မိူဝ်ႈဝႃးဝၼ်းတီႈ 23 /4/2026 ယၢမ်းၵၢင်ၶမ်ႈ ၸွမ်ၸိုင်ႈဢူးမိၼ်းဢွင်ႇလၢႆႇ (ဢၼ်လုၵ်ႉတီႈသိုၵ်းမၢၼ်ႈယိုတ်းမိူင်းသေၶိုၼ်ႈမႃးၼၼ်ႉ) ပိုၼ်ၽၢဝ်ႇဢွၵ်ႇ ပဵၼ်တၢင်းၵၢၼ် တင်းသဵင်ႈ 60 ၸႄႈဝဵင်း( ၼႂ်း 9 ၸႄႈတိူင်း လႄႈ ၸႄႈမိူင်း ) ႁူမ်ႈပႃးၸႄႈဝဵင်း ၼႂ်းၼႃႈတီႈ သိုၵ်းရၶႅင်ႇၵုမ်းၵမ်။

ၵွၼ်ႇၼႃႈပၢင်လိူၵ်ႈတင်ႈပွမ်ၼႆႉ သိုၵ်းမၢၼ်ႈယိုတ်းမိူင်း ပိုၼ်ၽၢဝ်ႇၵိုတ်းဝႆႉငဝ်းလၢႆးၶိုၵ်ႉၶၵ်ႉသေ ၸတ်းႁဵတ်း ၶိုင်ပွင်ပၢင်လိူၵ်ႈတင်ႈ ႁႂ်ႈယဝ်ႉတူဝ်ႈ ၶွတ်ႇၽွတ်ႈ ၸုမ်းလူင်ပွင်ၸိုင်ႈ ၸတ်းၶၢႆႉလၢႆႈႁွင်ႈၵၢၼ် လႄႈ ၶႃႈႁၢပ်ႇ ၵၢၼ်ၶုၼ်ႁႂ်ႈယဝ်ႉတူဝ်ႈယဝ်ႉ ၶိုၼ်းသိုပ်ႇပိုၼ်ၽၢဝ်ႇဢွၵ်ႇ သဵၼ်ႈမၢႆၸႄႈဝဵင်း ငဝ်းလၢႆးၶိုၵ်ႉၶၵ်ႉ ထႅင်ႈၵမ်းၼိုင်ႈ ပဵၼ်ၵမ်းဢွၼ်တၢင်းသုတ်း ။

ၽူႈလူင်ႉလႅၼ်ႇၵၢၼ်မိူင်း မိူင်းတႆး လႄႈ မိူင်းႁူမ်ႈတုမ် ထတ်းသၢင်လၢတ်ႈၼႄတီႈၽူႈတွႆႇႁွၵ်ႈဝႆႉဝႃႈ “ၶႃႈထၢင်ႇတႄႉ ပိူင်ယႂ်ႇၶဝ်တေလေႃႇတိုၵ်း ၾၢႆႇရၶႅင်ႇ၊ ၵွပ်ႈမၼ်းလွၵ်ႇငိုတ်ႈ လွင်ႈပၢၼ်ႇပွင်ၽွင်းငမ်းၶဝ်ႁၢဝ်ႈႁႅင်း၊ မိူင်းတႆး ပွတ်းႁွင်ႇတႄႉ ဢေႃးၸႃႇမိူင်းၶႄႇႁူမ်ႇငမ်းၸွႆႈလႄႈ ၶဝ်ဢမ်ႇတၢပ်ႈမႆႈၸႂ်လူင်လၢင်၊ ၵူၺ်းၵႃႈ ဢဝ် 2008 ဝႃႈ သေ တေလႆႈၸႂ်ႉၸုမ်းလွႆ၊ ၶႄႇ ၵဝ်ႈၵၢင်ႉ ထွႆပၼ်ၼႃႈတီႈၸိူဝ်းဢမ်ႇၸႂ်ႈ ၼႂ်းၶွပ်ႇၼႃႈလိၼ်ၽွင်းငမ်းႁင်းၶေႃ ၶဝ်ၼၼ်ႉယူႇ။ လၢတ်ႈဢမ်ႇထွမ်ႇၸိုင် ၸၢင်ႈပဵၼ်ပၢင်တိုၵ်းဢေႃႈ” ဝႃႈၼႆ။

ၼႂ်း 60 ၸႄႈဝဵင်းဢၼ်ပိုၼ်ၽၢဝ်ႇငဝ်းလၢႆးၶိုၵ်ႉၶၵ်ႉထႅင်ႈပွၵ်ႈၵမ်းႁႅၵ်ႈ ဝၢႆးလင်မိၼ်းဢွင်ႇလၢႆႇ လႆႈၶိုၼ်ႈပဵၼ်ၸွမ်ၸိုင်ႈၼႆႉ ဢမ်ႇပႃးၼႃႈတီႈသိုၵ်းဝႃႉ (UWSA)ၵုမ်းၵမ်သေ သမ်ႉသႂ်ႇဝႆႉပႃး ၼႃႈတီႈတပ်ႉသိုၵ်းမိူင်းလႃး NDAA တင်း တပ်ႉသိုၵ်းၵဝ်ႈၵၢင်ႉ MNDAA ၵုမ်းၵမ်ဝႆႉ။

မိူၼ်ၼင်ႇ ၸႄႈဝဵင်းၼမ်ႉတူႈ ၊ မၢၼ်ႈပဵင်း၊ ၵူတ်ႉၶၢႆ၊ ၼမ်ႉၶမ်း၊ သႅၼ်ဝီ၊ ၵုၼ်လူင်၊ ၼမ်ႉသၼ်ႇ၊ မၢၼ်ႈတူင်ႈ၊ ႁူဝ်ပၢင်ႇ၊ ၵၢတ်ႇၵဝ်ႇ (လၢဝ်ႇၵၢႆး)၊ ၵွင်းၸၢင်ႉ (ကုန်းကြမ်း) ၊ မိူင်းမိတ်ႈ ၊ ၵျွၵ်ႉမႄး ၊ သီႇပေႃႉ လႄႈ မိူင်းလႃး ၸဵမ်ၸိူဝ်းၼႆႉ။

