သိုၵ်းလူင်ပွင်ၸိုင်ႈ တီႉၺွပ်းၼုမ်ႇတႆးသွင်ပီႈၼွင်ႉ မၢပ်ႇၼႄးဝႃႈ ၵဵဝ်ႇၶွင်ႈပၢင်တိုၵ်းၸၼ်ႉၸွမ်သိုၵ်း

ၾၢႆႇႁူမ်ႇလူမ်ႈသိုၵ်း ၸယၽ လူင်ပွင်ၸိုင်ႈ ၼေႇပျီႇတေႃႇ တီႉၺွပ်းၼုမ်ႇတႆး သွင်ပီႈၼွင်ႉ မၢပ်ႇၼႄးဝႃႈ ၵဵဝ်ႇၶွင်ႈၵၼ်တင်း ၸုမ်းဢူၺ်းလီသိုၵ်း သၢမ်ၸုမ်း  ၶဝ်ႈလူမ်ႇယိုဝ်း ၸၼ်ႉၸွမ်သိုၵ်း DSTA တီႈဝဵင်းပၢင်ႁူႈ။

ဝၼ်းတီႈ 17/8/2019 ပူၼ်ႉမႃးၼႆႉ ၽူႈယႂ်ႇၵူၼ်းလူင်ပွၵ်ႉၽွင်ႇတေႃႇ ဝဵင်းပၢင်ႁူႈ(မေႇမဵဝ်ႉ) ၸွမ်းသူင်ႇၼႄ တၢင်း ၾၢႆႇႁူမ်ႇလူမ်ႈသိုၵ်း ၸယၽ ၶွင်သိုၵ်းလူင်ပွင်ၸိုင်ႈမၢၼ်ႈ ၼေႇပျီႇတေႃႇ ၶဝ်ႈၵူတ်ႇထတ်း ႁိူၼ်း လုင်းၸေႃးလႃႉ   ပေႃႈ မေႃသွၼ် ၸၢႆးၶုၼ်မိူင်း တင်း မေႃသွၼ်ၸၢႆးလႅင်းၸိုၼ်ႈ။ ၼႂ်းဝၼ်းၼၼ်ႉ ၸၢႆးလႅင်းၸိုၼ်ႈဢမ်ႇယူႇ၊ ၸယၽ ႁၼ်တီႈၼွၼ်းမၼ်းၸၢႆး သိူဝ်ႇဝႆႉၽႃႈတၼ်းသိူဝ်းလၢႆး (ၽႃႈသိူဝ်ႇသီ သိုၵ်းလၢႆး)၊ ၸၢၵ်ႈလၢတ်ႈ သႅၼ်းဢွၼ်ႇ ၶွင်ႈမၼ်းၸၢႆးလုၵ်ႈၼိုင်ႈ လႄႈ ႁွင်ႉဢဝ် ၵေႃႉပဵၼ်ပီႈဢၢႆႈမၼ်း ၸၢႆးၵႂႃႇထတ်းထၢမ် – ဝႃႈၼႆ။

ၸၢႆးၸေႃးလႃႉ ၵေႃႉပဵၼ်ပေႃႈလၢတ်ႈတီႈၽူႈတွႆႇႁွၵ်ႈဝႃႈ- “ဝၼ်းၼၼ်ႉ ယၢမ်းဝၢႆးဝၼ်း 5 မူင်း ၸယၽ မႃးသွၵ်ႈႁိူၼ်းႁဝ်းၶႃႈထိုင် 10 မူင်းၵၢင်ၶိုၼ်း။ ၶဝ်ႁၼ်ၸၢၵ်ႈ လၢတ်ႈ လဵၵ်ႉလဵၵ်ႉဢွၼ်ႇ ဢၼ်လုၵ်ႈၸၢႆးၶႃႈ ၸႂ်ႉ ၼႂ်းၵၢၼ် ၼႂ်းႁူင်းႁဵၼ်း ။လိူဝ်ၼၼ်ႉ သမ်ႉႁၼ်ၽႃႈတီႈၼွၼ်းလၢႆးသိုၵ်း။ ၶဝ်ထၢမ်ဝႃႈပဵၼ်ၶွင်ၽႂ်။ ၶႃႈဝႃႈပဵၼ်ၶွင် လုၵ်ႈၸၢႆးၶႃႈ ၸၢႆးလႅင်းၸိုၼ်ႈ။ မၼ်းသမ်ႉဢမ်ႇယူႇလႄႈတေသွပ်ႇထၢမ် ဢိတ်း ဢွတ်း ၼႆသေ ၶဝ်ႁွင်ႉဢဝ်ပီႈဢၢႆႈ မၼ်းၵႂႃႇ။  ဝၼ်းတီႈ 19 /8/2019 လုၵ်ႈၸၢႆးၶႃႈ ၸၢႆးလႅင်းၸိုၼ်ႈ ပွၵ်ႈမႃး ႁိူၼ်းၵေႃႈ ၶဝ်ၵၵ်းၶင်ဝႆႉထႅင်ႈ၊ တီႈႁွင်ႈၶင် တပ်ႉပလိၵ်ႈၸႄႈဝဵင်း ပၢင်ႁူႈဝႆႉ”– ဝႃႈၼႆ။

