သိုၵ်းမၢၼ်ႈ ဢဵၼ်ႁႅင်း မွၵ်ႈ 40 ၵေႃႉ လေႃႇယိုဝ်း သိုၵ်းတႆး RCSS တီႈႁိမ်းဝၢၼ်ႈၼႂ်းလိုင်း တၢင်းပွတ်းသၼဵၼ်း မီးၾၢႆႇႁွင်ႇဝဵင်းပၢင်လူင်၊  သွင်ၾၢႆႇ လႆႈပဵၼ်ပၢင်တိုၵ်းၵၼ် ဝႃႈၼႆ။

ဝၼ်းတီႈ 27/06/2019 ယၢမ်းၵၢင်ၼႂ် 8 မူင်းၼႆႉ သိုၵ်းမၢၼ်ႈ တပ်ႉၶမယ 525 သွၵ်ႈတဝ်ထိူၼ်ႈသေ ၽႃႇၺႃးတပ်ႉသိုၵ်း ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA ဢၼ်တူင်ႉၼိုင်ယူႇဝႆႉ တၢင်းပွတ်းသၼဵၼ်း ဝဵင်းပၢင်လူင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။ လႆႈပဵၼ်ပၢင်တိုၵ်းၵၼ် ႁိမ်းဝၢၼ်ႈၼႂ်းလိုင်း ဢိူင်ႇၼႃးတဵတ်ႇ ဝႃႈၼႆ။

ၸဝ်ႈသိုၵ်း ၸၢႆးဢူး ၽူႈၶၢၼ်ပၢၵ်ႇၼင်ႈလုမ်းၵပ်းသၢၼ် RCSS/SSA တီႈဝဵင်းတူၼ်ႈတီး လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈၼႆႉ တၢင်းဝၢၼ်ႈၼႂ်းလိုင်းၼႆႉ လႆႈႁူႉဝႃႈ သိုၵ်းမၢၼ်ႈတဝ်ထိူၼ်ႇမႃးလႄႈ လႆႈပဵၼ်ပၢင်တိုၵ်းၵၼ် တင်း သိုၵ်းႁဝ်းၶႃႈ ၵမ်ႈၼိုင်ႈ ဢဵၼ်ႁႅင်းသိုၵ်းၶဝ် တေမီးမွၵ်ႈ 40 ၵႃႈၼႆႉ။ တပ်ႉသိုၵ်းမၢၼ်ႈၼၼ်ႉ တေပဵၼ်တပ်ႉ ၶမယ 525”ဝႃႈၼႆ။

ၵဵဝ်ႇလူၺ်ႈလွင်ႈပဵၼ်ပၢင်တိုၵ်းၵၼ်ၼႆႉ တီႈႁွင်ႈၵၢၼ်ပိုၼ်ၽၢဝ်ႇ RCSS/SSA ဢွၵ်ႇဝႆႉဝႃႈ တၢင်းၾၢႆႇသိုၵ်းၶွင်ႇသီႇ ဢဝ် ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆးတႄႉ ဢမ်ႇမီးလွင်ႈ မၢတ်ႇၸဵပ်းလူႉတၢႆသင်။ တၢင်းၾၢႆႇသိုၵ်းမၢၼ်ႈတႄႉ လႆႈလူႉတၢႆ 1 ၵေႃႉ ဝႃႈၼႆ။

မိူဝ်ႈဝၼ်းတီႈ 26/6/2019 ယၢမ်းၵၢင်ၼႂ် 10 မူင်းၼၼ်ႉၵေႃႈ သိုၵ်းမၢၼ်ႈ ပႃႈတႂ်ႈတပ်ႉသိုၵ်းသၢမ်ၸဵင်ႇ ၵဵင်းတုင် ဢဵၼ်ႁႅင်း မွၵ်ႈ 40 ၵေႃႉ ၶိုၼ်ႈလေႃႇယိုဝ်း တပ်ႉသိုၵ်း ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA တင်း ပွတ်း ဝၢၼ်ႈပဵင်းသၢင်း ဢိူင်ႇမိူင်းပူးလူင် ၸႄႈဝဵင်းမိူင်းပဵင်း ၸိုင်ႈတႆးပွတ်းဢွၵ်ႇၶူင်း။

