တႆးၼႆႉပၢၼ်သိုပ်ႇပၢၼ် ပဵၼ်ၵူၼ်းၶိူဝ်းယဵၼ်ႇငႄႈလႄႈမီးၾိင်ႈထုင်းဢၼ်လီႁၵ်ႉမႃးတႃႇသေႇ။ ၾၢႆႇၼိုင်ႈတႆးၼႆႉ ယုမ်ႇယမ်ၼိူဝ်သင်ၵေႃႈမီးလွင်ႈမၼ်ႈၵိုမ်း။ ၵွပ်ႈၼႆလႄႈ ဢိင်ၼိူဝ်လွင်ႈယုမ်ႇယမ်သေၵေႃႈမီးပၢင်ၵႅဝ်ႈ (ဢၼ်တႆး ႁွင်ႉဝႃႈပွႆး) သႅၼ်းလဵၵ်ႉသႅၼ်းယႂ်ႇ ၼၼ်ႉၵေႃႈၶႂ်ႈဝႃႈမီးၵူႈလိူၼ်။   ပွႆးသႅၼ်းလဵၵ်ႉၼႆႉ  တူဝ်ယၢင်ႇမၼ်း မိူၼ်ၼင်ႇ ၶၢဝ်းၾူၼ် ၾူၼ်ဢမ်ႇတူၵ်းလႄႈႁဵတ်းပွႆးပွႆႇၼူၾႆးယွၼ်းၾူၼ်  ပွႆးလၵ်ႉၶူၵ်ႉမႄႈမၢႆႈယွၼ်းၾူၼ် ။ ပွႆးယႂ်ႇသမ်ႉ မိူၼ်ၼင်ႇပွႆးဢွၵ်ႇဝႃႇ ပွႆးပီမႂ်ႇ ပွႆးသၢင်ႇလွင်း ၸိူဝ်းၼႆႉတႄႇၵႂႃႇ မီးထႅင်ႈတင်းၼမ် ။  ပွႆးဢၼ်တႆးၸတ်းၵူႈဢၼ်ၼႆႉ ဢိင်ၼိူဝ်လွင်ႈယုမ်ႇယမ်သေ မီးတီႈပွင်ႇမၼ်းၵူႈဢၼ်။ ၵူၺ်းၵႃႈ ၼႂ်းၵၢပ်ႈပၢၼ်ဝၼ်းမိူဝ်ႈၼႆႉ ဢိင်ၼိူဝ်လွင်ႈဝၢၼ်ႈ မိူင်းလူႉသေ တႆးလႆႈပၢႆႈလႆႈယၢၼ်ပိုၼ်ႉတီႈ။ ၾိင်ႈထုင်းဢၼ်ႁၢႆၵေႃႈႁၢႆ။ ဢၼ်ပေႃႇမႂ်ႇၵေႃႈမီး။ ၵွပ်ႈၼႆမၢင်တီႈ ၸတ်းပွႆးယူႇသေတႃႉ ၽွၼ်းလီလႄႈ ၽွၼ်းၸႃႉမၼ်းၶူၼ်းၶဝ်းလေႃးလႄးၵၼ် ။ ပွႆးမၢင်ဢၼ်ၸတ်းယူႇၵေႃႈဢမ်ႇႁူႉတီႈပွင်ႇမၼ်းၵေႃႈမီး။ ၵွပ်ႈၼႆ  မိူဝ်ႈလႂ်မိူဝ်ႈႁဵတ်းပွႆးယူႇၵေႃႈ ႁႂ်ႈမီးၼမ်ႉတွၼ်းၽွၼ်းလီတႃႇတူင်ႇၵူၼ်း ၊ ၸင်ႇတေ ပဵၼ်ပွႆးဢၼ်မီးၵႃႈၶၼ်လႄႈ မီးတီႈပွင်ႇ ၼႆ ႁဝ်းၶႃႈထုၵ်ႇလီဢွၼ်ၵၼ်သႂ်ႇၸႂ် ။  

