ႁႅင်းၵၢၼ်မိူင်းႁူမ်ႈတုမ် ၼႂ်းမိူင်းလၢဝ်း ပွၵ်ႈႁိူၼ်းၶိုၼ်း

ႁႅင်းၵၢၼ်မိူင်းႁူမ်ႈတုမ် ၼႂ်းမိူင်းလၢဝ်း ဢွၼ်ၵၼ်ပွၵ်ႈႁိူၼ်းၶိုၼ်း ယွၼ်ႉတၢင်းပဵၼ်ဝႆးရတ်ႊသ်ၶူဝ်ႊရူဝ်ႊၼႃႊ ဢၼ်ၽႄႈဝႆး ၼႂ်းမိူင်းၶႄႇၼၼ်ႉ။

ၼႂ်းဝၼ်းတီႈ 28-29/1/2020 ၶၢဝ်းတၢင်း 2 ဝၼ်းမႃးၼႆႉ ႁႅင်းၵၢၼ်မိူင်းႁူမ်ႈတုမ် ၸိူဝ်းၵႂႃႇႁဵတ်းၵၢၼ်ၼႂ်းမိူင်းလၢဝ်းၼၼ်ႉ ဢွၼ်ၵၼ်ပွၵ်ႈၶိုၼ်းၶဝ်ႈမႃးတၢင်းတႃႈႁိူဝ်းဝၢၼ်ႈပုင်ႇ ဢိူင်ႇမိူင်းၽူင်း(ၵ) ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း ယွၼ်ႉတၢင်းပဵၼ်ၶူဝ်ႊရူဝ်ႊၼႃႊ ဢၼ်ပဵၼ်ယူႇတၢင်းမိူင်းၶႄႇၽႄႈဝႆး ဝႃႈၼႆ။

လုင်းၸၢႆးၵျေႃႇ ၵူၼ်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ “ၼႂ်းၶၢဝ်းတၢင်း 2 -3 ဝၼ်းမႃးၼႆႉ ႁႅင်းၵၢၼ်မိူင်းမၢၼ်ႈ ဢၼ် ၵႂႃႇႁဵတ်းၵၢၼ်တၢင်းမိူင်းလၢဝ်းၼၼ်ႉ ဢွၼ်ၵၼ်ပွၵ်ႈၶဝ်ႈမႃးၶိုၼ်း မွၵ်ႈ 1 ႁဵင်ၼႆႉ။ တေႃႈလဵဝ် ၼႂ်းဝဵင်းတႃႈၶီႈလဵၵ်းၼႆႉ ၵိုၼ်းလူင်ဝႆႉၶႃႈယဝ်ႉ။ ဢၼ်မႃးၼွၼ်းၸွမ်းဝတ်ႉဝႃးၵေႃႈၼမ်။ မၢင်ၵေႃႉ လႆႈတူဝ်ရူတ်ႉၵႃးသေ ပွၵ်ႈမိူဝ်း ႁိူၼ်းၵၼ်ၵေႃႈမီး ၽွင်ႈယဝ်ႉ”ဝႃႈၼႆ။

ႁႅင်းၵၢၼ် ဢၼ်ၵႂႃႇမီးတၢင်းမိူင်းလၢဝ်းၼႆႉ ၵမ်ႈၼမ်ပဵၼ်ၵူၼ်းမိူင်းထုင်ႉလိၼ်ပဵင်း။

လုင်းၸၢႆးၵျေႃႇ သိုပ်ႇလၢတ်ႈဝႃႈ “ မိူဝ်ႈၼႆႉတႄႉ ၸွင်ႇတေပွၵ်ႈမႃးထႅင်ႈ ဢမ်ႇမႃးထႅင်ႈတႄႉ ဢမ်ႇႁူႉ။ မိူဝ်ႈဝႃး ပီႈၼွင်ႉ တၢင်းၵျွၵ်ႉမႄး၊ မိူင်းငေႃႉ၊ လႃႈသဵဝ်ႈ၊ တၢင်ႉယၢၼ်း ၸိူဝ်းၼၼ်ႉတႄႉ ပွၵ်ႈႁိူၼ်းၵၼ်ၵမ်ႈၽွင်ႈယဝ်ႉ။ ႁႅင်းၵၢၼ်မၢၼ်ႈဢၼ် လုၵ်ႉတၢင်း မိူင်းလၢဝ်းမႃး ၼႆႉ ၵမ်ႈၼမ်ပဵၼ်ၵူၼ်းတၢင်းပွတ်းလိၼ်ထုင်ႉပဵင်း ႁႅင်းၵၢၼ်မိူင်းမၢၼ်ႈဢၼ်ၵႂႃႇႁဵတ်းၵၢၼ် တၢင်းမိူင်းလၢဝ်းၼၼ်ႉ ၵမ်ႈၼမ်ၵႂႃႇႁဵတ်းၵၢၼ်ၵေႃႇသၢင်ႈၵၼ်”ဝႃႈၼႆ။

ႁွင်ႈၵၢၼ်သိုဝ်ႇၶၢဝ်ႇ Tachileik News Agency ဢွၵ်ႇဝႆႉတႄႉ ၼႂ်းၶၢဝ်းတၢင်း 2 ဝၼ်းၼႆႉ ႁႅင်းၵၢၼ် မိူင်းႁူမ်ႈတုမ် ဢၼ် လုၵ်ႉတၢင်းမိူင်းလၢဝ်း ပွၵ်ႈမႃးၼႆႉ တင်းမူတ်းမီး 689 ၵေႃႉ ဝႃႈၼႆ။

ၵဵဝ်ႇလူၺ်ႈလွင်ႈႁႅင်းၵၢၼ်မိူင်းႁူမ်ႈတုမ် ဢၼ်ပွၵ်ႈၶဝ်ႈမႃး တၢင်းတႃႈႁိူဝ်းဝၢၼ်ႈပုင်ႇ ဢိူင်ႇမိူင်းၽူင်း(ၵ) ၼႆႉ ယူႇတီႈၽူႈမီး ပုၼ်ႈၽွၼ်းလႄႈ ႁွင်ႈၵၢၼ်ပၢႆးယူႇလီ လႆႈႁူမ်ႈၵၼ်သေ ၵႂႃႇၵူတ်ႇထတ်းလူမ်းမႆႈ ပၢႆးယူႇလီပၼ်ယဝ်ႉ ၸင်ႇပၼ်ၶဝ်ႈမႃး ဝႃႈ ၼႆ။

တေႃႈလဵဝ် ၵူၼ်းၸပ်းတၢင်းပဵၼ်ဝႆးရတ်ႊသ်ၶူဝ်ႊရူဝ်ႊၼႃႊတၢင်းလုမ်ႈၾႃႉၼႆႉ မီးၵႂႃႇ 7,912 ၵေႃႉ၊ ဢၼ်လႆႈလူႉတၢႆၵႂႃႇ သမ်ႉ မီး 170 ၵေႃႉ။ မိူင်းဢၼ်ၸပ်းတၢင်းပဵၼ်ၼမ်တီႈသုတ်း ပဵၼ်မိူင်းၶႄႇ မီးႁူဝ်ၵူၼ်းယူႇ 7,801 ၵေႃႉ ဢၼ်တၢႆၼႆႉ ၵေႃႈ ပဵၼ်ၼႂ်းမိူင်းၶႄႇလွၼ်ႉလွၼ်ႉ ယူႇတီႈသိုဝ်ႇ ၶၢဝ်ႇ South China Morning Post ဢွၵ်ႇဝႆႉၼင်ႇၼႆ။