သိုၵ်းလူင်ပွင်ၸိုင်ႈမၢၼ်ႈ ၸႂ်ႉၶိူင်ႈမိၼ် ပွႆႇမၢၵ်ႇ ၸွမ်းလွႆတွၼ်း ၸႄႈဝဵင်းမိူင်းၵိုင် လႄႈ ၵူၼ်းဝၢၼ်ႈ ၸိူဝ်းယူႇတိၼ်လွႆတွၼ်း တၢင်းသွင်ၾင်ႇ ပၢႆႈၶဝ်ႈဝဵင်းမိူင်းၵိုင် လႄႈဝဵင်းၵေးသီး။

မိူဝ်ႈၼႆႉ ဝၼ်းတီႈ 29/2/2020 ယၢမ်းဝၢႆးဝၼ်း မွၵ်ႈ 4 မူင်းၼႆႉ သိုၵ်းလူင်ပွင်ၸိုင်ႈမၢၼ်ႈ ၸႂ်ႉၶိူင်ႈမိၼ်ပွႆႇမၢၵ်ႇ ၸွမ်းႁိမ်းႁွမ်း လွႆတွၼ်း တီႈမီးပၢင်သဝ်းတပ်ႉသိုၵ်းၸိုင်ႈတႆး RCSS/SSA ၼၼ်ႉလႄႈ  ၵူၼ်းဝၢၼ်ႈၸွမ်းတိၼ်လွႆ တၢင်းသွင်ၾင်ႇ ၸိူဝ်းမီးၼႂ်းၸေႈဝဵင်းမိူင်းၵိုင်ၵေႃႈ ၽူင်ႉပၢႆႈၵႂႃႇယူႇတီႈဝတ်ႉၵျွင်းလွႆၸၢၵ်ႈ၊ ဝတ်ႉၵုင်းၸူင် ၊ ဝတ်ႉၵျွင်းၵွင်းမူးသၢႆး ၸႄႈဝဵင်းမိူင်း ၵိုင် ၊ ၸိူဝ်းမီးတၢင်း ၵေးသီးၵေႃႈ ၵႂႃႇယူႇတီႈဝတ်ႉၵျွင်းၽၵ်းၼၢမ်  ၼႂ်းၸေႈဝဵင်းၵေးသီး ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။

လုင်းၸၢႆးလူင် ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ 2 ၸႄႈဝဵင်းမိူင်းၵိုင် လၢတ်ႈတီႈၽူႈတွႆႇႁွၵ်ႈဝႃႈ “ တေႃႈလဵဝ် တီႈႁၢမ်းငၢႆးႁဝ်းၶႃႈတႄႉ မီးၵူၼ်းပၢႆႈၽေးသိုၵ်း(ငိူင်ႉပၢႆႈၽေး) မွၵ်ႈ 200 ပၢႆယဝ်ႉ။ ယၢမ်းလဵဝ် မႃးသွၼ်ႈယူႇဝႆႉ တီႈဝတ်ႉႁူဝ် လွႆ တင်း ဝတ်ႉၵုင်းၸူင်။ တီႈဝတ်ႉႁူဝ်လွႆတႄႉ ၵူၼ်းပၢႆႈၽေးမႃးယူႇၼမ်ဝႆႉ။ ၸိုဝ်ႈဝၢၼ်ႈ ဢၼ်လႆႈႁူႉလီလီတႄႉ ပဵၼ် ဝၢၼ်ႈၵုင်းၺွင်ႇ တင်း ဝၢၼ်ႈၽႃသႃး ဢၼ်လႆႈႁူႉဝႆႉ ပဵၼ်ဢၼ်ၼႆႉ တၢင်ႇဝၢၼ်ႈၵေႃႈ တေပၢႆႈမႃးယူႇ ၵူၺ်းၵႃႈ ပႆႇလႆႈႁူႉ ၸိုဝ်ႈ” ဝႃႈၼႆ။

လိူဝ်ႈၼၼ်ႉ ၵူၼ်းဝၢၼ်ႈ ဝၢၼ်ႈႁူဝ်ၼွင် ဝၢၼ်ႈၼွင်ဢုင် ဝၢၼ်ႈၵၢတ်ႇၸိူဝ်းၼႆႉ ဢွၼ်ၵၼ်ပၢႆႈ။ ဝၢၼ်ႈၸိူဝ်းလႆႈပၢႆႈၸိူဝ်းၼႆႉပဵၼ်ဝၢၼ်ႈဢၼ်ယူႇတႂ်ႈဢိူင်ႇႁၢမ်းငၢႆး ဝႃႈၼႆ။