ၼႂ်းလူၵ်ႈလုမ်ႈၾႃႉလူင်ၼႆႉ တူၺ်းၵူၼ်းၶိူဝ်းလႂ်ၵေႃႈ မီးၾိင်ႈငႄႈႁိတ်ႈႁွႆးႁင်းၽႂ်မၼ်း ၊ ၽႂ်ၵေႃႈ ၵူဝ်မၼ်းႁူင်ႈမၼ်းႁၢႆလႄႈ ဢွၼ်ၵၼ်ႁၵ်ႉသႃပႂ်ႉပႃးထိုင် ႁူဝ်ပၢၵ်ႇပီ 21 ၼႆႉ။

ၾိင်ႈထုင်းဢၼ်ဝႃႈၼႆႉ ဢမ်ႇမီးၽႂ်တဵၵ်းတဵင်ၵၼ်ႁဵတ်း ဢမ်ႇလႆႈယူႇၼႂ်းပိူင်ဢၼ်တေလႆႈတဵၵ်းၸႂ်ႉၵၼ်ႁဵတ်း ။ ၵူၺ်းၵႃႈဝႃႈ မၼ်းပဵၼ်လွင်ႈယုမ်ႇယမ် လိုၵ်ႉလမ်ႇဢၼ်ယူႇၼႂ်းမၢၵ်ႇဢူၵ်းႁူဝ်ၸႂ်ၶိူဝ်းၵူၼ်းၶိူဝ်းလႂ်ၶိူဝ်းၼၼ်ႉဝႆႉ။

ၾိင်ႈထုင်းၼႆႉ ပဵၼ်ၵူၼ်းလုၼ်ႈၵဝ်ႇ(ပူႇမွၼ်ႈၼၢႆးယႃႈ) ႁဵတ်းဝႆႉသေ ၵူၼ်းလုၼ်ႈမႂ်ႇ(လုၵ်ႈလၢၼ်လိၼ်) မႃးပုတ်ႈတႅၼ်းသေႁဵတ်းၵႂႃႇၶပ်ႉၶပ်ႉတၢမ်းတၢမ်း ။ ဢိင်ၼိူဝ်ငဝ်းလၢႆးသေ  ၾိင်ႈထုင်းဢၼ်သႅၼ်းႁုၼ်ႈမႂ်ႇႁဵတ်းၼၼ်ႉ ၸၢင်ႈမေႃပိူင်ႈလႄႈ ၸၢင်ႈမေႃ လၢၵ်ႇလၢႆးၵႂႃႇထႅင်ႈၸိူဝ်ႉၼိုင်ႈ ပိူင်ၼိုင်ႈ ။

ၼႂ်းၵႃႈၾိင်ႈထုင်း ၵူႈသႅၼ်းသႅၼ်းၼၼ်ႉ ပေႃးဢဝ်ၽူႈၶူၼ်ႉၶႂႃႉၶဝ်ဝႃႈ ၸႅၵ်ႇလႆႈပဵၼ် 2 သႅၼ်း။ သႅၼ်းၼိုင်ႈ ပဵၼ်ၾိင်ႈထုင်းဢၼ်ယိပ်းၵမ်လႆႈ ၊ ထႅင်ႈသႅၼ်းၼိုင်ႈသမ်ႉ ဢမ်ႇၸၢင်ႈယိပ်းၼႄၵၼ်လႆႈ။

