ်ႈၸႄႈဝဵင်းၵျွၵ်ႉမႄး ၸွမ်းၼင်ႇပၵ်းပိူင်မၢႆမီႈဝၢၼ်ႈမိူင်း မတ်ႉတႃ (ပ) 55/2020 ၼၼ်ႉဝႆႉ ဝႃႈၼႆ။
ၼႂ်းၸႄႈဝဵင်းၵျွၵ်ႉမႄး ၼႂ်းဢိူင်ႇမိူင်းတၢင်ႈၼႆႉ မိူဝ်ႈဝၼ်းတီႈ 22 လိူၼ်ၵျႅၼ်ႊၼိဝ်ႊရီႊ 2020 ၼၼ်ႉၵေႃႈ ၽူႈမၢႆ ၼႂ်းဢိူင်ႇမိူင်းတၢင်ႈ ထုၵ်ႇယိုဝ်းတၢႆၵေႃႉၼိုင်ႈ။ လိူဝ်ၼၼ်ႉ မိူဝ်ႈၼႂ်းလိူၼ်ၾႅပ်ႊၿိဝ်ႊရီႊ 2020 ၼၼ်ႉၵေႃႈ ၵူၼ်းဝၢၼ်ႈ ထုၵ်ႇယိုဝ်းတၢႆ ၵေႃႉၼိုင်ႈ ၼႂ်းဢိူင်ႇမိူင်းတၢင်ႈၵူၺ်းၼင်ႇၵဝ်ႇ။
မိူဝ်ႈႁၢင်ပီ 2019 လိူၼ်ၼူဝ်ႊဝႅမ်ႊၿိူဝ်ႊၼၼ်ႉၵေႃႈ ၽူႈၵွၼ်းဢိူင်ႇမိူင်းတၢင်ႈ လႄႈ ၽူႈၵွၼ်းဝၢၼ်ႈ ၼႂ်းဢိူင်ႇမိူင်းတၢင်ႈ 2 ၵေႃႉ ထုၵ်ႇယိုဝ်းတၢႆ တီႈၼႂ်းႁၢၼ်ႉၶၢႆၶဝ်ႈၽၵ်းတီႈၼိုင်ႈ ၼႂ်းၸႄႈဝဵင်းၵျွၵ်ႉမႄး။
လွင်ႈဢၼ်ၺႃးယိုဝ်းတၢႆၸိူဝ်းၼႆႉ ဢမ်ႇတွၼ်ႉတီႉၺွပ်းလႆႈၵူၼ်းယိုဝ်းသေပွၵ်ႈ။ ၽွင်းတႅၼ်းပွတ်းတွၼ်ႈၵျွၵ်ႉမႄးလၢတ်ႈဝႃႈ ယွၼ်ႉပိူဝ်ႈမၢႆမီႈဝၢၼ်ႈမိူင်း ဢမ်ႇသုမ်ႇငမ်းထိုင်ၵူၼ်းမိူင်း လႄႈ ၸင်ႇပဵၼ်ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