ဝၼ်းတီႈ 26/03/2025 ယၢမ်းၵၢင်ၶမ်ႈ ယူႇတီႈ ၸုမ်းၵေႃတႆး ၸတ်းပၢင်ၵႅဝ်ႈ ဝၼ်းၶွပ်ႈၶူပ်ႇ 26 ပီတဵမ် တီႈႁူင်းႁဵၼ်းၸိူဝ်ႉၸၢတ်ႈ ၸၼ်ႉသုင် ဝဵင်းၵႃလီႉ ၸိုင်ႈတႆးပွတ်းၸၢၼ်း ၼႂ်းပၢင်ၵႅဝ်ႈၼႆႉ ၽူႈပွင်ၵၢၼ်ၵေႃတႆး လႆႈလိူၵ်ႈဢဝ် ၽူႈလူင်ႉလႅၼ်ႇၾၢႆႇပၢႆးပိုၼ်း Dr ၸၢႆးသၢင်ႇဢၢႆႈသေ ယိုၼ်ႈတွၼ်ႈပၼ် သူးရၢင်းဝလ်း ဢၼ်မီးၸိုဝ်ႈဝႃႈ “ၾၼ်းသိုပ်ႇၶိူဝ်း” ၼႆယဝ်ႉ။

သူးရၢင်းဝလ်းၾၼ်းသိုပ်ႇၶိူဝ်းၼႆႉ ယိူင်းဢၢၼ်း တႃႇယုၵ်ႉယွင်ႈမၵ်းမၼ်ႈ ၽူႈသၢင်ႈပိုၼ်းလီ တေႃႇၸိူဝ်ႉၶိူဝ်းမႃး ပီယၢဝ်းၶၢဝ်းႁိုင်သေ ယုၵ်ႉပိူင်ၾၢင်ၵႃႈၶၼ်တႆးသုင် ဢူမုၼ်တႆးႁိူင်း ၼႂ်းၵႄႈတႆးလႄႈ ၵူႈၸၢဝ်းၶိူဝ်း ၼႂ်းလုမ်ႈၾႃႉ ၼႆယဝ်ႉ။

ပေႃးထိုင်မႃး ၼႂ်းဝၼ်းၶွပ်ႈၶူပ်ႇ ဝၼ်းၵေႃႇတင်ႈၸုမ်းၵေႃတႆး ၵူႈပီပီၼႆႉ တေၶတ်းလိူၵ်ႈ ၽူႈၸိူဝ်းသၢင်ႈပိုၼ်းလီ တေႃႇၸိူဝ်ႉၶိူဝ်းမႃး ပီယၢဝ်းၶၢဝ်းႁိုင်သေ ယုၵ်ႉယွင်ႈမၵ်းမၼ်ႈၵႂႃႇ ၼိုင်ႈပီလႂ် ၼိုင်ႈၵေႃႉ။ ပီၼႆႉ ၸုမ်းၵေႃတႆး ၸင်ႇလႆႈလိူၵ်ႈမၵ်းမၼ်ႈ Dr ၸၢႆးသၢင်ႇဢၢႆႈသေ ယိုၼ်ႈမွပ်ႈသူးၾၼ်းသိုပ်ႇၶိူဝ်းၼႆႉမႃး ၼႆယဝ်ႉ။

ၼၢင်းႁဵဝ်းသႅင် ၽူႈပွင်ၵၢၼ်ၵေႃတႆး ႁူဝ်ပဝ်ႈ ၸၼ်ႉၸွမ်တူင်ႇၵူၼ်းတႆး မွၵ်ႇလၢတ်ႈဝႃႈ – “လွင်ႈတၢင်း ဢၼ်လႆႈလိူၵ်ႈ တွၵ်ႊတိူဝ်ႊ ၸၢႆးသၢင်ႇဢၢႆႈၼႆႉ ယွၼ်ႉမၼ်းၸဝ်ႈသွၵ်ႈႁႃငိူၼ်ႈငဝ်ႈပိုၼ်းတႆး တႅမ်ႈပိုၼ်းတႆး ၼင်ႇပပ်ႉလိၵ်ႈၾၢႆႇတႆး၊ ၾၢႆႇမၢၼ်ႈ၊ ၾၢႆႇဢိင်းၵလဵတ်ႈ တင်းၼမ်၊ ပဵၼ်ၵေႃႉၶတ်းၸႂ် ၼွင်ႇသၢၼ် ၸိူဝ်ႉၶိူဝ်း ဢၼ်လႆႈႁၢင်ႇယၢၼ်ၵႆတင်းၸိူဝ်ႉၶိူဝ်း မိူၼ် ၼင်ႇ – ပီႈၼွင်ႉတႆးဢႃႇႁူမ်ႇ (ဢႃႇသမ်ႇ)၊ ပီႈၼွင်ႉတႆး တၢင်းမိူင်းယၢင်းၽိူၵ်ႇလႄႈ ပီႈၼွင်ႉတႆး ၸိူဝ်းမီးၼႂ်းမိူင်းထႆး ၸိူဝ်းၼႆႉ”- ဝႃႈၼႆ။