ၾိင်ႈထုင်း ဢၼ်ယိပ်းၵမ်လႆႈဢၼ်ဝႃႈၼႆႉ တူဝ်ယၢင်ႇမၼ်း မိူၼ်ၼင်ႇ ၶိူင်ႈမႆႉၶိူင်ႈမိုဝ်းဢၼ်ယၢမ်ႈၸႂ်ႉသွႆႈမႃးပၢၼ်သိုပ်ႇပၢၼ် ၸဵမ်ဢဝ်ၶိူင်ႈႁွႆႈၶိူင်ႈတိုဝ်း ၊ ၶိူင်ႈၸႂ်ႉၶူဝ်းသွႆ ၊ ၶူဝ်းၼုင်ႈတၢင်းဝႆ လႄႈ ၶိူင်ႈႁႆႇတိုင်ႈ ၸိူဝ်းၼႆႉ ။

ၾိင်ႈထုင်း ဢၼ်ဢမ်ႇယိပ်းၵမ်လႆႈသမ်ႉ မိူၼ်ၼင်ႇ လွင်ႈယုမ်ႇယမ်ၼပ်ႉထိုဝ် ၊ ၾိင်ႈၵိူဝ်းယမ်သႃႇသၼႃႇ ၊ လွင်ႈယဵၼ်ႇငႄႈ ၸဵမ်ၸိူဝ်းၼႆႉ။

ၼႂ်းၵႃႈ ၾိင်ႈထုင်းႁိတ်ႈႁွႆးၸိူဝ်းၼၼ်ႉ ယႅၵ်ႈဢွၵ်ႇလႆႈထႅင်ႈပဵၼ် 2 တွၼ်ႈ ၊ တွၼ်ႈၼိုင်ႈ ပဵၼ်ၾိင်ႈထုင်းဢၼ်ယႂ်ႇလူင် မိူၼ်ၼင်ႇ ဢၼ်ယၢမ်ႈမီးမႃးပီယၢဝ်းၶၢဝ်းႁိုင် ၊ ဢၼ်မီးၵူၼ်းတင်းၼမ်ႁူမ်ႈၵၼ်ယုမ်ႇယမ်ထိုင်ယၢမ်းလဵဝ်  တူဝ်ယၢင်ႇမၼ်း  ၽႃသႃၵႂၢမ်းလၢတ်ႈလႄႈ လွင်ႈၵိူဝ်းယမ် ။

 တွၼ်ႈသွင်သမ်ႉ  ပဵၼ်ၾိင်ႈထုင်းသႅၼ်းလဵၵ်ႉ မိူၼ်ၼင်ႇ ၾိင်ႈဢၼ်ယွႆႈယႅမ်း ဢၼ်ႁဵတ်းၸွမ်းၼႂ်းတူင်ႇၵူၼ်း ဢွင်ႈတီႈလႂ် တီႈၼၼ်ႈ တူဝ်ယၢင်ႇမၼ်း ၾိင်ႈၵိၼ်ယႅမ်ႉ ၊ လွင်ႈၼုင်ႈဝႆ ၼႂ်းပိုၼ်ႉတီႈ ၽႂ်မၼ်း လႄႈ ပၢင်ႁၢင်ႈႁႅၼ်း လွင်ႈၵိူဝ်းယမ်ၼႂ်းပိုၼ်ႉတီႈၽႂ်မၼ်း တူဝ်ယၢင်ႇမၼ်း ၼႂ်းဝၢၼ်ႈတႆးႁဝ်း ၵႆႉမီး ၾိင်ႈမႄးဝၢၼ်ႈမႄးႁိူၼ်း (ဢၼ်လွတ်ႈ ႁေႃးထမ်းသေလိုပ်ႈပႅတ်ႈလွင်ႈဢမ်ႇလီ) ၊ ၾိင်ႈၵိူဝ်းယမ်ၽီ ၸိူဝ်းၼႆႉ။

လွင်ႈဢၼ်လၢတ်ႈမႃးၸိူဝ်းၼႆႉ ပဵၼ်ၾိင်ႈငႄႈၾိင်ႈထုင်း ဢၼ်ၵူၼ်းၵူႈၶိူဝ်းၼႂ်းလုမ်ႈၾႃႉမီး ဢမ်ႇၵွမ်ႉမီးတႆးၵူၺ်း။  

