ၸုမ်းႁဵတ်းၵၢၼ် PPST ဢၢၼ်းတေႁူပ်ႉဢုပ်ႇၵၼ် တီႈဝဵင်းၵဵင်းမႆႇ ၸိုင်ႈထႆး တႃႇဢုပ်ႇၵၼ်လွင်ႈ ပိူင်ၶွတ်ႇၽွတ်ႈယူင်ႉၶၢပ်ႈ PPST ၼႆၼၼ်ႉ ၺႃးသိုၵ်းလူင်ပွင်မၢၼ်ႈ တႅမ်ႈလိၵ်ႈသူင်ႇၸူး ၸဝ်ႈၼႃႈတီႈထႆး ႁႂ်ႈႁႄႉႁၢမ်ႈ ပၢင်ႁူပ်ႉထူပ်းၵၼ်ၼၼ်ႉ ဝႃႈၼႆ။
ဝၼ်းတီႈ 7/6/2019 ယူႇတီႈၵႅမ်ၸွမ်ႁၢၼ် ၶိၼ်ႇၸေႃႇ ၾၢႆႇတပ်ႉသိုၵ်းလူင်ပွင်ၸိုင်ႈမၢၼ်ႈ တႅမ်ႈလိၵ်ႈသူင်ႇၸူး တၢင်းၾၢႆႇ ၸဝ်ႈၼႃႈတီႈထႆးသေ ႁႂ်ႈႁႄႉႁၢမ်ႈပၼ် ယႃႇႁႂ်ႈၸုမ်းႁဵတ်းၵၢၼ် PPST လႆႈၸတ်းႁဵတ်းပၢင်ႁူပ်ႉထူပ်း/ ပၢင်ၵုမ်ၵၼ် ဢၼ်တေၸတ်းႁဵတ်းတီႈဝဵင်းၵဵင်းမႆႇ ၸိုင်ႈထႆး ၼႂ်းဝၼ်းတီႈ 8-10 လိူၼ်ၵျုၼ်ႊၼႆႉ ဝႃႈၼႆ။
ၸဝ်ႈၶိုၼ်းသႂ် ၸႂ်ယဵၼ် ၽူႈၵိူဝ်းၵုမ် PPST လၢတ်ႈတီႈၽူႈတွႆႇႁွၵ်ႈဝႃႈ “ ၶဝ်တႅမ်ႈလိၵ်ႈသူင်ႇၸူး တၢင်းၾၢႆႇၸဝ်ႈၼႃႈတီႈထႆး၊ လၢတ်ႈဝႃႈ ပၢင်ၵုမ်ဢၼ် ၽတူဝ်ႇၸေႃးတႃႇတူဝ်ႇမူး ဢွၼ်ႁူဝ်သေ တေၸတ်းဝၼ်းတီႈ 8 -9 -10 ၼၼ်ႉ တေပႃးၸုမ်း လူင်းလၢႆးမိုဝ်း 10 ၸုမ်းၵူၺ်းသေဢမ်ႇၵႃး တေပႃးထႅင်ႈၸုမ်းဢၼ်ဢမ်ႇလူင်းလၢႆးမိုဝ်း မိူၼ် KIO ၶဝ်၊ KNPP ၶဝ် ၸိူဝ်းၼႆႉ။ ၵွပ်ႈပိူဝ်ႈၸိူဝ်းၼၼ်လႄႈ ပေႃးဝႃႈႁဵတ်းၼႆၸိုင် မၼ်းတေမႃးယႃႉ ၶၵ်ႉၵၢၼ်ငမ်းယဵၼ် ဢၼ်လူင်ပွင်ၸိုင်ႈလႄႈ တပ်ႉသိုၵ်းဢွၼ်ႁူဝ်ႁဵတ်း ယွၼ်ႉပိူဝ်ႈၼၼ်လႄႈ ႁႂ်ႈပိၵ်ႉပၼ်သေၵမ်း” ဝႃႈၼႆ။
ၸုမ်းႁဵတ်းၵၢၼ် ၼႂ်း PPST ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ တီႈတႄႉမၼ်း ပၢင်ၵုမ်ဢၼ်ၸုမ်း ႁဵတ်းၵၢၼ်ႁဝ်း တေႁူပ်ႉၵၼ်ၼႆႉ ဢမ်ႇလႆႈၽိတ်ႈမွၵ်ႇ ၸုမ်း KIO တင်း KNPP ၶဝ်ႈႁူမ်ႈၸွမ်း” ဝႃႈၼႆ။
