မိူဝ်ႈဝႃးဝၼ်းတီႈ 15/3/2021 ၶွင်ႇသီႇသိုၵ်းပိုၼ်ၽၢဝ်ႇဢွၵ်ႇမႃးဝႃႈ ယူႇတီႈလုမ်းတြႃးသိုၵ်းသေ တေယိပ်းတိုဝ်းၵူတ်ႇထတ်းၵႂႃႇၼႆႉပဵၼ်တၢင်းၽိတ်း 23 လိူင်ႈ ၼႂ်းၼၼ်ႉပႃးတင်းလိူင်ႈသိုဝ်ႇ မီႇတီႇယႃႇ။
ၽွင်းၶၢဝ်းသိုၵ်းယိုတ်းဢႃႇၼႃႇၸိုင်ႈမိူင်းၼႆႉ ၵူၼ်းမိူင်းၼႄၵၢင်ၸႂ်သၢၼ်ၶတ်းသိုၵ်း၊ သိုၵ်းတင်းပလိၵ်ႈသမ်ႉ ဢဝ်လၢႆးႁၢႆႉပိုတ်းယိုဝ်းၽဵဝ်ႈမူၺ်ႉၵူၼ်းမိူင်းၶိုၼ်းလႄႈ ၵူၼ်းမိူင်းလႆႈဢဝ်လၢႆးၵူႈဢၼ်ဢၼ်သေ သၢၼ်ၶတ်းၼႄၵၢင်ၸႂ်ၶိုၼ်းၵတ်းၵတ်းယဵၼ်ယဵၼ်ႁႂ်ႈလႆႈ။ ၵွပ်ႈၼႆလႄႈသိုၵ်းတင်းပလိၵ်ႈလႆႈဢဝ်ဢဵၼ်ႁႅင်းသေ ႁၢမ်ႈႁႄႉယႃႉၾုင်ၵူၼ်းမိူင်း ပိုတ်းယိုဝ်းပေႃႉထုပ်ႉတီႉၺွပ်းၵႂႃႇ 2000 ပၢႆလႄႈ လူႉတၢႆၵႂႃႇ 200 ပၢႆ။
ၵွပ်ႈၼႆလႄႈ ၶွင်ႇသီႇသိုၵ်းၸင်ႇမႃးပိုၼ်ၽၢဝ်ႇဢွၵ်ႇဝႃႈ – လိူင်ႈႁၵ်းလင်တေႃႇသူႈၶိုၼ်းဝၢၼ်ႈမိူင်း ၊ ယႃႉသလေႇၼႃႈတႃ လူင်ပွင်ၸိုင်ႈ၊ ႁဵတ်းႁႂ်ႈ ၵၢၼ်တပ်ႉသိုၵ်းလႄႈ ၸုမ်းပၵ်းပိူင်မၢႆမီႈ လႆႈမီးလွင်ႈၶွင်ႉၶမ်ထိူင်းထိူဝ်ႉ ၸိူဝ်းၼႆႉၶဝ်ႈပႃးၼႂ်းတၢင်းၽိတ်းမတ်ႉတႃ 122၊ 124 သေ ဢၼ်ပဵၼ်လွင်ႈ ပိုၼ်ၽၢဝ်ႇၶၢဝ်ႇပွမ် ဢၼ်ႁဵတ်းႁႂ်ႈတုမ်ႉတိူဝ်ႉၶႃႈႁၢပ်ႇၵၢၼ်ၶုၼ် သမ်ႉတေလႆႈၺႃးမတ်ႉတႃ 505 ၊လိူဝ်ၼၼ်ႉပဵၼ်မၢႆမီႈ ၵပ်းသိုပ်ႇတင်းၸုမ်းၼွၵ်ႈမၢႆမီႈ၊ မၢႆမီႈၶိူင်ႈၵွင်ႈၵၢင်ႇ၊ ၶႃႈႁႅမ်ၵူၼ်း၊ ၸူၼ်ႁိမ်ၶူဝ်း၊ ၵၼ်ႉၸၼ်၊ ၵိၼ်သူးၵိၼ်လၢပ်ႈ ၊ ယႃႈမဝ်းၵမ်၊ ႁႄႉၵင်ၶူဝ်းၶွင်ၵူၼ်းမိူင်း ၸဵမ်ၸိူဝ်းၼႆႉ။
လိူဝ်ၼၼ်ႉယင်းမီးထႅင်ႈ လွင်ႈသိုဝ်ႇၶၢဝ်ႇ၊ လွင်ႈဢိတ်ႇလိၵ်ႈ၊ ၵူၼ်းၶဝ်ႈဢွၵ်ႇမိူင်း၊ ၵၢၼ်ၵပ်းသိုပ်ႇလူၺ်ႈၶိူင်ႈၸၢၵ်ႈ ဢီႊလႅၵ်ႉထရေႃးၼိၵ်ႉ၊ ၾၢႆႇၽွင်းငမ်းဝၢၼ်ႈဢိူင်ႇ၊ လွင်ႈၵေႃႇၵၢၼ်ႁၢႆႉၸိူဝ်းၼႆႉ ယူႇတီႈလုမ်းတြႃးသိုၵ်းသေ တေထတ်းထွင်ၸတ်းပွင်တႅပ်းတတ်းတြႃးပၼ်တူတ်ႈတၢမ်ႇၵႂႃႇ ဝႃႈၼႆ။
ၵဵဝ်ႇၵပ်းလွင်ႈၼႆႉ ၽူႈလူင်ႉလႅၼ်ႇၾၢႆႇပၢႆးမႆၢမီႈၵေႃႉၼိုင်ႈလၢတ်ႈဝႃႈ – “ၵမ်ႈၼမ်ပဵၼ်တၢင်းၽိတ်းဢၼ်တူဝ်ၶဝ် ပူၼ်ႉပႅၼ်ဝႆႉယူႇၼၼ်ႉလွၼ်ႉလွၼ်ႉ။ ပေႃးပဵၼ်ၵူၼ်းၶဝ် ၶဝ်တေတတ်းသိၼ် လူၺ်ႈတူတ်ႈတၢမ်ႇမဝ်မဝ်။ ပေႃးပဵၼ်ၵူၼ်းမိူင်းဢၼ်သၢၼ်ၶတ်းမႅၼ်ႈၶဝ် ၶဝ်တေတီႉၺွပ်းဢွၼ်တၢင်းသေ ဝၢႆးမႃးၶဝ်ၸင်ႇၶႂ်ႈဢဝ်လိူင်ႈလူၺ်ႈမၢႆမီႈသင်ၵေႃႈတေယူႇတီႈၶဝ်မူတ်း တေပဵၼ်ၸိူင်ႉၼႆၵူၺ်းၶႃႈ လၢႆးၶဝ်ႁဵတ်းယၢမ်းလဵဝ်ၼႆႉ ”- ဝႃႈၼႆ ။