ၾိင်ႈၶိူဝ်းလႂ်ၶိူဝ်းၼၼ်ႉၼႆႉ မၼ်းၵမ်ႉထႅမ်ၼႂ်းၶၵ်ႉတွၼ်ႈႁၵ်ႉသႃပႂ်ႉပႃးၸိူဝ်ႉၸၢတ်ႈၽႂ်မၼ်းဝႆႉလႄႈ ပဵၼ်ၶၵ်ႉတွၼ်ႈ ဢၼ်လမ်ႇလွင်ႈယူႇၼႆ ၽႂ်ဢမ်ႇထဵင်လႆႈ ။

ၸင်ႇၼၼ်လႄႈ ၶၢဝ်းလႂ်ၶၢဝ်းၼၼ်ႉ ၼင်ႇႁိုဝ်ၾိင်ႈဢမ်ႇႁၢႆ ၶိူဝ်းဢမ်ႇၶၢတ်ႇၼၼ်ႉ တၵ်းလႆႈပၼ်ႇ ပုတ်ႈၵၼ် ၸတ်း ႁဵတ်းပွႆးၾိင်ႈငႄႈၾိင်ႈထုင်း ။ ၼိုင်ႈၵေႃႈ ႁႂ်ႈၵူၼ်းသႅၼ်းႁုၼ်ႈမႂ်ႇ ႁပ်ႉႁူႉၾိင်ႈထုင်းသေမေႃပုတ်ႈတိၼ်တၢင်မိုဝ်း ပႂ်ႉပႃး ၾိင်ႈထုင်းၵႂႃႇ။

သွင်ၵေႃႈ ႁႂ်ႈၵူၼ်းတၢင်ႇၶိူဝ်းလႄႈလုမ်ႈၾႃႉ ႁပ်ႉႁူႉၾိင်ႈထုင်းတူဝ်ၵဝ်ႇဝႃႈ ၾိင်ႈၸိူဝ်းၼႆႉတိုၵ်ႉမီးယူႇတိုၵ်ႉႁဵတ်းယူႇ ၵူၼ်းႁၼ်လီၸွမ်းတိုၵ်ႉၼမ်ယူႇၼႆၸိူဝ်းၼႆႉ ။ ၵွပ်ႈၼၼ်လႄႈ ၸၢဝ်းတႆးႁဝ်းၵေႃႈ ထုၵ်ႇလီ ႁူႉႁၼ်လွင်ႈလမ်ႇလွင်ႈၾိင်ႈထုင်းသေၸတ်းၵႂႃႇ။

ဢိင်ၼိူဝ်ငဝ်းလၢႆးဝၢၼ်ႈမိူင်းဢမ်ႇၼိမ်သဝ်းသေ  လွင်ႈႁဵတ်းပၢင်ပွႆးၾိင်ႈငႄႈၾိင်ႈထုင်းၸိူဝ်းၼႆႉ မိူဝ်ႈလဵဝ်ပဵၼ်တီႈ ၸီႉၸမ်ႈ ပဵၼ်တီႈဝႃႈၵၼ်မႃး ။ ဢၼ်ႁၼ်ယူႇလၵ်းလၵ်းတႄႉၵေႃႈ ၵူၼ်းတႆးၸိူဝ်းယူႇၼႂ်းမိူင်းလႄႈၼွၵ်ႈမိူင်း ပေႃးၵဵဝ်ႇ လူၺ်ႈပၢင်ပွႆးမႃး ၵႆႉဢီးတၢင်းၽိတ်းသႂ်ႇၵၼ်။

