Friday, March 29, 2024

WHO တိုၵ်းသူၼ်း Google ႁၢမ်ႈၶၢဝ်ႇၽိတ်း/ပွမ်  ၵဵဝ်ႇၵပ်းတၢင်းပဵၼ်ၶူဝ်ႊရူဝ်ႊၼႃႊ  

Must read

ၸုမ်းပၢႆးယူႇလီလုမ်ႈၾႃႉ WHO ပိုၼ်ၽၢဝ်ႇ ဝႃႈ တေႁူမ်ႈမိုဝ်းၵၼ်တင်း Google သေ ၶိုင်ပွင်တႃႇပိၵ်ႉ/ႁၢမ်ႈ ၶၢဝ်ႇပွမ် ၶၢဝ်ႇၽိတ်း  ၵဵဝ်ႇၵပ်းၸိူဝ်ႉမႅင်းၶူဝ်ႊရူဝ်ႊၼႃႊ  ဢၼ်ၽႄႈယူႇၼိူဝ်ဢွၼ်ႊလၢႆႊၸိူဝ်းၼႆႉ ဝႃႈၼႆ။

Credit to WHO

WHO ၸတ်းႁဵတ်းပၢင်ၵုမ်တီႈမိူင်း ၵျီႊၼီႊဝႃႊ မိူဝ်ႈဝၼ်းတီႈ 3/2/2020 သေ တႅၵ်ႉရူဝ်ႉသ် ဢႅတ်ႉႁၼ်ႊၼူဝ်ႊၵတ်ႉ ဝရီႊသႅတ်ႉ ဢၼ်ပဵၼ်ၽူႈယႂ်ႇၵူၼ်းလူင်ၼႂ်းၸုမ်းWHO လၢတ်ႈဝႃႈ – ၶၢဝ်ႇငၢဝ်းၵဵဝ်ႇၵပ်းၸိူဝ်ႉမႅင်းၶူဝ်ႊရူဝ်ႊၼႃႊ ဢၼ်မီးၶေႃႈမုၼ်းၽိတ်းပိူင်ႈ ၼၼ်ႉ  ၸၢင်ႈမီးပၼ်ႁႃၼမ်၊ ၸၢင်ႈပဵၼ်ၽေးၼမ် – ဝႃႈၼႆ ။

- Subscription -

လိူဝ်ၼၼ်ႉ တႅၵ်ႉရူဝ်ႉသ်ယင်း ႁၢႆးငၢၼ်းလၢတ်ႈတီႈပၢင်ၵုမ်ၽူႈပွင်ၵၢၼ် ၼၼ်ႉပႃးဝႃႈ  ၵဵဝ်ႇၵပ်းၶၢဝ်ႇတၢင်းပဵၼ် ၶူဝ်ႊရူဝ်ႊၼႃႊ သေ ပေႃးမႃးၶူၼ်ႉႁႃၼႂ်း ၵူႊၵိူဝ်ႊလ်ၼႆ ႁႂ်ႈလႆႈႁၼ်ၶၢဝ်ႇဢၼ် WHO ပိုၼ်ၽၢဝ်ႇဝႆႉ ဢၼ်ပဵၼ်ၶေႃႈမုၼ်းမၢၼ်ႇမႅၼ်ႈလႄႈ ၶၢဝ်ႇဢၼ်ပဵၼ်တၢင်းၵၢၼ်  ၼၼ်ႉၵမ်းလဵဝ်ၼၼ်ႉ ယူႇတီႈ WHO လႆႈႁူမ်ႈမိုဝ်းၵၼ်တင်း Google သေၶိုင်ပွင်ဝႆႉယူႇ  ဝႃႈၼႆ။

ၶၢဝ်ႇငၢဝ်းဢၼ်ၶေႃႈမုၼ်းၽိတ်းပိူင်ႈဝႆႉႁၢဝ်ႈႁႅင်း ၸိူဝ်းဢၼ်ၽႄႈယူႇၼိူဝ် ၼႅင်ႈသိုဝ်ႇSocial Media ၼၼ်ႉ ၵေႃႈ ၼင်ႇၵႃႈပိၵ်ႉလႆႈၼၼ်ႉ တေၶိုင်ပွင်ႁၢမ်ႈပိၵ်ႉ ၼင်ႇႁိုဝ်ၵူၼ်းတေ ဢမ်ႇ ၸၢင်ႈတူၺ်း ဢမ်ႇၸၢင်ႈသျႄးၼမ် – တႅၵ်ႉရူဝ်ႉသ်လၢတ်ႈၼင်ႇၼႆ။