ၸၢႆးၶုၼ်မိူင်း ဢႃယု 28 ပီ၊ ၸၢႆးလႅင်းၸိုၼ်ႈဢႃယု 24 ပီ။ တင်းသွင်ၵေႃႉၼႆႉ ပဵၼ်ၶူးသွၼ်တီႈ ၸၼ်ႉၸွမ်တူင်ၵူၼ်းတႆး – ၵေႃတႆး ဝဵင်းၵႃလီႉ။ ၸၢႆးၶုၼ်မိူင်း လိုဝ်ႈၵၢၼ်သေ ပွၵ်ႈမိူဝ်းၸွႆႈၵၢၼ်ႁိူၼ်း၊ ၸၢႆးလႅင်းၸိုၼ်ႈ တေတေႃႇၵၢၼ်ႁဵၼ်းထႅင်ႈၼႆသေ ပွၵ်ႈမိူဝ်းယူႇႁိူၼ်း ႁၢင်ႈႁႅၼ်းတႃႇၶဝ်ႈၸၼ်ႉၸွမ် ထႅင်ႈ။

ၶူးသွၼ်ၸၢႆးၽူင်းၶွင်ႇ  ၽူႈပွင်ၵၢၼ် ႁူင်းႁဵၼ်းၵေႃတႆး လၢတ်ႈတီႈၽူႈတွႆႇႁွၵ်ႈဝႃႈ -“ ဢၼ်တပ်ႉသိုၵ်းၼႄး ဝႃႈၵဵဝ်ႇ ၶွင်ႈၵၼ်တၢင်း လွင်ႈၸုမ်း ပွႆႇမၢၵ်ႇတီႈႁူင်းႁဵၼ်း DSTA ၼႆၼၼ်ႉတႄႉ ဢမ်ႇပဵၼ်လႆႈၶႃႈ။ ဢဝ်တၢင်းဝူၼ်ႉ ၵေႃႈလီ တၢင်းႁဵတ်းတၢင်းသၢင်ႈၵေႃႈလီ မႃးထတ်း တူၺ်း တႄႉၶဝ်တၢင်းသွင်ပီႈၼွင်ႉၼႆႉ တႃႇတေၵႂႃႇ ႁဵတ်း လွင်ႈမဵဝ်းၼႆႉမၼ်းဢမ်ႇမီး။ တေဝႃႈ ဢဝ်ၶႃပီႈၼွင်ႉ ၵႂႃႇၼွင်ႇၵၢႆႇလွင်ႈယိုဝ်းႁူင်းႁဵၼ်းသိုၵ်း ဢၼ်ဝႃႈ ၼၼ်ႉ ၵေႃႈ ပေႃးမႃးတူၺ်း ၼိူဝ်ႉလိူတ်ႈၸိူဝ်ႉၶိူဝ်းဝႃႈၵေႃႈ ၶဝ်ဢမ်ႇၸႂ်ႈၸိူဝ်ႉၶိူဝ်းလဵဝ်ၵၼ်တင်း ၸုမ်းမႃးယိုဝ်းႁူင်း ႁဵၼ်းၼၼ်ႉ သေၸုမ်းၶႃႈလူး ။  လွင်ႈမၢပ်ႇၼႄးၼႆႉပဵၼ်ၾၢႆႇလဵဝ်ၵူၺ်းၶႃႈ။ ၶဝ်တိုၼ်းဢမ်ႇၵဵဝ်ႇၶွင်ႈၶႃႈ။ ” – ဝႃႈၼႆ။