ၵဵဝ်ႇၵပ်းလွင်ႈၼႆႉ ယူႇတီႈၾၢႆႇၵိူဝ်းၵုမ် PPST လၢတ်ႈတႄႉဝႃႈ ပၢင်ၵုမ်ၼႆႉ တေႁဵတ်းလွင်ႈယူင်ႉသၢင်ႈ PPST တေယႃႉ ၼႄႇ၊ တေမႄႇၶႂၢၵ်ႈၵႂႃႇပဵၼ် PPCM ၼႄႇ။ ၽူႈဢွၼ်ႁူဝ်ၸတ်းႁဵတ်းၼႆႉသမ်ႉ ပဵၼ်သလၢႆးသႃႇလႃႇႁေး။ လၢႆးဢၼ်တေ တၢင်ႇၼႄ လွင်ႈလႅၵ်ႈယူင်ႉသၢင်ႈၼႆႉတႄႉ ပဵၼ်ၽတူဝ်ႇၸေႃးတႃႇတူဝ်ႇမူး ဝႃႈၼႆ။
“ၵဵဝ်ႇၵပ်းလူၺ်ႈယူင်ႉသၢင်ႈ PPST ၼႆႉ ႁဝ်းဝႆႉၵွၼ်ႇၵေႃႈလႆႈ ဢမ်ႇပေႃးလူဝ်ႇမႆႈၸႂ်ၵႃႈႁိုဝ်။ ၵူၺ်းၵႃႈ ဢၼ်လမ်ႇလွင်ႈၼႆႉ မၼ်းတေၵဵဝ်ႇၵပ်းလူၺ်ႈ လွင်ႈဢုပ်ႇဢူဝ်ၵၢၼ်မိူင်းၼႆႉ ဝၢႆး 2020 ၼၼ်ႉ ၸွင်ႇတေသိုပ်ႇပဵၼ်ႁႃႉ၊ ဢမ်ႇသိုပ်ႇပဵၼ်ႁႃႉ ဢၼ်ဝႃႈၼၼ်ႉ။ ၵဵဝ်ႇၵပ်းလွင်ႈၼႆႉ တၢင်းၾၢႆႇၸဝ်ႈၼႃႈတီႈၾၢႆႇမၢၼ်ႈၶဝ်တႄႉလၢတ်ႈ ဝၢႆးလင် 2020 ၵေႃႈ တေသိုပ်ႇပဵၼ် ၵႂႃႇယူႇ ၵူၺ်းၵႃႈ ဢၼ်တပ်ႉသိုၵ်းမၢၼ်ႈ ပိုၼ်ၽၢဝ်ႇဝႆႉၼၼ်ႉသမ်ႉဝႃႈ 2020 ႁႂ်ႈယဝ်ႉ ၸႃႉဢၼ်ၶဝ်သမ်ႉ ဢမ်ႇၶိုၼ်းမေး ၵႄႈလိတ်ႈၼႆ မၼ်းၵေႃႈတေပဵၼ် ဢၼ်ၵႂင်ၸႂ်ၵၼ်ၵူႈၾၢႆႇ” ၽူႈၵိူဝ်းၵုမ် PPST လၢတ်ႈၼႄၼင်ႇၼႆ။
ယွၼ်ႉၼၼ် တၢင်းၾၢႆႇ NRPC လႄႈသင်၊ တၢင်းၾၢႆႇလူင်ပွင်ၸိုင်ႈလႄႈသင်၊ တၢင်းၾၢႆႇတပ်ႉသိုၵ်းမၢၼ်ႈ လႄႈသင် လူဝ်ႇလႆႈပိုၼ်ၽၢဝ်ႇပၼ်တႅၵ်ႇတႅၵ်ႇလႅင်းလႅင်း ၵဵဝ်ႇၵပ်းလူၺ်ႈ လွင်ႈတေသိုပ်ႇဢုပ်ႇဢူဝ်း ၵၢၼ်မိူင်းၼၼ်ႉ ဝၢႆး လင် 2020 ၸွင်ႇပဵၼ် ဢမ်ႇပဵၼ် ၸဵမ်ၸိူဝ်းၼႆႉ။ လွင်ႈပိူင်ယူင်ႉသၢင်ႈ PPST ၼႆႉ မၼ်းၵေႃႈယင်းပႂ်ႉလႆႈယူႇ – ဝႃႈၼႆ။
