လူင်ပွင်ၸိုင်ႈထႆး ပိုၼ်ၽၢဝ်ႇ ၶၢႆႉဝၼ်းပိုတ်ႇႁဵတ်းဝႂ်ႁေႃႈရူတ်ႉၵႃး (ဝႂ်ၶပ်းၶီႇ) ပတ်းပိုၼ်ႉတူဝ်ႈမိူင်းထႆး ၵႂႃႇထႅင်ႈတၢင်းၼႃႈတေႃႇပေႃးထိုင် ပိုၼ်ၽၢဝ်ႇပူတ်းယႃႉပႅတ်ႈငဝ်းလၢႆး ၶိုၵ်ႉၶၵ်ႉ။
မိူဝ်ႈဝၼ်းတီႈ 7/5/2020 ယူႇတီႈလူင်ပွင်ၸိုင်ႈထႆး ႁွင်ႈၵၢၼ်ၾၢႆႇတေႃႉသူင်ႇတၢင်းလိၼ် လႆႈပိုၼ်ၽၢဝ်ႇ ဝႃႈ- ၶၢႆႉဝၼ်းပိုတ်ႇႁဵတ်း ဝႂ်ႁေႃႈရူတ်ႉၵႃး ရူတ်ႉၶိူင်ႈ (ဝႂ်ၶပ်းၶီႇ) ပတ်းပိုၼ်ႉတူဝ်ႈမိူင်းထႆး၊ တင်ႈတႄႇ ဝၼ်းတီႈ 7/5/2020 ၵႂႃႇ တေႃႇပေႃးထိုင် ပိုၼ်ၽၢဝ်ႇပူတ်းယႃႉပႅတ်ႈငဝ်းလၢႆးၶိုၵ်ႉၶၵ်ႉ-ၼႆယဝ်ႉ။
ၼႂ်းလိၵ်ႈပၢႆႉပိုၼ်ၽၢဝ်ႇၼၼ်ႉ လၢတ်ႈဝႃႈ-တွၼ်ႈတႃႇၽူႈၸိူဝ်းလႆႈၸႅင်ႈလၢတ်ႈဢဝ်ၶပ်ႉမၢႆၶဝ်ႈထႅဝ် (ၵျွင်းၶိဝ်ႊ) လူင်ႈၼႃႈၽၢၼ်ႇတၢင်း ဢႅပ်ႊၽလီႊၶေႊသျိၼ်ႊ DLT Smart Queue ဢမ်ႇၼၼ် ၸႅင်ႈလၢတ်ႈၽၢၼ်ႇတၢင်း https://gecc.dlt.go.th ၶွင်ႁွင်ႈၵၢၼ်လူင်ၾၢႆႇတေႃႉသူင်ႇတၢင်းလိၼ် ဝႆႉၼၼ်ႉ ပေႃးဝႃႈပိုတ်ႇႁဵတ်းဝႂ် ဢၼုၺၢတ်ႈႁေႃႈရူတ်ႉမႃးၸိုင် တေလႆႈႁပ်ႉသုၼ်ႇလႆႈႁဵတ်းၵႂႃႇ ၸွမ်းၼင်ႇၶပ်ႉမၢႆၸႅင်ႈလၢတ်ႈ (ၶိဝ်ႊၵဝ်ႇ) ဢၼ်ၸႅင်ႈလၢတ်ႈဝႆႉယဝ်ႉ၊ လိူဝ်သေၽူႈၸိူဝ်းဢဝ်ၶိဝ်ႊ ဝႆႉသေပူတ်းယႃႉၶိဝ်ႊပႅတ်ႈ-ၼႆယဝ်ႉ။
ၸၢႆးၸီႇရုတ်ႉ ဝိသၢလ်ၸိတ်ႇ ႁူဝ်ပဝ်ႈႁွင်ႈၵၢၼ်ၾၢႆႇတေႃႉသူင်ႇတၢင်းလိၼ် လၢတ်ႈဝႃႈ- ႁႂ်ႈဢွၼ် ၵၼ်ပႂ်ႉတူၺ်းၶၢဝ်ႇ တၢင်းႁွင်ႈၵၢၼ်ၾၢႆႇတေႃႉသူင်ႇ ၸႄႈတွၼ်ႈၽႂ်မၼ်း ဝႃၼႆ။
