ၽွင်းလူင်ၾၢႆႇငိုၼ်းတွင်း ပိုၼ်ၽၢဝ်ႇႁႂ်ႈၶၢႆႉဝၼ်းၸတ်းပွႆးၾိင်ႈထုင်းယွၼ်ႉၼႂ်းမိူင်းတႆး တႃႇႁႄႉၵင်ႈတၢင်းပဵၼ်ၸိူဝ်ႉမႅင်း ဝူႊႁၢၼ်ႊ ဢမ်ႇၼၼ် ၶူဝ်ႊရူဝ်ႊၼႃႊ ဢမ်ႇၼၼ် ၶူဝ်ႊဝိတ်ႉ 19 ။

မိူဝ်ႈၼႆႉ ဝၼ်းတီႈ 2/3/2020 ယူႇတီႈဢူးၸူဝ်းၺုၼ်ႉ ၽွင်းလူင် ၾၢႆႇၽၼ်ႊၻႃႊငိုၼ်းတွင်းလႄႈ ၶူင်းၵၢၼ် ၸႄႈမိူင်းတႆး လူင်းလၢႆးမိုဝ်း   ပိုၼ်ၽၢဝ်ႇဝႆႉဝႃႈ – တေႃႈလဵဝ်ၼႆႉ တၢင်းပဵၼ်ၶူဝ်ႊရူဝ်ႊၼႃႊ ဢၼ်ပဵၼ်ၸိူဝ်ႉမႅင်း တိတ်းၽႄႈငၢႆႈ ဢၼ်ပဵၼ်တီႈ မိူင်းဝူႊႁၢၼ်ႊ မိူင်းၶႄႇၼၼ်ႉ ၽႄႈဝႆႊလၢမ်းတူဝ်ႈလုမ်ႈၾႃႉယဝ်ႉလႄႈ  ၼင်ႇႁိုဝ် ပေႃးတေၵႅတ်ႇၶႄႁႄႉၵင်ႈလႆႈၼၼ်ႉ ပၢင်ပွႆးၾိင်ႈႁိတ်ႈႁွႆး ၼႂ်းမိူင်းတႆးၼၼ်ႉ ႁႂ်ႈ ၵိုတ်းယင်ႉဝႆႉၵမ်းၼိုင်ႈ ဢမ်ႇၼၼ် ႁႂ်ႈၶၢႆႉဝၼ်းမၼ်းပႅတ်ႈသေၵွၼ်ႇ ဝႃႈၼႆ။

ၼႂ်းလိၵ်ႈပိုၼ်ၽၢဝ်ႇ ၾၢႆႇပၢႆးယူႇလီလႄႈ လဵၼ်ႈႁႅင်း ဢွၵ်ႇဝႆႉဝႃႈ “ၼႂ်းၽွင်းယၢမ်းတေႃႈလဵဝ်ၼႆႉ သင်ပဵၼ်လႆႈ ႁႂ်ႈငိူင်ႉဝႄႈ ပၼ် ဢွင်ႈတီႈၵူၼ်းၵိုၼ်းလႄႈ  ပွႆးလၢမ်းသေၵမ်း။  ၵူဝ်လႆႈတိတ်းၸပ်းၵၼ်ၽႄႈလၢမ်း” ဝႃႈၼႆ။

တေႃႈလဵဝ် မိူင်းၼႂ်းႁူမ်ႈတုမ်ၼႆႉ ပႆႇၵူတ်ႇထတ်းႁၼ်မႅၼ်ႈ ၵူၼ်းၸပ်းတၢင်းပဵၼ် ဝႃႈၼႆသေတႃႉ  ၼႂ်းလုမ်ႈၾႃႉၼႆႉ ၽႄႈလၢမ်းထိုင်  70 မိူင်းပၢႆယဝ်ႉ ။ ၵူၼ်းလုတၢႆယွၼ်ႉတၢင်းပဵၼ်ၼႆႉ ဝၼ်းတီႈ 2/3/2020 ၼႆႉမီးၵႂႃႇ 3000 ပၢႆယဝ်ႉဝႃႈၼႆ။