တႃႇၶိုၼ်းမႄးၵေႃႇသၢင်ႈ ႁူင်းလဵၼ်ႈဢဵၼ်ႁႅင်းႁႂ်ႈၶႅမ်ႉလိူဝ်ၵဝ်ႇ ၊ တႃႇၵေႃႇသၢင်ႈ ဢၢင်ႇလဵၼ်ႈၼမ်ႉၼႆသေ သိုၵ်းမၢၼ်ႈဢွၵ်ႇလိၵ်ႈ လိုပ်ႈႁၢၼ်ႉၶၢႆၶူဝ်း 200 ႁွင်ႈႁႂ်ႈၶၢႆႉဢွၵ်ႇသေ တႄႇၵူၼ်ႇယႃႉႁွင်ႈႁၢၼ်ႉတၢင်းၶၢႆ ဢၼ်မီးၵၢင်ဝဵင်းတူၼ်ႈတီး ၸိုင်ႈတႆးပွတ်းၸၢၼ်း ဝႃႈၼႆ ။

မိူဝ်ႈဝႃးဝၼ်းတီႈ 16/3/2026 တႄႇယၢမ်းၵၢင်ၼႂ် သိုၵ်းမၢၼ်ႈတႄႇယႃႉ ႁွင်ႉႁၢၼ်ႉဢၼ်မီးႁိမ်းႁွမ်းသူၼ်မွၵ်ႇပူဝ်ႇၶျူၵ်ႈဢွင်ႇသၢၼ်း ( ဗိုလ်ချုပ်အောင်ဆန်း ) တီႈပၢင်ႇလဵၼ်ႈဢဵၼ် ႁႅင်းၵၢင်ဝဵင်းတူၼ်ႈတီးၵႂႃႇ ၼႆယဝ်ႉ ။

ၸဝ်ႈႁၢၼ်ႉတၢင်းၶၢႆလၢတ်ႈတီႈၽူႈတွႆႇႁွၵ်ႈဝႃႈ -“ တလဵဝ်ႁဝ်းတႄႇလႆႈၶၢႆႉယူႇယဝ်ႉၶႃႈ ၊ ယႃႇႁႂ်ႈပိူၼ်ႈလႆႈမိူၼ်ႁဝ်းၶႃႈၵူၺ်းလႃႈ ၊ မိူဝ်ႈဢွၼ်တၢင်းယၢမ်ႈယူႇႁိူၼ်းၸဝ်ႈၵဝ် ၊ ၵမ်းၼႆႉတႄႉ ဢမ်ႇမီးႁိူၼ်းယဝ်ႉၶႃႈ ၊ ၵွၼ်ႇႁွင်ႈႁၢၼ်ႉဢၼ်ၶဝ်ႁၢင်ႈႁႅၼ်းပၼ်ၼၼ်ႉပႆႇယဝ်ႉတႄႉ တေလႆႈၶၢတ်ႈႁိူၼ်းယူႇဢေႃႈ ၵႃႈၶၢတ်ႈႁိူၼ်းၵေႃႈၵႃႈယႂ်ႇၼႃႇ ၼိုင်ႈလိူၼ်ၼႆႉ 10-20 သႅၼ် တီႈဢေႇမၼ်းၶႃႈဢေႃႈ”- ဝႃႈၼႆ ။

ၼႂ်းၼၼ်ႉႁၢၼ်ႉတၢင်းၶၢႆ မီး 160 ႁၢၼ်ႉ ၊ ႁၢၼ်ႉၶၢႆၶိူင်ႈၵႃးတင်းသဵင်ႈ တေလႆႈၶၢႆႉၵႂႃႇၾၢႆႇဢွၵ်ႇဝဵင်းတူၼ်ႈတီး တီႈ 4 လၵ်းၼၼ်ႉတင်းသဵင်ႈ ၊ ႁၢၼ်ႉတၢင်းၵိၼ်လႄႈ ႁၢၼ်ႉၶဝ်ႈမုၼ်း ၸိူဝ်းၼၼ်ႉသမ်ႉ တေလႆႈၶၢႆႉၵႂႃႇယူႇတၢင်းႁွင်ႈႁၢၼ်ႉႁူင်းၾႆးမိၼ် ။

