ၵူၼ်းဝၢၼ်ႈၵုင်းၺွင်ႇၽႃသႃး ၸိူဝ်းပၢႆႈမႃးသွၼ်ႈတီႈဝတ်ႉလွႆၸၢၵ်ႈမိူင်းၵိုင် ပႆႇၸၢင်ႈပွၵ်ႈႁိူၼ်း

ၵူၼ်းပၢႆႈၽေးသိုၵ်း တီႈႁၢမ်းငၢႆး တိုၵ်ႉၵိုတ်းထႅင်ႈယူႇ  ယင်းပႆႇပွၵ်ႈသဵင်ႈ ယွၼ်ႉငဝ်းလၢႆးၼႂ်းပိုၼ်ႉတီႈ ပႆႇၼိမ်လီ။

ဝၼ်းတီႈ 6/3/2020 ၵူၼ်းပၢႆႈၽေးသိုၵ်း ဝၢၼ်ႈၵုင်းၺွင်ႇၽႃသႃး၊ ဝၢၼ်ႈၸၢမ်ပွင်ႇလႄႈ ဝၢၼ်ႈႁူဝ်ၼွင် ႁူဝ်ၵူၼ်း 300 ပၢႆ ဢၼ်မႃးသွၼ်ႈဝႆႉတီႈဝတ်ႉလွႆၸၢၵ်ႈ တင်း ဝတ်ႈၵုင်းၸူင် ၼႂ်းဢိူင်ႇႁၢမ်းငၢႆး ၸႄႈဝဵင်းမိူင်းၵိုင်ၼၼ်ႉ ၶိုၼ်းဢွၼ်ၵၼ်ပွၵ်ႈ ႁိူၼ်းၽႂ်မၼ်းၵမ်ႈၽွင်ႈယဝ်ႉ။  ၵူၺ်းၵႃႈ တီႈဝတ်ႉလွႆၸၢၵ်ႈတႄႉ ၵိုတ်းဝႆႉ ၵူၼ်းထဝ်ႈ လႄႈ လုၵ်ႈဢွၼ်ႇ ၵမ်ႈၽွင်ႈ မွၵ်ႈ 20 – 30 ၵေႃႉ ၼႆႉ ဝႃႈၼႆ။

ၸၢႆးထုၼ်း ၸုမ်းၵူၼ်းၼုမ်ႇၶႅၵ်ႇလီပၢင်ၸႃႉ ႁၢမ်းငၢႆးလၢတ်ႈတီႈၽူႈတွႆႇႁွၵ်ႈဝႃႈ “ တီႈဝတ်ႉလွႆၸၢၵ်ႈတႄႉ တိုၵ်ႉ ၵိုတ်းဝႆႉထႅင်ႈဢိတ်းၼိုင်ႈၶႃႈ မွၵ်ႈႁူဝ်ၵူၼ်း 20-30 ၵေႃႉၼႆႉ။ ယွၼ်ႉငဝ်းလၢႆး ၼႂ်းပိုၼ်ႉတီႈ ပႆႇၼိမ်သဝ်း တိုၵ်ႉမီး သိုၵ်း မၢၼ်ႈ တူင်ႉၼိုင် ၶဝ်ႈဢွၵ်ႇဝၢၼ်ႈယူႇ၊ မိူဝ်ႈဝႃး ၵၢင်ၼႂ်ၵေႃႈ သဵင်ၵွင်ႈတႅၵ်ႇထႅင်ႈၵမ်းၼိုင်ႈသေ ထိုင်ဝၢႆးဝၼ်းမႃး ၵူၼ်းဝၢၼ်ႈႁဝ်း ၸင်ႇဢွၼ်ၵၼ်ပွၵ်ႈမိူဝ်းၵမ်ႈၽွင်ႈၶႃႈ” ဝႃႈၼႆ။

ၵူၼ်းပၢႆႈၽေးသိုၵ်း ဢၼ်တိုၵ်ႉၵိုတ်းဝႆႉယူႇ တီႈဝတ်ႉလွႆၸၢၵ်ႈၼၼ်ႉ ပဵၼ်ၵူၼ်းဝၢၼ်ႈၵုင်းၺွင်ႇၽႃသႃး ဝႃႈၼႆ။

