ၼႂ်းၸိုင်ႈမိူင်းလုၵ်ႈၸုမ်း ဢႃႊသီႊယၼ်ႊ 10 မိူင်းၼႆႉ ႁႅင်းၵၢၼ်ယၢၼ်မိူင်းမီးယူႇ 6 လၢၼ်ႉပၢႆ။ၼႂ်းၼၼ်ႉ မိူင်းမၢၼ်ႈပဵၼ်မိူင်းဢၼ်မီးႁႅင်းၵၢၼ်ယၢၼ်မိူင်း ၼမ်သုတ်း ထိၼိုင်ႈ ။
Facebook ၶွင်ၸုမ်း Asean ပိုၼ်ၽၢဝ်ႇမိူဝ်ႈဝၼ်းတီႈ 5 လိူၼ်မေႊဝႃႈ ၼႂ်းႁႅင်းၵၢၼ်ယၢၼ်မိူင်း 6 လၢၼ်ႉပၢႆၼၼ်ႉ ႁႅင်းၵၢၼ်ယၢၼ်မိူင်းဢၼ်လုၵ်ႉမိူင်းမၢၼ်ႈမႃး မီးယူႇ 2 လၢၼ်ႉပၢႆ။ လႆႈဝႃႈၼမ်သုတ်းၼႂ်းလုၵ်ႈၸုမ်း 10 မိူင်းဝႃႈၼႆ။
ၼႂ်းၼၼ်ႉ ႁႅင်းၵၢၼ်ယၢၼ်မိူင်း ဢၼ်လုၵ်ႉမိူင်း ဢိၼ်ႊတူဝ်ႊၼီႊသျိူဝ်ႊမႃးမီး ၼိုင်ႈလၢၼ်ႉပၢႆ၊ ၼမ်သုတ်းထူၼ်ႈသွင်၊ မလေးသျိူဝ်းသမ်ႉ ပဵၼ်တီႈသၢမ်သေ မိူင်းလၢဝ်းလႄႈ မိူင်း ၵမ်ႊပေႃႊတီႊယႃး ပဵၼ်တီႈ 4 လႄႈ တီႈ5။
ၸုမ်းပၵ်းတႃၸွႆႈထႅမ်ႁႅင်းၵၢၼ်ယၢၼ်မိူင်းၶဝ် ယင်းလၢမ်းၶၢတ်ႈဝႃႈႁူဝ်ၼပ်ႉ ႁႅင်းၵၢၼ်မိူင်းမၢၼ်ႈ ဢၼ်ၵႂႃႇမီးမိူင်းမလေးသျိူဝ်းလႄႈမိူင်းထႆးၼၼ်ႉ ယင်းတေၸၢင်ႈၼမ်လိူဝ် ဢၼ်ၸုမ်း ဢႃႊသီႊယၼ်ႊ ၼပ်ႉသွၼ်ႇဝႆႉလူးၵွၼ်ႇ ဝႃႈၼႆ။
ၸုမ်းၸွႆႈထႅမ်ႁႅင်းၵၢၼ်ယၢၼ်မိူင်း MWRN ၼႅင်ႈသၢၼ်သုၼ်ႇလႆႈႁႅင်းၵၢၼ်ယၢၼ်မိူင်း ဢၼ်ပၵ်းတီႈ မႁႃၶျႆး လၢတ်ႈဝႃႈ ႁႅင်းၵၢၼ်ယၢၼ်မိူင်း မိူင်းမၢၼ်ႈ ၸဵမ်ပိုင်းမီးဝႆႉ 4 လၢၼ်ႉ။ ဝၢႆးၼႆႉၵေႃႈ ဢၼ်လၵ်ႉဢွၵ်ႇမိူင်းသေ ၵႂႃႇႁႃႁဵတ်းၵၢၼ်မိူင်းႁိမ်းႁွမ်း ၼိုင်ႈပီဢမ်ႇယွမ်း 2 သႅၼ်ၵေႃႉ- ဝႃႈၼႆ။
ၵဵဝ်ႇၵပ်းလွင်ႈႁႅင်းၵၢၼ်ယၢၼ်မိူင်းၼႆႉသေ ၼင်ႇႁိုဝ်ႁႅင်းၵၢၼ်တေမီးသုၼ်ႇလႆႈႁႅင်းၵၢၼ်တဵမ်ထူၼ်ႈၼၼ်ႉ ယူႇတီႈလူင်ပွင်ၸိုင်ႈမိူင်းမၢၼ်ႈလႆႈလူင်းလၢႆးမိုဝ်းၸွမ်းတီႈလိၵ်ႈႁူမ်ႈမၢႆ ၶေႃႈလႆႈၸႂ် ၸုမ်းဢႃႊသီႊယၼ်ႊ မိူဝ်ႈပီ 2007 တီႈပၢင်ၵုမ် ASEAN ပွၵ်ႈၵမ်း 12 ဢၼ်ႁဵတ်းတီႈမိူင်း ၾိလိပ်ႉပိၼ်း ၼၼ်ႉယူႇ ။
ၼႂ်းၶေႃႈၵိၼ်ၵႅၼ်ႇၼၼ်ႉ ပႃးဝႆႉဝႃႈ – တၵ်းလႆႈၼပ်ႉယမ်ၵုင်ႇသိၵ်ႈၶႃႇႁႅင်းၵၢၼ်ယၢၼ်မိူင်းလႄႈ ပေႃႈမႄႈလုၵ်ႈလၢင်းမုင်ႉႁေႃႁိူၼ်းမၼ်းသေ တေလႆႈ ယုၵ်ႉမုၼ်းပၼ်ၼမ်ႉၵတ်ႉဢၼ်ၸိူဝ်းၶဝ်မီးဝႆႉၼၼ်ႉ ၊ တေလႆႉယုၵ်ႉမုၼ်းပၼ်ထၢၼ်ႈယူႇထၢၼ်ႈၵိၼ်ပိူင်ပဵၼ်ၵူၼ်း ဝႃႈၼႆ။
EU ႁူမ်ႈတုမ်ယူႊရူပ်ႊ ပိုၼ်ၽၢဝ်ႇမိူဝ်ႈလိူၼ်ၼူဝ်ႊဝႅမ်ႊပိူဝ်ႊပူၼ်ႉမႃးဝႃႈ ၼႂ်းႁႅင်းၵၢၼ်ယၢၼ်မိူင်းၼၼ်ႉ ႁႅင်းၵၢၼ်ၼၢင်းယိင်း ၵုၼ်ၶဵဝ်ဢေးသျိူဝ်း ဢၼ်ဢွၵ်ႇၵႂႃႇႁဵတ်းၵၢၼ်တၢင်ႇတီႈ တၢင်ႇမိူင်းမီးယူႇ 10 လၢၼ်ႉပၢႆ ဝႃႈၼႆ။
ဢၢင်ႈဢိင် – 7 Day