ၶႄႇပိုၼ်ၽၢဝ်ႇတေပိုတ်ႇၾၢႆၼမ်ႉၼႂ်းမိူင်းၶႄႇ ႁႂ်ႈၼမ်ႉလႆၶဝ်ႈမႄႈၼမ်ႉၶွင် တႃႇၵူၼ်းယူႇပွတ်းတၢင်းတႂ်ႈ တေမီးၼမ်ႉၵိၼ်ၼမ်ႉၸႂ်ႉ ဝႃႈၼႆ။
လူင်ပွင်ၸိုင်ႈၶႄႇ ပိုၼ်ၽၢဝ်ႇမိူဝ်ႈဝႃး ဝၼ်းတီႈ 20/2/2020 ဝႃႈ တႃႇၸွႆႈၵႄႈလိတ်ႈပၼ် ဢၼ်ၵူၼ်းမိူင်း ႁိမ်းႁွမ်း ဢၼ်ထူပ်းပၼ်ႁႃ ၾႃႉလႅင်ႉ ၼမ်ႉႁႅင်ႈ ၼၼ်ႉၼႆသေ တေပိုတ်ႇၾၢႆၼမ်ႉ မိူင်းၶဝ် ႁႂ်ႈလႆလူင်း ၼႂ်းမႄႈၼမ်ႉၶွင် ။ မိူဝ်းၼႃႈၵေႃႈ တေၸွႆႈထႅမ်ပႃးၾၢႆႇလွၵ်းလၢႆးပၢႆးၸၢၵ်ႈ ၵဵဝ်ႇၵပ်းလွင်ႈပႂ်ႉတူၺ်း ၾိင်ႈၾႃႉရႃႇသီႇ ဝႃႈၼႆ။
ၸုမ်းပၢႆးမၢၵ်ႈမီးလုမ်ႈၾႃႉ ထတ်းသၢင်သေပိုၼ်ၽၢဝ်ႇဝႃႈ ယွၼ်ႉပိူဝ်ႈၶႄႇတတ်းၼမ်ႉၶွင် ႁဵတ်းၾၢႆ ႁဵတ်းႁူင်းၸၢၵ်ႈၾႆးၾႃႉ ၼႂ်းမိူင်းၶဝ်ၼမ်ၼႃႇယဝ်ႉလႄႈ ဝၢႆးမႃး 5 ၸိုင်ႈမိူင်းဢၼ်ယူႇပွတ်းတၢင်းတႅမ်ႇၼႆႉ တေၸၢင်ႈတုမ်ႉတိူဝ်ႉပၢႆးမၢၵ်ႈမီးႁၢဝ်ႈႁႅင်းသေ ထိုင်တီႈတေလႆႈပိုင်ႈဢိင်ၼိူဝ်မိူင်းၶႄႇၼမ် -ဝႃႈၼႆလႄႈ ၶႄႇၸင်ႇလႆႈပိုၼ်ၽၢဝ်ႇတွပ်ႇၶိုၼ်းဝႃႈတေၸွႆႈ။
မိူဝ်ႈပီပူၼ်ႉမႃး ယွၼ်ႉပိူဝ်ႈၾႃႉလႅင်ႉ ၼမ်ႉႁႅင်ႈလိူဝ်ႁႅင်းလႄႈ မိူင်းမၢၼ်ႈ၊ မိူင်းလၢဝ်း၊ မိူင်းထႆး၊ ၵမ်ႇပူးၶျႃး လႄႈ ဝႅတ်ႉၼၢမ်း ယၢပ်ႇၽိုတ်ႇတႃႇၽုၵ်ႇသွမ်ႈ။ လွင်ႈၾႃႉလႅင်ႉ ၾူၼ်ဢေႇ ၼမ်ႉႁႅင်ႈၼႆႉပဵၼ်ယွၼ်ႉမိူင်းၶႄႇ ႁဵတ်းၾၢႆၾႆးၾႃႉ ၼိူဝ်မႄႈၼမ်ႉ လၢၼ်ႊၸၢင်ႊ (ၸိုဝ်ႈၼမ်ႉၶွင် တွၼ်ႈ ဢၼ်မီးၼႂ်းမိူင်းၶႄႇ) ၼမ်ႉ 11 တီႈလႄႈၸင်ႇပဵၼ် – ဢွၼ်ၵၼ်ထတ်းသၢင်ၼင်ႇၼႆ။
မိတ်ႉသတိူဝ်ႊ ဝင်ႊယီႊ ၽွင်းလူင်ၾၢႆႇၼွၵ်ႈမိူင်း မိူင်းၶႄႇတႄႉ တွပ်ႇလၢတ်ႈဝႃႈ ၾႃႉလႅင်ႉ ၼမ်ႉႁႅင်ႈၼႆႉ ပဵၼ်ယွၼ်ႉၾူၼ်ဢမ်ႇတူၵ်းၵူၺ်း။ တီႈမိူင်းၶႄႇၵေႃႈႁူပ်ႉတၢင်းယၢပ်ႇၽိုတ်ႇၸိူင်ႉၼၼ် – ဝႃႈၼႆ။
မိူင်းလၢဝ်းၵေႃႈ သၢင်ႈၾၢႆၼိူဝ်မႄႈၼမ်ႉၶွင်ၼမ်။ ပူၼ်ႉမႃးမိူဝ်ႈ 4 လိူၼ်ၼၼ်ႉၵေႃႈ ပိုတ်ႇၾၢႆမႂ်ႇထႅင်ႈ 2 ဢၼ်။ ၼႂ်းဢမ်ႇႁိုင်ဢမ်ႇၼၢၼ်းၼႆႉ တေပိုတ်ႇၾၢႆမႂ်ႇထႅင်ႈဢၼ်ၼိုင်ႈ တီႈႁိမ်းဝဵင်းလူင်ၽရပၢင်ႊ -လႆႈႁူႉၼင်ႇၼႆ။
ပိၼ်ႇၽႃႇသႃႇၶၢဝ်ႇတီႈ VOA
