လိၵ်ႈတႆး ၶဝ်ႈၼႂ်းပိူင် Google Translate မႃး ၶွပ်ႈတဵမ်ၼိုင်ႈပီ ၊ လွင်ႈလီဢိၵ်ႇၸႃႉၼၼ်ႉတႄႉ လႆႈ ငိၼ်းသဵင်တုမ်ႉတွပ်ႇ ၵူၼ်းၸိူဝ်းၸႂ်ႉတိုဝ်းတူၺ်းယဝ်ႉ လၢႆၸိူဝ်ႉလၢႆပိူင်။ ပဵၼ်ႁိုဝ်ၵေႃႈလီ ၶႅၼ်းသေ လိၵ်ႈတႆးႁၢမ်းတီႈယူႇလႄႈ ႁၢမ်းတီႈၸႂ်ႉ။

ၼင်ႇႁိုဝ် လိၵ်ႈတႆး သမ်ႉပေႃးတေတိူဝ်းၶဝ်ႈလႆႈၼႂ်းၵၢပ်ႈပၢၼ် ဢေႇဢၢႆႇ Ai ၸၼ်ႉလုမ်ႈၾႃႉလႆႈထႅင်ႈ ၼၼ်ႉ တႆးၵူႈတီႈၵူႈတၢင်း ၵူႈမူႇၵူႈၸုမ်း လူဝ်ႇလႆႈသႂ်ႇၸႂ်ပူၵ်းပွင်လိၵ်ႈတႆး ႁႂ်ႈမႅၼ်ႈၸွမ်းလၵ်းၸဵင် ဢၼ်ၵိုင်ႇငၢမ်ႇငဝ်းလၢႆး ဝႃႈၼႆ။

ဢိင်ၼိူဝ်တၢင်းၶတ်းၸႂ် ၾၢႆႇဢၢႆႊထီႊတႆးလၢႆၸုမ်းလၢႆၸဝ်ႈလၢႆတူၼ်သေ Google Translate ႁပ်ႉဢဝ် လိၵ်ႈတႆး ၶဝ်ႈၼႂ်းပိူင်ပိၼ်ႇၽႃသႃမႃး တဵမ်ၶၢဝ်းတၢင်းၼိုင်ႈပီ။

လုၵ်ႉဢဝ်ၽႃသႃတၢင်ႇၶိူဝ်းသေ ပိၼ်ႇပဵၼ်မႃးလႆႈထွႆႈၽႃသႃတႆး ႁိုဝ်ဢမ်ႇၼၼ် လုၵ်ႉတီႈလိၵ်ႈတႆး သေ ပိၼ်ႇပဵၼ်ၽႃသႃတၢင်ႇၶိူဝ်းၸိူဝ်းၼႆႉၼၼ်ႉ ပဵၼ်ၵၵ်ႇသေႃးလူင်ဢၼ်ၼိုင်ႈ ဢၼ်တေပိုတ်ႇႁူ မိုၼ်းတႃပၼ် ၵူၼ်းၶိူဝ်းတႆး တင်းလုမ်ႈၾႃႉၼႆ ၽႂ်တေဢမ်ႇထဵင်လႆႈ။

Google တႄႉ မၵ်းမၼ်ႈပိုၼ်ၽၢဝ်ႇၵႂႃႇ လွင်ႈလိၵ်ႈတႆးၶဝ်ႈၼႂ်းတွၼ်ႈ Translate ယဝ်ႉဝႃႈၼႆသေတႃႉ ၵူၼ်းတႆးၸိူဝ်းႁၼ်လီ ၵမ်ႉထႅမ်ဝႆႉၼမ်ႉၼၵ်းသေ ပၼ်ႁႅင်းၵေႃႈမီး။ ၵူၼ်းၸိူဝ်း ယိူင်းႁၼ်တီႈယူပ်ႈ ယွမ်းသေ လၢတ်ႈဝႃႈဢမ်ႇၶဝ်ႈတၢင်းတိုဝ်းၼႆၵေႃႈ မီးၼႆ ၵူၼ်းၼုမ်ႇတႆးၵေႃႉၼိုင်ႈလၢတ်ႈ။

ၵူၺ်းၵႃႈ ၵူၼ်းၸိူဝ်းသူၼ်ၸႂ်လႄႈ ႁၵ်ႉၼိူဝ်လိၵ်ႈလၢႆးတႆးၸိူဝ်းၼႆႉတႄႉ ဢၼ်ၶႅမ်ႉၵေႃႈ ႁႂ်ႈမၼ်းၶႅမ်ႉ ထႅင်ႈ ဢၼ်ၶိုၵ်ႉၵေႃႈ ႁႂ်ႈမၼ်းသိုပ်ႇၶိုၵ်ႉတွၼ်းၵႂႃႇၼၼ်ႉ ဢွၼ်ၵၼ်မုင်ႈမွင်း ၽူႈလူင်ႉလႅၼ်ႇလၢႆၾၢႆႇ ပူၵ်းပွင်ပၼ်ယူႇ။

