ၵူၼ်းၸိူဝ်းမီးၾၢင်ႁၢင်ႈ/ထုၵ်ႇထၢင်ႇထိူမ်ဝႃႈမီးၸိူဝ်ႉမႅင်းၶူဝ်ႊဝိတ်ႉ19 သေ ၵုမ်းတူဝ် ၵူတ်ႇထတ်း တီႈႁူင်းယႃ ဝဵင်းလိူဝ်ႇ (မၼ်းတလေး) ဝႆႉယူႇၼၼ်ႉ ၼႂ်းၶၢဝ်းတၢင်း 2 ဝၼ်းၵွႆး မီးၵူၼ်းတၢႆၵႂႃႇ 12 ၵေႃႉ။
ဝၼ်းတီႈ 24/4/2020 ၼၼ်ႉဝၼ်းလဵဝ်ၵူၺ်းတၢႆ 7 ၵေႃႉ။ ဝၼ်းတီႈ 25/4/2020 သမ်ႉတၢႆထႅင်ႈ 5 ၵေႃႉ။ ၵူၼ်းဢၼ်တၢႆၵႂႃႇ တင်း 12 ၵေႃႉ ၼႆႉ ပဵၼ်ၶေႃးၸဵပ်း၊ ဢႆ၊ လူမ်းမႆႈၶိုၼ်ႈႁႅင်းလႄႈ ၶဝ်ႈၸင်ႇမႃး ၶိုၼ်ႈႁူင်းယႃ။ ဢၼ်တၢႆ ၵႂႃႇ 12 ၵေႃႉ ၼၼ်ႉ တႃႇ ၵေႃႉ ၵူတ်ႇထတ်းတူၺ်း လႆႈႁူႉတႅတ်ႈတေႃး ဢမ်ႇတၢႆ ယွၼ်ႉတၢင်းပဵၼ်ၶူဝ်ႊဝိတ်ႉ၊ ၵိုတ်း တႃႇ 5 ၵေႃႉ တိုၵ်ႉထတ်းတူၺ်းဝႆႉယူႇ – လႆႈႁူႉၶၢဝ်ႇၼင်ႇၼႆ။
တွၵ်ႊတိူဝ်း ၸုၸုတူၺ်း ၽူႈၵွၼ်းႁူင်းယႃ တီႈဝဵင်းလိူဝ်ၼၼ်ႉ လၢတ်ႈတီႈသိုဝ်ႇၶၢဝ်ႇ 7 Day ဝႃႈ – ၵူၼ်း ၸိူဝ်းတၢႆၵႂႃႇၸိူဝ်းၼႆႉ မီးတၢင်းပဵၼ်ပွတ်ႇ၊ တပ်း၊ တႂ် လၢႆလၢႆ၊ ဢမ်ႇၸႂ်ႈဝႃႈ တၢႆ ယွၼ်ႉ တၢင်းပဵၼ် ၶူဝ်ႊဝိတ်ႉ ၼင်ႇၵဝ်ႇ။ ၸိူဝ်းတၢႆ 7 ၵေႃႉဝၼ်းၵမ်းဢွၼ်တၢင်းၼၼ်ႉ သူင်ႇၵူတ်ႇထတ်းတၢင်းပဵၼ်ဝႆႉ ၶေႃႈတွပ်ႇဢွၵ်ႇ မႃးတႃႇ 4 ၵေႃႉဝႃႈဢမ်ႇမီးတၢင်းပဵၼ်။ ထူၼ်ႈသွင်ၵေႃႈ ၶေႃႈတွပ်ႈဢွၵ်ႇမႃးတႃႇ 2 ၵေႃႉ ဢမ်ႇမီးၸိူဝ်ႉမႅင်း၊ ဢၼ်ၵူတ်ႇထတ်းပႆႇယဝ်ႉ တိုၵ်ႉယူႇတႃႇ 5 ၵေႃႉ ။
တီႁူင်းယႃၵူၼ်းမိူင်း ဝဵင်းလိူဝ်ႇၼၼ်ႉ ၵူၼ်းဢၼ်ပဵၼ်တၢင်းပဵၼ် ပွတ်ႇ၊ တပ်း သေ ထုၵ်ႇမၢႆတူဝ် ပႂ်ႉတူၺ်းၶူဝ်ႊဝိတ်ႉ 19 မီး 300 ပၢႆ။ ၼႂ်းၼၼ်ႉတၢႆၵႂႃႇယဝ်ႉ 44 ၵေႃႉ။ ဢၼ်ယႃၶႅၼ်းသေ လူင်းႁူင်းယႃၵႂႃႇမီး 180 ပၢႆ။ ၸွမ်းၼင်ႇၾၢႆႇပၢႆးယူႇလီ ပိုၼ်ၽၢဝ်ႇဝႆႉတႄႉ တီႈဝဵင်းလိူဝ်ႇ မီးၵူၼ်းၸပ်းၸိူဝ်ႉမႅင်းၶူဝ်ႊဝိတ်ႉ 3 ၵေႃႉ။