ငဝ်းလၢႆးၶိုၵ်ႉၶၵ်ႉၼႆႉ မီးဢႃယုႁိုင် ၶၢဝ်းတၢင်း 90 ဝၼ်း။ ၼႂ်းၸႄႈတိူင်း လႄႈ ၸႄႈမိူင်းဢၼ်ထုၵ်ႇပိုၼ်ၽၢဝ်ႇဝႆႉၼႆႉ ဝဵင်း ၼႂ်းမိူင်းတႆး ပႃးၼမ်လိူဝ်ပိူၼ်ႈသုတ်း ထီႉၼိုင်ႈ၊ ၼမ် သုတ်းတီႈသွင်ၼႆႉ ပဵၼ်ၸႄႈမိူင်းရၶႅင်ႇ ပႃး 14 ၸႄႈဝဵင်း ၊ ၸႄႈမိူင်းၶၢင် ပႃး 5 ၸႄႈဝဵင်း၊ ၸႄႈမိူင်းယၢင်းလႅင် ပႃး 3 ၸႄႈဝဵင်း၊ ၸႄႈမိူင်းယၢင်းၽိူၵ်ႇ ပႃး 2 ၸႄႈဝဵင်း၊ ၸႄႈမိူင်းၶျၢင်း ပႃး 7 ၸႄႈဝဵင်း၊ တိူင်းၸႄႈၵႅင်း ပႃး 8 ၸႄႈဝဵင်း၊ တိူင်းမၵူၺ်း ပႃး 5 ၸႄႈဝဵင်း၊ တိူင်းဝဵင်းလိူဝ်ႇမၢၼ်းတလေး ပႃး 1 ၸႄႈဝဵင်း ။

လိူဝ်ၼၼ်ႉ မိၼ်းဢွင်ႇလၢႆႇ ၸွမ်ၸိုင်ႈယိုတ်းမိူင်း ၸႂ်ႉတိုဝ်းလၵ်းမိူင်း 2008 ၾိင်ႈမိူင်း မတ်ႉတႃ 413 မတ်ႉတႃၽႄ (ခ) ၼၼ်ႉသေ ယုၵ်ႉဢဝ်ၵၢၼ်ၽွင်းငမ်း ၵၢၼ်တႅပ်းတတ်းတြႃး ၵၢၼ်တတ်းသိၼ် ၸႄႈဝဵင်းၸိူဝ်းၺႃးပိုၼ်ၽၢဝ်ႇငဝ်းလၢႆးၶိုၵ်ႉၶၵ်ႉဝႆႉတႃႇ 3 လိူၼ်ၼၼ်ႉ ပၼ်တီႈ ၸွမ်ၸိၵ်းသိုၵ်းမၢၼ်ႈၵေႃႉမႂ်ႇ ဢၼ်တၢမ်တူဝ်မၼ်းမွပ်ႈဢၢပ်ႈဢႃႇၼႃႇဢၢမ်း ၼၢတ်ႈဝႆႉပၼ်ၼၼ်ႉထႅင်ႈ။

ယွၼ်ႉသိုပ်ႇပိုၼ်ၽၢဝ်ႇဝႆႉပႃး ႁႂ်ႈပဵၼ်ပိုၼ်ႉတီႈသိုၵ်းၵုမ်းၵမ်ၽွင်းငမ်းလႄႈ ၸႄႈဝဵင်း 60 တီႈ ၸိူဝ်းပဵၼ်ဝႆႉ ယူႇၼႂ်းငဝ်းလၢႆးၶိုၵ်ႉၶၵ်ႉၼၼ်ႉ ၸွမ်းၼင်ႇလၵ်းမိူင်း 2008 ၸိုင် မီးလိူင်ႈဝႆႉ 23 ဢၼ်လႄႈ တေလႆႈၶိုၼ်ႈလုမ်းတြႃးသိုၵ်းသေ ၼမ်လႄႈဢေႇ တေလႆႈၵူတ်ႇထတ်းၵႂႃႇထႅင်ႈယူႇ ၼႆယဝ်ႉ။

ၾိင်ႈမိူင်း မတ်ႉတႃ 412(က) ၊ မတ်ႉတႃ 413 ၊ မတ်ႉတႃၽႄ (ခ) ဢၼ်ပႃးၼႂ်းလၵ်းမိူင်း 2008 ၼၼ်ႉ ၽွင်းပႃႇတီႇၼူၵ်ႉယုင်း NLD ဢွင်ႇပေႉပၢင်လိူၵ်ႈတင်ႈ ၽူႈၼမ်းၼႂ်းၸုမ်းလူင်ပွင်ၸိုင်ႈ ၼႂ်းလုမ်းသၽႃး ၶတ်းၸႂ်တႃႇယႃႉဢွၵ်ႇပႅတ်ႈ ႁႂ်ႈပဵၼ်တၢင်းၵၢၼ်ယူႇသေတႃႉ သဵင်ၵၢင်ၸႂ် ၽူႈတႅၼ်းၽွင်းသၽႃးၸိူဝ်းၵမ်ႉထႅမ် ႁၼ်လီတႃႇယႃႉဢွၵ်ႇပႅတ်ႈၼၼ်ႉ ဢမ်ႇပူၼ်ႉ 75% လႄႈ ဢမ်ႇဢွင်ႇမၢၼ်မႃး။