လုင်းၸၢႆးလူင်သိုပ်ႇလၢတ်ႈဝႃႈ “ လွင်ႈယၢပ်ႇၽိုတ်ႇတႄႉ သင်ဝႃႈပၢႆႈမႃးႁိုင် 3-4 ဝၼ်းတႄႉ တေမီးလွင်ႈယၢပ်ႇၽိုတ်ႇၵၢၼ်ၵိၼ်ယမ်ႉယူႇ။ တေႃႈလဵဝ် လႆႈငိၼ်းဝႃႈ ၵူၼ်းဝၢၼ်ႈငိူင်ႉဝႄႈဝႆႉၸူဝ်ႈၶၢဝ်း ယွၼ်ႉသိုၵ်းမၢၼ်ႈၶဝ် ဢဝ်ၶိူင်ႈမိၼ်မႃးပွႆႇမၢၵ်ႇၼႆလႄႈ ဢွၼ် ၵၼ်ၵူဝ်သေ ပၢႆႈဢွၵ်ႇမႃး” ဝႃႈၼႆ။

မိူဝ်ႈၼႆႉၵေႃႈ သိုၵ်းလူင်ပွင်ၸိုင်ႈမၢၼ်ႈတင်း တပ်ႉသိုၵ်းတႆး RCSS သိုပ်ႇပၼ်ပၢင်တိုၵ်းၵၼ် တင်းဝၼ်း ယူႇတီႈတပ်ႉ သိုၵ်းလူင်ပွင်ၸိုင်ႈမၢၼ်ႈ ၸႂ်ႉၶိူင်ႈမိၼ် ပွႆႇမၢၵ်ႇသႂ်ႇ ဝႃႈၼႆ။

ၵူၼ်းႁၢမ်းငၢႆး ဢႃယု 40 ပၢႆ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈၼႆႉၵေႃႈ ယိုဝ်းၵၼ်ၶႃႈဢေႃႈ သိုၵ်းမၢၼ်ႈ တေႃႉ ၵူၼ်းသိုၵ်းၶဝ်မႃးထႅင်ႈ ၵႃးသိုၵ်းပဵၼ်လၢႆလၢမ်းၶႃႈ။ ယဝ်ႉၵေႃႈ သိုၵ်းမၢၼ်ႈၶဝ်မႃးပွႆႇမၢၵ်ႇ ၵႂၼ်းၾႆးပေႃး လမ်လူင်ဝႆႉၶႃႈ ဢေႃႈ။ ၶိူင်ႈမိၼ်ဢၼ်မႃးပွႆႇမၢၵ်ႇၼၼ်ႉတႄႉ မွၵ်ႈ 2 လမ်းၼႆႉ။ ဝၢႆးသေ ၶဝ်ပွႆႇမၢၵ်ႇယဝ်ႉ ၵူၼ်းဝၢၼ်ႈ ဢွၼ်ၵၼ်ပၢႆႈဢွၵ်ႇ မႃးတိၵ်းတိၵ်း တေႃႈလဵဝ် ၶႂ်ႈမီးႁိမ်း 500 ၼႆႉယဝ်ႉ” ဝႃႈၼႆ။

ၵူၼ်းပၢႆႈၽေးသိုၵ်း ဢွၼ်ၵၼ်ပၢႆႈဢွၵ်ႇမႃးသမ်ႉ မိူၼ်ၼင်ႇ ဝၢၼ်ႈၵုင်းၺွင်ႇ၊ ဝၢၼ်ႈၽႃသႃး၊ ဝၢၼ်ႈမၢၵ်ႇမၼ်ႉ၊ ဝၢၼ်ႈပၢင် ပူဝ်ႇ၊ ဝၢၼ်ႈၼွင်တဝ်းလႄႈ ဝၢၼ်ႈလူင်ၸၢမ် ၸိူဝ်းၼႆႉ။

ဝၢၼ်ႈၵွင်းမူး 44 လင်ႁိူၼ်းလႄႈဝၢၼ်ႈမၢၵ်ႇမၼ်ႉ 21 လင်ႁိူၼ်း ၸိူဝ်းမီးတိၼ်လွႆတွၼ်း ဢၼ်ယူႇၼႂ်းၼႄႇဝဵင်းၵေးသီးၵေႃႈလႆႈပၢႆႈၶဝ်ႈမႃးသွၼ်ႈယူႇတီႈၵျွင်းၽၵ်းၼၢမ် ဢိူင်ႇဝၢၼ်ႈၶႅမ် ၸေႈဝဵင်းၵေးသီး မိူဝ်ႈၼႆႉဝၼ်းတီႈ 29/2/2020 ယၢမ်းဝၢႆးဝၼ်း။