Credit to Khao Sod

ၵဵဝ်ႇၵပ်းလွင်ႈပိုၼ်ၽႄႈၶၢဝ်ႇပွမ် လွင်ႈၵူၼ်းတိတ်းၸပ်းတၢင်းပဵၼ် ၶူဝ်ႊရူဝ်ႊၼႃႊဝၢႆးရၢတ်ႉသ် ၼိူဝ် ၾေႉသ်ပုၵ်ႉ သေ လူင်ပွင်ၸိုင်ႈမိူင်းထႆး ၵေႃႈ ပိုၼ်ၽၢဝ်ႇတႃႇတိၺွပ်း ၵူၼ်းမိူင်းထႆး 2 ၵေႃႉ။ လူင်ပွင်ၸိုင်ႈထႆးၼႄးဝႃႈ  ယွၼ်ႉပိူဝ်ႈတၢင်ႇၶၢဝ်ႇ ပွမ်ဝႃႈ ၵူၼ်းမိူင်းထႆး တိတ်းၸပ်းတၢင်းပဵၼ်။

ဢၼ်ၺႃးသင်ႇတိၼႆႉပဵၼ်ၵူၼ်းထႆး ယူႇဝဵင်းလူင်ၵုင်းထဵပ်ႈ (မိူင်းၵွၵ်ႇ) တင်းသွင်ၵေႃႉ။  ၵေႃႉၼိုင်ႈတႄႉၺႃးတိၺွပ်းမိူဝ်ႈဝၼ်းတီႈ 30 /1/2020 ယဝ်ႉ  ပဵၼ်ၽူႈယိင်း။ ၵိုတ်းလိူဝ်ထႅင်ႈၵေႃႉၼိုင်ႈတႄႉ ပဵၼ်ၵူၼ်းၸၢႆး၊ လူင်ပွင်ၸိုင်ႈတိုၵ်ႉႁူမ်ႈမိုဝ်းၵၼ်တင်း ပလိၵ်ႈၾၢႆႇ ၵူတ်ႇ ထတ်းၽူႈႁဵတ်းၽိတ်းၼိူဝ် ဢွၼ်ႊလၢႆႊ Cybercrime   Police သေ ၵူတ်ႇထတ်း သွၵ်ႈတူၺ်းယူႇ – ဝႃႈၼႆ။

Credit to SCMP

ၸွမ်းၼင်ႇၶၢဝ်ႇငၢဝ်း ၾၢႆႇပၢႆးယူႇလီ လူင်ပွင်ၸိုင်ႈမိူင်းၶႄႇ ပိုၼ်ၽၢဝ်ႇၼႂ်းဝၼ်းတီႈ 4/2/2020 ဝၼ်းမိူဝ်ႈၼႆႉဝႃႈ  ၼႂ်းလုမ်ႈၾႃႉ 20 မိူင်းပၢႆ ၵူၼ်းတိတ်းၸပ်းတၢင်းပဵၼ် ၼူဝ်ႊဝႄႊလ် ၶူဝ်ႊရူဝ်ႊၼႃႊ ၼႆႉမီးယူႇ 20623 ၵေႃႉသေ ဢၼ်တၢႆမီးယူႇ 437 ၵေႃႉ။  ၵူၼ်းတၢႆယွၼ်ႉတၢင်းပဵၼ်ၼႆႉ ၼွၵ်ႈလိူဝ်မိူင်းၶႄႇယဝ်ႉ မီးတီႈ ႁွင်ႊၶွင်ႊ 1 ၵေႃႉလႄႈ မိူင်းၾိပ်ႉလိပ်ႉပိၼ်းသ် 1 ၵေႃႉ။

Ref; AFP ,Khao Sod

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း