ဝၼ်းတီႈ 9/3/2026 ယၢမ်းဝၢႆးဝၼ်းမွၵ်ႈ 5 မူင်း 15 မိၼိတ်ႉ ႁႅင်းၵၢၼ်ယၢၼ်မိူင်း ၸၢႆးၵူၼ်းမိူင်းမၢၼ်ႈၵေႃႉၼိုင်ႈ ၶဝ်ႈၵႂႃႇၼႂ်းႁိူၼ်းလင်ၼိုင်ႈသေ ဢဝ်မိတ်ႈၸမ်ႈသႂ်ႇဢွၼ်ႇယိင်းၵေႃႉ ၼိုင်ႈယဝ်ႉ ၵၼ်ႉၸၼ်လူလၢႆၵႂႃႇ- ဝၢႆးၼၼ်ႉဢမ်ႇႁိုင်လၢႆၸူဝ်ႈမူင်းၵူၺ်း ၸဝ်ႈၼႃႈတီႈပလိၵ်ႈထႆး တီႉၺွပ်းလႆႈၵမ်းသိုဝ်ႈ ၼႆယဝ်ႉ။

ၵူၼ်းၸၢႆးၸၢဝ်းၶိူဝ်းမၢၼ်ႈ ၵေႃႉၵၼ်ႉၸၼ်လူလၢႆယိင်းဢွၼ်ႇၼၼ်ႉ ၸိုဝ်ႈႁွင်ႉ ယူႊၸုပ်ႉ ဢႃယု 33 ပီ။ မၼ်းၸၢႆးပဵၼ်ႁႅင်းၵၢၼ် ယူႇသဝ်းၼႂ်းဝဵင်းၸၢင်ႉၵၢၼ်း ၸႄႈတွၼ်ႈၵဵင်းမႂ်ႇ ၸိုင်ႈထႆး။ ၽွင်းၵိူတ်ႇပၼ်ႁႃ ၼႂ်းႁိူၼ်းလင်ၼၼ်ႉ မီးလုၵ်ႈဢွၼ်ႇယိင်း ဢႃယု 14 ပီ ယူႇဝႆႉၵေႃႉလဵဝ် ပဵၼ်ၶၢဝ်းပေႃႈမႄႈ လႄႈ ၵူၼ်းၼႂ်းမုင်ႉႁေႃႁိူၼ်းယိင်းဢွၼ်ႇၼၼ်ႉဢမ်ႇယူႇ ၼႆယဝ်ႉ။

ၽိူဝ်ႇပေႃႈမႄႈပီႈၼွင်ႉဢွၼ်ႇယိင်းၵေႃႉၼၼ်ႉ ပွၵ်ႈမႃးထိုင်ႁိူၼ်းသေ ႁူႉလွင်ႈတၢင်းပၼ်ႁႃၼၼ်ႉ လႆႈၵႂႃႇတိူင်ႇလၢတ်ႈတီႈႁူင်းပလိၵ်ႈၵမ်းသိုဝ်ႈ။ ထိုင်မႃးယၢမ်းၵၢင်ၶမ်ႈ 9 မူင်း ပလိၵ်ႈထႆးတူၺ်းၸွမ်း CCTV သေ ၵႂႃႇတီႉလႆႈမၼ်းၸၢႆး တီႈၼႂ်းယုမ်းဢၼ်မီးၼႂ်းဝၢင်းႁိမ်းႁိူၼ်းဢွၼ်ႇ ယိင်းၼၼ်ႉၵူၺ်း။ မၼ်းၸၢႆးတင်းတိုၵ်ႉၼုင်ႈသိူဝ်ႈၶူဝ်းၽွင်းၵႂႃႇၵၼ်ႉၸၼ် ၼၼ်ႉသေဢမ်ႇၵႃး မိတ်ႈဢၼ်မၼ်းၸၢႆးဢဝ်ၵႂႃႇၸမ်ႈသေၵၼ်ႉၸၼ်ၼၼ်ႉၵေႃႈတိုၵ်ႉမီးၼႂ်းမိုဝ်းမၼ်းယူႇၼႆ – ပလိၵ်ႈထႆးလၢတ်ႈ။

