ႁႂ်ႈပဵၼ်ၵၢၼ်ၵမ်ႉ ႁႅင်းႁူမ်ႈၵၼ်ႁႄႉ တၢင်းပဵၼ် ဝူႊႁၢၼ်ႊ ၶူဝ်ႊရူဝ်ႊၼႃႊ ၼႆသေ ၶွမ်ႊမတီႊ ၸတ်းပွႆး ဝၼ်းၸိူဝ်ႉၸၢတ်ႈၸိုင်ႈတႆး/ဝၼ်းမိူင်းတႆး/ဝၼ်းၶိူဝ်းတႆး 7 February  ၶွပ်ႈတဵမ် 73 ပီ တီႈဝဵင်းၼမ်ႉၶမ်း ၵေႃႈ ၸတ်းႁဵတ်းပၢင်ၵုမ်ၵၼ်သေ တႅပ်းတတ်းဝႃႈ တေဢမ်ႇႁဵတ်းပွႆးယဝ်ႉ ဝႃႈၼႆ။

ၼႂ်ၼႆႉ ဝၼ်းတီႈ 01/02/2020 ၶွမ်ႊမတီႊ ၸတ်းပွႆး ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈတဵမ် 73 ပီ တီႈဝဵင်း ၼမ်ႉၶမ်း မွၵ်ႇႁွင်ႉ ပေႃႈဝၢၼ်ႈ မႄႈမိူင်းသေ ၸတ်းႁဵတ်းပၢင်ၵုမ် ဢုပ်ႇဢူဝ်းတူၵ်းလူင်းၵၼ် လၢႆၶေႃႈ လွင်ႈတေဢမ်ႇၸတ်းႁဵတ်း ပၢင်ပွႆး 7 February  ။

ၵဵဝ်ႇၵပ်းလွင်ႈၼႆႉသေ ၸၢႆးမွၵ်ႇသႂ် ၽူႈၶၢၼ်ပၢၵ်ႇ ၶွမ်ႊမတီႊ ၸတ်းပွႆး ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈတဵမ် 73 ပီ ဝဵင်းၼမ်ႉၶမ်း လၢတ်ႈတီႈ ၸုမ်းၶၢဝ်ႇၽူႈတွႆႇႁွၵ်ႈဝႃႈ – “ဝဵင်းႁဝ်းၶႃႈၼႆႉ တိတ်းၵပ်းလႅၼ်လိၼ်ၶႄႇ၊ ၾၢႆႇၼိုင်ႈ ၾၢႆႇယူႇလီလုမ်ႈၾႃႉ WHO ၵေႃႈ ပိုၼ်ၽၢဝ်ႇ ၾၢင်ႉတိူၼ် လွင်ႈမႅင်းတၢင်းပဵၼ် ဢၼ်ၼႆႉဝႆႉလႄႈ ၼင်ႇႁိုဝ် ႁႂ်ႈပဵၼ်တၢင်းႁႄႉၵင်ႈ မႅင်းတၢင်းပဵၼ်ၼႆႉ ယႃႇႁႂ်ႈ မႃးၸပ်းၽႄႈ တီႈၵူၼ်းမိူင်းႁဝ်းၶႃႈ ၼႆသေ ၸင်ႇတႅပ်းတတ်းဝႃႈ တေဢမ်ႇပႆႇႁဵတ်းယဝ်ႉ ဝၼ်းမိူင်းတႆး ႁဝ်း ၶွပ်ႈတဵမ် 73 ပီ ပီၼႆႉ” – ဝႃႈၼႆ။

ၶေႃႈပိုၼ်ၽၢဝ်ႇ ၶွမ်ႊမတီႊ ပၢင်ပွႆးဝဵင်းၼမ်ႉၶမ်း ၵဵဝ်ႇၵပ်း လွင်ႈတေဢမ်ႇၸတ်းပွႆး ဝၼ်းၸိူဝ်ႉၸၢတ်ႈ ၸိုင်ႈတႆး ၶွပ်ႈတဵမ် 73 ပီ ၼၼ်ႉ မီးယူႇ 5 ၶေႃႈ။ ၼႂ်းၼၼ်ႉတႄႉ – ၾၢႆႇယူႇလီလုမ်ႈၾႃႉ ပိုၼ်ၽၢဝ်ႇ ၾၢင်ႉ တိူၼ် လွင်ႈၸိူဝ်ႉမႅင်း Novel Corona Virus  ၊ လွင်ႈတၢင်းမိူင်းၶႄႇ ၵေႃႈ ၸိူဝ်ႉမႅင်းၼႆႉ ၽႄႈၼမ် ႁႅင်း၊ ဝဵင်းၼမ်ႉၶမ်းသမ်ႉပဵၼ်မိူင်းတိတ်းၸပ်းလႅၼ်လိၼ်လႄႈ ပီၼႆႉ တေဢမ်ႇၸတ်းႁဵတ်းယဝ်ႉ ၸဵမ်ၸိူဝ်းၼႆႉ။

