တေႃႈလဵဝ် ၵူၼ်းပၢႆႈၽေးသိုၵ်း ၼႂ်းၸႄႈဝဵင်းသီႇပေႃႉ ဢၼ်ပၢႆႈမႃးသွၼ်ႈဝႆႉၸွမ်းဝတ်ႉဝႃးၽႃသိူဝ်ႇ တင်းမူတ်း မီး 986 ၵေႃႉ ပႆႇပဵၼ်ပွၵ်ႈႁိူၼ်း ယွၼ်ႉငဝ်းလၢႆးၼႂ်းပိုၼ်ႉတီႈပႆႇၼိမ်သဝ်း ဝႃႈၼႆ။
ဝၼ်းတီႈ 24/02/2019 ယၢမ်းၵၢင်ၼႂ် မွၵ်ႈ 9 မူင်း ၵူၼ်းဝၢၼ်ႈၶၢႆးႁဵဝ်း ဢိူင်ႇၵုင်းသေႃႉ ႁူဝ်ၵူၼ်း 30 ၵေႃႉ လႆႈဢွၼ်ၵၼ် ပၢႆႈၽေးသိုၵ်း RCSS တင်း SSPP သေ မႃးသွၼ်ႈဝႆႉတီႈဝတ်ႉၽူဝ်းတေႃႇ ပွၵ်ႉၸၢင်ႈၶမ်းၸၢၼ်း ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ။ ၵူၼ်းဝၢၼ်ႈ ထူပ်း ႁၼ် ၸုမ်းယိပ်းၵွင်ႈၵၢင်ႇတူင်ႉၼိုင်ၵႂႃႇမႃးႁၢဝ်ႈႁႅင်းလႄႈ ၵူဝ်ပဵၼ်ပၢင်တိုၵ်းသေ ဢွၼ်ၵၼ်ငိူင်ႉဝႄႈဝႆႉထႃႈ ဝႃႈၼႆ။
ၽူႈၸွႆႈထႅမ်ၵူၼ်းပၢႆႈၽေးသိုၵ်း တီႈၸႄႈဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈဝႃးတႄႉ သဵင်ၵွင်ႈတႅၵ်ႇ ထႅင်ႈ တၢင်းပွတ်းဝၢၼ်ႈၶၢႆးႁဵဝ်း မွၵ်ႈယၢမ်း12 မူင်း ၵၢင်ဝၼ်း။ ၵူၼ်းဝၢၼ်ႈတႄႉ ယွၼ်ႉလႆႈႁၼ် သိုၵ်းတူင်ႉၼိုင် ၶဵင်ႈၶႅင် တေႃႇၵၼ်သေ ၵူဝ်ပဵၼ်ပၢင်တိုၵ်းၼႆလႄႈ ပၢႆႈဢွၵ်ႇမႃးဝႆႉထႃႈဢွၼ်တၢင်း” ဝႃႈၼႆ။
တေႃႈလဵဝ် ၵူၼ်းပၢႆႈၽေးသိုၵ်း ဢၼ်မႃးသွၼ်ႈဝႆႉ တီႈဝတ်ႉၼႃးမၢၵ်ႇၶေႃသမ်ႉ တင်းမူတ်း ႁူဝ်ၵူၼ်း 41 ၵေႃႉ၊ ဝတ်ႉ ၼမ်ႉသိမ်ႇ ႁူဝ်ၵူၼ်း 148 ၵေႃႉ၊ ဝတ်ႉမၢၼ်ႈလီႈ ႁူဝ်ၵူၼ်း 767 ၵေႃႉလႄႈ ဝတ်ႉၽူဝ်းတေႃႇ 30 ၵေႃႉ တင်းမူတ်း ႁူမ်ႈ ၵၼ် 986 ၵေႃႉ ဝႃႈၼႆ။
ၵူၼ်းပၢႆႈၽေးသိုၵ်း ဢၼ်ပၢႆႈဢွၵ်ႇမႃးသမ်ႉ ပဵၼ်ၵူၼ်းဝၢၼ်ႈ ၼႂ်းလူင်၊ တူၼ်ႈၵႅင်း၊ ႁူဝ်ၼႃး၊ ဝၢၼ်ႈႁူမ်ႈ၊ တႃႈလူင်၊ ၵဵတ်းၽူၼ်၊ ဝၢၼ်ႈပႃႇၵၢင်း၊ ဝၢၼ်ႈၶၢႆးႁဵဝ်းလႄႈ ဝၢၼ်ႈပၢင်ႇလေႃႉ ဢိူင်ႇပုင်ႇဝူဝ်း ၸႄႈဝဵင်းၵျွၵ်ႉမႄး ၸဵမ်ၸိူဝ်းၼႆႉ။
လိူဝ်ၼၼ်ႉ ၵူၼ်းပၢႆႈၽေးသိုၵ်း တီႈၸႄႈဝဵင်းၼမ်ႉတူႈလႄႈ ၵျွၵ်ႉမႄးတႄႉ လႆႈဢွၼ်ၵၼ်ပွၵ်ႈၶိုၼ်းႁိူၼ်းယေး ၵၼ် မူတ်းယဝ်ႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