ဢိင်ၼိူဝ်တပ်ႉသိုၵ်းတႆး ၼင်ႇၵၼ် ပဵၼ်ပၼ်ႁႃ ႁိမ်ပိုၼ်ႉတီႈၵၼ်ၼၼ်ႉသေ ၵူၼ်းမိူင်းသီႇပေႃႉ ႁိမ်း 1,500 ၵေႃႉ လႆႈ ဢွၼ် ၵၼ်ပၢႆႈယၢၼ်ႁိူၼ်းယေး တင်ႈတႄႇႁူဝ်လိူၼ်ၵျႅၼ်ႊၼိဝ်ႊရီႊ 2019 ၼႆႉမႃး ထိုင်ယၢမ်းလဵဝ် ပႆႇႁတ်းပွၵ်ႈမိူဝ်း ၶိုၼ်းမူတ်း ဝႃႈၼႆ။
ဝၼ်းတီႈ 09/01/2019 ယၢမ်းဝၢႆးဝၼ်း 2 မူင်း ၵေႃၵမ်ၵၢၼ် ၵူၼ်းပၢႆႈၽေး လႆႈႁုပ်ႈသဵၼ်ႈမၢႆၵူၼ်းပၢႆႈၽေးသိုၵ်း ဢၼ် တိုၵ်ႉၵိုတ်းဝႆႉ တီႈဝတ်ႉၵျွင်းၽူဝ်းတေႃႇ၊ ဝတ်ႉၼႃးမၢၵ်ႇၶေႃ၊ ဝတ်ႉၼွင်ၵေႃႈ၊ ဝတ်ႉ ၼႃးသၢင်း(ၵွင်းႁုင်း)၊ ဝတ်ႉပၢင် ၼိဝ်ႉလႄႈ ႁူင်းႁေႃတူၼ်ႈၵႃႈ ၼႂ်းၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ တင်းမူတ်း ႁူဝ် ၵူၼ်းတိုၵ်ႉမီးယူႇ 993 ၵေႃႉ ဝႃႈၼႆ။
ၵူၼ်းပၢႆႈၽေးသိုၵ်း တီႈဝတ်ႉၼႃးမၢၵ်ႇၶေႃ လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈတႄႉ ပႆႇပဵၼ်ပွၵ်ႈ တိုၵ်ႉတူၺ်းငဝ်းလၢႆး မၼ်းယူႇ လႆႈငိၼ်းဝႃႈ လႅပ်ႈၶဵင်ႈၶႅင်ၵၼ်ဝႆႉယူႇၼႆဝႃႇ။ မၢင်ဝၢၼ်ႈတႄႉ ပွၵ်ႈမိူဝ်းၵမ်ႈၽွင်ႈၶႃႈယဝ်ႉ ၶဝ်ဝႃႈ တေတူၺ်း ငဝ်းလၢႆးမၼ်းသေ ယူႇတူၺ်း ယွၼ်ႉဝႃႈ လူဝ်ႇႁဵတ်းၵၢၼ်။ သင်ဝႃႈ ငဝ်းလၢႆးမၼ်းဢမ်ႇလီၼႆၵေႃႈ တေၶိုၼ်းပွၵ်ႈ မႃးၼႆဝႃႇ လႆႈငိၼ်းၶဝ်ဝႃႈတႄႉ” ဝႃႈၼႆ။
ၵူၼ်းပၢႆႈၽေးသိုၵ်း ဢၼ်ပၢႆႈမႃးသွၼ်ႈဝႆႉတီႈဝတ်ႉၽူဝ်းတေႃႇသမ်ႉ ၸၢႆး 96 ၵေႃႉ၊ ယိင်း 91 ၵေႃႉ။ တီႈဝတ်ႉၼႃးမၢၵ်ႇ ၶေႃ ၸၢႆး 227 ၵေႃႉ၊ ယိင်း 392 ၵေႃႉ။ တီႈဝတ်ႉၼွင်ၵေႃႈ ၸၢႆး 12 ၵေႃႉ၊ ယိင်း 29 ၵေႃႉ။ တီႈဝတ်ႉၼႃးသၢင်း(ၵွင်းႁုင်း) ၸၢႆး 29 ၵေႃႉ၊ ယိင်း 38 ၵေႃႉ။ တီႈဝတ်ႉပၢင်ၼိဝ်ႉ ၸၢႆး 7 ၵေႃႉ၊ ယိင်း 6 ၵေႃႉ။ တီႈႁူင်းႁေႃ တူၼ်ႈၵႃႈ ၸၢႆး 29 ၵေႃႉ၊ ယိင်း 37 ၵေႃႉ တင်းမူတ်း ႁူမ်ႈၵၼ် မီး 993 ၵေႃႉ ဝႃႈၼႆ။
ဝၢၼ်ႈၵူၼ်းပၢႆႈၽေးသိုၵ်း ဢၼ်ပၢႆႈဢွၵ်ႇမႃးသမ်ႉ မိူၼ်ၼင်ႇ ဝၢၼ်ႈၵဵတ်းၽူၼ်၊ ဝၢၼ်ႈၼွင်ၵေႃႈ၊ ဝၢၼ်ႈတူၼ်ႈၵႅင်း၊ ဝၢၼ်ႈပၢင်ၼိဝ်ႉ၊ ဝၢၼ်ႈၶၢႆးႁဵဝ်း၊ ဝၢၼ်ႈၽၵ်းႁီႉ၊ ဝၢၼ်ႈလူင်ဝၢႆ၊ ဝၢၼ်ႈၼႂ်းလူင်၊ ဝၢၼ်ႈႁူဝ်ၼႃး၊ ဝၢၼ်ႈႁုင်း၊ ဝၢၼ်ႈတႃႈလူင်၊ ဝၢၼ်ႈပၢင်ႁႆႈလႄႈ ဝၢၼ်ႈၼမ်ႉမေႃႇလူင် ၸိူဝ်းၼႆႉ။
တၢင်းပွတ်းတွၼ်ႈၸႄႈဝဵင်းသီႇပေႃႉၼႆႉ မီးၸုမ်းယိပ်းၵွင်ႈၵၢင်ႇတူင်ႉၼိုင်ၵႂႃႇမႃးယူႇတႃႇသေႇ မိူၼ်ၼင်ႇ တပ်ႉသိုၵ်း လူင် ပွင်ၸိုင်ႈမၢၼ်ႈ၊ ၸုမ်းသိုၵ်းဢူၺ်းလီပွတ်းႁွင်ႇ TNLA တင်း SSPP၊ သိုၵ်း RCSS ၸဵမ်ၸိူဝ်းၼႆႉ။