ယူႇတီႈၵေႃတႆးသေယၢမ်းလဵဝ်တႄႉလႆႈၵမ်ႉထႅမ်ဝႆႉဝႃႈ ၶဝ် ပဵၼ်မေႃသွၼ်တီႈႁူင်းႁဵၼ်းၵေႃတႆးတႄႉတႄႉ။  ၶူဝ်းၶွင်ၸၢၵ်ႈလၢတ်ႈ၊  ၶိူင်ႈတူၺ်းၽႅၼ်တီႈ GPS ၸိူဝ်းၼႆႉ ပဵၼ်ၶိူင်ႈ ၸႂ်ႉ ၼႂ်းႁူင်းႁဵၼ်း တႃႇတိတ်း တေႃႇၵၼ် ၽွင်းဢွၼ်လုၵ်ႈႁဵၼ်းလူင်းလဵပ်ႈႁဵၼ်းၸွမ်းပိုၼ်ႉတီႈ – ဝႃႈၼႆ။

ၶူးၸၢႆးၽူင်းၶွင်ႇသိုပ်ႇလၢတ်ႈထႅင်ႈဝႃႈ – “ပေႃးဢဝ်ငဝ်းလၢႆးဝၼ်းမိူဝ်ႈလဵဝ်ဝႃႈတႄႉ လူင်ပွင်ၸိုင်ႈၵေႃႈ တေဝႆႉလွင်ႈၽဵင်ႇပဵင်းပဵၼ်ထမ်းယူႇ ႁၼ်ထိုင်ၼင်ႇၼႆ။ ၽွင်းယၢမ်းၵေႃႇသၢင်ႈလွင်ႈငမ်းယဵၼ်ၼႆႉ ႁၼ်ၽႂ်ၵေႃႈ ဝႃႈပဵၼ်ၵူၼ်းၵဵဝ်ႇၶွင်ႈၼႆသေလႃႈလီတိၺွပ်းၵမ်းလဵဝ်တႄႉ ဢမ်ႇၸႂ်ႈလၢႆးမၼ်းယဝ်ႉ။ ၸၢင်ႈႁဵတ်းႁႂ်ႈသုၵ်ႉသၵ်ႉသေဢမ်ႇၵႃး ၸၢင်ႈႁဵတ်းႁႂ်ႈ ၵူၼ်းလီယဵၼ်းပဵၼ်ၵူၼ်းႁၢႆႉၵႂႃႇထႅင်ႈလူးၵွၼ်ႇ။”- ဝႃႈၼႆ။

ငဝ်ႈငုၼ်းတီႇမူဝ်ႇၶရေႇၸီႇ ၸိူဝ်ႉၶိူဝ်းတႆး SNLD လၢတ်ႈဝႃႈ မေႃသွၼ်သွင်ၵေႃႉ ပီႈၼွင်ႉၼႆႉ  ပဵၼ်ၵူၼ်း ဢၼ် တူင်ႉၼိုင်ၸွႆႈထႅမ်တူင်ႇဝူင်းၵူၼ်းလႄႈ ယူႇတီႈပႃႇတီႇသေ တေၸွႆႈထႅမ်ၵႂႃႇၼင်ႇ ၵႃႈပွင် ပဵၼ်လႆႈ ဝႃႈၼႆ။