မၢင်ၸိူဝ်း တႅမ်ႈတၢင်ႇလၢတ်ႈၵိူဝ်ႉၵၼ်လဵၼ်ႈၼိူဝ်ၼႅင်ႈသိုဝ်ႇဢွၼ်ႊလၢႆႊဝႃႈ တႆးၼွၵ်ႈမိူင်းၼႆႉ သူင်ပွႆး ၽေႉပွႆးၼႃႇ ဝၢၼ်ႈမိူင်းဢမ်ႇသႃႇၵေႃႈ တိုၵ်ႉႁဵတ်းပွႆး ၼႆၸိူဝ်းၼႆႉ။ ၸိူဝ်းယူႇၼႂ်းမိူင်းသေ ၶိုၼ်းၸီႉၸမ်ၵၼ် ၶိုၼ်းတုမ်ႉတွပ်ႇၵၼ် ၵေႃႈမီး ဝႃႈဝဵင်းၼၼ်ႉဝဵင်းၼႆႉ ႁဵတ်းပွႆး ၊ ဝဵင်းၼၼ်ႉဝဵင်းၼႆႉသမ်ႉ ၵူၼ်းမိူင်းလႆႈပၢႆႈၽေးၼႆၸိူဝ်းၼႆႉ။

ဢိင်ၼိူဝ် ပွႆးၾိင်ႈထုင်းၸိူဝ်းၼႆႉသေ  ၽွင်းတၢင်းဝူၼ်ႉတၢင်းၶႆႈၸႂ်ၵူၼ်းမိူင်းတိုၵ်ႉသူၼ်ႈသဵၼ်းသၢၼ်ၵၼ်ယူႇၼႆႉ ဢမ်ႇၵိုင်ႇလီၵႂႃႇသူၼ်းၾႆး ႁႂ်ႈမီးႁွႆးတႅၵ်ႇၸတ်ႉၵၼ်ၼႂ်းၵၢၼ်ၸိူဝ်ႉၶိူဝ်းထႅင်ႈ။ တႆးႁဝ်းၼႆႉ တႃႇၽွမ်ႉၵၼ်ၼႆႉ မၼ်း ယၢပ်ႇ သေတႃႉ တႃႇတႅၵ်ႇၸတ်ႉၵၼ်ၼႆႉ မၼ်းတိူဝ်းငၢႆႈလိူဝ် ၼႆ ၵူၼ်းၼုမ်ႇတႆး ႁဵတ်းၵၢၼ်တူင်ႇၵူၼ်းၵေႃႉၼိုင်ႈ လၢတ်ႈၼင်ႇၼႆ။

ယွၼ်ႉတႆးလႆႈယၢၼ်ၵၼ်ယူႇၵေႃႉတီႈၵေႃႉတၢင်း ၵေႃႉဝၢၼ်ႈၵေႃႉမိူင်းလႄႈ ၽႂ်ဢမ်ႇၵုမ်းၽႂ်လႆႈ ၊ လီလီၸႃႉၸႃႉ တႆးႁဝ်းဢမ်ႇလႆႈယူႇၼႂ်းမိူင်းလွတ်ႈလႅဝ်းထၢင်ႇႁၢင်ႈၼင်ႇၵၢင်ၸႂ်မီးလႄႈ သင်ပဵၼ်လႆႈ – ႁဵတ်းပွႆးသင်ၵေႃႈယဝ်ႉ ဢမ်ႇႁဵတ်းပွႆးသင်ၵေႃႈယႃႇ တႆးယႃႇၶိုၼ်းလႃႇၵၼ်ၶိုၼ်းၼႆႉ လီလိူဝ်ပိူၼ်ႈ ။  ပေႃးတႆးၽိတ်းၵၼ်တီႈတွၼ်ႈလႂ်ၵေႃႈ ပဵၼ်တီႈလီၶူဝ်လီၸူမ်းပိူၼ်ႈၵႃႈၼၼ်ႉၼႆ ၵိုင်ႇလီၾၢင်ႉ။

