မိူဝ်ႈဝႃးဝၼ်းတီႈ 18 လိူၼ်မၢတ်ႉၶျ် ၽူႈပွင်ၵၢၼ်သိုၵ်း ၸွမ်သိုၵ်းထႆး ၵျိတ်ႊၶျၼူၵ်ႊ ၼုတ်းၵျယႃႊ Chitchanok Nujjaya ၵႂႃႇႁူပ်ႉထူပ်း ဢုပ်ႇဢူဝ်း သိုၵ်းမၢၼ်ႈယိုတ်းမိူင်း တီႈဝဵင်း လူင်ၼေႇပျီႇတေႃႇ တၢမ်တူဝ်ၸွမ်ၸိၵ်းသိုၵ်းမၢၼ်ႈမိၼ်းဢွင်ႇလၢႆႇ ၵေႃႉႁပ်ႉပုၼ်ႈၽွၼ်းယုၵ်ႉၸၼ်ႉတူဝ်ၵဝ်ႇပဵၼ် ၵႅမ်ၸွမ် ၸိုင်ႈမိူင်းႁူမ်ႈတုမ်ဝႆႉၼၼ်ႉ ႁူပ်ႉဢုပ်ႇဢူဝ်းၸွမ်း ဝႃႈၼႆ။

ၼႂ်းပၢင်ႁူပ်ႉထူပ်းၼၼ်ႉ တင်းသွင်ၾၢႆႇ ဢုပ်ႇဢူဝ်းၵၼ်ၵႂႃႇ လွင်ႈၵၢၼ်ၼိမ်တဵင်ႈၸွမ်းလႅၼ်လိၼ် မိူင်းထႆး-မိူင်းတႆး-မိူင်းမၢၼ်ႈတိတ်းၸပ်းၵၼ် ပဵၼ်ပိူင်ယႂ်ႇ။ ယွၼ်ႉပၢင်တိုၵ်းၸွမ်းလႅၼ်လိၼ် မိူင်းထႆး-မိူင်းႁူမ်ႈတုမ်သေ ႁဵတ်းႁႂ်ႈသဵၼ်ႈတၢင်းၵၢၼ်ၵႃႉၶၢႆ ဢၼ်လႆႈငိုၼ်းထႆးၶဝ်ႈဢွၵ်ႇၼပ်ႉႁူဝ်လၢၼ်ႉမၼ်း လႆႈၵိုတ်း ယင်ႉၵႂႃႇ ႁိုင်ႁူဝ်ပီမၼ်းလႄႈ ပိူဝ်ႈတႃႇၸွမ်းလႅၼ်လိၼ်တေမီးလွင်ႈၼိမ်တဵင်ႈၼၼ်ႉ ၸင်ႇလႆႈႁူပ်ႉဢုပ်ႇဢူဝ်းလွင်ႈ ၵၢၼ်ၵႃႉၶၢႆၵၼ် ၼႆယဝ်ႉ။

ၼွၵ်ႈလိူဝ်ၽူႈၼမ်းသိုၵ်းတင်းသွင်ၸိုင်ႈမိူင်း ႁူပ်ႉဢုပ်ႇၵၼ် လွင်ႈႁူမ်ႇလူမ်ႈလႅၼ်လိၼ်ၸိုင်ႈမိူင်းၼၼ်ႉယဝ်ႉ ယင်းဢုပ်ႇဢူဝ်းၸတ်းၽႅၼ်ပႃး တႃႇသိုၵ်းတင်း သွင်မိူင်း ႁူမ်ႈၾိုၵ်း ၵၢၼ်သိုၵ်းၸွမ်းၵၼ်ထႅင်ႈၵွၼ်ႇ။ ဝၼ်း လႄႈ ဢွင်ႈတီႈ လွင်ႈတၢင်းႁူဝ်ယွႆႈ ဢၼ်သိုၵ်းမၢၼ်ႈ တင်း သိုၵ်းထႆး တေႁူမ်ႈၵၼ်ၾိုၵ်းၵၢၼ်သိုၵ်းၼၼ်ႉတႄႉပႆႇလႆႈႁူႉတႅတ်ႈတေႃး ။

တီႈပၢင်ႁူပ်ႉထူပ်းၼၼ်ႉ ၾၢႆႇသိုၵ်းမၢၼ်ႈယိုတ်းမိူင်း ပဵၼ်ၵႅမ်ၸွမ်ၸိၵ်းသိုၵ်း သူဝ်းဝိၼ်း ၊ ၸွမ်သိုၵ်းလူင် ယႄးဝိၼ်းဢူး ႁွင်ႈၵၢၼ်ၾၢႆႇၵႅတ်ႇၶႄ (တပ်ႉပႆလိၼ်)၊ ၸွမ်သိုၵ်းလူင် ၵျေႃႇ ၸႂႃႇလိၼ်း ၽူႈၵုမ်းၵၢၼ် ၾၢႆႇတပ်ႉၼမ်ႉ၊ လိၼ်၊ လူမ်း ၶဝ်ႈႁူမ်ႈဢုပ်ႇဢူဝ်းၸွမ်း ၼႆယဝ်ႉ။

ၽူႈၼမ်းသိုၵ်းမၢၼ်ႈၸိူဝ်းႁူပ်ႉထူပ်းဢုပ်ႇဢူဝ်းၸွမ်း ၽူႈၼမ်းသိုၵ်းထႆးၼၼ်ႉ ပဵၼ်ၵူၼ်းၸိူဝ်း တေဢဝ်တီႈယူႇ ၼႂ်းႁွင်ႈၵၢၼ်ဢၼ်လမ်ႇလွင်ႈ တႃႇလူင်ပွင်ၸိုင်ႈမႂ်ႇ ဢၼ်သိုၵ်းမၢၼ်ႈယိုတ်းမိူင်း တေၶွတ်ႇၽွတ်ႈၼႂ်းဝူင်ႈၼႃႈသေ ႁဵတ်းၵၢၼ်မိူင်းၵႂႃႇၼၼ်ႉယူႇ။

လိူဝ်ၼၼ်ႉ ၾၢႆႇသိုၵ်းထႆး ယင်းဢုပ်ႇလၢတ်ႈယွင်ႈဢၢမ်း လႄႈ ႁူမ်ၸူမ်းၸွမ်း တီႈသိုၵ်းမၢၼ်ႈယိုတ်းမိူင်း ၸတ်းႁဵတ်းပၢင်လိူၵ်ႈတင်ႈယဝ်ႉတူဝ်ႈၵႂႃႇလီငၢမ်းသေ ဢုပ်ႇလၢတ်ႈတူၵ်ႇတၵ်ႉပႃး လွင်ႈတႄႇႁွင်ႉ ၽူႈတႅၼ်းၽွင်းၸိူဝ်းဢွင်ႇပေႉပၢင်လိူၵ်ႈတင်ႈသေ တႄႇၸတ်းပၢင်ၵုမ်လူင်သၽႃးၵူႈၸၼ်ႉထၢၼ်ႈၵႂႃႇ ၸိူဝ်းၼႆႉ- ဝႃႈၼႆ။