မိူၼ်ၼင်ႇ ၸဝ်ႈၽူႈလူင်ႉလႅၼ်ႇ ၾၢႆႇဢၢႆႊထီႊ IT ၼႂ်းတႆး လၢႆၸဝ်ႈလၢႆတူၼ်လၢႆၵေႃႉၵေႃႈ တႃႇႁႂ်ႈလိၵ်ႈ တႆး ၵႂၢမ်းတႆး တေၶိုၼ်ႈသင်ႉၶိုတ်းပၢၼ်ၼၼ်ႉ ႁိုဝ်ႁွၼ်ႇႁူၼ်ထွႆ၊ တိုၼ်းၶတ်းသၢင်ႈမႃးယူႇဢမ်ႇယင်ႉ ဢမ်ႇလိုဝ်ႈ။ ငဝ်းလၢႆးၼႂ်းဝၢၼ်ႈၼႂ်းမိူင်း တေသုၵ်ႉၵႃႈႁိုဝ်ၵေႃႈ ၶဝ်တိုၼ်းပၵ်းၸႂ်ႁဵတ်းၵႂႃႇယူႇၼႆ ၾၢႆႇ ဢၢႆႊထီႊတႆး ၵေႃႉၼိုင်ႈၵေႃႈ လၢတ်ႈၼင်ႇၼႆ။

လိၵ်ႈတႆး ၶဝ်ႈပႃးၼႂ်း Google Translate တႄႉ တဵမ်ၵႂႃႇၼိုင်ႈပီ မိူဝ်ႈဝၼ်းတီႈ ဝၼ်းတီႈ 27/06/2025 ၼႆႉ။ လႆႈဝႃႈ ဢွင်ႇမၢၼ်ၵႂႃႇယဝ်ႉ ၼိုင်ႈပီ။ ၼႂ်းၵႄႈၼႆႉၵေႃႈ ၼင်ႇႁိုဝ် တေတိူဝ်းမီးလွင်ႈၶိုၼ်ႈယႂ်ႇၵႂႃႇ ၼၼ်ႉ ၸၢႆးၼေႃႇသႅင်ၾႃႉ ၽူႈၶဝ်ႈႁူမ်ႈသၢင်ႈၾၢႆႇဢၢႆႊထီႊတႆး ၵေႃႉၼိုင်ႈ လၢတ်ႈတၢင်းႁၼ်ထိုင်ဝႆႉ ၼင်ႇၼႆ –

“လွင်ႈၶႂ်ႈႁႂ်ႈသိုပ်ႇပဵၼ်ထႅင်ႈတႄႉၵေႃႈ လွင်ႈပိၼ်ႇၽႃသႃမၼ်း ႁႂ်ႈမီးၼမ်ႉတွၼ်းလႄႈ ႁႂ်ႈမၢၼ်ႇမႅၼ်ႈ ၼမ်ၶိုၼ်ႈမႃးထႅင်ႈ။ ႁႂ်ႈမီးမႃး ထွႆႈၵႂၢမ်းဢၼ်မၢၼ်ႇမႅၼ်ႈလႄႈ ဢၼ်ၶိုတ်းၸၼ်ႉမႃးထႅင်ႈၼမ်ၼမ်။ ႁႂ်ႈလိၵ်ႈတႆး ၽႄႈတိူၼ်းၶဝ်ႈၸႂ်ႉလႆႈၼႂ်းလၢႆလၢႆဢွင်ႈတီႈ မိူၼ်ၼင်ႇ ၸႂ်ႉလၢႆးထဵၵ်ႊၼူဝ်ႊလူဝ်ႊၵျီႊ ႁႂ်ႈ ဢွၵ်ႇသဵင်တႆး ၊ ႁႂ်ႈပိၼ်ႇၽႃသႃဢွၵ်ႇသဵင်တႆး ၸိူဝ်းၼႆႉ။ လုၵ်ႉတီႈသဵင်ၼၼ်ႉသေ ႁႂ်ႈထွတ်ႇၶေႃႈၵႂၢမ်း မႃးပဵၼ်လိၵ်ႈၶိုၼ်းၸိူဝ်းၼႆႉၶႃႈဢေႃႈ”- ဝႃႈၼႆ။