ယူႊၸုပ်ႉလၢတ်ႈတီႈပလိၵ်ႈဝႃႈ – ၵွၼ်ႇၼႃႈၼႆႉမၼ်းၸၢႆးမႃးႁဵတ်းၵၢၼ်ႁိမ်းႁွမ်းႁိူၼ်းယိင်းဢွၼ်ႇၵေႃႉၼႆႉ။ မၼ်းၸၢႆးလၵ်ႉလွမ်ထုၵ်ႇတႃ ယိင်းဢွၼ်ႇ ၵေႃႉၼၼ်ႉမႃးႁိုင်ယဝ်ႉ။ယွၼ်းတီႈၵပ်းသိုပ်ႇမၼ်းၼၢင်းၵေႃႈဢမ်ႇလႆႈ။ မၼ်းၸၢႆးၸင်ႇဢမ်ႇယိူၼ်ႉလႆႈသေ လၵ်ႉလွမ်ပႂ်ႉတူၺ်းၶၢဝ်း ၵူၼ်းလူင်ဢွၵ်ႇႁိူၼ်းၵႂႃႇ။ ၽွင်းၼၼ်ႉမၼ်းၸၢႆးၸင်ႇၶဝ်ႈၵႂႃႇၵၼ်ႉၸၼ်ယိင်းဢွၼ်ႇၵေႃႉၼၼ်ႉ-ဝႃႈၼႆ။

ယၢမ်းလဵဝ်တႄႉ ပလိၵ်ႈထႆးတီႉၺွပ်း ယူႊၸုပ်ႉသေၵူတ်ႇထတ်းဢဝ်လိူင်ႈဝႆႉ လူၺ်ႈလွင်ႈဢဝ်မိတ်ႈၸမ်ႈလွၵ်ႈငိုတ်ႈၵၼ်ႉၸၼ်ႁဵတ်းႁၢႆႉပိူၼ်ႈ၊ လွင်ႈပူၼ်ႉပႅၼ်ၶဝ်ႈႁိူၼ်း ယေးပိူၼ်ႈၸဵမ်ၸိူဝ်းၼႆႉသေ တေပၼ်တူတ်ႈတၢမ်ႇၵႂႃႇ ဝႃႈၼႆ။

မိူၼ်ၼႆၼင်ႇၵဝ်ႇ မိူဝ်ႈဝၼ်းတီႈ 7/3/2026 ၼၼ်ႉၵေႃႈ ပလိၵ်ႈထႆး ဝဵင်းႁၢင်လူင်း မိူင်းၵဵင်းမႂ်ႇ ၵူတ်ႇထတ်းႁၼ်တူဝ်တၢႆၵူၼ်းၼႂ်းႁိူၼ်းလင်ၼိုင်ႈ တီႈဢိူင်ႇၼမ်ႉၽႄႉ ဝဵင်းႁၢင်လူင်း ပဵၼ်ၼၢင်းယိင်းဢွၼ်ႇ ၸိုဝ်ႈၼွင်ႉၽရႅဝ်း ဢႃယု 22 ပီ ။ ၾၢင်ႁၢင်ႈတူဝ်တၢႆၼၼ်ႉ ပဵၼ်ၾၢင်ႁၢင်ႈၺႃး ၵၼ်ႉၸၼ်လူလၢႆသေ ဢဝ်ၸိူၵ်ႈႁတ်ႉၶေႃးထိုင်တၢႆဝႆႉ ၼႆယဝ်ႉ။

ထိုင်မႃးဝၼ်းတီႈ 8 လိူၼ်မၢတ်ႉၶျ် ၸင်ႇတီႉလႆႈၽူႈပူၼ်ႉပႅၼ်ၵၼ်ႉၸၼ်လူလၢႆ ၵေႃႉဢၼ်ၶႃႈႁႅမ်တၢႆယိင်းဢွၼ်ႇၼၼ်ႉသေ လႆႈႁူႉဝႃႈ ပဵၼ်ပီႈၶူၺ်ၽူႈတၢႆၶိုၼ်း ဝႃႈၼႆ။

ၼွင်ႉၽရႅဝ်း ၽူႈတၢႆၼၼ်ႉပဵၼ်လုၵ်ႈဢွၼ်ႇယိင်းၸၢဝ်း လိသေႃး ၵူၼ်းမိူင်းဝဵင်းႁႅင် ။ မၼ်းၼၢင်းႁဵတ်းၵၢၼ်ႁႃငိုၼ်းသေလဵင်ႉလူပေႃႈမႄႈပီႈၼွင်ႉတၢင်းႁိူၼ်း။ တေႃႇထိုင်ဝၼ်းတီႈ 5 ၼၼ်ႉမၼ်းၼၢင်းတိုၵ်ႉၵႂႃႇႁဵတ်းၵၢၼ်ယူႇ။ ထိုင်မႃးဝၼ်းတီႈ 6 ယၢမ်းႁူဝ်ၶမ်ႈမၼ်းၼၢင်းဢမ်ႇၵႂႃႇႁဵတ်း ၵၢၼ်လႄႈ မႄႈလဵင်ႉၸင်ႇၵပ်းၾူၼ်ႊႁႃ။ ဢမ်ႇမီးၽႂ်ႁပ်ႉၾူၼ်ႊလႄႈ ထိုင်တီႈၸႅင်ႈပလိၵ်ႈမႃးၵူတ်ႇထတ်းတူၺ်း ၸင်ႇလႆႈႁၼ်တူဝ်တၢႆ ၼႂ်းဝၼ်းတီႈ 7 ယၢမ်းၵၢင်ၼႂ် ဝႃႈၼႆ။