တေႃႇထိုင်ယၢမ်းလဵဝ် မၢင်ၸႄႈတွၼ်ႈ ယင်းပႆႇယွၼ်ႇယၢၼ်းပၼ် လွင်ႈႁဵတ်းဝႂ်ၶပ်းၶီႇ၊ ၵူၼ်းမိူင်း သမ်ႉလႆႈၶၢမ်ႈၸႄႈဝဵင်းၸႄႈတွၼ်ႈသေ ၵႂႃႇႁဵတ်းတီႈဢၼ်လူင်ပွင်ၸိုင်ႈမၵ်းမၼ်ႈဝႆႉပၼ်။ ၵွပ်ႈၼႆ ၾၢႆႇတေႃႉသူင်ႇ ႁၼ်ထိုင်ဝႃႈ ပေႃးၵႂႃႇၶွၼ်ႈတုမ်ၵၼ်တီႈပၢင်သွၼ် ပၢင်တွပ်ႇ ၵူဝ်တိတ်းၸပ်းတၢင်းပဵၼ်ၵၼ် ဝႃႈၼႆဝႆႉ။
ၵွပ်ႈပိူဝ်ႈၼၼ် ပိူဝ်ႈတႃႇၵူၼ်းၸိူဝ်းဢၼ် ဝႂ်ဢၼုၺၢတ်ႈႁေႃႈရူတ်ႉ မူတ်းဢႃႇယု တင်ႈတႄႇဝၼ်းတီႈ 2/1/2020 ၵႂႃႇတေႃႇထိုင် ဝၼ်းပိုၼ်ၽၢဝ်ႇပူတ်းယႃႉငဝ်းလၢႆးၶိုၵ်ႉၶၵ်ႉ ဢမ်ႇၼၼ် တေႃႇပေႃးမီး ၶေႃႈပိုၼ်ၽၢဝ်ႇသေပိူင်ပိူင်ၶိုၼ်းၼၼ်ႉ ႁႂ်ႈယွၼ်ႇယၢၼ်းပၼ် ၵဵဝ်ႇလွင်ႈၵၢၼ်ၸႂ်ႉတိုဝ်း မၢႆမီႈသေၵမ်းၼႆ ယူႇတီႈ ႁွင်ႈၵၢၼ်ၾၢႆႇတေႃႉသူင်ႇ လႆႈၵပ်းသၢၼ်ၵႂႃႇ တီႈႁွင်ႈၵၢၼ်ၾၢႆႇပလိၵ်ႈ ဢိၵ်ႇႁွင်ႈၵၢၼ်ၾၢႆႇတူၺ်းထိုင်လူလွမ် ၵၢၼ်ၸွႆႈထႅမ်တၢင်းပိူင်ၵူၼ်း (ၶေႃးပေႃးၽေႃး) (คปภ.) ယဝ်ႉ- ဝႃႈၼႆ။
ယၢမ်းလဵဝ် ၾၢႆႇတေႃႉသူင်ႇ လႆႈပၼ်တိုဝ်ႉတၢင်း ႁႂ်းလူင်းလၢႆးၸိုဝ်ႈ ဢဝ်မၢႆၶပ်ႉတၢမ်း(ၵျွင်းၶိဝ်ႊဝႆႉ) တၢင်း ဢွၼ်ႊလၢႆႊ သေ ပေႃးထိုင်ၶၢဝ်းပိုၼ်ၽၢဝ်ႇပူတ်းယႃႉငဝ်းလၢႆးၶိုၵ်ႉၶၵ်ႉယဝ်ႉတႄႉ ၵူၼ်းၸိူဝ်းလူင်းၸိုဝ်ႈဝႆႉၼၼ်ႉ တေမီးသုၼ်ႇလႆႈ ႁဵတ်း/ တေႃႇဝႂ်ၶပ်းၶီႇၵႂႃႇဢွၼ်တၢင်း ဝႃႈၼႆ။
ဢိင်ၶေႃႈမုလ်းသိုဝ်ႇၶၢဝ်ႇထႆး www.chiangmainews.co.th
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