ၸိူင်ႉၼၼ်ၼင်ႇၵဝ်ႇ ဝဵင်းမူႇၸေႊ ဢၼ်ဢၢၼ်းၸတ်းႁဵတ်းပွႆး 7 Feb ၶိုၵ်ႉယႂ်ႇၵိုၼ်းၶွၼ်ႈ ၼၼ်ႉၵေႃႈ  ယွၼ်ႉၵူဝ်တၢင်းပဵၼ် မႃးၽႄႈၼႂ်းပွႆး  ၵူဝ် ၵူၼ်းဝၢၼ်ႈၵူၼ်းမိူင်းတိတ်းၸပ်းၵၼ်မူတ်းၼႆသေ တႅပ်းတတ်းဝႃႈ  တေဢမ်ႇ ႁဵတ်းပွႆးယဝ်ႉဝႃႈၼႆ။

ပေႃးဢမ်ႇမီးဝၼ်းၸိူဝ်ႉၸၢတ်ႈၸိုင်ႈတႆး တိုၼ်းဢမ်ႇၸၢင်ႈမီးမႃးဝၼ်းမိူင်းႁူမ်ႈတုမ်လႄႈ ဝၼ်းၸိူဝ်ႉၸၢတ်ႈၸိုင်ႈတႆး/ဝၼ်းမိူင်းတႆး/ဝၼ်းၶိူဝ်းတႆး 7 February ၼႆႉ ပဵၼ်သင်မႃးၵေႃႈယဝ်ႉ ၵိုၵ်းၵပ်းၸိူင်ႈတႆးမႃးယဝ်ႉလႄႈ ၼင်ႇႁိုဝ် ၵူၼ်းဝၢၼ်ႈၵူၼ်းမိူင်း ပေႃးတေ ဢမ်ႇလူင်လိုမ်း လိၵ်ႈႁူမ်ႈမၢႆ ပၢင်လူင်၊ ပိုၼ်းပဵၼ်မႃး ဝၼ်းၸိူဝ်းၼႆႉ ႁူမ်ႈဝႃႈ ဢမ်ႇပဵၼ်ႁဵတ်းပွႆးၶုၵ်းထူပ်း ၵေႃႈ ၵူၼ်းမိူင်းတႆး ၵူႈတီႈ ၵူႈလႅၼ် လီပူၵ်းၸွမ်ပိဝ်မိူင်းတႆး/တုင်းၸိူဝ်ႉၸၢတ်ႈမိူင်းတႆးၵၼ်သေ ၽုၵ်ႇၾင်ဝႆႉ ၼႂ်းႁူဝ်ၸႂ်ၽႂ်မၼ်းဝႃႈၼႆ။

တၢင်းပဵၼ်ဢၼ်တႄႇမႃးတီႈ ဝဵင်းဝူႁၼ် ၸႄႈမိူင်းႁူပေႇ မိူင်းၶႄႇ – ၸိူဝ်ႉမႅင်း ၶူဝ်ရူဝ်ႊၼႃႊ ၼႆႉ ၶၢဝ်းတၢင်း သွင်ဝူင်မႃးၼႆႉၵူၺ်း ၽႄႈထိုင် 22 မိူင်း ၊ ႁူဝ်ၵူၼ်း 12027 ၵေႃႉ၊ လူႉတၢႆ 259 ၵေႃႉ ယဝ်ႉၼႆ ၶၢဝ်ႇ SCMP (South China Morning Post) ပိုၼ်ၽၢဝ်ႇဝႆႉၼင်ႇၼႆ။ မိူင်းဢမေႊရီၵၼ်ႊ ၵေႃႈ ႁၼ်ဝႆႉ ၵူၼ်းၸပ်းတၢင်းပဵၼ်ၼႆႉၵေႃႉၼိုင်ႈ၊ မိူင်းထႆး ၸပ်း 19 ၵေႃႉ သေ ပဵၼ်မိူင်းၽႄႈၼမ် ဝႆႉတီႈသွင်။ ၸိူဝ်ႉမႅင်းၼႆႉ ယွၼ်ႉၸပ်းၵၼ်ငၢႆႈႁႅင်းၼႃႇလႄႈ လူင်ပွင်ၸိုင်ႈမိူင်းၶႄႇ ပေႃးလႆႈႁဵတ်းႁူင်းယႃမႆသေ ယူတ်းယႃ ၵူၼ်းၸပ်းတၢင်ပဵၼ် ၼႆႉႁင်းၶေႃ။ တၢင်းပဵၼ်ၼႆႉ ယွၼ်ႉ ဢဝ် မိင်ႇ/ဝိင်ႇ ဢဝ်ငူး ၵိၼ်လႄႈ တႄႇ ၸပ်းၽႄႈမႃး။