ပၢင်ပွႆးလိူၼ်သီႇ မိူင်းၵိုင် ဢမ်ႇၵိုၼ်း ယွၼ်ႉပိူဝ်ႈပၢင်တိုၵ်း ဢၼ်ပဵၼ်ယူႇတီႈလွႆတွၼ်း ဢိူင်ႇႁၢမ်းငၢႆး ၽူႈတႅၼ်းသၽႃး ၸႄႈဝဵင်းမိူင်းၵိုင်လၢတ်ႈ။
ပၢင်ပွႆးလိူၼ်သီႇမူၼ်း တီႈထၢတ်ႈမူၺ်ႇတေႃႇလူင် ၼႂ်းၸႄႈဝဵင်းမိူင်းၵိုင်ၼႆႉ သင်ၶၸဝ်ႈလႄႈ တၵ်ႉၵႃႇသတ်ႉထႃး တေႇၸတ်းႁဵတ်းၼႂ်းဝၼ်းလိူၼ်သီႇမႂ်ႇ 8 ၶမ်ႈ ဝၼ်းတီႈ 1/3/2020 ဝၼ်းမိူဝ်ႈၼႆႉ တေၸတ်းတေႃႇထိုင် ဝၼ်းလိူၼ်သီႇမူၼ်း။ ၵူၺ်းၵႃႈ ယွၼ်ႉပိူဝ်ႈတပ်ႉသိုၵ်းလူင်ပွင်ၸိုင်ႈမၢၼ်ႈတင်း သိုၵ်းတႆး RCSS ပဵၼ်ပၢင်တိုၵ်းၵၼ် တၢင်းပွတ်းလွႆတွၼ်း ဢိူင်ႇႁၢမ်းငၢႆးၼၼ်ႉႁၢဝ်ႈႁႅင်းသေ တုမ်ႉတိူဝ်ႉ ပွႆး လိူၼ်သီႇ။
လုင်းၸၢႆးလူင် ၽူႈတႅၼ်းသၽႃး ၸႄႈမိူင်းၶဵတ်ႇလိူၵ်ႈတင်ႈ မၢႆ 2 ၸႄႈဝဵင်းမိူင်းၵိုင် လၢတ်ႈတီႈၽူႈတွႆႇႁွၵ်ႈဝႃႈ “ ယွၼ်ႉၶဝ် ပဵၼ်ပၢင်တိုၵ်းၵၼ်သေ တေႃႈလဵဝ် ပွႆးလိူၼ်သီႇႁဝ်းၼႆႉ ၵူၼ်းၶၢႆၶူဝ်းပွႆးပေႃးဢမ်ႇတဵမ်ယဝ်ႉ။ ယွမ်းပႅတ်ႈၼမ်ၼႃႇ။ ၵူႈပီတႄႉ ၵူၼ်းမႃးၶၢႆၶူဝ်းႁိမ်ၵၼ်ပေႃးတဵမ်။ ပီၼႆႉတႄႉ ဢေႇၼႃႇ၊သုမ်ႉၶၢႆလိူဝ်ၼမ်ဝႃႈၼမ်။မိူဝ်ႈပီပူၼ်ႉၼၼ်ႉ သုမ်ႉၶၢႆၶူဝ်း မီးႁိမ်းၸမ် 500 သုမ်ႉ။ ပီၼႆႉ တိုၵ်ႉမီး 200 သုမ်ႉပၢႆၵူၺ်း။ ၵူၼ်းမႃးၶၢႆၶူဝ် တႄႉ မႃးၵၼ် ၵမ်းဢိတ်းၵမ်းဢွတ်းၵူၺ်း။ ဢမ်ႇပႆႇမႃးၼမ်။ ယွၼ်ႉပၢင်တိုၵ်းၼၼ်ႉသေ တုမ်ႉတိူဝ်ႉပွႆးလိူၼ်သီႇႁဝ်းၶႃႈ တႄႉတႄႉဢိူဝ်ႈ” ဝႃႈၼႆ။