ၸၢႆးပၢင်ႇ ၽူႈတႅၼ်းသၽႃးၶဵတ်ႇလိူၵ်ႈတင်ႈမၢႆ 1 ၸႄႈဝဵင်းမိူင်းၵိုင် လၢတ်ႈတီႈၽူႈတွႆႇႁွၵ်ႈဝႃႈ “ ၸိူဝ်းၵိုတ်းဝႆႉပႆႇၸၢင်ႈမိူဝ်းၼႆႉ မၼ်းပဵၼ်ၵူၼ်းထဝ်ႈလႄႈ လုၵ်ႈဢွၼ်ႇ။ ၸိူဝ်း  ၵႂႃႇမႃး ပၢႆႈယၢပ်ႇ ၶၢႆႉယၢပ်ႇၼၼ်ႉၸိူဝ်းၼၼ်ႉၶႃႈဢေႃႈ။ ဢၼ်ၵိုတ်းဝႆႉ  ပႆႇၸၢင်ႈမိူဝ်းတႄႉ ပဵၼ်ၵူၼ်းဝၢၼ်ႈၵုင်းၺွင်ႇၽႃသႃး။ ပႂ်ႉတူၺ်း ငဝ်းလၢႆးထႅင်ႈ 2-3 ဝၼ်း ပေႃးဝႃႈငဝ်းလၢႆးၼိမ်လီ ၵတ်းယဵၼ်ယဝ်ႉၼႆၸိုင် ၸင်ႇတေဢွၼ်ၵၼ်ပွၵ်ႈမိူဝ်းၶႃႈ” – ဝႃႈၼႆ။

ၵဵဝ်ႇၵပ်းလွင်ႈၼႆႉ မိူဝ်ႈဝႃးဝၼ်းတီႈ 6/3/2020 ယၢမ်းဝၢႆးဝၼ်း ၾၢႆႇတပ်ႉသိုၵ်းလူင်ပွင်ၸိုင်ႈလၢတ်ႈတီႈၽွင်းတႅၼ်းဝႃႈ တွၼ်ႈတႃႇၵူၼ်းဝၢၼ်ႈၵုင်းၺွင်ႇၽႃသႃးတႄႉ ပႆႇၸၢင်ႈပၼ်မိူဝ်း ယွၼ်ႉပိူဝ်ႈငဝ်းလၢႆးပႆႇလီ ဝႃႈၼႆ။

ၵူၼ်းဝၢၼ်ႈၵုင်းၺွင်ႇၽႃသႃး ၵူၼ်းၼုမ်ႇၵမ်ႈၽွင်ႈ  ဢွၼ်ၵၼ်ပွၵ်ႈမိူဝ်းတူၺ်းႁိူၼ်း မိူဝ်ႈဝႃး ဝၼ်းတီႈ 6/3/2020 ယၢမ်းဝၢႆးဝၼ်း 4 မူင်း  ။

ၵူၼ်းပၢႆႈၽေးသိုၵ်း ဝၢၼ်ႈၵုင်းၺွင်ႇ ဢၼ်သွၼ်ႈတီႈ ဝတ်ႉၵုင်းၸူင်သေ ပွၵ်ႈမိူဝ်းထိုင်ဝၢၼ်ႈၶိုၼ်းၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ “ တီႈဝတ်ႉ ၵုင်းၸူင်တႄႉ ဢမ်ႇမီးၽႂ်ယဝ်ႉၶႃႈ။ ႁဝ်းၶႃႈ ဢွၼ်ၵၼ်ပွၵ်ႈၶိုၼ်းႁိူၼ်းမူတ်းယဝ်ႉ။ ၽႅဝ်ႁိူၼ်းၶိုၼ်းမိူဝ်ႈဝႃးၵၢင်ၶမ်ႈၶႃႈ။  ၵူၺ်းၵႃႈ ပႆႇႁတ်းၵႂႃႇတၢင်းလႂ်တႄႉတႄႉၶႃႈ တေႃႈလဵဝ် သိုၵ်းမၢၼ်ႈ တိုၵ်ႉမီးယူႇၼႂ်းဝၢၼ်ႈႁဝ်းၼႆႉယူႇၶႃႈ”ဝႃႈၼႆ။

ဢိင်ၼိူဝ်သိုၵ်းလူင်ပွင်ၸိုင်ႈမၢၼ်ႈတင်း ၶွင်ႇသီႇဢဝ်ၶိုၼ်းၸိုင်ႈတႆး RCSS/SSA ပဵၼ်ပၢင်တိုၵ်းၵၼ် တၢင်းပွတ်းလွႆတွၼ်း မိူဝ်ႈဝၼ်းတီႈ 27/2/2020 ၼၼ်ႉႁၢဝ်ႈႁႅင်းသေ ၵူၼ်းဝၢၼ်ႈ ဢၼ်ယူႇၸွမ်းတိၼ်လွႆတွၼ်း ဢွၼ်ၵၼ်ပၢႆႈဢွၵ်ႇမႃး ၼပ်ႉႁူဝ် ပၢၵ်ႇတီႈဢိူင်ႇႁၢမ်းငၢႆးသေဢမ်ႇၵႃး ယဝ်ႉၵေႃႈ သိုၵ်းလူင်ပွင်ၸိုင်ႈမၢၼ်ႈ ၶိုၼ်ႈလေႃႇယိုဝ်းထႅင်ႈ တီႈလွႆႁူၼ်းသေ ၵူၼ်း ဝၢၼ်ႈပွတ်းတိၼ်လွႆၼၼ်ႉ ဢွၼ်ၵၼ်ပၢႆႈၶဝ်ႈ တၢင်းၵေးသီး ၼပ်ႉႁူဝ်ပၢၵ်ႇထႅင်ႈ ဝႃႈၼႆ။