ၵူၼ်းပဵၼ်ၵေႃႉၼိုင်ႈ လူမ်းမႆႈၶိုၼ်ႈမိူၼ်ၾၢင်ႁၢင်ႈတိတ်းၸပ်းတၢင်းပဵၼ် ၶူဝ်ႊဝိတ်ႊ – 19 လႄႈ မေႃယႃ တီႈသီႇပေႃႉ ၵုမ်းၶင်တူဝ်မၼ်းၸၢႆးသေ ပႂ်ႉတူၺ်းငဝ်းလၢႆးဝႆႉယူႇ ။
ဝၼ်းတီႈ 16/3/2020 ၽူႈၸၢႆးၵေႃႉၼိုင်ႈ ၵႂႃႇႁဵတ်းၵၢၼ် တၢင်းဝဵင်းႁူၺ်ႈၸူင်ႉ( ဟွေကျိုးမြို့) ၸႄႈမိူင်းၵႂၼ်ႊတူင်ႊ ၸိုင်ႈ မိူင်းၶႄႇသေပွၵ်ႈမႃးၶိုၼ်းဝဵင်းသီႇပေႃႉ၊ ၼၢဝ် လူမ်းမႆႈၶိုၼ်ႈသုင်လႄႈ မေႃယႃ ၵၵ်းတူဝ်ဝႆႉတီႈႁူင်းယႃ သေ ပႂ်ႉတူၺ်းငဝ်းလၢႆး တၢင်းပဵၼ်မၼ်းၸၢႆးဝႆႉယူႇ ဝႃႈၼႆ။
Dr. ၼၼ်ႇတႃႇဝိၼ်း ၽူႈၵွၼ်းႁူင်းယႃ သီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “ မၼ်းၸၢႆးလုၵ်ႉမိူင်းၶႄႇ ပွၵ်ႈမႃးထိုင်သီႇပေႃႉ မိူဝ်ႈဝႃး ။ မၼ်းၸၢႆးမီးလူမ်းမႆႈယူႇၵေႃႈဢမ်ႇမႃးႁႃမေႃ။ ၸဝ်ႈလူတ်ႉၶိူင်ႈႁပ်ႉၸၢင်ႈ ဢၼ်တၢင်ႇမၼ်းမႃးႁိူၼ်းၼၼ်ႉ ပွင်ႇၸူးပၼ်မေႃယႃလႄႈ မေႃယႃလႆႈၵႂႃႇၺပ်ႉတူဝ်မၼ်းမႃးၵူတ်ႇထတ်းတီႈႁူင်းယႃ။ တေႃႈလဵဝ် လႆႈဢဝ်မၼ်းၸၢႆး ဝႆႉႁင်းၶေႃသေ ပႂ်ႉတူၺ်းတၢင်းပဵၼ်မၼ်းၸၢႆးယူႇ” ဝႃႈၼႆ။
မိူဝ်ႈဝႃး ဝၼ်းတီႈ 16/3/2020 ယၢမ်းၵၢင်ၶမ်ႈ 7 မူင်း မၼ်းၸၢႆးၶီႇၵႃး Express ႁပ်ႉၸၢင်ႈလမ်းၼိုင်းသေ ႁွတ်ႈၽႅဝ် မႃး သီႇပေႃႉ ဝႃႈၼႆလႄႈ ယၢမ်းလဵဝ်ၼွၵ်ႈလိူဝ် ၵေႃႉပွၵ်ႈမိူင်းၶႄႇမႃးၼၼ်ႉယဝ်ႉ ၸဝ်ႈ ရူတ်ႉၶိူင်ႈႁပ်ႉၸၢင်ႈလႄႈ ၵူၼ်းၼႂ်းမုင်ႉႁေႃႁိူၼ်း ၸဝ်ႈရူတ်ႉၶိူင်ႈ ၼၼ်ႉ မေႃယႃႁႂ်ႈယူႇဝႆႉၼႂ်းႁိူၼ်းၵူၺ်းၵွၼ်ႇ။ ပႆႇႁႂ်ႈၵႂႃႇတၢင်းလႂ် ၾၢႆႇပၢႆးယူႇလီတေပႂ်ႉတူၺ်းငဝ်းလၢႆးၵွၼ်ႇဝႃႈၼႆ။
Dr. ၼၼ်ႇတဝိၼ်းလၢတ်ႈဝႃႈ ယူႇတီႈၵူၼ်းမိူင်းသင်ဝႃႈထူပ်းႁၼ် ၵူၼ်းၵႂႃႇႁဵတ်းၵၢၼ်ၼွၵ်ႈမိူင်းပွၵ်ႈမႃး ဢမ်ႇၼၼ် ႁၼ်မႅၼ်ႈၵူၼ်းဢၼ်လီထၢင်ႇထိူမ် မိူၼ်ၵူၼ်းၸပ်းတၢင်းပဵၼ်ၸိူဝ်ႉမႅင်းၸိုင် ႁႂ်ႈၼႅတ်ႈပွင်ႇၶၢဝ်ႇၸူးထိုင် တီႈႁွင်ႈ ၵၢၼ်ပၢႆးယူႇလီသေၵမ်း- ဝႃႈၼႆ ။
တေႃႈလဵဝ် ၵူၼ်းၸပ်းတၢင်းပဵၼ်ၶူဝ်ႊရူဝ်ႊၼႃႊ တၢင်းလုမ်ႈၾႃႉၼႆႉ မီး 182,511 ၵေႃႉ၊ တၢႆ 7,415 ၵေႃႉ သိုဝ်ႇၶၢဝ်ႇ South China Morning Post ဢွၵ်ႇဝႆႉ။