ယၢမ်းလဵဝ် လုၵ်ႉတီႈလိၵ်ႈတႆးပိၼ်ႇပဵၼ်ၽႃသႃလိၵ်ႈတၢင်ႇၸၢဝ်းၶိူဝ်းလႆႈယဝ်ႉဝႃႈၼႆသေတႃႉ ပႆႇဢွၵ်ႇ သဵင်တႆးလႆႈ။ လွင်ႈၼႆႉၵေႃႈ မိူဝ်းၼႃႈမႃး ၼင်ႇႁိုဝ် တေၸႂ်ႉတိုဝ်းသဵင်တႆးလႆႈၼႂ်း Google ၼၼ်ႉ တေ လႆႈၸိုၼ်ႇၶတ်းၸႂ် ၵႂႃႇထႅင်ႈတင်းၼမ်ယူႇ ဝႃႈၼႆ။

တႃႇလိၵ်ႈတႆးၵႂၢမ်းတႆး တေၶဝ်ႈၼႂ်းလွၵ်းပိူင် Google ၼႆႉၵေႃႈ ဢမ်ႇငၢႆႈ။ ယွၼ်ႉဝႃႈ လိၵ်ႈတႆး ၵႂၢမ်းတႆး ထုင်ႉၼိုင်ႈလႄႈ ထုင်ႉၼိုင်ႈ မိူင်းၼိုင်ႈလႄႈ မိူင်းၼိုင်ႈ ၸႂ်ႉတိုဝ်းၵႅၼ်ၵၢင်မၼ်း လၵ်းမၼ်းဢမ်ႇမိူၼ်ၵၼ်။

ၸၢႆးၼေႃႇသႅင်ၾႃႉ ၽူႈၶဝ်ႈႁူမ်ႈသၢင်ႈၾၢႆႇဢၢႆႊထီႊတႆး သိုပ်ႇလၢတ်ႈၼႄဝႆႉၼင်ႇၼႆ -“ပေႃးမႃးတူၺ်း လွင်ႈယၢပ်ႇ ၽူႈၶူင်သၢင်ႈႁဝ်းၶႃႈတႄႉၵေႃႈ ထူပ်းလွင်ႈယၢပ်ႇတီႈဢၼ် လိၵ်ႈတႆးႁဝ်း ဢမ်ႇမီး လၵ်း ၸဵင် Standard ၊ မၼ်းဢမ်ႇႁူမ်ႈၵၼ်လႆႈတင်းမိူင်း။ ၵႂၢမ်းတႆးႁဝ်းၼႆႉ တေမီးပွတ်းတႂ်ႈပွတ်းၼိူဝ် ၼႆ တႄႇၵႂႃႇ မၼ်းမီးၼမ်ၼႃႇ။ ၼႂ်းၵၢၼ်လေႃးၶေႃႈၵႂၢမ်းၸိူဝ်းၼႆႉၵေႃႈ တီႈၼိုင်ႈလႄႈတီႈၼိုင်ႈ မိူင်းလႄႈမိူင်းၵေႃႈ ဢမ်ႇမိူၼ်ၵၼ်။ ၵူၼ်းၸႂ်ႉတိုဝ်း ၵူၼ်းႁဵတ်းဢွၵ်ႇလိၵ်ႈတႆးၵေႃႈ တီႈၼိုင်ႈလႄႈတီႈၼိုင်ႈ ဢမ်ႇမိူၼ်ၵၼ်။ ၼိုင်ႈဝဵင်းၼိုင်ႈပိူင်ႁဵတ်းၼႆလႄႈ ၽူႈၶူင်သၢင်ႈဢၢႆႊထီႊၶဝ်ၵေႃႈ ဝူၼ်ႉၵႂင် ဢမ်ႇႁူႉဝႃႈ တေဢဝ်ထွႆႈၵႂၢမ်းဢၼ်လႂ်ပဵၼ်ၵၢင်”- ဝႃႈၼႆ။  

ၸူးၸႂ်တႄႉ ၶႂ်ႈႁႂ်ႈတႆးၵူႈမူႇၵူႈၸုမ်း ႁူမ်ႈသၢင်ႈၵွင်ႉသၢၼ်လႆႈၸႂ်ၵၼ် သႂ်ႇၸႂ်ၼိူဝ်သေ ၶိုင်ဢွၵ်ႇထွႆႈၵႂၢမ်း ႁႂ်ႈပဵၼ်သဵင်လဵဝ် တီႈပွင်ႇဢၼ်လဵဝ်ၵၼ် ၸင်ႇတေတိူဝ်းႁဵတ်းႁႂ်ႈၵူၼ်းႁဵတ်း ၵၢၼ် ၾၢႆႇဢၢႆႊထီႊၶဝ် ႁဵတ်းၵၢၼ်ငၢႆႈ။

