ၽွင်းတပ်ႉသိုၵ်းတပ်ႉမတေႃႇ ပိုၼ်ၽၢဝ်ႇ ၵိုတ်းတိုၵ်းဝႆႉၾၢႆႇလဵဝ်ၼႆႉ တပ်ႉသိုၵ်းမၢၼ်ႈယိုဝ်းတပ်ႉပၢင်သဝ်း RCSS/SSA ၼႂ်းဝၼ်းလဵဝ် 3 တီႈ။

ႁွင်ႈၵၢၼ်ၶၢဝ်ႇတႆးလွတ်ႈလႅဝ်းၶွင် RCSS/SSA ပိုၼ်ၽၢဝ်ႇဝႆႉဝႃႈ ဝၼ်းတီႈ 13/02/2019 ယၢမ်းၵၢင်ဝၼ်း 2 မူင်း 40 မိၼိတ်ႉ သိုၵ်းမၢၼ်ႈဢၼ်ပၵ်းတပ်ႉတီႈၼမ်ႉမႄႈၵုၼ်း ၸႄႈဝဵင်းမိူင်းပၼ်ႇ ယိုဝ်းလႄႈမၢၵ်ႇ လူင် 120 MM တူၵ်းသႂ်ႇတီႈ ႁိမ်းတပ်ႉႁူမ်ႇလူမ်ႈဢၼ်မီးၸဵင်ႇႁွင်ႇဝၼ်းဢွၵ်ႇလွႆတႆးလႅင်း တူၵ်း သႂ်ႇၽၢႆႇၼိူဝ်တၢင်းၵႃး လုၵ်ႉၼမ်ႉမႄႈၵုၼ်း ၵႂႃႇၽၢႆႇ တႂ်ႈ တပ်ႉပဵင်းသၢင်းလုၵ်ႈၼိုင်ႈ၊ ယၢမ်းႁူဝ်ၶမ်ႈ 6 မူင်းၶိုင်ႈသမ်ႉ  သိုပ်ႇယိုဝ်း မၢၵ်ႇလူင်သႂ်ႇထႅင်ႈ တပ်ႉႁူမ်ႇ လူမ်ႈငဝ်ႈၸိုင်ႈ လွႆတႆးလႅင်း 2 လုၵ်ႈ လႄႈ မၢၵ်ႇၵႂႃႇတူၵ်းတီႈႁူၺ်ႈ ၼမ်ႉသွင်ၵေး ဢၼ်လူင်းတေႃႇသႂ်ႇ ၽၢႆႇတႂ်ႈလွႆသွင်ၼၢင်း၊ ယၢမ်း ႁူဝ်ၶမ်ႈ 17:30 မူင်း ယိုဝ်းသႂ်ႇတီႈ တပ်ႉပၢင်သဝ်း လွႆလမ်  မၢၵ်ႇလူင်တူၵ်းသႂ်ႇတီႈတိၼ်တပ်ႉယၢမ်းမၢႆ 11 ဝႃႈၼႆ။

ၽူႈမီးၸၼ်ႉၼႂ်းတပ်ႉသိုၵ်းၸိုင်ႈတႆး RCSS/SSA ၸဝ်ႈၼိုင်ႈလၢတ်ႈဝႃႈ – “မိူဝ်ႈဝႃးၵၢင်ဝၼ်း တူဝ်တႅၼ်း RCSS/SSA လႄႈ တူဝ်တႅၼ်းတပ်ႉသိုၵ်းတပ်ႉမတေႃႇမၢၼ်ႈ ႁူပ်ႉထူပ်းဢုပ်ႇဢူဝ်းၵၼ်တီႈ ၼေႇပျီႇတေႃႇ ယင်းလႆႈၸႂ်တူၵ်းလူင်း ၵၼ် တႃႇတေႁူပ်ႉဢုပ်ႇၵၼ်ၼႂ်းဝၼ်းတီႈ 23 တေမႃးၼႆႉယဝ်ႉ။ ယၢမ်းဝၢႆးဝၼ်း သိုၵ်းမၢၼ်ႈသမ်ႉမႃးယိုဝ်းတပ်ႉပၢင် သဝ်းRCSS/SSA သေၵေႃႈ ဢၼ်တူၵ်းလူၵ်းၵၼ်ဝႆႉၼၼ်ႉ ၶိုၼ်းလႆႈယႃႉပႅတ်ႈ။ ” – ဝႃႈၼႆ။

ၽူႈမီးၸၼ်ႉၼႂ်းတပ်ႉတိူင်းသိုၵ်းဝၼ်းဢွၵ်ႇၵေႃႉၼိုင်ႈတွပ်ႇလၢတ်ႈ တီႈၸုမ်းၶၢဝ်ႇမၢၼ်ႈၸုမ်းၼိုင်ႈဝႃႈ – ဢၼ်လႆႈတင်ႈၸႂ်ယိုဝ်းတေႃႇ RCSS တႄႉဢမ်ႇမီး။ ၾိုၵ်းယိုဝ်းၵွင်ႈလူင်တႄႉ လႅပ်ႈတေပဵၼ်လႆႈယူႇ ဝႃႈၼႆ။