သိုပ်ႇသေၼၼ်ႉ – ထႅင်ႈလွင်ႈၼိုင်ႈၵေႃႈ မၼ်းၸဝ်ႈ ပဵၼ်ၵေႃႉယုၵ်ႉယွင်ႈလိၵ်ႈလၢႆးတႆး ယၢမ်ႈလႆႈပဵၼ် ၵေႃႉဢဝ်ပုၼ်ႈၽွၼ်း ၼႂ်းၵေႃလိၵ်ႈလၢႆးလႄႈ ၾိင်ႈငႄႈတႆး ဝဵင်းတႃႈၵုင်ႈ ပီယၢဝ်းၶၢဝ်းႁိုင်သေ ပဵၼ်ၵေႃႉၶတ်းၸႂ်ၵမ်ႉထႅမ် ၼႂ်းပၢႆးပၺ်ႇၺႃႇၸိူဝ်ႉၶိူဝ်းတႆးမႃး။ ယဝ်ႉၵေႃႈ ၵမ်ႉထႅမ်ၵႃႈႁဵၼ်း တႃႇလုၵ်ႈႁဵၼ်း တၢင်းမိူင်းယၢင်းၽိူၵ်ႇသေ ပဵၼ်တီႈၵိူဝ်းၵုမ် ၸၼ်ႉၸွမ်တူင်ႇၵူၼ်းတႆးမႃးၼႆ – ၸုမ်းၵေႃတႆး ၸင်ႇပိုၼ်ၽၢဝ်ႇဝႆႉၼင်ႇၼႆ။

ၼႂ်းပၢင်ၵႅဝ်ႈၼႆႉ ၼွၵ်ႈလိူဝ်ယိုၼ်ႈမွပ်ႈယုၵ်ႉယွင်ႈ Dr ၸၢႆးသၢင်ႇဢၢႆႈယဝ်ႉ မီးပႃးပၢင်ၵိၼ်ၶဝ်ႈႁူမ်ႈမူႇ တင်းၸုမ်းတူင်ႉၼိုင်တူင်ႇဝူင်းၵူၼ်း၊ ၸုမ်းၾၢႆႇပၢႆးပၺ်ႇၺႃႇသေ ၵမ်ႉၸွႆႈငိုၼ်း တႃႇပၢႆးပၺ်ႇၺႃႇ ႁူင်းႁဵၼ်းပရႁိတ လွႆလွမ်ႉဝဵင်းတၢင်ႉယၢၼ်း၊ ႁူင်းႁဵၼ်းမွၵ်ႇၵွၼ်တႆး မိူင်းယႆ၊ ႁူင်းႁဵၼ်းတႆး လၢႆးၶႃႈလႄႈ ႁူင်းႁဵၼ်းၸိူဝ်ႉၸၢတ်ႈ ထုင်ႉယိူင်း ၸိူဝ်းၼႆႉပႃးသေ ၸုမ်းလုၵ်ႈႁဵၼ်းၶဝ် မီးတၢင်းၵႃႈၾိင်ႈထုင်းလႄႈ ဝွၵ်း ၸိူဝ်းၼႆႉ။

ၼႂ်းပၢင်ၵႅဝ်ႈၼႆႉ မီးမေႃသွၼ်၊ လုၵ်ႈႁဵၼ်း ပႃးၸဵမ်ၽူႈယႂ်ႇၵူၼ်းလူင် ၼႂ်းပိုၼ်ႉတီႈလႄႈ ၽူႈတူင်ႉၼိုင် ၵၢၼ်တူင်ႇဝူင်း ပၢႆးပၺ်ႇၺႃႇ ၼႂ်းမိူင်းတႆး ၸိူဝ်းၼႆႉ ၶဝ်ႈႁူမ်ႈဢမ်ႇယွမ်း 1,500 ၵေႃႉ ၼႆယဝ်ႉ။

သူးရၢင်းဝလ်း ၾၼ်းသိုပ်ႇၶိူဝ်းၼႆႉ ၸုမ်းၵေႃတႆး လႆႈတႄႇတင်ႈမႃး ၼႂ်းဝၼ်းတီႈ 26/03/2024 လႆႈ ယိုၼ်ႈမွပ်ႈပၼ် ၶူင်းပူင်သွၼ်လူင် လုင်းၸၢႆးၾႃႈ ပဵၼ်ၵေႃႉႁႅၵ်ႈ ပီၼႆႉ ပဵၼ်တွၵ်ႊတိူဝ်ႊ ၸၢႆးသၢင်ႇဢၢႆႈ ၼႆယဝ်ႉ။