Friday, March 29, 2024

ၵူၼ်းပၢႆႈၽေးသိုၵ်း တီႈသီႇပေႃႉ ၶႂ်ႈႁႂ်ႈသိုၵ်းတႆး 2 ၸုမ်း ၸဵဝ်းငူပ်ႉငီႉဢုပ်ႇဢူဝ်း ၵိုတ်းသိုၵ်းၵၼ်ဝႆးဝႆး

Must read

ၵူၼ်းမိူင်းသီႇပေႃႉ ၸိုင်ႈတႆးပွတ်းႁွင်ႇ ဢၼ်သွၼ်ႈယူႇဝႆႉ ၸွမ်းဝတ်ႉဝႃးၽႃသိူဝ်ႇ မီးႁိမ်းလိူၼ်ယဝ်ႉ ပႆႇၸၢင်ႈပွၵ်ႈၶိုၼ်း မႆႈၸႂ် ၼႃႈၵၢၼ်တႃငၢၼ်းလႄႈ လုၵ်ႈႁဵၼ်းတႃႇတေတွပ်ႇလိၵ်ႈၼႂ်းႁူင်းႁဵၼ်း။ ၵွပ်ႈၼၼ်လႄႈ မီးၵၢင်ၸႂ်ၶႂ်ႈႁႂ်ႈသိုၵ်းတႆး 2 ၸုမ်း ၶဝ်ႈႁႃၵႄႈလိတ်ႈၵၼ်ဝႆးဝႆး ဝႃႈၼႆ။

Photo by – Shar Htat Paing/ ၵူၼ်းပၢႆႈၽေးသိုၵ်းတီႈသီႇပေႃႉ

တေႃႈလဵဝ် ၵူၼ်းပၢႆႈၽေးသိုၵ်း ဢၼ်ယူႇသဝ်းဝႆႉတီႈ ဝတ်ႉၼႃးမၢၵ်ႇၶေႃ ႁူဝ်ၵူၼ်း 617 ၵေႃႉ၊ ဝတ်ႉတူၼ်ႈၵႃႈ 55 ၵေႃႉ၊ ဝတ်ႉၼႃးၵၢင် 122 ၵေႃႉ၊ ဝတ်ႉၼွင်ဢၢင်ႈ 90 ၵေႃႉလႄႈ ၵျွင်းၶရိတ်ႊယၼ်ႇလီသူး 98 ပီ ႁူမ်ႈၵၼ် တင်းမူတ်း ႁူဝ်ၵူၼ်း မီး 982 ၵေႃႉ ဝႃႈၼႆ။

- Subscription -

ၵူၼ်းပၢႆႈၽေးသိုၵ်း ဢၼ်မႃးသွၼ်ႈဝႆႉတီႈ ဝတ်ႉၼႃးမၢၵ်ႇၶေႃ လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈ ၵူၼ်းမိူင်းတႄႉ ႁူပ်ႉ လွင်ႈယၢပ်ႇၽိုတ်ႇတႄႉတႄႉ ၵၢၼ်ငၢၼ်းၵေႃႈလႆႈပႅတ်ႈဝႆႉသေပၢႆႈဢွၵ်ႇမႃး၊ ငႃးလမ် ဢၼ်လူဝ်ႇဢဝ်ၵေႃႈ ဢမ်ႇတၼ်း ဢဝ်သေ လႆႈသုမ်းၵေႃႈၼမ်။ ၶဝ်ႈၵၢပ်ႇၵေႃႈ ဢမ်ႇလႆႈၵၢၼ်ႉ။ ပၢင်တိုၵ်းၼႆႉ တႄႇပဵၼ်မႃး တၢင်းဝၢၼ်ႈ တူၼ်ႈၵႅင်း ဢွၼ်တၢင်းသေ လႆႈပၢႆႈမႃးတေႃႇထိုင်ယၢမ်းလဵဝ် ပႆႇလႆႈပွၵ်ႈမိူဝ်း။ လိူဝ်ၼၼ်ႉ တေႃႈလဵဝ်ၼႆႉ သမ်ႉထိုင်ၶၢဝ်း လုၵ်ႈႁဵၼ်း လူဝ်ႇ တွပ်ႇလိၵ်ႈယဝ်ႉလႄႈ ၶႂ်ႈႁႂ်ႈသိုၵ်းတႆးႁဝ်းၶႃႈ တင်းသွင်ၾၢႆႇ ႁၼ်ထိုင်ၸႂ်ၵူၼ်းမိူင်းၽွင်ႈ၊ ဢေးလူႁဝ်းၶႃႈၽွင်ႈ တုၵ်းယွၼ်းႁႂ်ႈၶဝ်ၸဝ်ႈ ၸဵဝ်းႁူပ်ႉထူပ်းငူပ်ႉငီႉၵၼ်သေ ၵိုတ်းပၢင်တိုၵ်းၵၼ်ဝႆးဝႆးသေၵမ်း” ဝႃႈၼႆ။