တွၼ်ႈတႃႇ ၵူၼ်းၵိၼ်ငိုၼ်းလိူၼ် ပိၼ်ႇသိၼ်ႇၼၼ်ႉသမ်ႉ ၸႂ်ႉၶၢႆႉၵႂႃႇတီႈ ႁိူၼ်းမိၼ်းၵျၢၼ်ႇၸိတ်ႉ( မင်းကျန်စစ် အိမ်ယာ) ဢမ်ႇၼၼ် ႁႂ်ႈၵႂႃႇသိုဝ်ႉလွၵ်းလိၼ်သေ ယူႇၼႂ်းဝဵင်းဢေးတႃႇယႃႇ ဝႃႈၼႆ။

ၼၢင်းယိင်းၵေႃႉယူႇၼႂ်းပိုၼ်ႉတီႈလၢတ်ႈတီႈၽူႈတွႆႇႁွၵ်ႈဝႃႈ -“ၵၢၼ်ႁႃၵိၼ်လဵင်ႉတွင်ႉၶဝ်တေလႆႈတႄႇၶိုၼ်းမူတ်းဢေႃႈ ၊ တွၼ်ႈတႃႇၶဝ်ၵေႃႈယၢပ်ႇ တွၼ်ႈတႃႇၵူၼ်းမိူင်းႁဝ်းၶႃႈၵေႃႈယၢပ်ႇ ၊ မိူဝ်ႈဝႃးၼႆႉ ပၼ်ႇႁႃ ၶူဝ်းၶွင်ၸႂ်ႉတႃႇၵႃး ၸွမ်းၼႂ်းဝဵင်းၵေႃႈ ဢမ်ႇၸၢင်ႈၵႂႃႇႁႃသိုဝ်ႉတီႈလႂ် ၊ ႁႃသိုဝ်ႉယၢပ်ႇၼႃႇ”- ဝႃႈၼႆ ။

ႁွင်ႈႁၢၼ်ႉဢၼ်မီးႁိမ်းႁွမ်းသူၼ်မွၵ်ႇပူဝ်ႇၶျူၵ်ႈဢွင်ႇသၢၼ်းၼၼ်ႉၵူၼ်းပိုၼ်ႉတီႈသိုဝ်ႉယူႇ ၶၢတ်ႈယူႇမႃးမီး 24 ပီပၢႆ ။ ႁွင်ႈၵၢၼ်ၾၢႆႇလိူမ်ႈလႆႇၸႄႈဝဵင်းတူၼ်ႈတီး သူင်ႇလိၵ်ႈထိုင် ၵူၺ်းဢမ်ႇၵႃး တၢမ်တူဝ်ၽူႈမီးပုၼ်ႈၽွၼ်း ၸိူဝ်းယူႇၼႂ်းႁွင်ႈၵၢၼ်လူင်ပွင်ၸိုင်ႈ တႂ်ႈသိုၵ်းမၢၼ်ႈယိုတ်းမိူင်းၶဝ်ၵေႃႈလူင်းပၼ်ၾၢင်ႉ ႁႂ်ႈၸဝ်ႈႁၢၼ်ႉတၢင်းၶၢႆၶဝ်ၶၢႆႉဢွၵ်ႇၼႆႉ မီး 3 ပွၵ်ႈ ။ မိူဝ်ႈလိူၼ်တီႊသႅမ်ႊပိူဝ်ႊ ဝၼ်းတီႈ 3 ၼိုင်ႈပွၵ်ႈ ၊ ၼႂ်းလိူၼ်ၵျႅၼ်ႊၼိဝ်ႊရီႊ ဝၼ်းတီႈ 5 ၼိုင်ႈပွၵ်ႈ ၊ ၼႂ်းလိူၼ်ၾႅပ်ႉပိဝ်ႊရီႊ ဝၼ်းတီႈ 2 ၼိုင်ႈပွၵ်ႈ ။ ဝၼ်းတီႈ 28 လိူၼ်ၾႅပ်ႉပိဝ်ႊရီႊၼႆႉ တေလႆႈၶၢႆႉၶူဝ်းလဵင်းဢွၵ်ႇၵႂႃႇႁႂ်ႈယဝ်ႉတူဝ်ႈ သင်ဢမ်ႇၶၢႆႉပၼ် တေဢဝ်ဢဵၼ်ႁႅင်းၵူၼ်း တင်းၶိူင်ႈၸၢၵ်ႈ မႃးၵူၼ်ႇယႃႉလႅဝ်ပႅတ်ႈတင်းသဵင်ႈ ၼႆယဝ်ႉ ။