ၶၢဝ်းတၢင်းပၢင်တိုၵ်းၼမ် ဝၢၼ်ႈမိူင်းယုင်ႈၼႆႉ ၵၢၼ်ႁႃၵိၼ်လဵင်ႉတွင်ႉယၢပ်ႇ ၊ တေသိုဝ်ႉတေၸၢႆႇသင်ၵေႃႈ ၵူၼ်းမိူင်းလႆႈတိၼ်းတွၼ်း ။ ၵုၼ်ႇၵိၼ်ယမ်ႉ ဢၼ်လႂ်သၢင်ႇထုၵ်ႇ ဢၼ်လႂ်ပေႃး ၵူၼ်းမိူင်းလိူၵ်ႈၵိၼ် ။ မၢင်ၸိူဝ်း ႁၼ်တၢင်းၵိၼ်ဢၼ်လႂ် ဢမ်ႇလႆႈၸႂ်ႉၸၢႆႇငိုၼ်းၼမ်ၼၼ်ႉ တေၵဵပ်း တေဢဝ်ၵိၼ်ငၢႆႈငၢႆႈ ။ ပေႃးမိူၼ် တီႈၼမ်ႉလၼ်ႈၼႆႉ ၵူၼ်းဝၢၼ်ႈ ၵဵပ်းၵိၼ်သႆႈၵွၵ်ႇမိူင်းၶႄႇ ဢၼ်မူတ်းဢႃယုၸိူဝ်းၼၼ်ႉလႄႈ ၸုမ်းၵဵဝ်ႇၶွင်ႈပေႃးလႆႈလူင်းၵူတ်ႇထတ်းႁႄႉႁၢမ်ႈ ။ မၢင်ၸိူဝ်းၵေႃႈ ထတ်းသၢင်လၢတ်ႈဝႃႈ လွင်ႈၼႆႉ ၸဵမ်ပိုင်းၵေႃႈ သင်ႁူႉဝႃႈ ဢမ်ႇလီ ၊ ၵိုင်ႇႁၢမ်ႈ ၸဵမ်မိူဝ်ႈ ၵုၼ်ႇပႆႇၶဝ်ႈဝဵင်းမႃး ။

ၼႆႉသမ်ႉ ပေႃးၶၢဝ်ႇ ပႆႇလိုဝ်းႁူင်ဢွၵ်ႇမႃးၵေႃႈ ပႆႇႁႃႁၢမ်ႈၵၼ် ၊ ၸဝ်ႈႁၢၼ်ႉၸဝ်ႈသႅင်ႇမၢင်ၸိူဝ်းတၢင်ႇၶၢႆဝႆႉၵေႃႈ ပေႃးၵူၼ်းၼမ် ပႆႇႁူႉႁၼ်ၸွမ်း ဢမ်ႇမီးၽႂ် ၸုမ်းလႂ်မႃးႁၢမ်ႈၼႆ ၵူၼ်းပိုၼ်ႉတီႈလၢတ်ႈ ။ လွင်ႈၼႆႉ ၸၢႆးသႂ်ၸိုၼ်ႈမိူင်း တေႁၢႆးငၢၼ်းၼႄပၼ်ၵႂႃႇၶႃႈဢေႃႈ။

မိူင်းႁူမ်ႈတုမ်မၢၼ်ႈၼႆႉ ၵၢၼ်ပူၵ်းပွင်ပၼ်ပၢႆးႁူႉပၢႆးႁၼ်ၵူၼ်းမိူင်းဢေႇ ။ တေႃႈၼင်ႇ ၽွင်းဝၢၼ်ႈမိူင်းၼိမ် ပၢင်ပၼ်တၢင်းႁူႉ ဢၼ်ၵူၼ်းမိူင်းၵိုင်ႇလီႁူႉဢမ်ႇထိုင်တီႈတႄႉတႄႉ ။ ပၼ်ဝၢၼ်ႈၼိုင်ႈ လုတ်ႈႁၢမ်းဝၢၼ်ႈၼိုင်ႈ ။ တၢင်းႁူႉဢၼ်ၵူၼ်းမိူင်းၵိုင်ႇလီႁူႉၼၼ်ႉ ဢမ်ႇႁွတ်ႈ တူဝ်ႈထိုင်ၵူႈပွၵ်ႉၵူႈယွမ်ႇလႆႈ ။

