သိုၵ်းမၢၼ်ႈယိုတ်းမိူင်းထႅမ်ႁႅင်းသိုၵ်း ၶဝ်ႈၵႂႃႇပၵ်းတပ်ႉတီႈဢိူင်ႇၵျွၵ်ႉငႅၵ်ႉ ၼႂ်းၸႄႈဝဵင်းဝၢၼ်ႈငႂ်ႈ (ယႂႃႇငၢၼ်ႇ) ၸိုင်ႈတႆးပွတ်းၸၢၼ်းယဝ်ႉ တီႉၺွပ်းၵူၼ်းဝၢၼ်ႈ 5 ၵေႃႉ။ ယွၼ်းငိုၼ်း ၵႃႈထုတ်ႇတူဝ်တီႈၵူၼ်းမိူင်း ၼိုင်ႈၵေႃႉလႂ်ၼပ်ႉႁူဝ်သိပ်းသႅၼ်ပျႃးယဝ်ႉ ၸင်ႇပွႆႇပၼ်ၶိုၼ်း ၼႆယဝ်ႉ ။
တႄႇၼႂ်းလိူၼ်မတ်ႉၶျ် ဝၼ်းတီႈ 8 ၵူၼ်းဝၢၼ်ႈၵျွၵ်ႉငႅၵ်ႉ(ကျောက်ငှက်) 5 ၵေႃႉ ၽွင်းၵႂႃႇလႄႇႁိူၼ်းပီႈၼွင်ႉ ၺႃးသိုၵ်းမၢၼ်ႈတီႉၺွပ်းၵႂႃႇ ၼိူဝ်သဵၼ်ႈတၢင်း ဝၢၼ်ႈဢူၵ်ႉတုၼ်း (အုတ်တွင်း) လႄႈ ဝၢၼ်ႈၵျွၵ်ႉငႅၵ်ႉ(ကျောက်ငှက်) ဝႃႈၼႆ ။
သိုၵ်းမၢၼ်ႈသင်ႇၵူၼ်းၼႂ်းမုင်ႉႁိူၼ်းၶဝ် ဢဝ်ငိုၼ်းၵႂႃႇၼိုင်ႈၵေႃႉလႂ် 50 သႅၼ်ပျႃးသေထုတ်ႇဢဝ်တူဝ်မႃးၶိုၼ်း။ ၵူၼ်းၸိူဝ်းၺႃးတီႉၺွပ်းၵႂႃႇသေ လႆႈဢဝ်ငိုၼ်းထုတ်ႇတူဝ်ဢွၵ်ႇမႃးၶိုၼ်းလႆႈၼၼ်ႉ ပဵၼ်ၼၢင်းယိင်းၵေႃႉၼိုင်ႈလႄႈ ၵူၼ်းၸၢႆးၵေႃႉၼိုင်ႈ။ ၵူၼ်းၸၢႆး 3 ၵေႃႉၸိူဝ်းၺႃးတီႉၺွပ်း ၵႂႃႇသေ ဢမ်ႇပွႆႇမႃးပၼ်ၶိုၼ်းၼၼ်ႉတႄႉ ထုၵ်ႇသူင်ႇၵႂႃႇၾိုၵ်းၵၢၼ်သိုၵ်းမၢၼ်ႈယဝ်ႉ ဝႃႈၼႆ ။
ၵူၼ်းၸၢႆးၵေႃႉယူႇၼႂ်းပိုၼ်ႉတီႈလၢတ်ႈတီႈၽူႈတွႆႇႁွၵ်ႈဝႃႈ -“ထုၵ်ႇတီႉၺွပ်းၵႂႃႇ ၽွင်းၶဝ်ၵႂႃႇလႄႇ ႁိူၼ်းပီႈၼွင်ႉၶဝ်ႁႄပွၵ်ႈမႃးႁိူၼ်းၼၼ်ႉဢေႃႈ ၊ ပေႃးႁူဝ်ၶမ်ႈၼႆႉသိုၵ်းမၢၼ်ႈၶဝ် ၵႆႉပၼ်ႇပၼ်ႇလဵပ်ႈလဵပ်ႈၸွမ်းၵိဝ်ႇၸွမ်းတၢင်းၼႃႇ၊ ပေႃးႁၼ်ၵူၼ်းၵေႃႈ ႁွင်ႉၵိုတ်းႁႄထတ်းၸႅတ်ႈထၢမ်ယဝ်ႉ တီႉၺွပ်း ၊ ၶဝ် 5 ၵေႃႉၼၼ်ႉၵေႃႈ လႆႈပၼ်ငိုၼ်း ၼိုင်ႈၵေႃႉ 50 သႅၼ် ၵႂႃႇထုတ်ႇတူဝ်ဢွၵ်ႇမႃးၶိုၼ်း ၼႆႉတင်းလႆႈမႃးၶိုၼ်းသွင်ၵေႃႉၵူၺ်း ၊ ထႅင်ႈ 3 ၵေႃႉတႄႉ သိုၵ်းမၢၼ်ႈဝႃႈ သူင်ႇၵႂႃႇၾိုၵ်းၵၢၼ်သိုၵ်းယဝ်ႉ”– ဝႃႈၼႆ ။
လႆႈႁူႉဝႃႈ ၵူၼ်းၸိူဝ်းၺႃးသိုၵ်းမၢၼ်ႈတီႉၺွပ်းၵႂႃႇၼၼ်ႉ ပဵၼ်ၵူၼ်းဢႃယု 30 ပီ သႅၼ်းပၢၼ်ၵၢင် ၊ ပဵၼ်ၵူၼ်းႁဵတ်းၵၢၼ်ႁႃၸဝ်ႉၵိၼ်ၶမ်ႈသေလဵင်ႉၼႃႈႁိူၼ်းဝႆႉ ၼႆယဝ်ႉ။
