ဝၼ်းတီႈ 29/06/2025 ယၢမ်းဝၢႆးဝၼ်း 3 မူင်းၶိုင်ႈ ၼၢင်းယိင်းၵေႃႉၼိုင်ႈ ၵႂႃႇတီႇၽဵဝ်ႈသူၼ် ႁိမ်းဢွင်ႈတီႈတပ်ႉပၢင်သဝ်းၵဝ်ႇမၢၼ်ႈၸၶၢၼ်းတိတ်ႉ (စခန်းသစ်) ၼၼ်ႉသေ ယဵပ်ႇၺႃးမၢၵ်ႇၾင်လိၼ်သေ လူႉတၢႆၵႂႃႇ ၼႂ်းၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ။
ၵူၼ်းမိူင်းပိုၼ်ႉတီႈ ဝဵင်းၼမ်ႉၶမ်း လၢတ်ႈၼႄဝႃႈ – “သူၼ်ၶဝ်မီးႁိမ်းၵုင်းတပ်ႉမၢၼ်ႈၵဝ်ႇၼၼ်ႉၼႃႇ။ သူၼ်ၶဝ်ႁႄတပ်ႉၼႆႉ ၸပ်းၵၼ်ဝႆႉ။ မၼ်းၵႂႃႇၸွၼ်ႉသူၼ်ၶဝ်ႈၵၢပ်ႇမၼ်းႁႄ ၵႂႃႇဝဵၵ်ႉၺႃးမၢၵ်ႇ။ ဢဝ်တႅၵ်ႇ သႂ်ႇၺႃးၼႃႈမၼ်းၵွႆၵႂႃႇသဵင်ႈ”- ဝႃႈၼႆ။
လႆႈႁူႉဝႃႈ ၼၢင်းယိင်းၵေႃႉၺႃးမၢၵ်ႇတႅၵ်ႇသႂ်ႇသေလူႉတၢႆၵႂႃႇၼႆႉ ပဵၼ်သႅၼ်းဢႃယု 30 ပၢႆ ၸၢဝ်းၶိူဝ်းၶႄႇ ၸိုဝ်ႈႁွင်ႉ တေႃႇဢႃးၾဵင်ႉ။ ၼႂ်းၶၢဝ်းတၢင်းႁႃႈလိူၼ်ၼႆႉ ယွၼ်ႉမၢၵ်ႇမႅင်းၾင်လိၼ်သေ လုၵ်ႈဢွၼ်ႇလႄႈ ၵူၼ်းလူင်လူႉတၢႆၵႂႃႇ 5 ၵေႃႉ၊ မၢတ်ႇၸဵပ်းၵႂႃႇ 17 ၵေႃႉ ၼႆယဝ်ႉ။
ဝဵင်းၼမ်ႉၶမ်းၼႆႉ ဝၢႆးလင်ၽႅၼ်ယၼ်ႇသိုၵ်း 1027 မႃး သိုၵ်းတဢၢင်းၵုမ်းၵမ်ဝႆႉသေ ပၼ်ၵၢၼ်လုမ်းဝႆႉယူႇ။
တႅမ်ႈ – ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