ဝၼ်းတီႈ 10 လိူၼ်ၾႅပ်ႉပိဝ်ႊရီႊၼႆႉ ၸုမ်းပလိၵ်ႈ CIB မိူင်းထႆး ႁဵတ်းပၢင်သပ်းၸႅင်ႈၶၢဝ်ႇၵႂႃႇဝႃႈ တီႉၺွပ်းလႆႈၸုမ်းၵျႃႊၽျႅၼ်ႉ ဢၼ်ႁဵတ်း Application TikTok ဢၼ်ပွမ်သေ လႄႇႁႃလွၵ်ႇလႅၼ်ႁူၺ်းသူၼ်း ႁႂ်ႈလူင်းတိုၼ်းလၢင်း တီႈၼႂ်းမိူင်းထႆး ဝႃႈၼႆ။
ၸုမ်းၶဝ်ၼႆႉ ၸႂ်ႉတိုဝ်းသိုဝ်ႇတူင်ႇဝူင်း မိူၼ်ၼင်ႇ LINE/Facebook ၸိူဝ်းၼႆႉသေ ႁႃတူဝ်ယိူဝ်ႇ၊ ဢုပ်ႇလၢတ်ႈ ႁႂ်ႈမိုတ်ႈၵိုဝ်းၸမ်ၸႂ်ၵၼ်ယဝ်ႉ ႁူၺ်းသူၼ်း ႁႂ်ႈမႃးပဵၼ်ၽူႈတၢင်တူဝ် ၵၢၼ်ၵႃႉၶၢႆ ၼႂ်း TikTok Shop။ ၸိူဝ်းၶဝ်လၢတ်ႈဝႃႈ ၽူႈတၢင်တူဝ်ၵၢၼ်ၵႃႉၶၢႆၼႆႉ ဢမ်ႇလူဝ်ႇၶၢႆ/ဢမ်ႇလူဝ်ႇသူင်ႇၶူဝ်းၶွင်သင်၊ ၶဝ်ႈႁူမ်ႈလူင်းတိုၼ်းလၢင်းၸွမ်းၵူၺ်းၵေႃႈ လႆႈၼမ်ႉ မျၢတ်ႉၼမ်ႉတွၼ်းၸွမ်း ၼိုင်ႈၶိုင်ႈယဝ်ႉ ဝႃႈၼႆ။
သင်ၶဝ်ႈႁူမ်ႈလူင်းတိုၼ်းလၢင်းၸိုင် ၼမ်ႉမျၢတ်ႈၼမ်ႉတွၼ်း ဢၼ်လႆႈမႃးတီႈ ၵၢၼ်ၶၢႆၶူဝ်းၶွင်ၼၼ်ႉ တေဢွၵ်ႇမႃးၼႄဝႆႉပၼ် တီႈၼႂ်း Application TikTok Shop။ ၵူၺ်းၵႃႈ ငိုၼ်း ၼၼ်ႉ မီးဝႆႉသဵၼ်ႈမၢႆၵူၺ်း ဢမ်ႇထွၼ်ဢွၵ်ႇလႆႈ၊ တေလၢတ်ႈဝႃႈ လၢႆးထွၼ်ဢဝ်ငိုၼ်းဢမ်ႇမႅၼ်ႈလႄႈ ဢၵွင်ႉၺႃး ဢိုတ်းဝႆႉ၊ သင်ၶႂ်ႈႁႂ်ႈဢၵွင်ႉပိုတ်ႇၶိုၼ်းၸိုင် ႁႂ်ႈသႂ်ႇငိုၼ်းၵႂႃႇထႅင်ႈ ဝႃႈၼႆ။
ၵဵဝ်ႇလူၺ်ႈလွင်ႈၼႆႉသေ မီးၵူၼ်းၵႂႃႇတိူင်ႇၸႅင်ႈဝႆႉတီႈ ႁူင်းပလိၵ်ႈ 88 ၵေႃႉ၊ ၸိူဝ်းၶဝ်သုမ်းငိုၼ်းၵႂႃႇၸွမ်း မွၵ်ႈ 25 လၢၼ်ႉဝၢတ်ႇပၢႆ ဝႃႈၼႆ။
ၾၢႆႇပလိၵ်ႈၶဝ် ၸတ်းၽႅၼ်ၵၢၼ်ၵူတ်ႇထတ်းသေ တီႉၺွပ်းလႆႈ ၵူၼ်းၵဵဝ်ႇၶွင်ႈ 4 ၵေႃႉ ယူႇသဝ်းဝႆႉၼႂ်းမိူင်းထႆးလၢႆလၢႆတီႈ။ ၽူႈမီးပုၼ်ႈၽွၼ်းၶဝ် လႆႈယိုတ်းသိမ်းဢဝ်ဝႆႉ ၶူဝ်းၶွင် ငိုၼ်းၶမ်းလႄႈ တီႈလိၼ်ႁိူၼ်းယေးၶဝ် ဢၼ်ၵိုင်ႇငိုၼ်းထႆး 114 လၢၼ်ႉဝၢတ်ႇ။
လိူဝ်ၼၼ်ႉ တေပိုတ်ႇလိူင်ႈဢဝ်တၢင်းၽိတ်းၵႂႃႇ လူၺ်ႈတၢင်းၽိတ်း ႁူမ်ႈၵၼ်လွၵ်ႇလႅၼ်ပိူၼ်ႈ၊ ပိုၼ်ၽႄႈၶေႃႈမုလ်းၽိတ်းလႄႈ ပူၼ်ႉပႅၼ်ပၵ်းပိူင်မၢႆမီႈ ၾၢႆႇ ၶွမ်ႊပိဝ်ႊတိူဝ်ႊ လႄႈ လွင်ႈငိုၼ်းတွင်း ၸိူဝ်းၼႆႉ ဝႃႈၼႆ။
ၾၢႆႇၽူႈမီးပုၼ်ႈၽွၼ်းၶဝ် တိုၵ်းသူၼ်းပၼ်ၾၢင်ႉဝႃႈ – သင်တေၸၼ် download ဢဝ် application ဢၼ်လႂ်သေဢမ်ႇဝႃႈ ႁႂ်ႈၶဝ်ႈၵႂႃႇၸၼ်လုတ်ႇဢဝ် တီႈၼႂ်း app store ဢမ်ႇ ၼၼ် play store ၵူၺ်း။ ယႃႇပေယုမ်ႇၽႂ်ငၢႆႈသေ ဢူၼ်းငိုၼ်းပၼ်ပိူၼ်ႈ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