ၼင်ႇႁိုဝ် ၽေးရေႃးၵႃႇတၢင်းပဵၼ်ၵူႈပိူင်ပိူင် ပေႃးတေဢမ်ႇၽႄႈလၢမ်း ၊ ၼင်ႇႁိုဝ်ပေႃးတေဢမ်ႇတိတ်းၸပ်းၵၼ်ၼၼ်ႉ လွင်ႈႁႄႉၵင်ႈလူင်ႈၼႃႈ လူဝ်ႇၽႂ်းၶၼ် ။ လူဝ်ႇထိုင်တီႈ ။ ၵူၺ်းၵႃႈ ၸုမ်းၵဵဝ်ႇၶွင်ႈ ဢၼ်တူင်ႇၼိုင်ႈ ၽွင်းသိုၵ်းမၢၼ်ႈၵုမ်းၼႆႉ ႁဵတ်းၵၢၼ်ဢၼ်လႂ်ၵေႃႈ ဢမ်ႇထိုင်တီႈလီလီ ယွၼ်ႉပၵ်းပိူင်ဢမ်ႇႁူမ်ႇငမ်းလႆႈၵူႈတီႈ။

မိူၼ်တီႈၼမ်ႉလၼ်ႈ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ ၼႆႉ ၵူၼ်းဝၢၼ်ႈၸိူဝ်းယူႇၸွမ်းၶႅပ်ႇဝဵင်း ၵႂႃႇၵဵပ်းၵိၼ်သႆႈၵွၵ်ႇဢၼ်ၵႃးတၢင်ႇၵုၼ်ႇမႃးပႅတ်ႈဝႆႉတီႈ ပႃႇႁဵဝ်ႈ ဝၢၼ်ႈၼွင်ၶဵဝ် ၾၢႆႇတူၵ်းဝဵင်း မိူဝ်ႈဝၼ်းတီႈ 2/3/2026 ၼၼ်ႉလႄႈ ဝၼ်းတီႈ 3/3/2026 ၼႆႉ ၸုမ်းၵဵဝ်ႇၶွင်ႈ ဢၼ်ယူႇတႂ်ႈသိုၵ်းမၢၼ်ႈ ပႃးၸဵမ် ႁွင်ႈၵၢၼ်ၾၢႆႇပၢႆးယူႇလီ ၊ ၾၢႆႇလိူမ်လႆႇ ၊ ပလိၵ်ႈမၢၼ်ႈ ၸိူဝ်းၼႆႉ လူင်းၵူတ်ႇထတ်း ႁႄႉႁၢမ်ႈ ဝႃႈၼႆ။

ဢၼ်ႁႄႉႁၢမ်ႈၶူဝ်းၵုၼ်ႇမိူင်းၶႄႇၼႆႉတႄႉ မီးလွင်ႈႁႄႉႁၢမ်ႈမႃးၸဵမ်မိူဝ်ႈ သိုၵ်းမၢၼ်ႈ ပႆႇတႄႇ ပၢင်လိူၵ်ႈတင်ႈ ။ ဢိင်ၼိူဝ် မီးလွင်ႈၵူတ်ႇထတ်းႁႄႉႁၢမ်ႈလၢႆလွင်ႈသေ ၵႃးတၢင်ႇၵုၼ်ႇ ၸိူဝ်းတၢင်ႇၵုၼ်ႇၵိၼ်ယမ်ႉမိူင်းၶႄႇမႃးၵေႃႈ ၸိူင်ႉၵၢတ်ႈႁိုင်ၼၢၼ်းသေ ဢဝ်ၵုၼ်ႇဢႃယုမူတ်းပႅတ်ႈ ။ ၵမ်းလိုၼ်းထိုင်တီႈလႆႈထွၵ်ႇပႅတ်ႈ။

ၵူၼ်းဝၢၼ်ႈ ၸိူဝ်းယူႇၶႅပ်ႇဝဵင်းသမ်ႉ မၢင်ၸိူဝ်းဢဝ်ၶၢႆၶိုၼ်း ၊ မၢင်ၸိူဝ်းၵႂႃႇၵဵပ်းၵိၼ်ယမ်ႉၶိုၼ်းလႄႈ ၸုမ်းၵဵဝ်ႇၶွင်ႈ ၸင်ႇလူင်းပိုၼ်ႉတီႈၵူတ်ႇထတ်းႁႄႉႁၢမ်ႈ ။ ၵမ်ႈၼမ် ပဵၼ် သႆႈၵွၵ်ႇ သီလႅင် ( ဢၼ်ဢဝ်ၼိူဝ်ႉမူ ၼိူဝ်ႉၵႆႇ ၸိူဝ်းၼႆႉႁဵတ်းဝႆႉ )

ဢိင်ၼိူဝ်လွင်ႈၼႆႉ ၵူၼ်းပိုၼ်ႉတီႈ လၢတ်ႈတီႈၽူႈတွႆႇႁွၵ်ႈဝႃႈ –

ဢွၼ်ၵၼ်ၵႂႃႇဢဝ်သေ မၢင်ၸိူဝ်းၵေႃႈ ၶိုၼ်းလႆႈၶၢႆတေႃႇၵၼ် မၢင်ၸိူဝ်းၵေႃႈ တၼ်းလႆႈၵႂႃႇဢဝ်မႃးသေ မႃးၵိၼ်။ မၢင်ၸိူဝ်းၵေႃႈ ၵိၼ်ပဵၼ်တွင်ႉပဵၼ်ႁၢၵ်ႈၸိူဝ်းၼႆႉၵေႃႈမီး ။ ဢၼ်ၵႂႃႇဢဝ်မႃးၼႆႉ လႆႈဝႃႈ ပဵၼ်ၵူၼ်းၼႂ်းၼမ်ႉလၼ်ႈၼႆႉၵမ်ႈၼမ်ယဝ်ႉၶႃႈ

ပေႃးထိုင်မႃး ဝၼ်းတီႈ 10 – 11 လိူၼ်မၢတ်ႉၶျ်ၼႆႉ သမ်ႉတေမီးပွႆးလိူၼ်သီႇ ၼမ်ႉလၼ်ႈလႄႈ ၵမ်ႈၼမ်ၸိူဝ်းၶႂ်ႈၵႃႉၶႂ်ႈၶၢႆၼႂ်းပွႆး တိုၵ်ႉလႄႇႁႃၵုၼ်ႇၵႃႉတၢင်းၶၢႆ ။ ၸင်ႇၼၼ် ၽွင်းႁႃၵုၼ်ႇယၢပ်ႇၼၼ်ႉ ၸၢင်ႈမီးၵူၼ်းသိုပ်ႇၵဵပ်းဢဝ် သႆႈၵွၵ်ႇဢၼ်ဢႃယုမူတ်းၸိူဝ်းၼႆႉၵႂႃႇၶၢႆတေႃႇၵူၼ်းၶဝ်ႈပွႆးထႅင်ႈ – ၼႆ ၵူၼ်းၼမ်ႉလၼ်ႈၵေႃႉၼိုင်ႈလၢတ်ႈ။

မိူဝ်ႈဢွၼ်တၢင်းၵေႃႈ ပလိၵ်ႈမၢၼ်ႈၶဝ် ႁႄႉႁၢမ်ႈယူႇ ဝႃႈၼႆသေတႃႉ ပေႃးမီးၵူၼ်းဢဝ်ငိုၼ်းမွၼ်ၵေႃႈ ၸၢင်ႈတေႃႉၵုၼ်ႇၶဝ်ႈၼႂ်းဝဵင်း ။ ၵူၺ်းၵႃႈ ပွၵ်ႈၼႆႉသမ်ႉ လႅပ်ႈတေ ငူပ်ႉငီႉၵၼ်ဢမ်ႇလႆႈလႄႈ ၸဝ်ႈၵႃးတၢင်ႇၵုၼ်ႇၵေႃႈ ၸင်ႇလႆႈၵႂႃႇထွၵ်ႇပႅတ်ႈ။ သမ်ႉမီးၵူၼ်းၵႂႃႇၵဵပ်းဢဝ်လႄႈ ၸုမ်းၵဵဝ်ႇၶွင်ႈၸိူဝ်းယူႇတႂ်ႈသိုၵ်းမၢၼ်ႈ ၸင်ႇလူင်းပိုၼ်ႉတီႈ ၵူတ်ႇထတ်းၸွမ်းႁၢၼ်ႉၸွမ်းသႅင်ႇလႄႈ ၼႂ်းၵၢတ်ႇ ၊လိူဝ်ၼၼ်ႉ ၵႂႃႇၸုတ်ႇၽဝ်ပႅတ်ႈ သႆႈၵွၵ်ႇၸိူဝ်းဢၼ်ယိုတ်းပႅတ်ႈၸိူဝ်ၼၼ်ႉ ၼႆ – ၵူၼ်းမိူင်းၼမ်ႉလၼ်ႈ လၢတ်ႈၼႄၼင်ႇၼႆ –