ပၢင်ပွႆးလိူၼ်သီႇ တီႈမိူင်းၵိုင်ၼႆႉ ၸတ်းႁဵတ်းမႃး ၵူႈပီပီ ၸွမ်းၼင်ႇၾိင်ႈႁိတ်ႈႁွႆး ။ ပီႈၼွင်ႉတီႈၸမ်တီႈၵႆ ဝၢၼ်ႈပီႈမိူင်းၼွင်ႉ ဢွၼ်ၵၼ်မႃးၶၢႆၶူဝ်းၵိၼ်ၶူဝ်းၼုင်ႈ ဢၼ်ဢွၵ်ႇၼႂ်းပိုၼ်ႉတီႈၽႂ်မၼ်း ၵိုၼ်းၶွၼ်ႈလီၵူႈပီ။
ၸၢႆးပီး ၵူၼ်းမိူင်းၵိုင် လၢတ်ႈတီႈၽူႈတွႆႇႁွၵ်ႈဝႃႈ “ ဝၼ်းတႄႇပၢင်ပွႆးၼႆႉ တေပၢင်းၸဝ်ႈမိူင်းၶဝ်ႈပွႆးၶႃႈဢေႃႈ။ ဢၼ်တေၵိုၼ်း တႄႉ တေပဵၼ်ၼႂ်းလိူၼ်သီႇမႂ်ႇ 11 ၶမ်ႈၵႂႃႇၶႃႈဢေႃႈ။ ပီၼႆႉတႄႉ ဢမ်ႇႁူႉ ယဝ်ႉၶႃႈ ၸွင်ႇတေၵိုၼ်းမိူၼ်မိူဝ်ႈၵူႈပီၼႆ။ တၢင်းႁၢမ်းငၢႆး လွႆတွၼ်းၵေႃႈ သိုၵ်းမၢၼ်ႈၶိုၼ်ႈယိုဝ်းသိုၵ်းတႆး ႁၢဝ်ႈႁႅင်း” ဝႃႈၼႆ။
သိုၵ်းလူင်ပွင်ၸိုင်ႈမၢၼ်ႈ တင်း သိုၵ်းတႆး RCSS ပဵၼ်ပၢင်တိုၵ်းၵၼ်မႃးၼႆႉ တႄႇဢဝ် ဝၼ်းတီႈ 27/2/2020 ယၢမ်းၵၢင်ၼႂ် မႃးသေ တေႃႇထိုင်ဝၼ်းမိူဝ်ႈၼႆႉ သွင်ၾၢႆႇတိုၵ်ႉပဵၼ်ပၢင်တိုၵ်းၵၼ်ႁၢဝ်ႈႁႅင်းယူႇ။ ယူႇတီႈ သိုၵ်းလူင်ပွင်ၸိုင်ႈမၢၼ်ႈ ၸႂ်ႉႁႅင်း သိုၵ်း 4 တပ်ႉၵွင်သေ ၶိုၼ်ႈယိုဝ်း။ တေႃႈလဵဝ် တၢင်းၾၢႆႇသိုၵ်းမၢၼ်ႈ တိုၵ်ႉၽိူမ်ႉႁႅင်းသိုၵ်းထႅင်ႈယူႇ ။ ၼႂ်ၼႆႉၵေႃႈ သဵင်ၵွင်ႈသဵင်မၢၵ်ႇ မေႃးယူႇၸဵမ်ၸဝ်ႉ ၵူၼ်းၵေးသီးလၢတ်ႈၼင်ႇၼႆ။
လွႆတွၼ်းၼႆႉ ၼႂ်းၸေႈဝဵင်းမိူင်းၵိုင် မီးၸဵင်ႇႁွင်ႇဝၼ်းဢွၵ်ႇမိူင်းၵိုင် ယၢၼ်ၵႆမွၵ်ႈ 50 လၵ်း။ မီးၸမ်တၢင်းဝဵင်းၵေးသီး (မီးၾၢႆႇတူၵ်းၵေးသီး) မီးၾၢႆႇႁွင်ႇႁၢမ်းငၢႆး ။