မိူၼ်ၼႆၼႂ်းၵၢင်လိူၼ်မၢတ်ႉၶျ်ၼႆႉၵူၺ်း သိုၵ်းမၢၼ်ႈမႃးတီႉၺွပ်း ၵူၼ်းဝၢၼ်ႈ ၵုင်းသိင်ႇ (သိမ်ကုန်း) ၼႂ်းၸႄႈဝဵင်းယႂႃႇငၢၼ်ႇ ၼၢင်းယိင်း 2 ၵေႃႉ ၊ ၵူၼ်းၸၢႆး ၼိုင်ႈၵေႃႉၵႂႃႇသေ ထိုင်ဝၼ်းမိူဝ်ႈၼႆႉ (17/3/2026) ၵေႃႈ ပႆႇလႆႈတၢင်းၵပ်းသိုပ်ႇသင် ၼႆယဝ်ႉ ။
ၼၢင်းယိင်းဢႃယု 30 ပီလၢတ်ႈတီႈၽူႈတွႆႇႁွၵ်ႈဝႃႈ -“ ယွၼ်ႉသင်လႄႈ မႃးတီႉၺွပ်းၵႂႃႇတႄႉဢမ်ႇႁူႉ ၊ သိုၵ်းမၢၼ်ႈဢဝ်ၵႃးသေ မႃးၺွပ်းထိုင်တီႈႁိူၼ်းၶဝ် ၊ တေႃႇထိုင်မိူဝ်ႈၼႆႉၵေႃႈ ပႆႇလႆႈငိၼ်းၶၢဝ်ႇသင် ”- ဝႃႈၼႆ ။
တႄႇႁူဝ်ပီ 2026 ၼႆႉမႃးသိုၵ်းမၢၼ်ႈႁူမ်ႈတင်းပျီႇတူႉၸိတ်ႉပဢူဝ်း ႁႅၼ်းသိုၵ်းၶဝ်ႈၵႂႃႇၼႂ်းဝၢၼ်ႈ ၼပၢၼ်းၵျီး၊ ဢိၼ်ႇတေႃး(ပႃႇတိုင်း) လႄႈ ယေႇၶျၢၼ်း ဢိၵ်ႇထႅင်ႈလၢႆလၢႆဝၢၼ်ႈ ၼႂ်း ၸႄႈဝဵင်းယႂႃႇငၢၼ်ႇ ။ ၼႄၶေႃႈဢၢင်ႈဝႃႈ ၵဵဝ်ႇၵွင်ႉတင်းၸုမ်းလုၵ်ႉၽိုၼ်ႉၼႆသေ တီႉၺွပ်းၵူၼ်းမိူင်းမွၵ်ႈ 10 ၵေႃႉပၢႆ ၵႂႃႇၵုမ်းၶင်ဝႆႉတီႈႁူင်းပလိၵ်ႈ။ လိူဝ်ၼၼ်ႉ တဵၵ်းယွၼ်းငိုၼ်းတီႈ ပီႈၼွင်ႉၵူၼ်းၼႂ်းမုင်ႉႁေႃႁိူၼ်းၸိူဝ်းၺႃးၺွပ်းၼၼ်ႉၵႂႃႇ ၼိုင်ႈၵေႃႉလႂ် 10 သႅၼ်၊ ပေႃးပၼ် ငိုၼ်း ၸင်ႇပွႆႇတူဝ်ပၼ် ၼႆယဝ်ႉ။
ၽွင်းမႃးပၵ်းတပ်ႉၼႂ်းဝၢၼ်ႈၵေႃႈ ၸႂ်ႉၵူၼ်းပိုၼ်ႉတီႈ သူင်ႇႁေႃႇၶဝ်ႈၸွၵ်းၽၵ်းပၼ်ၵူၺ်းဢမ်ႇၵႃး ယင်းလွၵ်ႇငိုတ်ႈတဵၵ်းဢဝ် ၵႃးၵူၼ်းဝၢၼ်ႈသေ ၸႂ်ႉၵူၼ်းဝၢၼ်ႈသႂ်ႇၼမ်ႉမၼ်းၵႃးပႃး ဝႃႈၼႆ။
တီႈဝဵင်းဝၢၼ်ႈငႂ်ႈ ( ယႂႃႇငၢၼ်ႇ ) ၼႆႉ မီးၸုမ်းတပ်ႉသိုၵ်းထၼူႉ DPLA ၊ ၸုမ်းသိုၵ်းလုၵ်ႉၽိုၼ်ႉ ၵျဵဝ်းၽိဝ်ႇ ၊ ၸုမ်းသိုၵ်းထၼူႉ DSNDA ၶဝ်တူင်ႉၼိုင်ယူႇသဝ်းဝႆႉၵူၺ်းဢမ်ႇၵႃး ပျီႇတူႉ ၸိတ်ႉပဢူဝ်း PNO တင်း သိုၵ်းမၢၼ်ႈၵေႃႈ ၵႆႉထႅမ်ႁႅင်းသိုၵ်းၶဝ်ႈၼႂ်းဝၢၼ်ႈၼႂ်းဝဵင်း ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