မိူဝ်ႈလဵဝ်ၼႆႉ ႁဵတ်းၽႂ်ႁဵတ်းမၼ်းၵူၺ်းလႄႈ ပေႃးဢွၵ်ႇမႃးထွႆႈၵႂၢမ်းၼိုင်ႈဢၼ်ၼႆႉ ပဵၼ်ၶေႃႈၵႂၢမ်းတႆး ပွတ်းလႂ်ၼႆ ပဵၼ်ၶေႃႈထၢမ်ၵၼ်မႃးလႄႈ ဢမ်ႇထၢင်ႇႁၢင်ႈၶူင်ဢွၵ်ႇလႆႈထွႆႈၵႂၢမ်းၼႂ်းပိူင် Google။

ပဵၼ်ၸိူင်ႉႁိုဝ်ၵေႃႈယႃႇ တႃႇႁႂ်ႈလိၵ်ႈလၢႆးတႆးလႄႈ ၵႂၢမ်းလၢတ်ႈတႆး တေယူႇလွတ်ႈၼၼ်ႉ ဢမ်ႇလႆႈယူႇ တီႈ ၸဝ်ႈဢၢႆႊထီႊၶဝ်ၵူၺ်း တၵ်းလူဝ်ႇမီးၵူၼ်းၸႂ်ႉတိုဝ်းလိၵ်ႈတႆးၵႂၢမ်းတႆးၼိူဝ်ၼႅင်ႈသိုဝ်ႇ (သူဝ်ႊ သျႄႊမီႊတီႊယိူဝ်ႊ ၵူႈသႅၼ်း) ၼမ်ၼမ်။

ပေႃးဝႃႈ မီးၵူၼ်းၸႂ်ႉတိုဝ်းၼမ်ၵေႃႈ ႁႅင်းၶေႃႈမုလ်းၽႃသႃတႆး တေတိူဝ်းမီးၼမ်မႃး။ ၶွမ်ႊပၼီႊ ၾၢႆႇဢၢႆႊထီႊ ၸိူဝ်းၼႆႉၵေႃႈ တေႁၼ်ဝႃႈ ၽႃသႃတႆးမီးၵူၼ်းၸႂ်ႉတိုဝ်းၼမ်ယူႇၼႆသေ တေဝူၼ်ႉသွၼ်ႇ ၶပ်ႉၶိုင်ပႃး ၼႂ်းလၢႆလၢႆၶၵ်ႉတွၼ်ႈမႃး။

ဢမ်ႇဝႃႈ တေပဵၼ်ၵေႃသိုဝ်ႇၶၢဝ်ႇ၊ ၸုမ်းပၢႆးပၺ်ႇၺႃႇ၊ ၵေႃလိၵ်ႈလၢႆးတႆးၵူႈတီႈတီႈ ၸိူဝ်းၼႆႉ ႁႂ်ႈမေႃၸုင်ၸၼ်ၵၼ်၊ ဢုပ်ႇဢူဝ်းၵၼ် တမ်းဝၢင်းၽႅၼ်ၵၢၼ် ဢၼ်မိူၼ်ၵၼ်ၸင်ႇတေမီးလွင်ႈၶိုပ်ႈၼႃႈ ၼႂ်း ၼႃႈၵၢၼ်ဢၢႆႊထီႊတႆး။

ပေႃးၸိူင်ႉၼၼ်  ၵူၼ်းၸႂ်ႉတိုဝ်းလိၵ်ႈလၢႆးတႆးၵေႃႈ တေဢမ်ႇၵႂင် ၊ ၽူႈၶိုင်လိၵ်ႈလၢႆးတႆး ၼႂ်းဢၢႆႊထီႊတႆး လၢႆလၢႆၸဝ်ႈၵေႃႈ တေဢမ်ႇမီးလွင်ႈၶွင်ႈၶမ်။ ပဵၼ်မႃးၼင်ႇၼၼ်ၵွၼ်ႇ ၸင်ႇတေၸၢင်ႈၶိုင်ပွင် ႁႂ်ႈလိၵ်ႈတႆးၵႂၢမ်းတႆး ၵႂႃႇလႆႈလွတ်ႈလႅဝ်းထၢင်ႇႁၢင်ႈၼႆ ၽူႈႁူႉႁၼ်ၼႂ်းဢၢႆႊထီႊတႆး သိုပ်ႇလၢတ်ႈၼႄၼင်ႇၼႆ။