ပီႈၶူၺ်မၼ်းၼၢင်း ၵေႃႉပူၼ်ႉပႅၼ်ၶႃႈႁႅမ်ၼၼ်ႉၸိုဝ်ႈၸၢႆးပွၼ်ႊ ဢႃယု 33 ပီ။ မၼ်းၸၢႆးလၢတ်ႈဝႃႈ – ၼႂ်းဝၼ်းတီႈ 6 မၼ်းၸၢႆးၵႂႃႇၵိၼ်လဝ်ႈမႃးၸဵမ်ၸဝ်ႉ။ ယၢမ်းၵၢင်ၼႂ်မွၵ်ႈ 9 မူင်း 10 မူင်း မၼ်းၸၢႆးမႃးတႅပ်းတူၼ်ႈမႆႉၼႂ်းဝၢင်းႁိူၼ်းဢၼ်ၼွင်ႉၽရႅဝ်းယူႇ။ ဝၢႆးတႅပ်းတူၼ်ႈမႆႉယဝ်ႉ မၼ်းၸၢႆး ၶိုၼ်ႈမိူဝ်းၼိူဝ်ႁိူၼ်းၼွင်ႉၽရႅဝ်း ဢၢၼ်းမိူဝ်းဝႆႉလဵၵ်းလိူဝ်ႈ။ ၽွင်း ၼၼ်ႉမၼ်းၸၢႆးဢဝ်သေႃးလိူဝ်သေပိုတ်ႇတူၺ်းႁွင်ႈၼွင်ႉၽရႅဝ်း တိုၵ်ႉႁၼ်မၼ်းၼၢင်းၼွၼ်းလပ်းယူႇ။ မၼ်းၸၢႆးၸင်ႇၶဝ်ႈၵႂႃႇဢၢၼ်းၵၼ်ႉၸၼ်။ ၼွင်ႉၽရႅဝ်းတိုၼ်ႇမႃး တူၵ်းၸႂ်သေႁွင်ႉ။ မၼ်းၸၢႆးဢဝ်ၽႃႈႁူမ်ႇ လႄႈ မွၼ်ႁူဝ်တဵၵ်းဝႆႉတီႈႁူဝ်။ ၼွင်ႉၽရႅဝ်း တိုၵ်ႉႁွင်ႉသႅၼ်ႇထႅင်ႈယူႇလႄႈထိုင်တီႈၸၵ်ႉဢဝ်ၸိူၵ်ႈၾႆးတၢင်းႁူဝ်ၼွၼ်းၼၼ်ႉမႃးႁတ်ႉၶေႃးၼွင်ႉ ၽရႅဝ်း ထိုင်တၢႆ။ ၽိူဝ်ႇတၢႆယဝ်ႉမၼ်းၸၢႆးဢၢၼ်းၵၼ်ႉၸၼ် သမ်ႉႁၼ်ၼွင်ႉၽရႅဝ်းပဵၼ်ႁူဝ်လိူၼ်ဝႆႉလႄႈဢမ်ႇတၼ်းလႆႈၵၼ်ႉၸၼ်။ ၽွင်းၼၼ်ႉ ၽိူဝ်ႇမၼ်းၸၢႆးတူၺ်း ၼွင်ႉၽ ရႅဝ်းသမ်ႉပေႃးတၢႆယဝ်ႉ ႁဵတ်းႁႂ်ႈမၼ်းၸၢႆးတူၵ်းၸႂ်သေၼႅတ်ႈလၵ်ႉဢဝ်ထူင်လႄႈ ၾူၼ်ႊမိုဝ်းထိုဝ်ၶွင်ၼွင်ႉၽရႅဝ်းသေ ၼႅတ်ႈဢွၵ်ႇႁိူၼ်းမႃး။ ယင်းပၢႆယႃႉသေႃးၽၵ်းတူႁွင်ႈၼွင်ႉ ၽရႅဝ်း ဝႆႉထႅင်ႈလူးၵွၼ်ႇ ႁဵတ်းမိူၼ်ၾၢင်ႁၢင်ႈမီးၵူၼ်းတၢင်းၼွၵ်ႈ ၶဝ်ႈမႃးလၵ်ႉ ၶူဝ်းၶွင်သေ ၵၼ်ႉၸၼ်ၶႃႈႁႅမ်တၢႆၵႂႃႇ ။ ဝၢႆးၼၼ်ႉ မၼ်းၸၢႆးပၢႆႁဵတ်းၵႅင်ႈပဵၼ်ၵူၼ်းသိုဝ်ႈသႂ်သေ ယင်းပၢႆၵႂႃႇလၢတ်ႈတီႈပလိၵ်ႈဝႃႈ ပဵၼ်ၸႂ်ဢမ်ႇလီၸွမ်းတီႈဢၼ်ၼွင်ႉမေးထုၵ်ႇၶႃႈႁႅမ်တၢႆ ဝႃႈၼႆ။

