RCSS ဢွၵ်ႇၶေႃႈပိုၼ်ၽၢဝ်ႇဝႃႈ တေၶတ်းၸႂ်ပွင်သၢင်ႈၵႂႃႇ ၼင်ႇႁိုဝ် တေပဵၼ်မႃး ပၢင်ၵုမ်လူင် လွင်ႈငမ်းယဵၼ်မိူင်းႁူမ်ႈတုမ် (ပီႁူဝ်ပၢၵ်ႇ 21 ပၢင်လူင် ပွၵ်ႈၵမ်း 4) ၸွမ်းၼင်ႇ ၶၢဝ်းယၢမ်းဢၼ်မၵ်းတမ်းဝၢင်းဝႆႉၼၼ်ႉလႄႈ ပၢင်ၵုမ်ၵၢၼ်မိူင်းၸၼ်ႉ ၸိူဝ်ႉၸၢတ်ႈ ND တႆးၵေႃႈ ဢမ်ႇႁိုင်ဢမ်ႇၼၢၼ်းတေၸတ်းႁဵတ်းတီႈ ဝဵင်းလၢင်းၶိူဝ်း မိူင်းတႆးပွတ်းၸၢၼ်း ဝႃႈၼႆ။
ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA ၸတ်းႁဵတ်းပၢင်ၵုမ်ႁူဝ်ပီ ပွၵ်ႈၵမ်း 20 တႄႇဢဝ် ဝၼ်းတီႈ 21-24/2/2020 တီႈငဝ်ႈၸိုင်ႈလွႆတႆးလႅင်း။ ဢုပ်ႇဢူဝ်းၵဵဝ်ႇၵပ်းၼႃႈၵၢၼ်တႃႇငၢၼ်း RCSS ၼႂ်းၶၢဝ်းတၢင်း 1 ပီ သေ ဢွၵ်ႇ ၶေႃႈ ပိုၼ်ၽၢဝ်ႇၵႂႃႇ 6 ၶေႃႈ ၊ ၼႂ်းၼၼ်ႉပႃး လွင်ႈတေ ၸတ်းႁဵတ်း ပၢင်ဢုပ်ႇဢူဝ်းၸၼ်ႉၸိူဝ်ႉၸၢတ်ႈတႆး ND -National Dialogue ။
ၸဝ်ႈႁၢၼ် ၶမ်းၸၢမ်ႇ ၽူႈၶၢၼ်ပၢၵ်ႇ RCSS လၢတ်ႈတီႈၽူႈတွႆႇႁွၵ်ႈဝႃႈ- “ မိူဝ်ႈပူၼ်ႉမႃး ၼႂ်းပၢင်ၵုမ် JICM ၼၼ်ႉ လႆႈဢုပ်ႇ ဢူဝ်းၵၼ်သေ တူၵ်းလူင်းၵၼ် မီးဝႆႉ ၶေႃႈၼိုင်ႈ တေၸတ်းႁဵတ်းၶိုၼ်းပၢင်ၵုမ်လူင်ငမ်းယဵၼ် UPC ယွၼ်ႉၼၼ်လႄႈ လူင်ႈ ၼႃႈ မၼ်းၼႆႉ တေလႆႈၸတ်းႁဵတ်း ပၢင်ၵုမ်ၸိူဝ်ႉၸၢတ်ႈ ND တႆး၊ ဢၢၼ်းၸတ်းႁဵတ်း ၼႂ်းဝဵင်းလၢင်းၶိူဝ်း ၸိုင်ႈတႆးပွတ်း ၸၢၼ်း မွၵ်ႈႁူဝ်လိူၼ်ဢေႊ ပရိူဝ်ႊ 2020 ၼႆႉ” – ဝႃႈၼႆ။
တွၼ်ႈတႃႇ ပၢင်ၵုမ်ၸိူဝ်ႉၸၢတ်ႈ ND တႆး ဢၼ်တေၸတ်းႁဵတ်းတီႈဝဵင်းလၢင်းၶိူဝ်းၼႆႉယၢမ်းလဵဝ် ပႆႇလႆႈၶွတ်ႇၽွတ်ႈၵေႃ ၵမ်ၵၢၼ်။ ႁူဝ်လိူၼ် တေမႃးၼႆႉ ယူႇတီႈ ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး CSSU တေၸတ်းႁဵတ်းပၢင်ၵုမ်။ ဝၢႆးၼၼ်ႉ တႄႉ ယူႇတီႈၶွမ်ႊမတီႊပွင်ၵၢၼ်သေ တေၸတ်းႁဵတ်းပၢင်ၵုမ်ႁၢင်ႈႁႅၼ်းလူင်ႈၼႃႈတီႈ ဝဵင်းလူင်တူၼ်ႈတီး ၸိုင်ႈတႆးပွတ်းၸၢၼ်း ၼႂ်းဝၼ်းတီႈ 20 ထိုင် 30 လိူၼ် မၢတ်ႉၶျ် ဝႃႈၼႆ။
ပၢင်ၵုမ်ၸၼ်ႉၸိူဝ်ႉၸၢတ်ႈတႆး ၼႆႉ ဢၢၼ်းၸတ်းႁဵတ်း ၸဵမ်မိူဝ်ႈႁူဝ်ပီ 2017 ၺႃးၸုမ်းသိုၵ်းလူင်ပွင်ၸိုင်ႈ ႁၢမ်ႈႁႄႉ လႄႈ ဢမ်ႇလႆႈၸတ်းႁဵတ်းမႃး။ ႁူဝ်ၶေႃႈဢၼ်လူဝ်ႇဢုပ်ႇဢူဝ်း ဢဝ်သဵင်ၵၢင်ၸႂ်ၸိူဝ်ႉၶိူဝ်းတႆး သေ ဢုပ်ႇဢူဝ်းၶိုၼ်းၼႂ်း ပၢင်ၵုမ်ၸၼ်ႉၸိူဝ်ႉၸၢတ်ႈတႆး ၼၼ်ႉ မီးယူႇ 4 – 5 ႁူဝ်ၶေႃႈ။ မိူၼ်ၼင်ႇ – ႁူဝ်ၶေႃႈ ၵၢၼ်မိူင်း၊ ၵၢၼ်ပၢႆးမၢၵ်ႈမီး၊ ၵၢၼ်သိုၵ်း၊ ၵၢၼ်ပၢႆးပၺ်ၺႃ ပၢႆးယူႇလီ လႄႈ လွင်ႈၸႅၵ်ႇၸႂ်ႉ ၶူဝ်းႁႄႈၶူဝ်းတိုၼ်းၼမ်ႉလိၼ် ၸိူဝ်းၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