ၸုမ်းတူင်ႉၼိုင်သုၼ်ႇလႆႈၵူၼ်း မိူင်းလႅတ်ႇတိၼ်ႇဢမေႊရိၵ ဢဝ်လိူင်ႈၶႃႈႁႅမ်ၶိူဝ်းၵူၼ်း တၢႆပဵၼ်ၵေႃႇပဵၼ်ၵွင် တၢင်းမိူင်းရၶႅင်ႇၼၼ်ႉသေ ၸႅင်ႈၵႂၢမ်း “ၸွႆးတြႃး” တီႈလုမ်းတြႃး မိူင်းဢႃႊၵျိၼ်ႊတီႊၼႃႊ ႁႂ်ႈဢဝ်လိူင်ႈ တေႃႇဢွင်ႇသၢၼ်းၸုၵျီႇ လႄႈ ၸွမ်ၸိၵ်းသိုၵ်းမိၼ်းဢွင်ႇလၢႆႇ ဢိၵ်ႇပႃးတင်း သႅၼ်းၽူႈၼမ်းလၢႆလၢႆၵေႃႉ -ဝႃႈၼႆ။
ၾၢႆႇမၢႆမီႈလုမ်းတြႃးလုမ်ႈၾႃႉမီးဝႆႉဝႃႈ လွင်ႈပူၼ်ႉပႅၼ် ရႃႇၸဝၢတ်ႈသိုၵ်း၊ ပူၼ်ႉပႅၼ်သုၼ်ႇလႆႈၵူၼ်း ႁၢႆႉႁႅင်းတီႈလႂ်မိူင်းလႂ်ၵေႃႈယဝ်ႉ ယိုၼ်ႈလိူင်ႈတၢင်ႇတီႈလုမ်းတြႃး လႆႈၵူႈတီႈ၊ ၵူႈၸိုင်ႈမိူင်းၼႂ်းလုမ်ႈၾႃႉ ဝႃႈၼႆသေတႃႉ ပေႃးၵဵဝ်ႇၵပ်းလွင်ႈ လူင်ပွင်ၸိုင်ႈလႄႈ ၽူႈၼမ်းသိုၵ်းမိူင်းႁူမ်ႈတုမ်မၢၼ်ႈၼႆ လိူဝ်သေ လုမ်းတြႃးမိူင်းဢႃႊၵျိၼ်ႊတီႊၼႃႊ ဢမ်ႇၸၢင်ႈ ၵႂႃႇတၢင်ႇတီႈလႂ် ၼႆ Tomas Ojea ၽူႈတၢင်ႇယိုၼ်ႈလိူင်ႈ လၢတ်ႈတီႈၸုမ်းၶၢဝ်ႇ APF ၼင်ႇၼႆ။
ၾၢႆႇၼိုင်ႈၵေႃႈယွၼ်ႉပိူဝ်ႈ ယူႇတီႈလုမ်းတြႃးမိူင်းဢႃႊၵျိၼ်ႊတီႊၼႃႊၼႆႉ ႁပ်ႉပိူင်ၸတ်းထတ်း တတ်းသိၼ်တြႃး ၵူႈၸိုင်ႈမိူင်း Universal Jurisdiction ၸင်ႇလႆႈယိုၼ်ႈလိူင်ႈတီႈၼၼ်ႈ။ လုမ်းတြႃးတၢင်ႇမိူင်းသမ်ႉ ၵူဝ်တုမ်ႉတိူဝ်ႉဝူင်ႈၵၢင်မိူင်းတေႃႇမိူင်းသေ ဢမ်ႇႁပ်ႉၸႅင်ႈၵေႃႈမီး။
ၼႂ်းၶေႃႈၵၢဝ်ႇႁႃၼၼ်ႉ ပႃးဝႆႉဝႃႈ ယွၼ်ႉပိူဝ်ႈလူင်းမိုဝ်းၸတ်းၵၢၼ် ၶႃႈႁႅမ်ၽဵဝ်ႈမူၺ်ႉၶိူဝ်းၵူၼ်း ၼႂ်းၸႄႈမိူင်းရၶႅင်ႇ၊ ယွၼ်ႉပိူဝ်ႈ ၸွႆႈထႅမ်တႃႇပဵၼ်မႃးလွင်ႈၵၢၼ်ၶႃႈႁႅမ်ၶိူဝ်းၵူၼ်း လႄႈ ယွၼ်ႉပိူဝ်ႈ ႁူမ်ႇတူမ်းၵဵပ်းသိူင်ႇ ၶေႃႈမုလ်းၶၢဝ်ႇသၢၼ် ပိူင်ပဵၼ်ၵၢၼ်ၶႃႈႁႅမ်ၽဵဝ်ႈမူၺ်ႉၶိူဝ်းၵူၼ်း – ၸဵမ်ၸိူဝ်းၼႆႉ။
လုမ်းတတ်းသိၼ်တြႃးမိူင်း ဢႃႊၵျိၼ်ႊတီႊၼႃႊၼႆႉ ႁပ်ႉယိပ်းထတ်းသၢင် သိင်ႇၶၻီး ၵူႈမိူင်းမိူင်း ၼႂ်းလုမ်ႈၾႃႉ။ ၼွၵ်ႈလိူဝ်လိူင်ႈၽူႈၼမ်းမိူင်းမၢၼ်ႈယဝ်ႉ ယၢမ်းလဵဝ်ယင်းယိပ်းလိူင်ႈ ပၼ်ႁႃသုၼ်ႇလႆႈ ၵူၼ်းမိူင်းၶႄႇလႄႈ မိူင်းသပဵၼ်ႊ ဝႆႉယူႇ ဝႃႈၼႆ။
ၶေႃႈမုၼ်း- AFP,VOA