ႁႅင်းၵၢၼ်မိူင်းႁူမ်ႈတုမ် 7 ၵေႃႉဢၼ်ၵႂႃႇႁဵတ်းၵၢၼ် တီႈၸႄႈမိူင်းလူင်ၶျွၼ်ႊ ၸိုင်ႈမိူင်းၶႄႇၼၼ်ႉ ၵိၼ်ၺႃးႁဵပ်းမိူဝ်ႇသေ လႆႈၶဝ်ႈႁူင်းယႃမိူင်းၶႄႇ ၊ မိူင်းၶႄႇ ယႃဢမ်ႇလႆႈလႄႈ သူင်ႇတူဝ်မႃးၶိုၼ်းၾင်ႇမိူင်းမၢၼ်ႈ၊ လူႉတၢႆၵႂႃႇ 5 ၵေႃႉယဝ်ႉ။
ဝၼ်းတီႈ 26/06/2019 ၼၼ်ႉ ႁႅင်းၵၢၼ်မိူင်းႁူမ်ႈတုမ် 7 ၵေႃႉ ဢၼ်ၵိၼ်ၺႃးႁဵပ်းမိူဝ်ႇၼၼ်ႉ ထုၵ်ႇသူင်ႇတူဝ်ပွၵ်ႈၶိုၼ်း မူႇၸေႊ တၢင်းၽၵ်းတူမိူင်းႁေႃၶမ်းလူင် (လႅၼ်လိၼ် တႆး – ၶႄႇ) သေ ယူႇတီႈ ၸုမ်းၸွႆႈထႅမ် ၵရုၼႃႇ မူႇၸေႊ လႆႈၵႂႃႇပႂ်ႉႁပ်ႉ ဢဝ်သေသူင်ႇတေႃႇႁူင်းယႃ ဝဵင်းလိူဝ်ႇၵမ်းလဵဝ်။
ႁႅင်းၵၢၼ် 7 ၵေႃႉ ဢၼ်ၵိၼ်ၺႃးႁဵပ်းမိူဝ်ႇၼၼ်ႉ ၵႂႃႇႁဵတ်းၵၢၼ် တီႈၼႂ်းသူၼ် ဝဵင်းလူင်ၶျွၼ်ႊ ၸႄႈမိူင်းယုၼၢၼ်ႊ ၸိုင်ႈ မိူင်းၶႄႇ။ ၵႂႃႇၵဵပ်းႁဵပ်း ဢၼ်ဢွၵ်ႇၼႂ်းသူၼ်ၼၼ်ႉ မႃးၵိၼ် ၊ ၵိၼ်ၵၢင်ဝၼ်း 1 တႃႇ ဢမ်ႇပဵၼ်သင်လႄႈ ၵိၼ်ၵၢင်ၶမ်ႈထႅင်ႈတႃႇၼိုင်ႈၸင်ႇပဵၼ်ႁူဝ်ၶႆႈ ႁူဝ်မဝ်း တွင်ႉၶူၼ်ႉ ၶီႈ၊ႁၢၵ်ႈ ထိုင်တီႈ လႆႈသူင်ႇယူတ်း ယႃတူဝ်တီႈ ႁူင်းယႃမိူင်းၶႄႇ။
ဢူးတွင်းထုၼ်း ၸုမ်းၸွႆႈထႅမ် ၵရုၼႃႇ မူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈဝၼ်းတီႈ 26 ယၢမ်းၵၢင်ၶမ်ႈၼၼ်ႉ ၸုမ်း ႁဝ်းၶႃႈ လႆႈဢွၼ်ၵၼ်ၵႂႃႇပႂ်ႉတီႈၵဵတ်ႉ ႁေႃၶမ်း ၼၼ်ႉသေ လႆႈႁပ်ႉဢဝ်တူဝ်ၶဝ် 7 ၵေႃႉၼၼ်ႉ သူင်ႇႁူင်းယႃ ဝဵင်းလိူဝ်ႇ ၵမ်းလဵဝ်။ ထိုင်ယၢမ်း ၵၢင်ၶမ်ႈ 6 မူင်း ႁဝ်းၶႃႈ ႁွတ်ႈၽႅဝ်တီႈႁိမ်းဝၢၼ်ႈပၢင်ၵလေႃႉ ၼမ်ႉၽၵ်းၵႃၼၼ်ႉ ၽူႈၸၢႆး ၵေႃႉၼိုင်ႈလႆႈလူႉတၢႆၸွမ်းတၢင်း။ ထႅင်ႈ 6 ၵေႃႉၼၼ်ႉတႄႉ လႆႈသူင်ႇၽႅဝ် ႁူင်းယႃဝဵင်းလိူဝ်ႇ” ဝႃႈၼႆ။
ႁႅင်းၵၢၼ် 7 ၵေႃႉၼၼ်ႉ ပဵၼ်ၵူၼ်းၸႃတိ တိူင်းမၵူၺ်း မိူင်းမၢၼ်ႈပွတ်းၵၢင်။ ပဵၼ် ဢူးထုၼ်းထုၼ်းဢူး ဢႃယု 36 ပီ။ ဢူး ထုၼ်းလိၼ်း ဢႃယု 43 ပီ၊ မွင်ႇတိၼ်ႇသၢၼ်းလိၼ်း ဢႃယု 18 ပီ၊ မွင်ႇသူႇပႃႇ ဢႃယု 26 ပီ၊ မတဵင်းတဵင်းဝိၼ်း ဢႃယု 28 ပီ၊ မသူႉမျၢတ်ႉၶၢႆႇ ဢႃယု 23 ပီ လႄႈ မၵေႇၸိၼ်ႇ ဢႃယု 18 ပီ ၸိူဝ်းၼႆႉ။
ဢၼ်လူႉတၢႆပႅတ်ႈတီႈ ပၢင်ႇၵလေႃႉၼၼ်ႉပဵၼ် ဢူးထုၼ်းထုၼ်းဢူး။
ဢူးတွင်းထုၼ်း လၢတ်ႈဝႃႈ “ မိူဝ်ႈဝႃး ဝၼ်းတီႈ 27/6/2019 လူႉတၢႆထႅင်ႈ 4 ၵေႃႉ တီႈႁူင်းယႃဝဵင်းလိူဝ်ႇ။ တင်းမူတ်း ႁူမ်ႈ ၵၼ် 5 ၵေႃႉယဝ်ႉ” ဝႃႈၼႆ။
မိူဝ်ႈပီ 2018 ၼၼ်ႉၵေႃႈ ႁႅင်းၵၢၼ်မိူင်းႁူမ်ႈတုမ် ဢၼ်ၵႂႃႇႁဵတ်းၼႂ်းမိူင်းၶႄႇၼၼ်ႉ ၵိၼ်ၺႃးႁဵပ်းမိူဝ်ႇသေ လႆႈလူႉတၢႆၵႂႃႇ 7 ၵေႃႉ ဝႃႈၼႆ။
ၶၢဝ်းၾူၼ်ၼႆႉ ပဵၼ်ၶၢဝ်းႁဵပ်းဢွၵ်ႇ ။ ၵမ်ႈၽွင်ႈသမ်ႉဢမ်ႇႁူႉဝႃႈ ဢၼ်လႂ်ပဵၼ်ႁဵပ်းမိူဝ်ႇ၊ ဢၼ်လႂ်ဢမ်ႇၸႂ်ႈႁဵပ်းမိူဝ်ႇ။ ပေႃး ၵဵပ်းမႃးၵိၼ်ၺႃးႁဵပ်းမိူဝ်ႇၸိုင် ထိုင်တီလႆႈလူႉတၢႆၵေႃႈမီးတင်းၼမ်။ ၵူၼ်းတၢႆယွၼ်ႉ ႁဵပ်းမိူဝ်ႇၼႆႉ မီးၵူႈပီ မီးၵူႈမိူင်း။
