မိူဝ်ႈဝႃး ဝၼ်းတီႈ 13 လိူၼ်ထူၼ်ႈၼိုင်ႈ ၵၢင်ၶိုၼ်း ႁႅင်းၵၢၼ်ၵူၼ်းမိူင်းမၢၼ်ႈ ႁူဝ်ၵူၼ်းမွၵ်ႈ 100 ၵေႃႉ ၽိတ်းမေႃးႁႅမ်ၵၼ် ၼိူဝ်တၢင်းလူင်၊ ၵူၼ်းၸၢႆး 2ၵေႃႉ မၢတ်ႇၸဵပ်းႁႅင်း လႆႈႁၢမ်သူင်ႇႁူင်းယႃဝႆႉ ဝႃႈၼႆ။
ၸုမ်းႁႅင်းၵၢၼ်ၵူၼ်းမိူင်းမၢၼ်ႈၼၼ်ႉ ၵမ်ႈၼမ် ပဵၼ်ၵူၼ်းၼုမ်ႇ။ ၸိူဝ်းၶဝ် ပဵၼ်ဝႆႉသွင်ၵုမ်ႇသေ ၽိတ်းမေႃးႁႅမ်ၵၼ် တီႈၾၢႆႇၼႃႈႁိူၼ်းတိုၵ်း (ၶွၼ်ႊတူဝ်ႊ) ဢၼ်ၼိုင်ႈ ၼႂ်းထုင်ႉ ၽၢၼ်ႊထွင်ႊ ၸႄႈတွၼ်ႈ ၶျုၼ်ႊပူႊရီႊ မိူင်းထႆး။ ၵူၼ်းၼႂ်းပွၵ်ႉၼႂ်းယွမ်ႇ ဢွၼ်ၵၼ်တူၵ်းၸႂ်သေ ၼႅတ်ႈတိူင်ႇလၢတ်ႈၸဝ်ႈၼႃႈတီႈ။ ဝၢႆးၸဝ်ႈၼႃႈတီႈမႃးၵူတ်ႇထတ်း ထူပ်းႁၼ် ၵူၼ်းၸၢႆး 2ၵေႃႉ မၢတ်ႇၸဵပ်းဝႆႉ၊ ၵူၼ်းၸၢႆးၵေႃႉၼိုင်ႈ ၺႃးၽၼ်း တီႈၵွၵ်းႁူဝ်လႄႈတူဝ်ၶိင်းသေ မၢတ်ႇၸဵပ်းႁၢဝ်ႈႁႅင်းဝႆႉလႄႈ လႆႈသူင်ႇယူတ်းယႃတူဝ် တီႈႁူင်းယႃ ၽၢၼ်ႊထွင်ႊ ဝႃႈၼႆ။
မိူၼ်ၼႆ မိူဝ်ႈဝႃး ၵၢင်ၶိုၼ်းၼင်ႇၵဝ်ႇ ႁႅင်းၵၢၼ်ၵူၼ်းမိူင်းမၢၼ်ႈ ၵူၼ်းၼုမ်ႇၸၢႆးၵေႃႉၼိုင်ႈ ၺႃးၸုမ်းႁႅင်းၵၢၼ်ၼင်ႇၵၼ် လမ်းႁဵတ်းႁၢႆႉထုပ်ႉပေႃႉဢဝ်မိတ်ႈတႅင်း တီႈၼႃႈႁၢၼ်ႉသႄးဝႅၼ်ႉ ၼႂ်းၸႄႈတွၼ်ႈ သမုတ်ႊပရႃႊၵၼ်ႊ၊ ၼုမ်ႇၸၢႆးႁႅင်းၵၢၼ်ၵေႃႉၼၼ်ႉ မၢတ်ႇၸဵပ်းႁၢဝ်ႈႁႅင်း လႆႈႁၢမ်သူင်ႇႁူင်းယႃဝႆႉ။
ယၢမ်းလဵဝ် တႃႇတေတီႉၺွပ်းဢဝ်တၢင်းၽိတ်း ၵူၼ်းႁဵတ်းႁၢႆႉၸိူဝ်းၼၼ်ႉ ၸဝ်ႈၼႃႈတီႈ တိုၵ်ႉသိုပ်ႇၵူတ်ႇထတ်း လိုပ်ႇလမ်းတီႉၺွပ်းဝႆႉ။
ပူၼ်ႉမႃး မိူဝ်ႈဝၼ်းတီႈ 11 ၼႆႉၵေႃႈ ႁႅင်းၵၢၼ်ၵူၼ်းမိူင်းမၢၼ်ႈလႄႈ ၵူၼ်းထႆး (ၵူၼ်းႁပ်ႉသူင်ႇၶူဝ်းၶွင်) ၽိတ်းမေႃးၵၼ် တီႈၼႃႈႁၢၼ်ႉတၢင်းၵိၼ် The One၊ ၵူၼ်းထႆး 3ၵေႃႉ ၺႃးထုပ်ႉပေႃႉ။ ယွၼ်ႉပိူင်ပဵၼ်ၼႆႉသေ ႁႅင်းၵၢၼ်ၵူၼ်းမိူင်းမၢၼ်ႈ 6 ၵေႃႉ လႆႈယွမ်းၼွမ်းထိုင် ၵူၼ်းထႆးလႄႈ လႆႈသႄငိုၼ်းပၼ် တႃႇမႄးၶိုၼ်းရူတ်ႉၶိူင်ႈ ၵူၼ်းထႆး။ လိူဝ်ၼၼ်ႉ ႁႅင်း ၵၢၼ်ၵူၼ်းမိူင်းမၢၼ်ႈ 6 ၵေႃႉ ၺႃးပူတ်းၵၢၼ်ဢွၵ်ႇပႅတ်ႈ ဝႃႈၼႆ။
ဢိင်ၼိူဝ်ပၼ်ႁႃၸိူဝ်းၼႆႉသေ ၽူႈၸွႆႈထႅမ်ႁႅင်းၵၢၼ်ၵူၼ်းမိူင်းမၢၼ်ႈ တိုၵ်းသူၼ်းပၼ်ၾၢင်ႉဝႆႉဝႃႈ – ၵူၼ်းမိူင်းႁူမ်ႈတုမ်မၢၼ်ႈ ၸိူဝ်းမႃးသွၼ်ႈယူႇဝႆႉၼႂ်းမိူင်းထႆးၼႆႉ ႁႂ်ႈၸွမ်းမၢႆမီႈမိူင်းထႆးသေ ႁႂ်ႈၾၢင်ႉၵၼ်ယူႇသဝ်းၵႂႃႇမႃး ၼႂ်းၵႄႈၵူၼ်းထႆး ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