မၢၵ်ႇတႅၵ်ႇၼႂ်းဝၢင်းႁိူၼ်းပူႇၵႄႇမၢၼ်ႈၸၢမ် ၸေႈဝဵင်းၼမ်ႉတူႈ ၸၢၵ်ႇမၢၵ်ႇတိူဝ်ႉၺႃး ၸဝ်ႈၼင်ႈၵျႂင်း တူၼ်ၼိုင်ႈ လႄႈ လႆႈသူင်ႇတူဝ်ယူတ်းယႃတီႈႁူင်းယႃလႃႈသဵဝ်ႈ။
ဝၼ်းတီႈ 8/4/2019 ယၢမ်းႁူဝ်ၶမ်ႈမီးၵူၼ်းဢမ်ႇႁူႉၸၵ်းဢဝ်မၢၵ်ႇမႃးထိုမ်ႈသႂ်ႇၼႂ်းဝၢင်းႁိူၼ်း လုင်းၽူဝ်းထွင်ႇ ပူႇၵႄႇဝၢၼ်ႈ မၢၼ်ႈၸၢမ် ဢိူင်ႇမိူင်းမု ၸေႈဝဵင်းၼမ်ႉတူႈ ။ ၽွင်းသင်ၶၸဝ်ႈ ၶီႇလူတ်ႉၶိူင်ႈလတ်းၼႃႈႁိူၼ်းပူႇၵႄႇၼၼ်ႉမၢၵ်ႇတႅၵ်ႇ ၸၢၵ်ႇမၢၵ်ႇတိူဝ်ႉမႅၼ်ႈလင်သင်ၶၸဝ်ႈ တူၼ်ၼိုင်ႈလႆႈမၢတ်ႇၸဵပ်း။
ၽူႈယိင်းဢႃႇယု 30 ပၢႆၵူၼ်းမၢၼ်ႈၸၢမ်လၢတ်ႈတီႈၽူႈတွႆႇႁွၵ်ႈဝႃႈ- “ပဵၼ်ၽႂ်မႃးထိုမ်ႈဝႆႉတႄႉဢမ်ႇႁူႉ။ သမ်ႉတႅၵ်ႇမႅၼ်ႈမိူဝ်ႈ ၸဝ်ႈသြႃႇ ၼႃးတူင်ႈ ၸဝ်ႈမူးလိင်ႇတလႄႈ ၸဝ်ႈသၢင်ႇပႃးၼိုင်ႈဢၢင်ႈတေၵႂႃႇ ပွႆးလေႃႉၸဝ်ႈသြႃႇၵျွင်းမိူင်းမု။ သမ်ႉလတ်းၵႂႃႇၼႃႈႁိူၼ်းပူႇၵႄႇလႄႈ မၢၵ်ႇတႅၵ်ႇတိူဝ်ႉသႂ်ႇလင်ၸဝ်ႈသြႃႇ။ မိူဝ်ႈဝႃးသူင်ႇတူဝ်ၸဝ်ႈသြႃႇၵႂႃႇႁူင်းယႃလႃႈသဵဝ်ႈၵမ်းလဵဝ်။ မိူဝ်ႈၼႆႉတႄႉ လႆႈငိၼ်းဝႃႈတေလႆႈလူင်း ႁူင်းယႃ ယဝ်ႉၼင်ႇၵဝ်ႇ။”- ဝႃႈၼႆ။
မၢၵ်ႇၼၼ်ႉပဵၼ်ၽႂ်မႃးထိုမ်ႈဝႆႉတႄႉဢမ်ႇႁူႉ။ ၵူၺ်းၵႃႈၸဝ်ႈႁိူၼ်းလႄႈ တၢင်ႇၵေႃႉတႄႉဢမ်ႇတိူဝ်ႉမၢတ်ႇ ၸဵပ်း ။
ၵွၼ်ႇၼႃႈၼၼ်ႉ မီးၸုမ်း ၽဵဝ်ႈမူၺ်ႉယႃႈမဝ်းၵမ် RCSS ၶဝ်ႈၵႂႃႇႁွင်ႉဢဝ်ပူႇၵႄႇ ၵႂႃႇၼေတၢင်း တႃႇၽဵဝ်ႈ မူၺ်ႉ ယႃႈမဝ်းၵမ်လႄႈ ၵူၼ်းဝၢၼ်ႈတႄႉလၢမ်းၶၢတ်ႈဝႃႈ လႅပ်ႈပဵၼ်ၸုမ်းၵႃႉၶၢႆယႃႈမဝ်းၵမ် ဢမ်ႇ ပေႃးၸႂ်သေ မႃးလွၵ်ႇငိုတ်ႈပူႇၵႄႇၵူၺ်းဝႃႈၼႆ။
ၵူၺ်းၵႃႈ ထိုင်ဝၼ်းမိူဝ်ႈၼႆႉ ၸဝ်ႈၼႃႈတီႈ ၼႂ်းပိုၼ်ႉတီႈၵေႃႈယင်းပႆႇပိုၼ်ၽၢဝ်ႇဝႃႈ ၵူၼ်းႁၢႆႉ ၽူႈမႃးပွႆႇမၢၵ်ႇပွမ်းၼႆႉပဵၼ်ၽႂ်။ မၢၼ်ႈၸၢမ်ၼႆႉမီးၾၢႆႇၸၢၼ်းဝဵင်းၼမ်ႉတူႈ။
