ၸုမ်းၵူၼ်းတေႃႉယႃႈ လုၵ်ႉတၢင်းမိူင်းတႆး ၶဝ်ႈမိူင်းထႆး ၺႃး ၾၢႆႇႁူမ်ႇလူမ်ႈလႅၼ်လိၼ်မိူင်းထႆး ဝႅတ်ႉလွမ်ႉလူမ်ႇယိုဝ်း သွင်ၾၢႆႇလႆႈပဵၼ်ပၢင်တိုၵ်းၵၼ် ၼႂ်းၸႄႈဝဵင်းၵဵင်းလၢဝ် ဢၼ်တေႃႇၼႃႈ ၸႄႈဝဵင်းမိူင်းတူၼ်ႈ ၸႄႈတွၼ်ႈမိူင်းသၢတ်ႇ မိူင်းတႆးပွတ်းဢွၵ်ႇၶူင်း။

သွင်ၾၢႆႇလႆႈပိုတ်းယိုဝ်းၵၼ် မိူဝ်ႈဝၼ်းတီႈ  3/2/2020  ႁိမ်းဝၢၼ်ႈလီသေႃး ပႃႇပူင်းငၢမ်း ဢၼ်တေႃႇၼႃႈ – ၵိင်ႇၸႄႈဝဵင်း ပုင်ႇပႃႇၶႅမ် ၸႄႈဝဵင်းမိူင်းတူၼ် – ယၢၼ်ၵႆၵၼ်တင်းလႅၼ်လိၼ်တႆး-ထႆး မွၵ်ႈ 19 လၵ်း/လူဝ်ႊ။ ၸဝ်ႈၼႃႈတီႈထႆး တပ်ႉပႂ်ႉလႅၼ်လိၼ်လႆႈမၢတ်ႇၸဵပ်း 2 ၵေႃႉ၊ တီႉလႆႈယႃႈမႃႉ တႃႇၵႃႈၶၼ်ငိုၼ်းထႆး 1000 လၢၼ်ႉဝၢတ်ႇ (ယႃႈမႃႉ 3 လၢၼ်ႉမဵတ်ႉ) လႄႈယႃႈၾိၼ်ႇၽိူၵ်ႇ 32 ၵီႊလူဝ်ႊ ၵရမ်ႊ ဝႃႈၼႆ။

ၸွမ်သိုၵ်း သုၽၶျႂပ်ႉ ထဝတ်းၽီႉရၶျႆး ၵႅမ်ၾၢႆႇၽဵဝ်ႈမူၺ်ႉယႃႈမဝ်းၵမ် တိူင်းသိုၵ်းမၢႆ 3   လၢတ်ႈတီႈ ၽူႈသိုဝ်ႇၶၢဝ်ႇထႆးဝႃႈ – “လႆႈငိၼ်းၶၢဝ်ႇၵူၼ်းၵႃႉယႃႈတေလတ်းတၢင်းၼႆသေ လႆႈၵႂႃႇပႂ်ႉ။ ၵူၼ်းတေႃႉယႃႈၸိူဝ်းၼႆႉ လုၵ်ႉတၢင်းဝၢၼ်ႈၼႃးၵွင်းမူး ဢိူင်ႇမိူင်းႁၢင် ၸေႈဝဵင်းမိူင်းတူၼ် ၸိုင်ႈတႆးသေ ၶၢမ်ႈလႅၼ်လိၼ်ၶဝ်ႈမိူင်းထႆး  လတ်းဝၢၼ်ႈလီးသေႃး ဝၢၼ်ႈပႃႇပူင်းငၢမ်း ဢိူင်ႇမိူင်းၼႃႉ ၸေႈဝဵင်းၵဵင်းလၢဝ် ၸႄႈတွၼ်ႈၵဵင်းမႆႇ ၸိုင်ႈထႆး။ ၾၢႆႇၵူၼ်းတေႃႉယႃႈ တႄႇယိုဝ်း ဢွၼ်တၢင်း လႄႈ ၸင်ႇလႆႈပိုတ်းယိုဝ်းၵၼ်   ႁိုင်မွၵ်ႈ 10 မိၼိတ်ႉ။ ”- ဝႃႈၼႆ။

ဝၢႆးလင်ပိုတ်းယိုဝ်းၵၼ်ယဝ်ႉ ၵူၼ်းတေႃႉယႃႈ ပႅတ်ႈဝႆႉထူင်ပိူဝ်ႉ 29 ထူင်  ၸၢၵ်ႈလၢတ်ႈ၊ မၢၵ်ႇပွမ်း သေလႅၼ်ႈပၢႆႈ ၊ ၾၢႆႇထႆးတပ်ႉပႂ်ႉ မၢတ်ႇၸဵပ်း 2 ၵေႃႉ – ၼႂ်းၼၼ်ႉ ၶုၼ်သိုၵ်း ဢႃးထိတ်ႉၵဵင်ၶမ်း ႁူဝ်ၼႃႈၾၢႆႇၽဵဝ်ႈမူၺ်ႉယႃႈမဝ်းၵမ် ၺႃးယိုဝ်းတီႈၵၢင်လင် မၢတ်ႇၸဵပ်းႁၢဝ်ႈႁႅင်း ယၢမ်းလဵဝ်ယူတ်းယႃတူဝ်ဝႆႉတီႈႁူင်းယႃ ၼၶွၼ်းၽိင်းဝဵင်းၵဵင်းမႆႇ ဝႃႈၼႆ။

ႁွင်ႈၵၢၼ်ၾၢႆႇၽဵဝ်ႇမူၺ်ႉယႃႈမဝ်းၵမ် မိူင်းထႆး ပိုၼ်ၽၢဝ်ႇဝႃႈ ၼႂ်းၶၢဝ်းတၢင်း 2 လိူၼ်ၼႆႉ ထႆး မၢၼ်ႈ လၢဝ်း ႁူမ်ႈၵၼ်ၽဵဝ်ႈမူၺ်ႉယႃႈမဝ်းၵမ်  ပွတ်းထုင်ႉသၢမ်ၸဵင်ႇၶမ်း  တီႉလႆႈယႃႈမႃႉ 32 လၢၼ်ႉမဵတ်ႉပၢႆ  ဢၢႆႈသ်ႉ 4.3 တၼ်ႊ  ယႃႈၾိၼ်ႇၽိူၵ်ႇ 420 ၵီႊလူဝ်ႊ – ဝႃႈၼႆ။

Ref;Thairat,Daily News