ဢမ်ႇၵိုင်ႇလီပဵၼ်ၸွမ်းၼင်ႇၵႂၢမ်းဢၼ် ပိူၼ်ႈမၵ်ႉသမ်ႉဝႃႈပိူၼ်ႈႁိတ်ႉ ပေႃးႁဝ်းမၵ်ႉသမ်ႉဝႃႈ မၼ်းဝၢၼ်။

 ၶူးသၢင်ႇၶမ်း ၸၢင်းယွတ်ႈ ၶူးပူင်သွၼ်ၾိင်ႈငႄႈၾိင်ႈထုင်းတႆး ၼႂ်းၸိုင်ႈထႆးတႄႉ လၢတ်ႈၼႄဝႃႈ – မၼ်းၸဝ်ႈ ယၢၼ်မိူင်းတႆးမႃး လၢႆသိပ်းပီ၊ ၵူၺ်းၵႃႈ ဢမ်ႇတွၼ်ႉၽႃႈပႅတ်ႈ ၾိင်ႈငႄႈႁိတ်ႈႁွႆး တီႈလႂ်ပဵၼ်ပွႆးၵေႃႈ ၵႆႉထူၵ်းပၢႆးမွၼ်း ၾိင်ႈထုင်းတႆး ပိုၼ်ၽႄႈၼႄပိူၼ်ႈယူႇတႃႇသေႇ ။ ပေႃးတၢင်ႇၸၢဝ်းၶိူဝ်းထၢမ်ဝႃႈ ပဵၼ်ၾိင်ႈသင်ၼႆ ၼႅတ်ႈတွပ်ႇ ၵမ်းလဵဝ်ဝႃႈ ပဵၼ်ၾိင်ႈထုင်းတႆး ။ ၼႆႉၵူၺ်းၵေႃႈ ႁဵတ်းႁႂ်ႈလုမ်ႈၾႃႉႁူႉၸၵ်းတႆး လူၺ်ႈ ဢမ်ႇလူဝ်ႇပိုတ်း ယိုဝ်းၵွင်ႈၵၢင်ႇ သင် – ဝႃႈၼႆ။  

ဢမ်ႇၸႂ်ႈဝႃႈ ယိပ်းၵွင်ႈၵၢင်ႇသေ ပိုတ်းယိုဝ်းတၢင်ႇၶိူဝ်းယဝ်ႉ ၸင်ႇတေမၵ်းမၼ်ႈလႆႈဝႃႈ ၵၢၼ်လုၵ်ႉၽိုၼ်ႉ၊ ဢဝ်ပၢႆၵမ် တႅမ်ႈလိၵ်ႈလၢႆး ၊ ဢဝ်ၾိင်ႈထုင်းႁိတ်ႈႁွႆးတိုၵ်းဢဝ်ၵေႃႈ တႆးၸၢင်ႈလႆႈတီႈယူႇယူႇပွတ်းတွၼ်ႈၼိုင်ႈၼႆယဝ်ႉ။

ၵူၺ်းၵႃႈ ဢၼ်လီၾၢင်ႉယႂ်ႇလူင်တႄႉ ပၢင်ပွႆးၾိင်ႈထုင်း ဢမ်ႇဝႃႈသႅၼ်းလဵၵ်ႉသႅၼ်းယႂ်ႇ သင်မေႃဝႆႉတၢင်း ယိူင်းဢၢၼ်း သုင် ၊ သင်မီးၽွၼ်းလီတႃႇတူင်ႇၵူၼ်းတႄႉ ႁဵတ်းၵေႃႈယင်းတေႁၼ်ၼမ်ႉႁၼ်တူဝ်။ မၢင်ၸိူဝ်း ဢွၼ်ၵၼ်ၸတ်း ပၢင်ပွႆး ယူႇၵူႈပီသေတႃႉ ဢမ်ႇႁၼ်ၼမ်ႉႁၼ်တူဝ်။ ငိုၼ်းၵွင်ၵၢင်ဢၼ်လႆႈမႃးၵေႃႈ ဢမ်ႇၸၢင်ႈဢဝ်မႃးသပ်းၸႅင်ႈ ၼႄၵၼ်လႆႈဝႃႈ ၸႂ်ႉၸၢႆႇသင် မူတ်းတီႈလႂ်ၼႆၸိူဝ်းၼႆႉ ။ ၼႆႉဢမ်ႇၵိုင်ႇလီပဵၼ်။