ၸၢႆးလဵၵ်ႉၽူႈၼမ်းၼႂ်းၵူႈလွင်ႈလွင်ႈ ပႃႇတီႇ SNLD လၢတ်ႈဝႃႈ –  “ၶဝ်သွင်ၵေႃႉပီႈၼွင်ႉၼႆႉ ဢမ်ႇၸႂ်ႈ ၽူႈၶဝ်ႈ ပႃႇတီႇၼႆသေတႃႉ ၶဝ်ယၢမ်ႈၸွႆႈၵၢၼ်ႁဝ်းၶႃႈမႃး။ ၵဵဝ်ႇလူၺ်ႈၵၢၼ် ၸိူဝ်ႉၸၢတ်ႈ ၵၢၼ်ၵူၼ်းၼမ် ၼႆၶဝ်တိုၼ်းတူဝ်ႈတၼ်းတႃႇသေႇ။ ၵွပ်ႈၼၼ်  ဢၼ်ဝႃႈၶဝ်ၵဵဝ်ႇလူၺ်ႈ ၸွမ်းၸုမ်းယိပ်းၵွင်ႈၵၢင်ႇဢၼ် မႃးႁဵတ်းႁၢႆႉယူႇၸိူဝ်းၼၼ်ႉၼႆၼၼ်ႉ ၵေႃႈတိုၼ်း တေဢမ်ႇပဵၼ်လႆႈ ။ ယူႇတီႈၸုမ်းၵူၼ်းၼုမ်ႇဢၼ်ၶဝ် ယူႇၵႆႈၵိၼ်ၸမ်ၵၼ်ၼၼ်ႉလႄႈသင် ယူႇတီႈၸုမ်း ဢၼ်ႁဵတ်းပရႁိတ ၼၼ်ႉလႄႈသင် ၸုမ်းၵၢၼ် မိူင်းလႄႈသင် ၸုမ်းဢၼ်ယိပ်းၵွင်ႈၵၢင်ႇလုၵ်ႉ ၽိုၼ်ႉ ၸိူဝ်းၼၼ်ႉလႄႈသင် လီဢွၵ်ႇသဵင် ႁူင်ႁူင်ယႂ်ယႂ်ႇ ႁႂ်ႈမၼ်းၸဵဝ်းပူၼ်ႉလွတ်ႈမႃးလႆႈ ႁဝ်းၶႃႈၶႂ်ႈပၼ်တၢင်း ႁၼ် ထိုင် ၸိူင်ႉၼႆ။ႁဝ်းၶႃႈၵေႃႈ ၵႃႈၼင်ႇပွင်ပဵၼ် လႆႈ တေၶတ်းၸႂ်ႁဵတ်းယူႇ” – ဝႃႈၼႆ။

ပႃႇတီႇႁူဝ်သိူဝ် SNLD ယင်းတူၵ်ႇလၢတ်ႈဝႃႈ ၶဝ်ငမ်းငဝ်းသေ ႁွင်ႉထၢမ် ႁွင်ႉထတ်းဢၼ်ဝႃႈၼၼ်ႉ မၼ်း ပဵၼ်ၼႃႈတီႈၶဝ်၊ ၵူၺ်းၵႃႈ ႁွင်ႉၽႂ်ၵႂႃႇၵေႃႈယဝ်ႉ ပေႃးမၼ်းလိူဝ်ၵႂႃႇ 24 ၸူဝ်ႈမူင်းသေ သမ်ႉဢမ်ႇၼႄလႆႈ ငိူၼ်ႈငဝ်ႈ လွင်ႈလႆႈၵၵ်းၶင်ၼႆၸိုင် ပွင်ႇဝႃႈ ၸဝ်ႈၼႃႈတီႈၾၢႆႇတီႉၵႂႃႇၼၼ်ႉမီးပုၼ်ႈၽွၼ်း ၊ မီးတင်း ၽိတ်း။ ၵွပ်ႈပိူဝ်ႈၸိူင်ႉၼႆ ဢၼ်ၶဝ်ႁွင်ႉၵႂႃႇၵုမ်းၶင်ဝႆႉၼၼ်ႉ ႁဝ်းၶႃႈတိုၼ်း ဢမ်ႇယွမ်းႁပ်ႉလႆႈ – ဝႃႈၼႆ။