ပေႃး ဢဝ်ငိုၼ်းပၼ်ႁေ လတ်းၶဝ်ႈဝဵင်းလႆႈၼႆၵေႃႈ တေမီးၼၼ်ႉၼႃႇ ။ ဢၼ်ၼႆႉ ၶဝ်ငီႉၵၼ်ဢမ်ႇလႆႈၵေႃႈ ပိူင်ၼိုင်ႈလႄႈ ။ ႁဵတ်းၼၼ်သေ မႃးထွၵ်ႇပႅတ်ႈ။ ၵူၼ်းၸိူဝ်းၼႆႉသမ်ႉ ၵႂႃႇဢဝ်မႃးၵိၼ်။ ၾၢႆႇၽူႈမီးပုၼ်ႈၽွၼ်းၶဝ်ၵေႃႈ တူၺ်းဢမ်ႇပေႃးႁၢင်ႈလီတႃသေ ၸင်ႇဢွၼ်ၵၼ်ၶိုၼ်းၵႂႃႇၵူတ်ႇထတ်း။ဢဝ်ႇၶၢဝ်ႇမၼ်းလိုဝ်းၵႂႃႇႁႅင်းၼၼ်ႉၶႃႈၼႃႇ

သႆႈၵွၵ်ႇသီလႅင်မိူင်းၶႄႇ ဢၼ်ၵူၼ်းမိူင်းတႆး သူင်ၵိၼ် သႂ်ႇၸွမ်းတၢင်းၵိၼ်မႃႇလႃႇ ၼၼ်ႉ ဢမ်ႇလီတေႃႇပၢႆးယူႇလီၼႆ ၸဝ်ႈၼႃႈတီႈထႆး ယၢမ်ႈ ပိုၼ်ၽၢဝ်ႇဢွၵ်ႇဝႆႉ ၸဵမ်မိူဝ်ႈ ၼႂ်းလိူၼ်ၵျူႊလၢႆႊ 2023 ။

ၵမ်ႈၼမ် ဢဝ်သႂ်ႇလေႃးမႃးၸွမ်း ထူင်ၶဝ်ႈသွႆး၊ ထူင်ၶိူင်ႈႁဵတ်း မႃႇလႃႇ ၸိူဝ်းၼၼ်ႉ ဢမ်ႇမီးလွင်ႈႁဵတ်းၸွမ်းလၵ်းၸဵင် ၵၢၼ်ႁဵတ်းဢွၵ်ႇ တၢင်းၵိၼ် လႄႈ ၽိူဝ်ႇႁွင်ႈၵၢၼ်ၾၢႆႇတၢင်းၵိၼ်လႄႈယႃႈယႃမိူင်းထႆး လႆထတ်းတူၺ်း ထူပ်း ႁၼ် ၸိူဝ်ႉမႅင်းပႅတ်ႊထီႊရီႊယႃႊတင်းၼမ်။ သင်ၵိၼ်ၺႃးမႅၼ်ႈ ၸၢင်ႈပဵၼ် ၽေးတေႃႇ ပၢႆးယူႇလီ ၊ ။
ၼႂ်းၶေႃႈပိုၼ်ၽၢဝ်ႇၶွင် ၾၢႆႇတၢင်းၵိၼ်လႄႈယႃ မိူင်းထႆးၼၼ်ႉတႅမ်ႈဝႆႉဝႃႈ – “ ပေႃးႁၼ် ၽႂ်သိုဝ်ႉၶၢႆ သိုဝ်ႉၵိၼ်ယႅမ်ႉ ၸိုင် ႁႂ်ႈပွင်ႇၶၢဝ်ႇပၼ်ၽူႈမီးပုၼ်ႈၽွၼ်း ၵမ်းသိုဝ်ႈ- တေၶဝ်ႈၵူတ်ႇထတ်းဢဝ်လိူင်ႈပၼ်တူတ်ႈတၢမ်ႇ ငိုၼ်း 2 သႅၼ်ဝၢတ်ႇ တူတ်ႈတၢမ်ႇၶွၵ်ႈ 2 ပီ ဝႃႈၼႆဝႆႉ။