ၵူၺ်းၵႃႈ ၽိူဝ်ႇပလိၵ်ႈၸွပ်ႇတူၺ်းၸွမ်း CCTV သေလိုပ်ႈလမ်းၸွမ်း ၸင်ႇတီႉလႆႈပဵၼ်ပီႈၶူၺ်မၼ်းၼၢင်း ပဵၼ်ၵေႃႉလူင်းမိုဝ်းၶႃႈႁႅမ်ယိင်းဢွၼ်ႇၼၼ်ႉတၢႆ ၼႆယဝ်ႉ။

ပလိၵ်ႈလႆႈတီႉၺွပ်းမၼ်းၸၢႆးသေ ၵူတ်ႇထတ်းတႃႇပၼ်တူတ်ႈတၢမ်ႇပူၼ်ႉပႅၼ်ႈၶဝ်ႈၼႂ်းပိုၼ်ႉတီႈသုၼ်ႇတူဝ်၊ တင်ႈၸႂ်ဢၢၼ်းၵၼ်ႉၸၼ်သေ ၶႃႈႁႅမ်ၵူၼ်းတၢႆ ၸဵမ်ၸိူဝ်းၼႆႉ ဝႃႈၼႆ။

ၸွမ်းၼင်ႇၾၢႆႇပၢႆးယူႇလီလႄႈ ၾၢႆႇႁႄႉၵင်ႈလွင်ႈၵၼ်ႉၸၼ်လူလၢႆ လုမ်ႈၾႃႉၶဝ်ၶူၼ်ႉၶႂႃႉသေပိုၼ်ၽၢဝ်ႇပၼ်တၢင်းၶႆႈၸႂ်ဝႆႉတႄႉ ၼႂ်းၵၢပ်ႈပၢၼ်ဝၼ်းမိူဝ်ႈၼႆႉ လွင်ႈၵၼ်ႉၸၼ်လူလၢႆ ၵၼ်ၼႆႉ ဢၼ်ပဵၼ် ၽူႈၸၢႆးၵူၼ်းပႅၵ်ႇၼႃႈ/ ၵူၼ်းတၢင်းၼွၵ်ႈ/ ဢၼ်ဢမ်ႇႁူႉၸၵ်းၵၼ်ၼႆႉ တေမီးမွၵ်ႈ 10 % ၵူၺ်း။ တႃႇ 90 % (ဝၢၵ်ႈ) ၼႆႉ ပဵၼ်ၵူၼ်းဢၼ်ႁူႉၸၵ်းၵၼ်၊ ဢူၺ်း ၵေႃႉၵၼ်၊ ပီႈၼွင်ႉၵၼ် ၊ ၵူၼ်းယူႇႁိမ်းၵိၼ်ၸမ်ၵၼ်လွၼ်ႉလွၼ်ႉ။ ၼွၵ်ႈလိူဝ်ၼၼ်ႉဢမ်ႇၵႃး ပိူင်လူင် လွင်ႈပူၼ်ႉပႅၼ်ၵၼ်ႉၸၼ်လူလၢႆၵၼ်ၼႆႉ ပဵၼ်ယွၼ်ႉၾၢႆႇၽူႈပူၼ်ႉပႅၼ် ၵိၼ်လဝ်ႈမဝ်းလွၼ်ႉလွၼ်ႉ။ ၵွပ်ႈၼႆလႄႈ ယူႇတီႈပေႃႈမႄႈ ၵူၼ်းႁိူၼ်းသေ သင်ဝႃႈမီးလုၵ်ႈလၢင်းၼၢင်းသၢဝ်ၸိုင် ဢမ်ႇထုၵ်ႇလီပၼ်လုၵ်ႈလၢင်းၼၢင်းသၢဝ် ယူႇၵေႃႉလဵဝ်၊ ဢမ်ႇထုၵ်ႇလီဝၢင်းၸႂ်ဝၢင်းၶေႃးသေ ဢဝ်လုၵ်ႈလၢင်းၼၢင်းသၢဝ်ၵႂႃႇပွႆႇဝႆႉၸွမ်းၵူၼ်းမိုတ်ႈၵိုဝ်းၸမ်ၸႂ်ၼႆ – တႅမ်ႈတၢင်ႇဝႆႉတီႈဝႅပ်ႉသၢႆႉၾၢႆႇပၢႆးယူႇလီ Hello Sayarwon ၼင်ႇၼႆ။