ၸဝ်ႈသိုၵ်းၸၢႆးဢူး လၢတ်ႈတီႈၽူႈတွႆႇႁွၵ်ႈဝႃႈ “ ၸွမ်းၼင်ႇၵူၼ်းၼႂ်းပိုၼ်ႉတီႈႁဝ်း ႁၢႆးငၢၼ်းမႃးတႄႉ ၾၢႆႇသိုၵ်းမၢၼ်ႈၶဝ် တင်ႈၸႂ်ၶိုၼ်ႈမႃးယိုဝ်း သိုၵ်းႁဝ်းၶႃႈ ဢၼ်တူင်ႉၼိုင်ႈယူႇဝႆႉတၢင်းပွတ်းတွၼ်ႈၼၼ်ႉ” ဝႃႈၼႆ။

ပၢင်တိုၵ်း ပွတ်းဝၢၼ်ႈပဵင်းသၢင်းၼၼ်ႉ သိုၵ်းမၢၼ်ႈ တင်း သိုၵ်းတႆး RCSS လႆႈတႄႇပဵၼ်ပၢင်တိုၵ်း ၵၼ် ယၢမ်းၵၢင်ၼႂ် 10:00 မူင်း ထိုင် 10:30 မူင်း တင်းႁိုင် 30 မိတ်ႉၼိတ်ႉ တင်း 2 ၾၢႆႇ ဢမ်ႇလႆႈမီးလွင်ႈမၢတ်ႇၸဵပ်း လူႉ တၢႆသင် ဝႃႈၼႆ။

“  ၾၢႆႇတပ်ႉမတေႃႇ သိုၵ်းမၢၼ်ႈ ပိုၼ်ၽၢဝ်ႇၵိုတ်းတိုၵ်းၾၢႆႇလဵဝ် တႃႇၶၢဝ်းတၢင်း 6 လိူၼ်ဢၼ်ဝႃႈၼၼ်ႉ မၼ်းပဵၼ်ၵၢၼ်လဵၼ်ႈဢၼ်ၼိုင်ႈၵူၺ်း။ တီႈတႄႉမၼ်း ၶဝ်ၵိုတ်းတိုၵ်းၾၢႆႇလဵဝ်ၼႆသေတႃႉၵေႃႈ လၢႆးႁဵတ်းသၢင်ႈၶဝ်ၼၼ်ႉ မၼ်းဢမ်ႇၵိုတ်း၊ လွင်ႈတူင်ႉၼိုင်ၶဝ် မၼ်းဢမ်ႇၵိုတ်း၊ လွင်ႈႁႃသွၵ်ႈ တဝ်ၶဝ်ၸိူဝ်းၼႆႉၵေႃႈ ဢမ်ႇၵိုတ်း၊ ၶဝ်ၼႄၼႃႈတိူဝ်ႈဝႃႈ (နယ်မြေစိုးမိုးရေး) သွၵ်ႈတဝ်ၸွမ်းၼႂ်းထိူၼ်ႇၵူၺ်း။ လွင်ႈသိုၵ်းၶဝ် တူင်ႉၼိုင် ၵေႃႈၶဝ်ဢမ်ႇယွမ်း။ ၾၢႆႇၼိုင်ႈၼႆႉတႄႉ ဢၼ်ၶဝ်ပိုၼ်ၽၢဝ်ႇၸိူင်ႉၼႆၼႆႉ ဢဝ်ၾၢႆႇၵၢၼ်မိူင်းသေဝႃႈဢဝ်ၵူၺ်း ၵၢၼ်သိုၵ်းၶဝ်တႄႉ ၶဝ်ၶိုၼ်းပၢႆထႅမ်ႁႅင်း/ ၽိူမ်ႉထႅမ်မႃးၵွၼ်ႇ ႁဝ်းၶႃႈတႄႉ ႁၼ်ထိုင်ၸိူင်ႉၼႆ” ၸဝ်ႈသိုၵ်းၸၢႆးဢူး လၢတ်ႈၼႄၼင်ႇ ၼႆ။

ယူႇတီႈသိုၵ်းမၢၼ်ႈ ပိုၼ်ၽၢဝ်ႇ ၵိုတ်းတိုၵ်းမႃးၾၢႆႇလဵဝ်မႃး တႃႇၶၢဝ်းတၢင်း 6 လိူၼ်ဝႃႈၼႆသေတႃႉ သိုၵ်းမၢၼ်ႈတင်းသိုၵ်း တဢၢင်း၊ သိုၵ်းမၢၼ်ႈတင်း သိုၵ်းၶၢင် လႆႈပဵၼ်ပၢင်တိုၵ်းၵၼ် တၢင်းပွတ်းႁွင်ႇ ဢမ်ႇယွမ်း 20 ပွၵ်ႈယဝ်ႉ ဝႃႈၼႆ။