လုင်းၸေႃးလႃႉ  သိုပ်ႇလၢတ်ႈဝႃႈ – “လွင်ႈၼႆႉၶႂ်ႈႁႂ်ႈပဵၼ် လွင်ႈၽဵင်ႇပဵင်း။ လုၵ်ႈၸၢႆးႁဝ်းၶႃႈၼႆႉ ဢမ်ႇလႆႈၵပ်း သိုပ်ႇ တိတ်းတေႃႇ ၵဵဝ်ႇၶွင်ႈတင်းၸုမ်းၼွၵ်ႈမၢႆမီႈသင်။ ယူႇ​တီႈပေႃႈၵေႃႉၼိုင်ႈသေ လၢတ်ႈလႆႈတဵမ်သူပ်း တဵမ်ပၢၵ်ႇဢိူဝ်ႈ ။ ဢဝ်လွင်ႈထၢင်ႇထိူမ်သေ မႃးၺွပ်းလုၵ်ႈႁဝ်းတႄႉ ဢမ်ႇၶႂ်ႈႁႂ်ႈမၼ်းပဵၼ်။  ၸုမ်းပွႆႇမၢၵ်ႇတီႈ ၸၼ်ႉၸွမ်သိုၵ်း DSTA ၼၼ်ႉ ၶဝ်ၵေႃႈမီးလွင်ႈႁပ်ႉႁွင်းယဝ်ႉလူးဝႃႈပဵၼ်ၼမ်ႉမိုဝ်းၶဝ်ၼႆ။   ပေႃးဢဝ်ၶေႃႈ ၵႂၢမ်းၸိူဝ်းၼႆႉဝႃႈ ယူဝ်ၶေးလုၵ်ႈႁဝ်းၶႃႈတေၸဵဝ်းလႆႈဢွၵ်ႇမႃးၶိုၼ်းယူႇ။” -ဝႃႈၼႆ။

မိူဝ်ႈ 15/8/2019 ယၢမ်းၵၢင်ၼႂ် 5 မူင်း ၸုမ်းဢူၺ်းလီသိုၵ်း 3 ၸုမ်း – သိုၵ်းၶႄႇၵဝ်ႈၵၢင်ႉ MNDAA  ၊ သိုၵ်းလွႆတဢၢင်းTNLA  တင်း သိုၵ်းရၶႅင်ႇ AA ႁူမ်ႈၵၼ် လူမ်ႇယိုဝ်း ၸၼ်ႉၸွမ်သိုၵ်းၾၢႆႇပၢႆးၸၢၵ်ႈ လၢၼ်ႇ ၵူတ်ႇထတ်းယႃႈမဝ်းၵမ်ၼွင်ၶဵဝ်ႇ၊ လၢၼ်ႇႁူဝ်ၵိုတ်ႈ၊ ၶူဝ်ႁူၺ်ႈၵိုတ်ႈ ၸိူဝ်းၼၼ်ႉ မိူဝ်ႈလဵဝ် ၵၼ် 5 တီႈ၊ ပႃးၵူၼ်းမိူင်းၵေႃႉၼိုင်ႈ တင်း သိုၵ်းမၢၼ်ႈ၊ ပလိၵ်ႈမၢၼ်ႈ ႁူမ်ႈတင်းမူတ်း တၢႆ 14 ၵေႃႉ ။

ယၢမ်းလဵဝ်ပၢင်တိုၵ်းသိုပ်ႇၽႄႈၵႂႃႇ ၸွမ်းသၢပ်ႇတၢင်းလူင် ဝဵင်းလိူဝ်ႇ – လႃႈသဵဝ်ႈ – မူႇၸေႊ – ၼမ်ႉၶမ်း။ ၼႂ်းၸႄႈဝဵင်းၼမ်ႉၶမ်း၊ မူႇၸေႊ၊ ၵူတ်ႉၶၢႆ ၊ သႅၼ်ဝီ၊ ၵုၼ်လူင် တင်း လႃႈသဵင်ႈ ၸိူဝ်းၼႆႉၵေႃႈ ပၢင်တိုၵ်း ၽႄႈၸွတ်ႇထပ်းၵၼ်မႃးၶိူဝ်းယႂ်း၊ ၵူၼ်းမိူင်း 5000 ပၢႆ ၺႃးၸၢၵ်ႇသိုၵ်းသိူဝ်လႆႈပၢႆႈယၢၼ်ႁိူၼ်းယေး တီႈယူႇ။