ၵွၼ်ႇၼႃႈ သိုၵ်းမၢၼ်ႈတေယိုဝ်း တပ်ႉပၢင်သဝ်း RCSS/SSA မိူဝ်ႈဝၼ်းတီႈ 13 ယၢမ်းၵၢင်ၼႂ်ၼၼ်ႉ ႁွင်ႈၵၢၼ် ၾၢႆႇပွင်ႇ ၶၢဝ်ႇတပ်ႉသိုၵ်းတပ်ႉမတေႃႇမၢၼ်ႈ ပိုၼ်ၽၢဝ်ႇဝႃႈ -“ ဢၼ်သိုၵ်း RCSS/SSA 50 ၵေႃႉ ယိုတ်းဢဝ် ၶူဝ်းၶွင် ၶူဝ်းသိုၵ်း လႄႈၶိူင်ႈၸႂ်ႉတိုဝ်း တီႈလူတ်ႉ ၽူႈၵွၼ်းတပ်ႉ သိုၵ်းမၢၼ်ႈ 2 ၵေႃႉ တီႈၼႂ်းၵၢင်မိူင်းပဵင်းလႄႈၵဵင်းတုင် (ၶႃလုၵ်ႉတူၼ်ႈတီး မႃးၵဵင်းတုင်) မိူဝ်ႈဝၼ်းတီႈ 12/02/2019 ၼၼ်ႉ ႁႂ်ႈသူင်ႇပၼ်ၶိုၼ်းၽႂ်းၽႂ်း။ ပေႃးဢမ်ႇသူင်ႇပၼ်ၶိုၼ်းၸိုင် ယူႇတီႈတပ်ႉ သိုပ်းတပ်ႉမတေႃႇမၢၼ်ႈ တေတုမ်ႉတွပ်ႇဢဝ်လိူင်ႈၶိုၼ်း ႁႂ်ႈထိုင်တီႈ။ ဢၼ် RCSS/SSA ႁဵတ်းၼႆႉ ပဵၼ်လွင်ႈပူၼ်ႉပႅၼ် လိၵ်ႈ ၵိၼ်ၵႅၼ်ႇ NCA ဢၼ်လႆႈ လူင်းလၢႆးမိုဝ်းၵၼ်ဝႆႉမိူဝ်ႈ 15/10/2015 ၼၼ်ႉ- ဝႃႈၼႆ။ဢၼ်ပဵၼ် ၽူႈၵွၼ်းသိုၵ်း 2 ၵေႃႉၼၼ်ႉၵေႃႈ ၽွင်းၶၢဝ်းတပ်ႉမတေႃႇပိုၼ်ၽၢဝ်ႇဝႆႉၵိုတ်းတိုၵ်းၾၢႆႇလဵဝ်ၼႆႉ ဝႆႉလွင်ႈႁူမ်ႇလူမ်ႈၸဝ်ႈၵဝ်ႇမဝ်မၢင်လႄႈ တေပၼ်တူတ်ႈတၢမ်ႇၼင်ႇမၢႆမီႈသိုၵ်းတမ်းဝၢင်းဝႆႉ ”- ပိုၼ်ၽၢဝ်ႇဝႆႉပႃးဝႃႈၼႆ။

ၵဵဝ်ႇလူၺ်ႈလွင်ႈၼႆႉ RCSS/SSA ၵေႃႈ လၢတ်ႈဝႃႈ သိုၵ်းမၢၼ်ႈ ယိုဝ်းမၢၵ်ႇလူင် တပ်ႉပၢင်သဝ်း တပ်ႉသိုၵ်းၸိုင်ႈတႆး RCSS/SSA လႄႈ တပ်ႉႁူမ်ႇလူမ်ႈငဝ်ႈၸိုင်ႈ လွႆတႆးလႅင်းၼႆႉ သိုၵ်းမၢၼ်ႈပူၼ်ႉပႅၼ် ၼႂ်းၶေႃႈတူၵ်းလူင်း ၵၢၼ်ၵိုတ်းယိုဝ်း လွင်ႈတိုၵ်းယိုဝ်း လႄႈ ပိူင်တိုဝ်းၵမ်သိုၵ်း (COC) ၼႂ်းၵၼ် 3 မၢႆ 8 ၵ (ၵ လႄႈ ၶ)  ၊ လိူဝ်ၼၼ်ႉ သိုၵ်းမၢၼ်ႈပူၼ်ႉပႅၼ်ပႃး ၶေႃႈတူၵ်းလူင်း  လိၵ်ႈႁူမ်ႈမၢႆ NCA  ၼႂ်းတွၼ်ႈ 3 ၵၼ် 3 မၢႆ 5 (ၵ လႄႈ ၶ) ဝႃႈၼႆ။