သဵင်ၵွင်ႈတႅၵ်ႇႁိမ်ဝၢၼ်ႈ လႄႈ ၵူၼ်းဝၢၼ်ႈ 4-5 ဝၢၼ်ႈ ၼႂ်းၸႄႈဝဵင်းသီႇပေႃႉ ပၢႆႈယၢၼ်ႁိူၼ်းယေး မႃးသွၼ်ႈယူႇတီႈ ဝတ်ႉဝႃး ထႅင်ႈ 100 ပၢႆ။
ဝၼ်းတီႈ 14/01/2019 ယၢမ်းၵၢင်ၼႂ်မွၵ်ႈ 7 မူင်း သဵင်ၵွင်ႈတႅၵ်ႇႁိမ်း ဢိူင်ႇၵုင်းသေႃႉ ၸႄႈဝဵင်းသီႇပေႃႉသေ ယၢမ်းၵၢင် ဝၼ်း 11 မူင်း ၵူၼ်းဝၢၼ်ႈၶၢႆးႁဵဝ်း တင်း ဝၢၼ်ႈဝၢၼ်ႈၽၵ်းႁီႉ ႁူဝ်ၵူၼ်း 82 ၵေႃႉ ဢွၼ်ၵၼ်ပၢႆႈမႃးသွၼ်ႈ ဝႆႉတီႈဝတ်ႉ ၼွင်ၵေႃႈ ၵူဝ်ပဵၼ်ပၢင်တိုၵ်းႁၢဝ်ႈႁႅင်း။ ၵူၼ်းဝၢၼ်ႈတူၼ်ႈၵႅင်းတင်း ဝၢၼ်ႈႁူဝ်ၼႃး ႁူဝ်ၵူၼ်း 67 ၵေႃႉသမ်ႉ ပၢႆႈမႃး သွၼ်ႈဝႆႉတီႈဝတ်ႉၼႃးမၢၵ်ႇၶေႃ ၼႂ်းၸႄႈဝဵင်းသီႇပေႃႉ။
ၵူၼ်းဝၢၼ်ႈၼႃးမၢၵ်ႇၶေႃ ဢၼ်ၸွႆႈထႅမ် ၵူၼ်းပၢႆႈၽေးသိုၵ်း တီႈဝတ်ႉၼႃးမၢၵ်ႇၶေႃ လၢတ်ႈတီႈၽူႈတွႆႇႁွၵ်ႈဝႃႈ “ ၵူၼ်း ပၢႆႈၽေးသိုၵ်းတီႈဝတ်ႉၼႃးမၢၵ်ႇၶေႃတႄႉ မိူဝ်းမိူဝ်းမႃးမႃး ၶႃႈဢေႃႈ။ လွင်ႈၶဝ်ႈၼမ်ႉတၢင်းၵိၼ်တႄႉ ဢမ်ႇလႆႈမႆႈၸႂ်၊ မီးပီႈၼွင်ႉတီႈၸမ်ၵႆ မႃးၸွႆႈဝႆႉယူႇ။ တီႈဝတ်ႉၼႃးမၢၵ်ႇၶေႃႁဝ်းၶႃႈတႄႉ ၵူၼ်းပၢႆႈၽေးသိုၵ်း မႃးသွၼ်ႈ ယူႇဝႆႉ မီး 3 ပွၵ်ႈယဝ်ႉ။ ပွၵ်ႈၵမ်းၼႆႉ တႄႇဢဝ် ဝၼ်းတီႈ 4 လိူၼ်ၼႆႉ ယၢမ်းႁူဝ်ၶမ်ႈ ၵူၼ်းဝၢၼ်ႈ ဢွၼ်ၵၼ်ပၢႆႈမႃး တေႃႈထိုင် မိူဝ်ႈလဵဝ် ပႆႇပဵၼ်ပွၵ်ႈ။ ပၢင်တိုၵ်းတႄႉ ၸွမ်းၼႂ်းပိုၼ်ႉတီႈတႄႉ ပဵၼ်ၵၼ်ယူႇ ၵူၺ်းဢမ်ႇပေႃးႁႅင်း ပဵၼ်ပွၵ်ႈ ပဵၼ်ၵမ်း ႁဵတ်းၼၼ်ၵူၺ်း” ဝႃႈၼႆ။
တေႃႈလဵဝ် ၵူၼ်းပၢႆႈၽေးသိုၵ်း ဢၼ်မီးတီႈဝတ်ႉၼႃးမၢၵ်ႇၶေႃသမ်ႉ တင်းမူတ်းႁူဝ်ၵူၼ်း မီး 627 ၵေႃႉ၊ တီႈဝတ်ႉၼွင် ၵေႃႈ သမ်ႉ 82 ၵေႃႉ၊ တီႈႁူင်းႁေႃ တူၼ်ႈၵႃႈသမ်ႉ 55 ၵေႃႉ ႁူမ်ႈၵၼ်တင်းမူတ်း ႁူဝ်ၵူၼ်း 764 ၵေႃႉ။
ၵူၼ်းပၢႆႈၽေးသိုၵ်းသမ်ႉ ပဵၼ်ၵူၼ်းဝၢၼ်ႈၵဵတ်းၽူၼ်၊ ၼႂ်းလူင်၊ တူၼ်ႈၵႅင်း၊ ႁူဝ်ၼႃး၊ မၢၼ်ႈတူင်ႈ၊ တႃႈလူင်၊ ၶၢႆးႁဵဝ်း လႄႈ ၽၵ်းႁီႉ ၸဵမ်ၸိူဝ်းၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