ၵူၼ်းဝၢၼ်ႈ ပၢႆႈၽေးသိုၵ်း ဢၼ်မႃးသွၼ်ႈဝႆႉတီႈ ဝတ်ႉၼွင်ၵေႃႈ ဢိူင်ႇၼမ်ႉယၢင်း ၸႄႈဝဵင်းသီႇပေႃႉ ႁူဝ်ၵူၼ်း 90 ပၢႆ ဢွၼ်ၵၼ်ပွၵ်ႈ ၶိုၼ်းႁိူၼ်းယေးၽႂ်မၼ်း ဝႃႈၼႆ။
ဝၼ်းတီႈ 17/01/2019 ယၢမ်းဝၢႆးဝၼ်း မွၵ်ႈ 2 မူင်း ၵူၼ်းဝၢၼ်ႈၶၢႆးႁဵဝ်း တင်း ဝၢၼ်ႈၽၵ်းႁီႉ ၼႂ်းဢိူင်ႇၵုင်းသေႃႉ ဢၼ် ပၢႆႈမႃးသွၼ်ႈဝႆႉတီႈ ဝတ်ႉၼွင်ၵေႃႈ ဢိူင်ႇၼမ်ႉယၢင်း ၸႄႈဝဵင်းသီႇပေႃႉ ႁူဝ်ၵူၼ်း 95 ၵေႃႉၼၼ်ႉ ၶိုၼ်းဢွၼ်ၵၼ်ပွၵ်ႈ ႁိူၼ်း ယဝ်ႉ ဝႃႈၼႆ။
ၸၢႆးလၢဝ်သႅင် ၽူႈၼမ်းၼႂ်းပႃႇတီႇႁူဝ်သိူဝ် ၸႄႈဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈဝႃးတႄႉ ဢၼ်ပွၵ်ႈၵေႃႈ ပွၵ်ႈ ဢၼ်မႃးၵေႃႈမႃးၶႃႈ ၵူၼ်းပၢႆႈၽေးသိုၵ်းတႄႉ မိူဝ်းမိူဝ်းမႃးမႃး။ မိူဝ်ႈၼႆႉ ယၢမ်းၵၢင်ၼႂ်သမ်ႉ ႁဝ်းၶႃႈ ၸုမ်းပႃႇတီႇ ႁူဝ်သိူဝ် တင်း ၵျွင်းၽူဝ်းတေႃႇ ပရႁိတ ဢွၼ်ၵၼ်ၵႂႃႇသူႇၸႂ်း တူၺ်းထိုင် ပီႈၼွင်ႉၵူၼ်းပၢႆႈၽေးသိုၵ်း တီႈၵျွင်းၶရိတ်ႉ ယၼ်ႇ လီႉသူး၊ ဝတ်ႉၼႃးၵၢင်လႄႈ ၼွင်ဢၢင်ႇ။ ၵူၼ်းပၢႆႈၽေးသိုၵ်း တီႈဝတ်ႉႁေႃၼမ်ႉ (ရေဟော်) တႄႉ ၶၢႆႉၵႂႃႇၶွၼ်ႈ တုမ်ၵၼ်ဝႆႉတီႈ ၵျွင်းၼႃးၵၢင်ဝႆႉယဝ်ႉ။ လွင်ႈၶဝ်ႈၼမ်ႉတၢင်းၵိၼ်တႄႉ ၶႅမ်ႉလႅပ်ႈၵၼ်ယူႇ ၶႃႈ” ဝႃႈၼႆ။
ၵူၼ်းဝၢၼ်ႈ 90 ၵေႃႉၼၼ်ႉ ပွၵ်းမိူဝ်းယဝ်ႉလီငၢမ်းသေတႃႉ မိူဝ်ႈဝႃး ဝၼ်းတီႈ 17/01/2019 ယၢမ်းဝၢႆးဝၼ်း မွၵ်ႈ 1 မူင်း သမ်ႉ ၵူၼ်းဝၢၼ်ႈလွႆမွၵ်ႇ တင်း ဝၢၼ်ႈသၢႆးၶၢဝ် ၼႂ်းဢိူင်ႇ ၵုင်းသေႃႉ ဢွၼ်ၵၼ်ပၢႆႈၽေးသိုၵ်းဢွၵ်ႇမႃးသွၼ်ႈဝႆႉတီႈ ၵျွင်းၶရိတ်ႉယၼ်ႇ လီႉသူး ထႅင်ႈႁူဝ်ၵူၼ်း 58 ၵေႃႉ။
တေႃႈလဵဝ် ၵူၼ်းပၢႆႈၽေးသိုၵ်း ဢၼ်မႃးသွၼ်ႈဝႆႉတီႈဝတ်ႉၼႃးမၢၵ်ႇၶေႃသမ်ႉ ႁူဝ်ၵူၼ်း 617 ၵေႃႉ၊ ႁူင်းႁေႃ တူၼ်ႈၵႃႈ 55 ၵေႃႉ၊ ဝတ်ႉၼႃးၵၢင် 173 ၵေႃႉ၊ ဝတ်ႉၼွင်ဢၢင်ႇ 90 ၵေႃႉ၊ ၵျွင်းၶရိတ်ႉယၼ်ႇ လီႉသူး 58 ၵေႃႉ ႁူမ်ႈၵၼ်တင်းမူတ်း 993 ၵေႃႉ။
ၵူၼ်းပၢႆႈၽေးသိုၵ်းၼႆႉ ပဵၼ်ၵူၼ်းဝၢၼ်ႈ ၼႂ်းလူင်၊ တူၼ်ႈၵႅင်း၊ ႁူဝ်ၼႃး၊ ဝၢၼ်ႈႁူမ်ႈ၊ တႃႈလူင်၊ ၵဵတ်းၽူၼ်၊ ၶၢႆးႁဵဝ်း၊ လူင်ဝၢႆ၊ ၽၵ်းၼၢမ်၊ လွႆမွၵ်ႇ၊ သၢႆးၶၢဝ် လႄႈ ၼွင်ဢၢင်ႇ ၸိူဝ်းၼႆႉ။
ယူႇတီႈၶွမ်ႊမတီႊၸွႆႈထႅမ်ၵူၼ်းပၢႆႈၽေးသိုၵ်း၊ ၸွႆႈထႅမ်ပၼ်ဝႆႉယူႇသေတႃႉ ၸဝ်ႈၽူႈမီးၼမ်ႉၸႂ် တီႈၸမ်တီႈၵႆၵေႃႈ ႁွတ်ႈထိုင် ၵမ်ႉၸွႆႈၶူဝ်းၶွင် ၵိၼ်ယႅမ်ႉလႄႈ ၽႃႈႁူမ်ႇၶူဝ်းၼွၼ်းယူႇ ဝႃႈၼႆ။
