ၵူၼ်းမိူင်းမၢၼ်ႈ 2 ၵေႃႉ ဢၼ်ၶဝ်ႈမိူင်းထႆးတၢင်းၶူဝ်တႃႈၶီႈလဵၵ်းမႄႈသၢႆၼၼ်ႉ ၸွမ်းၼင်ႇပလိၵ်ႈမၢၼ်ႈယွၼ်းတၢင်းႁူမ်ႈမိုဝ်းမႃးႁႂ်ႈတိပၼ်ၼႆလႄႈ ပလိၵ်ႈထႆးပိုၼ်ၽၢဝ်ႇတိၺွပ်းဝႆႉ။
ဢၼ်ပလိၵ်ႈထႆးပိုၼ်ၽၢဝ်ႇတိၵူၼ်းမိူင်းမၢၼ်ႈ 2 ၵေႃႉၼၼ်ႉ ပဵၼ် မဢူးတၢၼ်းၶိၼ်ႇ ဢႃယု 26 ပီလႄႈ မွင်ႇမွင်ႇၸူဝ်း ဢႃယု 28 ပီ။
ၸွမ်းၼင်ႇသိုဝ်ႇၶၢဝ်ႇ ၵဵင်းမႆႇၼိဝ်းသ် ပိုၼ်ၽၢဝ်ႇဝႃႈ တႄႉ မိူဝ်ႈဝၼ်းတီႈ 10/9/2019 ပလိၵ်ႈမၢၼ်ႈၶဝ်ႈၵူတ်ႇသွၵ်ႈတီႈႁိူၼ်းလင်ၼိုင်ႈ ဢၼ်ယူႇဝဵင်းမႂ်ႇပွၵ်ႉ 5 ၸေႈဝဵင်းၶျၢၼ်းမျႃႉသႃႇၸီႇ ဝဵင်းလိူဝ်ႇ ၼၼ်ႉ တိလႆႈ ၵူၼ်း 4 ၵေႃႉလႄႈ ၶိူင်ႈၵွင်ႈၵၢင်ႇ တင်းၼမ်။ ၼႂ်းၼၼ်ႉပၢႆႈလွတ်ႈ 2 ၵေႃႉ ပဵၼ်မဢူးတၢၼ်းၶိၼ်ႇလႄႈ မွင်ႇမွင်ႇၸူဝ်း။ ပလိၵ်ႈမၢၼ်ႈၼႄးဝႃႈ ၸိူဝ်းၶဝ်ပဵၼ်သၢႆတပ်ႉသိုၵ်းရၶႅင်ႇ AA ဝႃႈၼႆ။
ပလိၵ်ႈထႆးလၢတ်ႈဝႃႈ – ၶဝ်သွင်ၵေႃႉၼႆႉ ၶဝ်ႈမႃးမိူင်းထႆးမိူဝ်ႈဝၼ်းတီႈ 8 /9/2019 ။ၶႃသွင်ၵေႃႉၼႆႉ ယွင်ႈၵွင်ႇသီၶၢဝ်ၶဝ်ႈမႃးတင်းသွင်ၵေႃႉ။ ၶဝ်ဢဝ် ဝတ်းဝႂ်ၶၢမ်ႈလၢၼ်ႇလႅၼ်လိၼ် ဢၼ်မီးဢႃယုယူႇလႆႈ 7 ဝၼ်း။ တေႃႇထိုင်ဝၼ်းတီႈ 14/9/2019 ၵေႃႈၶဝ်ဢမ်ႇဢွၵ်ႇပွၵ်ႈမိူဝ်းၶိုၼ်းလႄႈ ယုမ်ႇယမ်ဝႃႈၶဝ်တိုၵ်ႉမီးၼႂ်းမိူင်းထႆးယူႇ။ ယၢမ်းလဵဝ်တႄႉ သူင်ႇႁႅင်းပလိၵ်ႈ ပႂ်ႉၵူတ်ႇထတ်းႁၢဝ်ႈႁႅင်း ၵူႈလၢၼ်ႇၵူႈၵဵတ်ႉ ယဝ်ႉ- ဝႃႈၼႆ။
ဢၼ်ပလိၵ်ႈၵူတ်ႇထတ်းႁၼ်ၶိူင်ႈၵွင်ႈၵၢင်ႇၼႂ်းဝဵင်းလိူဝ်ႇမိူဝ်ႈဝၼ်းတီႈ 10/9/2019 ၼၼ်ႉပဵၼ် THLIRAYA XT-ITTE. Satellite Phone 40 လုၵ်ႈ၊ ဝႅၼ်ႉတူၺ်းၸမ် 3 ဢၼ်၊ ၵွၼ်ႈယၢမ်း 28 ထူင်၊ ၶီႈၽိုင်ႈ 35 လႅမ်ႈ၊ ၸေႈၶၢဝ် 15 ၵဵၼ်၊ ဢိၵ်ႇလၢႆလၢႆဢၼ်။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