ၶေႃႈတုၵ်းယွၼ်းၼႆႉတႄႉ ဢမ်ႇပႆႇမီး ၽိုၼ်လိၵ်ႈလၢႆးဢွၵ်ႇမႃး။ ၵူၼ်းပၢႆႈၽေးသိုၵ်းတိုၵ်ႉဢုပ်ႇၶႆႈၼႄၽူႈတွႆႇႁွၵ်ႈ ၽွင်း ၵပ်းသိုပ်ႇတွင်ႈထၢမ်မိူဝ်ႈဝၼ်းတီႈ 21/01/2019 ၼႆႉၵူၺ်း။

ယၢမ်းလဵဝ်ၼႆႉ ၵူၼ်းဝၢၼ်ႈဢၼ်လႆႈပၢႆႈၽေးသိုၵ်းဢွၵ်ႇမႃးသမ်ႉ ပဵၼ်ၵူၼ်းဝၢၼ်ႈ ၼႂ်းလူင်၊ တူၼ်ႈၵႅင်း၊ ႁူဝ်ၼႃး၊ ဝၢၼ်ႈ ႁူမ်ႈ၊ တႃႈလူင်၊ ၵဵတ်းၽူၼ်၊ ၶၢႆးႁဵဝ်း၊ လူင်ဝၢႆ၊ ၽၵ်းၼၢမ်၊ လွႆမွၵ်ႇလႄႈ သၢႆးၶၢဝ် ၸဵမ်ၸိူဝ်းၼႆႉ။

မိူဝ်ႈဝၼ်းတီႈ 10/01/2019 ၼၼ်ႉၵေႃႈ ၵူၼ်းဝၢၼ်ႈ 14 ဝၢၼ်ႈ ႁူဝ်ၵူၼ်း 4,600 ပၢႆ ၼႂ်းဢိူင်ႇၼႃးမၢၵ်ႇၶေႃ ၸႄႈဝဵင်းသီႇ ပေႃႉ ၸိုင်ႈတႆးပွတ်းႁွင်ႇ ႁူမ်ႈၵၼ် လူင်းလၢႆးမိုဝ်း သူင်ႇထိုင်တီႈ ၽူႈတႅၼ်းပႃႇတီႇႁူဝ်သိူဝ် ၸႄႈဝဵင်းသီႇပေႃႉသေ ယူႇ တီႈၽူႈတႅၼ်း သိုပ်ႇယိုၼ်ႈပၼ် ၸွမ်သိုၵ်းလူင် ယွတ်ႈသိုၵ်း ႁူဝ်ပဝ်ႈ ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/ SSA လႄႈ ၸွမ်သိုၵ်းလူင် ပၢင်ႇၾႃႉ ႁူဝ်ပဝ်ႈ ပႃႇတီႇမႂ်ႇသုင် ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA ႁႂ်ႈ သွင်ၸုမ်း ၸဵဝ်းႁူပ်ႉ ဢုပ်ႇဢူဝ်းငူပ်ႉငီႉၵၼ်၊ ႁႂ်ႈၵိုတ်းပၢင်တိုၵ်းတေႃႇၵၼ်လႄႈ ႁႂ်ႈၵူၼ်းမိူင်းလႆႈၸွႆႈၵမ်ႉထႅမ်ပၼ် ၸုမ်း လဵဝ် တီႈလဵဝ် ဝႃႈၼႆ။

တႄႇဢဝ် ႁူဝ်ပီ 2019 ၼႆႉမႃး သိုၵ်းတႆး ပွတ်းၸၢၼ်း တင်း ပွတ်းႁွင်ႇ ပဵၼ်ပၢင်တိုၵ်းၵၼ်မႃးၶိူဝ်းယႂ်းသေ ၵူၼ်းဝၢၼ်ႈ ၼႂ်းၸႄႈဝဵင်းသီႇပေႃႉ ႁူဝ်ၵူၼ်းၼပ်ႉႁဵင် လႆႈဢွၼ်ၵၼ်ပၢႆႈၽေးသိုၵ်းမႃးသွၼ်ႈဝႆႉယူႇၸွမ်းဝတ်ႉဝႃး။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း