ၸၢႆးသႅင်မိူင်း မင်းၵွၼ်း ႁူဝ်ပဝ်ႈသိုဝ်ႇၶၢဝ်ႇၸၢဝ်းၶိူဝ်း မိူင်းထႆးတွၼ်ႈၼိူဝ်/ ၽူႈၸတ်းၵၢၼ်လူင် ႁူင်းပွႆႇသဵင် FM 99 ၵဵင်းမႂ်ႇ လၢတ်ႈၼႂ်းလၢႆးၵၢၼ်ပၢင်ၼမ်ႉၼဵင်ႈတႆး( ဝၼ်းတီႈ 13/10/2025 )ၼၼ်ႉဝႃႈ –

ႁဵတ်းပွႆးၼႆႉ ဢမ်ႇၽိတ်းၽႂ် ၊ ၵူၺ်းၵႃႈ ႁဵတ်း ႁႂ်ႈမီးၼမ်ႉတွၼ်းၽွၼ်းလီ ။ ပီႈၼွင်ႉတႆးၼႂ်းမိူင်းၵေႃႈ တေလႆႈပွင်ႇၸႂ်ပၼ် တႆး ၸိူဝ်းပဵၼ်ႁႅင်းၵၢၼ်ယၢၼ်မိူင်းၼႂ်းမိူင်းပိူၼ်ႈ ယွၼ်ႉဝႃႈ ၵုမ်ႇမၢင်ႉႁဵတ်းၵၢၼ်လဵင်ႉတွင်ႉၽႂ်မၼ်းၵူၺ်းလႄႈ  ဢမ်ႇတၼ်းလႆႈလိုဝ်ႈလႆႈသဝ်း။

တႃႇယႃႁိူဝ်ႉယႃၸႂ်ၸူဝ်ႈၵႅပ်ႉၵမ်းဢမ်ႇသူႈမီး ၵွပ်ႈလႆႈယူႇတႂ်ႈၶေႃႈသင်ႇပေႃႈလဵင်ႉၼၢႆးၸၢင်ႈၽႂ်မၼ်း ။ ၸင်ႇဝႃႈ ပေႃး မီးပွႆးမီးလၢမ်းၾိင်ႈထုင်းတႆးၼႆ ဢွၼ်ၵၼ်ၵႂႃႇယႃၸႂ်ၸူဝ်ႈၵႅပ်ႉၵမ်း ။  ပႆႇၸၢင်ႈပွၵ်ႈမိူင်းတႆးၶိုၼ်းတႃႉ  မီးတီႈၶွၼ်ႈ တုမ်ၵၼ်  ယင်းလႆႈထူပ်းလႆႈႁၼ်ပီႈၼွင်ႉယၢၼ်မိူင်းၼင်ႇၵၼ်လႄႈ ပဵၼ်တၢင်းဢုၼ်ႇၸႂ် ပဵၼ်တၢင်းသိူဝ်းၸႂ် လႄႈ လႆႈႁႅင်းၸႂ် ။ ဝၢႆးပွႆးဝၼ်းသွင်ဝၼ်းယဝ်ႉၵေႃႈ ၽႂ်ဢမ်ႇႁၼ်ၼႃႈၽႂ် တေႃႉတႄႉ လႆႈယႃၸႂ်ၶၢဝ်းပွႆးၼၼ်ႉၵူၺ်း။