ၾၢႆႇမိူင်းထႆး ပိုၼ်ၽၢဝ်ႇႁၢမ်ႈသိုဝ်ႉၶၢႆ ၵိၼ်ယမ်ႉတၢင်းၵိၼ်ၶႄႇၼႆႉသေတႃႉ ၾၢႆႇတၢင်းမိူင်းမၢၼ်ႈတႄႉ ႁဵတ်းဢဝ် ပူၼ်ႉဝူတ်ႈပူၼ်ႉၵၢမ်ႇ မွၵ်ႈၼၼ်ႉၵူၺ်းၼႆ ၵူၼ်းမိူင်းတႆးၵေႃႉၼိုင်ႈလၢတ်ႈ။

ၼႂ်းၶၢဝ်းတၢင်းဢၼ်မိူင်းၶႄႇမႃးလူင်းတိုၼ်း ဢဝ်ၶူဝ်းၶွင်ၼႂ်းမိူင်းမၢၼ်ႈမိူင်းတႆးမႃး ၶၢဝ်းတၢင်း 10 ပီပၢႆၼႆႉ တၢင်းၵိၼ်မိူင်းၶႄႇၵေႃႈ လၢမ်းၽႄႈၶဝ်ႈမႃးၼႂ်းမိူင်းတႆး။ မွၵ်ႈ 90 ပိူဝ်းသႅၼ်း ပဵၼ်တၢင်းၵိၼ်ၶႄႇလွၼ်ႉလွၼ်ႉ။ ၵူၼ်းမိူင်းတႆး ၸဵမ်လဵၵ်ႉယႂ်ႇၼုမ်ႇထဝ်ႈ သူင်ၵိၼ် ။

မိူၼ်ၼင်ႇသႆႈၵွၵ်ႇသႅၼ်းၼႆႉ တေၵႆႉလႆႈႁၼ်ၸွမ်းႁၢၼ်ႉတၢင်းၵိၼ်လၢႆလၢႆတီႈ မိူၼ်ၼင်ႇ ႁၢၼ်ႉမႃႇလႃႇ ၊ ႁၢၼ်ႉႁွတ်ႉပွတ်ႉ ၊ ႁၢၼ်ႉပိင်ႈယၢင်ႈ ၸိူဝ်းၼႆႉ ၵမ်ႈၼမ်ပဵၼ်ႁၢၼ်ႉၸၢဝ်းၶႄႇ။

ၼင်ႇၵႂၢမ်းထုင်းမီးဝႆႉဝႃႈ “ ၵႂႃႇဢမ်ႇထုၵ်ႇၼိုင်ႈယၢင်ႈ ၵိၼ်ဢမ်ႇထုၵ်ႇၼိုင်ႈၵမ်း ၸၢင်ႈပဵၼ်ၽေးတေႃႇတူဝ် ” ၼႆၼၼ်ႉ သင်ႁဝ်းဢမ်ႇၾၢင်ႉသေ ၵိၼ်ၵႂႃႇၵူႈသမ်ႇၵူႈပိူင်ၸိုင် သၢႆၸႂ်ၸၢင်ႈလူႉၵွပ်ႈမၼ်းဢမ်ႇႁၢင်ႉ။

မိူၼ်ၼင်ႇသႆႈၵွၵ်ႇသီလႅင်မိူင်းၶႄႇ ၼႆႉ ၸဵမ်လုၵ်ႈဢွၼ်ႇၵူၼ်းလူင် သူင်ၵိၼ်ယႅမ်ႉမႃးၼမ်လႄႈ ယူႇတီႈၽူႈႁူႉႁၼ်ၶဝ် ထုၵ်ႇလီႁၢမ်ႈသီးၵၼ်ယူႇ။