သိုၵ်း TNLA ပိုၼ်ၽၢဝ်ႇ ယွမ်းႁပ်ႉဝႃႈ လႆႈယိုဝ်းမႅၼ်ႈမေႃသွၼ်ႁူင်းႁဵၼ်းၸၼ်ႉငဝ်ႈ တၢႆၵေႃႉၼိုင်ႈ ၼႂ်းၸႄႈဝဵင်းၵူတ်ႉၶၢႆ ၸိုင်ႈတႆး ပွတ်းႁွင်ႇ။
မိူဝ်ႈဝၼ်းတီႈ 24/1/2020 ယၢမ်းၵၢင်ၶမ်ႈမွၵ်ႈ 7 မူင်းၼၼ်ႉ လူၺ်းမျုႉမူၺ်းဢွင်ႇ မေႃသွၼ် တီႈႁူင်းႁဵၼ်းၸၼ်ႉငဝ်ႈ လူင်ပွင်ၸိုင်ႈမၢၼ်ႈ ၼၼ်ႉၺႃးယိုဝ်းတၢႆ တီႈႁွင်ႈသဝ်းမၼ်းၼၢင်း ဝၢၼ်ႈ ႁူၺ်ႈၶူၵ်ႉ ၸႄႈဝဵင်းၵူတ်ႉၶၢႆ ၸိုင်ႈတႆးပွတ်းႁွင်ႇ။
TNLA ဢွၵ်ႇၶေႃႈပိုၼ်ၽၢဝ်ႇ မိူဝ်ႈဝၼ်းတီႈ 27 ၼၼ်ႉဝႃႈ ၵေႃႉယိုဝ်း မေႃသွၼ်ဝၢၼ်ႈႁူၺ်ႈၶူၵ်ႉ ၼၼ်ႉပဵၼ်ၵူၼ်းသိုၵ်း ၶဝ်ၸိုဝ်ႈႁွင်ႉ မၢႆး ၽူဝ်းၸဵင်ႇ ။ တေႃႈလဵဝ် လႆႈၵုမ်းၶင်တူဝ်မၼ်းဝႆႉသေ တေပၼ်တၢင်းၽိတ်းမၼ်းၸၢႆးၵႂႃႇ ဝႃႈၼႆ။
ၼႂ်းလိၵ်ႈၼၼ်ႉပႃးဝႆႉဝႃႈ သင်ဝႃႈပၼ်တူတ်ႈတၢမ်ႇၵူၼ်းသိုၵ်း ၽူႈပူၼ်ႉပႅၼ်ၶႃႈႁႅမ်ၼၼ်ႉယဝ်ႉၸိုင် တေဢဝ်မႃးၸႅင်ႈၼေပၼ်ၾၢႆႇၼႃႈၵူၼ်းတင်းၼမ် ႁႂ်ႈလႆႈႁပ်ႉႁူႉၸွမ်း ယူႇဝႃႈၼႆ။
ဢူးဢွင်ႇဝိၼ်း ၵေႃႉပဵၼ်လုင်း မေႃသွၼ် လုၺ်းမျႃႉမူၺ်းဢွင်ႇ လၢတ်ႈတီႈၽူႈတွႆႇႁွၵ်ႈဝႃႈ “ တၢင်းၾၢႆႇၸုမ်းယိပ်းၵွင်ႈၵၢင်ႇ တႄႉ ၶဝ်ယွမ်းႁပ်ႉဝႃႈ ပဵၼ်ၵူၼ်းၶဝ်။ လွင်ႈၶဝ်တေပၼ်တၢင်းၽိတ်းၼၼ်ႉ ၶဝ်တေႁဵတ်းၸိူင်ႉႁိုဝ်သေ ပၼ်ဢၼ်ဝႃႈ ဢၼ်ဝႃႈၼၼ်ႉ ဢမ်ႇပႆႇလႆႈႁူႉ” ဝႃႈၼႆ။
ၵဵဝ်ႇၵပ်းလွင်ႈၼႆႉ ယူႇတီႈၸုမ်း ၶၢဝ်ႇၽူႈတွႆႇႁွၵ်ႈ လႆႈတွင်ႈထၢမ်ၵႂႃႇတီႈၽူႈၶၢၼ်ပၢၵ်ႇ TNLA မၢႆးဢၢႆႈၵျေႃႇယူႇ သေတႃႉဢမ်ႇမီး လွင်ႈတုမ်ႉတွပ်ႇလၢတ်ႈ သင်မႃးၶိုၼ်း။
“ ၶႃႈႁဝ်းၶဝ်ၶႂ်ႈလၢတ်ႈတႄႉ ပၼ်ႁႃၸိူင်ႉၼႆ ယႃႇႁႂ်ႈလႆႈပဵၼ်ထႅင်ႈ။ ၶႂ်ႈႁႂ်ႈပွင်ႇၸႂ်လွင်ႈ သုၼ်ႇတူဝ်လႄႈသုၼ်ႇၸုမ်းၼၼ်ႉၸႅင်ႈလႅင်းလီသေ ယဝ်ႉၵေႃႈ ၶႂ်ႈႁႂ်ႈၵႄႈလိတ်ႈပၼ်ႁႃပၼ်ႁႂ်ႈလႆႈၽဵင်ႇပဵင်း” ဢူးဢွင်ႇဝိၼ်း တုၵ်းယွၼ်းလၢတ်ႈၼႄၼင်ႇၼႆ။
ဢူးဢွင်ႇဝိၼ်း လၢတ်ႈထႅင်ႈဝႃႈ – ဢမ်ႇၶႂ်ႈႁႂ်ႈၵႄႈလိတ်ႈပၼ်ႁႃလူၺ်ႈၵွင်ႈၵၢင်ႇ ။ မိူဝ်းၼႃႈမႃးၼင်ႇႁိုဝ်တေဢမ်ႇမီးလွင်ႈပူၼ်ႉပႅၼ်ႈၶႃႈႁႅမ်ထႅင်ႈၼၼ်ႉ ႁႂ်ႈလႆႈပၼ်တၢင်းၽိတ်းၼေတူဝ်ယၢင်ႇဝႆႉ ႁႂ်ႈလႆႈလၢပ်ႇ လႆႈတွင်းၵၼ်လီလီ။ မေႃသွၼ်လူၺ်းမျႃႉမူၺ်းဢွင်ႇၼႆႉပဵၼ်ၵူၼ်းဢၼ်ယူႇၵတ်းၵတ်းယဵၼ်ယဵၼ်ႁင်းမၼ်း။ လႆႈလုသုမ်းမေႃသွၼ်လီလီတႃႇလုၵ်ႈႁဵၼ်း ၼႆႉပဵၼ်ဢၼ်ၶေႃးၶူမ်သေးလၢႆတႄႉတႄႉ ဝႃႈၼႆ။
ၵူၼ်းသိုၵ်း TNLA ယိုဝ်း မေႃသွၼ်လုၺ်းမျုႉမူၺ်းဢွင်ႇတၢႆၼၼ်ႉ ပဵၼ်ယွၼ်ႉသင် ၼႆတႄႉ ယင်းပႆႇလႆႈႁူႉၸွမ်း။