ဢိင်ၼိူဝ်လွင်ႈပဵၼ်ပၢင်တိုၵ်းၵၼ်ၼႆႉသေ ၵူၼ်းဝၢၼ်ႈၸိူဝ်းယူႇတိၼ်လွႆတွၼ်း ၼႂ်းၸေႈဝဵင်းမိူင်းၵိုင်လၢတ်ႈဝႃႈ ၾၢႆႇတပ်ႉသိုၵ်းလူင်ပွင်ၸိုင်ႈမၢၼ်ႈ လုတၢႆၼမ်။ လႆႈငိၼ်းၸဝ်ႈၼႃႈတီႈၾၢႆႇသိုၵ်းတႆးၼႂ်းပိုၼ်ႉတီႈဝႃႈ လႆႈၵွင်ႈသိုၵ်းလူင်ပွင်ၸိုင်ႈတင်းၼမ် ဝႃႈၼႆသေတႃႉ ၾၢႆႇ RCSS တႄႉ ပႆႇပိုတ်ႇပဵၼ်တၢင်းၵၢၼ်။

ၸဝ်ႈႁၢၼ် ၶမ်းၸၢမ်ႇ ၽူႈၶၢၼ်ပၢၵ်ႇ RCSS လၢတ်ႈတီႈၽူႈတွႆႇႁွၵ်ႈဝႃႈ “ ၵဵဝ်ႇလူၺ်ႈလွင်ႈ ၵူၼ်းမၢတ်ႇၸဵပ်းလႄႈ တၢႆ တင်း တီႉလႆႈပႃး ၶိူင်ႈၵွင်ႈၵၢင်ႇၼၼ်ႉ ႁဝ်းၶႃႈ တေပႆႇၸၢင်ႈလၢတ်ႈလႆႈ ယွၼ်ႉဝႃႈ တေႃႈလဵဝ် တိုၵ်ႉပဵၼ်ပၢင်တိုၵ်းၵၼ် ၶဵင်ႈၶႅင် တေႃႇၵၼ်ယူႇ ပႆႇယဝ်ႉ”ဝႃႈၼႆ။

ၵဵဝ်ႇၵပ်းလွင်ႈၼႆႉ ၵႅမ်ၸွမ်ႁၢၼ်ၸေႃႇမိၼ်းထုၼ်း ၽူႈၶၢၼ်ပၢၵ်ႇ ၾၢႆႇပွင်ႇၶၢဝ်ႇတပ်ႉသိုၵ်း တပ်ႉမတေႃႇ လၢတ်ႈတီႈႁွင်ႈၵၢၼ်ၶၢဝ်ႇမၢၼ်ႈ 2 News ဝႃႈ – “RCSS ၼႆႉ ပဵၼ်ၸုမ်းလူင်းလၢႆးမိုဝ်း ၵိုတ်းတိုၵ်းတူဝ်ႈမိူင်း NCA သေယဝ်ႉ ဢမ်ႇႁဵတ်းၸွမ်းပိူင်တိုဝ်းၵမ်သိုၵ်း  Code of Conduct ဢၼ်သွင်ၾၢႆႇလႆႈၸႂ်ၵၼ်ဝႆႉ။ ၾၢႆႇတပ်ႉမတေႃႇၶဝ်ႈၵႂႃႇတႃႇၵႂၢတ်ႇပိုၼ်ႉတီႈ (ၼႄႇမျေႇသိၼ်းလိၼ်းယေး) သေ ၾၢႆႇ RCSS တႄႇပိုတ်းယိုဝ်းဢွၼ်တၢင်း ” – ဝႃႈၼႆဝႆႉ။

လွႆတွၼ်းၼႆႉ ၼႂ်းၸေႈဝဵင်းမိူင်းၵိုင် မီးၸဵင်ႇႁွင်ႇဝၼ်းဢွၵ်ႇမိူင်းၵိုင် ယၢၼ်ၵႆမွၵ်ႈ 50 လၵ်း။ မီးၸမ်တၢင်းဝဵင်းၵေးသီး (မီးၾၢႆႇတူၵ်းၵေးသီး)  မီးၾၢႆႇႁွင်ႇႁၢမ်းငၢႆး  ။