ၼင်ႇႁိုဝ် တေဢမ်ႇၸႂ်ႈပွႆးမူၼ်ႈပွႆးၵျေႃႇၵႂႃႇလၢႆလၢႆၼၼ်ႉ သင်သွၼ်ႇပႃး လွင်ႈႁႃငိုၼ်းၵွင်ၵၢင်တႃႇၵမ်ႉၸွႆႈ ငိုၼ်းတွင်း မိူဝ်းတၢင်းမိူင်းတႆးၸိုင် ႁႃတီႈဝႃႈဢမ်ႇမီး – ၸၢႆးသႅင်မိူင်း မင်းၵွၼ်း သိုပ်ႇလၢတ်ႈၼင်ႇၼႆ။

ၸိူင်ႉႁိုဝ်ၵေႃႈလီ တေၶႂ်ႈဝႃႈတႆး ႁိတ်ႉမၵ်ႉသူင်ပွႆး ၵႃႈႁိုဝ်ၵေႃႈယႃႇ သင်ဝႃႈတိုၵ်ႉသွၼ်ႇတႃႇၵူၼ်းၸိူဝ်း တုၵ်ႉၵိၼ်းယူႇတႄႉ ဢမ်ႇၸႂ်ႈပွႆးပဝ်ႇပွႆးၽၢင်း ။ ဢမ်ႇၵွမ်ႉၵႃႈမိူင်းထႆးၵူၺ်း  တႆးယၢၼ်မိူင်း တီႈဢမေႊရိၵႃႊ ယူႊရူပ်ႉ  ၵျပၼ်ႊ ထႆႊဝၼ်ႊ ၵူဝ်ႊလီႊယိူဝ်ႊ ဢိၵ်ႇတင်းလၢႆလၢႆမိူင်းတီႈဢၼ်တႆးၵႂႃႇသွၼ်ႈယူႇသဝ်းၸိူဝ်းၼၼ်ႉ ၼမ်လႄႈဢေႇတႄႉတၵ်းလႆႈဝူၼ်ႉပႃးတႃႇၵူၼ်းၼႂ်းမိူင်း ၸင်ႇဝႃႈ တႆးဢမ်ႇပွႆႇၽႃႈၵၼ်။

ႁူဝ်ပဝ်ႈ ၵေႃႈလိၵ်ႈလၢႆးလႄႈၾိင်ႈငႄႈတႆး ၵဵင်းမႂ်ႇ ၸၢႆးသႅင်ယၵေႃႈ လၢတ်ႈတၢင်းႁၼ်ထိုင်ဝႆႉဝႃႈ –

ႁူမ်ႈဝႃႈ ၵၢၼ်မိူင်းၵၢၼ်သိုၵ်းႁဝ်းဢမ်ႇၶိုၼ်ႈယႂ်ႇၶိုတ်းတၼ်းပိူၼ်ႈၵေႃႈ ၊ ၵၢၼ်ၾိင်ႈငႄႈႁဵတ်းႁွႆးတႆးႁဝ်း ယႃႇႁႂ်ႈမွတ်ႇဝၢႆးႁၢႆ ။ ၾိင်ႈထုင်းၼႆႉ လိူဝ်သေပဵၼ်သၢႆလိူတ်ႈဢၼ်လေႃႇလဵင်ႉပၼ်ဢွၵ်းဢေႃလႄႈႁူဝ်ၸႂ်တႆး ႁဵတ်းႁႂ်ႈမေႃဝႆႉၵႃႈၶၼ်ၸိူဝ်ႉၸၢတ်ႈယဝ်ႉ မၼ်းယင်းႁဵတ်းႁႂ်ႈၵူၼ်းတၢင်ႇၶိူဝ်းလႄႈလုမ်ႈၾႃႉ ႁူႉၸၵ်းၾိင်ႈတႆးႁဝ်းၼမ်မႃးသေ တေမေႃႁၼ်ၵႃႈၶၼ် ၾိင်ႈတႆးမႃးလိူဝ်ၵဝ်ႇ ဝႃႈၼႆ။